སྲིད་སྐྱོང་སྤེན་པ་ཚེ་རིང་མཆོག་གིས་༧གོང་ས་མཆོག་ལ་མཚན་ཤས་བཟོ་མཁན་ཚོ་རྒྱ་ནག་གི་རྒྱབ་སྐྱོར་བ་ཡིན་པ་དང་ཁོ་ཚོར་ཆབ་སྲིད་ཀྱི་དམིགས་འབེན་ཡོད་སྐོར་འགྲེལ་བརྗོད་གནང་འདུག
ཟླ་འདིའི་ཕྱི་ཚེས་ ༡༣ ཉིན་གྱི་ཕྱི་དྲོ་རྒྱ་གར་རྒྱལ་ས་ལྡི་ལི་རུ་(The Foreign Correspondents’ Club of South Asia) གོ་སྒྲིག་འོག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་དང་རྒྱ་དཀར་ནག་ཞེས་པའི་བརྗོད་གཞི་ཐོག་གསུང་བཤད་གནང་ཡོད་ཅིང་། སྐབས་དེར་ཉེ་ཆར་༧གོང་ས་མཆོག་གི་བརྙན་ཐུང་ཞིག་འབྲེལ་ནས་སྤྱི་ཚོགས་དང་དྲ་ལམ་ཁག་ཏུ་གླེང་སློང་ཤུགས་ཆེན་བྱེད་བཞིན་པའི་སྐོར་ལ་ལན་འདེབས་བྱས་ཡོད་པའི་ནང་དུ། ངས་ཀྱང་དོན་རྐྱེན་འདིའི་ནང་གི་གནོད་སྐྱོན་ཐེབས་ཡུལ་སུ་ཡིན་པར་འདྲི་འདོད་བྱུང་། ཁ་ཤས་ཀྱིས་བུ་ཆུང་དང་ནང་མི་ལ་གནོད་སྐྱོན་ཐེབས་འདུག་ཟེར་མོད། སྐབས་དེའི་མཛད་སྒོའི་རྗེས་སུ་བུ་ཆུང་དང་ཨ་མ་གཉིས་ཀྱིས་སྐད་ཆ་ཡག་པོ་བཤད་ཀྱི་འདུག་པ་མ་ཟད། སྐབས་དེའི་སློབ་ཕྲུག་ ༡༢༠ ལ་དོགས་འདྲི་དང་གནས་ཚུལ་ཅི་ཡང་བྱུང་མེད་པ་བོད་སྐད་གསར་ལམ་གྱི་བཅའ་འདྲི་བརྒྱུད་ནས་མཐོང་ཐུབ།
དངོས་ཡོད་གནས་སྟངས་ཐོག་ནས་༧གོང་ས་མཆོག་ནི་དགུང་ལོ་ ༨༧ ནས་༨༨ ལ་ཕེབས་ཀྱི་ཡོད། ཁྱེད་ཚོས་དགུང་ལོ་༨༨ ཕེབས་ལ་ཉེ་བ་ཞིག་ལ་མཚན་སྨད་འདྲ་མིན་ཞུ་ཐུབ་བམ། ༧གོང་ས་མཆོག་ནི་རྣམ་ཀུན་བདེན་པ་བཞི་ལ་ཉམས་ལེན་བྱེད་མཁན་གྱི་ནང་པའི་དགེ་སློང་ཞིག་རེད། ལོ་མང་པོའི་ཉམས་ལེན་གྱིས་མིག་དང་རྣ་བའི་དབང་བོ་སོགས་ཀྱི་ཚོར་འདུའི་ཞེན་ཆགས་ལས་བརྒལ་ཞིང་། འཇིག་རྟེན་འཁོར་བ་ལས་གྲོལ་ཏེ་གཏིང་ཟབ་མོ་ཉམས་ལེན་བྱེད་བཞིན་ཡོད། ཁ་ཤས་ཀྱིས་སྐུ་གཟུགས་ལ་མཇལ་ནས་ཤུགས་རྐྱེན་ཐེབས་པར་འདོད་ཡོད་ཀྱང་། ཚོར་འདུ་འདི་དག་བརྒལ་ཡོད་པ་རེད། ༧གོང་ས་མཆོག་སྐུ་སྒེར་ངོས་ལ་འདི་འདྲ་བའི་གནད་དོན་ནམ་ཡང་འབྱུང་མི་སྲིད་པ་ཞིག་རེད། མི་མང་གིས་དོན་རྐྱེན་གཅིག་གི་ཐོག་ནས་ཐག་གཅོད་བྱེད་ཐུབ་བམ། དེ་ཡང་གནད་དོན་ཆ་ཚང་བ་མ་རྟོགས་པར་ཐག་གཅོད་བྱེད་ཀྱི་ཡོད། ༧གོང་ས་མཆོག་གི་མི་ཚེ་གང་བོ་བྱམས་བརྩེ་དང་། འཚེ་བ་མེད་པ། འགྲོ་བ་མི་གཅིག་པ་ཡིན་པའི་ཉམས་ལེན་བྱེད་མཁན་ཞིག་རེད།
ཉེ་ཆར་༧གོང་ས་མཆོག་དང་ཕྲུ་གུ་གཉིས་འཐམ་འཁྱུད་བྱས་པའི་གནས་ཚུལ་མི་མང་གིས་མཐོང་ཐུབ། དེ་ནི་ས་གནས་གཞན་དང་། ཁང་པ། ཡུལ་བྱེ་བྲག་པ་ཞིག་ལས་བྱུང་བ་ཞིག་མ་རེད། རྩོད་གཞི་ཅན་དང་གོ་ནོར་ཐེབས་ས་ཅི་ཡང་མ་རེད། ངས་ཁོང་ཚོའི་ལྟ་ཚུལ་ལ་སྐྱོན་བརྗོད་བྱེད་ཀྱི་མེད། དེ་ནི་བརྙན་ཐུང་གཏུབ་ནས་སྒྲིག་བཟོ་བྱས་པ་ཞིག་རེད། ༧གོང་ས་མཆོག་ནི་སྙིང་རྗེའི་བདག་པོ་སྤྱན་རས་གཟིགས་ཀྱི་སྤྲུལ་བ་རེད། གནད་དོན་འདིས་ང་ཚོར་ན་ཟུག་གཏོང་བཞིན་འདུག ཚང་མས་དགོངས་པ་བཞེས་རོགས།
ངས་གནད་དོན་ཚབས་ཆེན་འདིའི་ཐོག་ཏུ་ཆུ་ཚོད་ཏོག་ཙམ་ནས་གཏོང་རྒྱུ་ཡིན། ག་དུས་ཡིན་ཡང་༧གོང་ས་མཆོག་གིས་ཆབ་སྲིད་དབུ་ཁྲིད་རྣམས་དང་མཇལ་འཕྲད་གནང་བཞིན་ཡོད། ངས་༧གོང་ས་མཆོག་གིས་སྲིད་འཛིན་ཁག་ཅིག་གི་དབུ་ལ་ཐུག་ནས་མཇལ་འཕྲད་བྱས་པ་གོ་མྱོང་། དེ་ནི་ནང་པའི་ཚད་མཐོ་བའི་བརྩི་བཀུར་བྱེད་སྟངས་ཤིག་རེད། བླ་ཆེན་རྣམས་ཕན་ཚུན་མཇལ་འཕྲད་སྐབས་དབུ་ཐུག་བྱེད་པ་རེད། ༧གོང་ས་མཆོག་ལ་མཚོན་ན་དེ་དག་རྒྱུན་ལྡན་ཞིག་ཡིན་པས་སྙན་གྲགས་ཡོད་པ་རེད། ལག་འཇུ་བྱེད་པ་དང་། སྣ་ཐུག་བྱེད་པར་དགའ་བོ་ཡོད། ༧གོང་ས་མཆོག་ནེའུ་ཛི་ལན་ཌིར་ཕེབས་སྐབས་སྐུ་མགྲོན་རྣམས་ལ་སྣ་ཐུག་བྱས་པ་རེད། ང་ཡང་དྷ་རམ་ས་ལར་ལོ་༢༥ རིང་བསྡད་པའི་ཉམས་མྱོང་ཡོད་པས་དེ་འདྲ་བྱུང་བཞིན་ཡོད་པ་ཤེས་ཀྱི་ཡོད། ༧གོང་ས་མཆོག་གིས་མཚམས་མཚམས་སུ་འཐམ་འཁྱུད་བྱེད་པ་དང་། སྣ་ལ་འཇུ་བ། དབུ་ཐུག་བྱེད་པ་སོགས་གནང་གི་ཡོད། འདི་དག་ནི་༧གོང་ས་མཆོག་གི་ལྷད་མེད་པའི་བྱམས་བརྩེའི་བརྩི་བཀུར་སྟོན་སྟངས་ཀྱི་རྣམ་པ་ཞིག་རེད།
ད་ཆ་དོན་རྐྱེན་འདིའི་རྐྱེན་བྱས་ཏེ་ཕོག་ཐུག་ཤོར་ཡུལ་སུ་ཆགས་འདུག་གམ། ཨ་མ་དང་ཕྲུ་གུ་གཉིས་ནི་རེད་མི་འདུག ཁོང་ཚོས་མ་འདོད་པའི་རྣམ་འགྱུར་གང་ཡང་བསྟན་མེད། འདིར་ཕོག་ཐུག་ཤོར་ཡུལ་ངོ་མ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་ཆགས་ཡོད། འདི་ག་རེ་བྱས་ནས་བྱུང་བ་རེད་དམ། འདིར་ང་ལ་མཐའ་སྡོམ་གཉིས་ཡོད། དང་པོ་དེ་ང་ཚོས་ཉམས་ཞིབ་བྱས་པ་ལྟར་ན། བརྙན་ཐུང་ཐོག་མར་བསྐྱར་དུ་འགྲེམས་སྤེལ་བྱེད་མཁན་རྒྱ་ནག་གཞུང་ལ་རྒྱབ་སྐྱོར་བྱེད་མཁན་གྲས་ཡིན་པ་ཤེས་རྟོགས་བྱུང་། ཁྱེད་རྣམ་པ་གསར་འགོད་པ་ཡིན་སྟབས་བརྙན་ཐུང་འདི་ཇི་ལྟར་བསྐྱར་དུ་འགྲེམས་སྤེལ་བྱས་པ་དང་། དེ་ཉིད་སུས་བེད་སྤྱོད་གཏོང་རྩིས་བྱེད་ཀྱི་ཡོད་པ་ཞིབ་འཇུག་གནང་རོགས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་དང་མཚན་སྙན་ལ་སྐུར་འདེབས་བྱས་པ་ལ་བརྟེན་ནས་སུ་ལ་ཁེ་ཕན་ཡོད་པ་གསལ་བཤད་བྱེད་མི་དགོས། མཚན་སྨད་ཞུ་རྒྱུའི་ལས་འགུལ་དེའི་ཁྱབ་ཚད་དང་ནུས་པ་ལ་བལྟས་ན། གནད་དོན་འདིའི་ཆབ་སྲིད་ཀྱི་ཕྱོགས་དེར་སྣང་ཆུང་གཏོང་རྒྱུ་མེད། གཉིས་པ་མང་ཚོགས་ངོས་ནས་དོན་རྐྱེན་དེར་ཡི་མ་རངས་པ་བྱུང་མཁན་ཡོད་རིགས་ལ་ཞུ་རྒྱུར། ཁྱེད་རྣམ་པས་དོན་དམ་གྱི་གནས་ཚུལ་ཆ་ཚང་རྟོགས་པར་མཛད་སྒོའི་བརྙན་ཆ་ཚང་གཟིགས་རོགས་ཞེས་ཞུ་རྒྱུ་ཡིན། དེ་ལྟར་གནང་ན་ཁྱེད་ཀྱིས་ད་གཟོད་ཆགས་སེམས་དང་བྱམས་བརྩེ་གང་ཡིན་དབྱེ་བ་འབྱེད་ཐུབ་ངེས་རེད། ཅེས་གསུངས་འདུག
དེ་རིང་བོད་མི་མང་སྤྱི་འཐུས་ལྷན་ཚོགས་ནས་ཡོངས་ཁྱབ་གསལ་བསྒྲགས་སྤེལ་བའི་ནང་། ༧གོང་ས་རྒྱལ་བ་རིན་པོ་ཆེ་མཆོག་གིས་ཆོས་ལུགས་དང་མི་རིགས་དབྱེར་མེད་ཀྱི་ཕྱི་ནང་གི་སྐྱེ་འགྲོ་ཀུན་གྱི་རེ་འདོད་བཞིན་མཇལ་འཕྲད་དང་འཛམ་གླིང་ཞི་བདེ་དང་འགྲོ་བ་མི་ཐེར་འབུམ་བརྒྱད་ལ་བདེ་སྐྱིད་བསྐྲུན་ཐབས་སོགས་རླབས་ཆེ་བའི་མཛད་འཕྲིན་བསྐྱངས་དང་སྐྱོང་བཞིན་ཡོད་པ་གླེང་སློང་བྱས་པ་དང་བསྟུན། རྒྱལ་སྤྱིའི་བརྒྱུད་ལམ་ཆེ་ཁག་དང་། སྤྱི་ཚོགས་ནང་སྐྱེ་བོ་ཚང་མས་འགན་ཁུར་གྱིས་༧གོང་ས་མཆོག་གི་རྣམ་ཀུན་དགོངས་པ་བཞེས་ཕྱོགས་དང་མཛད་སྤྱོད་ལ་རྒྱུས་ལོན་ཐོག་སྒྲོ་སྐུར་མེད་པའི་དངོས་ཡོད་གནས་ཚུལ་ལ་ངེས་པ་རྙེད་ཐུབ་ཐབས་བཟོ་དགོས་པ་གལ་ཆེན་ཆགས་ཡོད། བཙན་བྱོལ་བོད་མིའི་སྒྲིག་འཛུགས་དང་། ལྷག་དོན་༧གོང་ས་མཆོག་ལ་མཚན་སྨོད་ཞུ་མཁན་རྒྱ་ནག་དམར་གཞུང་གིས་དུས་དང་རྣམ་པ་ཀུན་ཏུ་ཕྱི་ནང་གི་བརྒྱུད་ལམ་དང་། གང་ཟག་སྒེར་སོགས་རྣམ་པ་འདྲ་མིན་བེད་སྤྱད་ཀྱིས་རང་རེའི་སྤྱི་ཚོགས་གཏོར་བཤིག་དང་ཉམས་དམས་སུ་གཏོང་རྒྱུའི་སྲིད་བྱུས་ངན་པ་སྤེལ་བཞིན་ཡོད་པས། རྣམ་དཔྱོད་ལྡན་པའི་འཛམ་གླིང་མི་མང་མགོ་སྐོར་གཏོང་ཐབས་བྲལ་ཡང་། སྐབས་རེར་ཉུང་ཤས་ལོག་ལམ་དུ་འཁྲིད་ཀྱི་ཡོད་པའི་སྐབས་བློ་གཟུ་བོར་གནས་པའི་ཕྱི་ནང་མི་རིགས་དང་། ཚོགས་སྡེ་ཁག་བཅས་ནས་གསལ་བཤད་བྱེད་བཞིན་ཡོད་པར་བསྔགས་བརྗོད་ཞུ་རྒྱུ་དང་། དེ་འདྲའི་གནས་ཚུལ་ཡོང་བའི་དུས་སུ་ཚང་མས་གཞན་ཟེར་གཡམ་རྒྱུགས་སུ་མི་འགྲོ་བར་ཕྱི་ནང་གསང་གསུམ་ལ་དོ་སྣང་དང་། བབ་བརླིང་བརྟན་གསུམ་གྱི་སྒོ་ནས་གདོང་ལེན་བྱ་རྒྱུ་གལ་ཆེར་མཐོང་། ཐེངས་འདིའི་༧གོང་ས་མཆོག་གི་མཛད་འཕྲིན་ལ་གོ་བ་ལོག་སྒྲུབ་དང་། དེ་བཞིན་འགྲེལ་བཤད་རང་སྣང་གང་དྲན་ཞིབ་འཇུག་མེད་པའི་བྱུང་རྒྱལ་ལྟ་བུ་བརྒྱུད་ལམ་དུ་སྤེལ་བར་བློ་ཕམ་ཆེན་པོ་བྱུང་།
ཁ་སང་ཕྱི་ཚེས་ ༡༣ ཉིན་དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གིས་དེ་འབྲེལ་བསྒྲགས་གཏམ་ཞིག་སྤེལ་བའི་ནང་། བདག་ཅག་གི་༧སྐྱབས་མགོན་དོན་གྱི་བདག་པོ་ནི་སྐུ་ཚེ་གང་པོར་བདག་བས་གཞན་གཅེས་ཀྱི་བྱང་ཆུབ་ཀྱི་སེམས་རིན་པོ་ཆེ་ལ་ཐུགས་དམ་གྱི་གཙོ་བོར་མཛད་པས། ཐུགས་ལ་དགོངས་རྒྱུ་དང་། གཞན་ལ་གསུང་རྒྱུ་གང་ཡིན་ཀྱང་འཚེ་བ་མེད་པ། གཞན་ལ་ཕན་པ། ལྷག་བསམ་དཀར་བ། གཡོ་སྒྱུ་ངོ་ལྐོག་མེད་པ་དེ་དག་ལས་གཞན་མེད། ཞལ་མཇལ་གསུང་ཐོས་བྱུང་བ་ཙམ་གྱིས་ཀྱང་བྱམས་བརྩེའི་བདག་ཉིད་ཡིན་པའི་ངེས་པ་སྙིང་ནས་འདྲེན། རྒྱུན་དུ་ཕྱི་ནང་གི་མི་ཅི་འདྲ་ཞིག་དང་མཇལ་འཕྲད་གནང་ཡང་། དེ་ལ་འཛེམས་ཟོན་དང་། བག་ཚ་བ་ཅུང་ཟད་ཙམ་མེད་པར་ཡུན་རིང་འདྲིས་པའི་མཛའ་བཤེས་ལྟར་བཀའ་མོལ་ལྷུག་པོར་གནང་བ། བྱམས་སྐྱོང་གནང་བ། སྐབས་འགར་རྩེད་མོའི་ཚུལ་དུ་གཞན་གྱི་ཨོག་ཚོམ་ནས་འཐེན་པ། ག་ག་ཚིལ་གནང་བ། ཞལ་འགྲམ་དང་ཤངས་ཐུག་རེས་མཛད་པ་སོགས་ནི་ནམ་རྒྱུན་གྱི་མཛད་སྟངས་ཤིག་དང་། གཞན་ལ་བཅོས་མིན་གྱི་དགའ་བ་དང་བརྩེ་བ་མཚོན་པའི་གནང་སྟངས་ཤིག་ལས་མ་འདས། མགོན་པོ་གང་ཉིད་ཀྱིས་སྐུ་ཚེ་ཧྲིལ་པོར་འཛམ་གླིང་སྤྱི་དང་བྱེ་བྲག་ལ་ཞི་བདེ་དང་འཆམ་མཐུན་ཡོང་བའི་དོན་དུ་བློས་གཏོང་ཅི་ཙམ་ཞིག་མཛད་ཡོད་པ་ནི་སྐྱེ་བོ་ཕལ་པའི་བློ་ངོར་ཤོངས་མི་ཐུབ་པ་ཙམ་རེད། དེ་ནི་ང་ཚོ་བོད་མི་གཅིག་པུའི་ཞེན་ཁོག་ཙམ་མིན་པར་ཤར་ནུབ་ཀྱི་སྐྱེ་བོ་ས་ཡ་མང་པོས་དགའ་བསུ་དང་། གཟེངས་རྟགས་ཅི་ཙམ་ཕུལ་བ་སོགས་ཀྱིས་མཚོན་ནུས། ད་ལྟ་དགུང་གྲངས་དགུ་བཅུར་ཕེབས་ལ་ཉེ་བ་ཡིན་ཡང་། ད་དུང་ཐུགས་བསྐྱེད་ཞུམ་པ་མེད་པར། ཕྱག་གཡས་གཡོན་ནས་སྐྱོར་བཞིན་ཉིན་ལྟར་མཇལ་ཁ་དང་། བཀའ་ཆོས་རྒྱུན་མ་ཆད་པ་གནང་སྟེ་སེམས་ཅན་མང་པོའི་དོན་མཛད་བཞིན་བཞུགས་པ་ནི་བསམ་ཤེས་ན་འཛམ་བུ་གླིང་པ་སྤྱིའི་བསོད་ནམས་ཞིག་ཏུ་འཁུམ། ད་དུང་ཡང་བསྟན་འགྲོ་སྤྱི་བྱེའི་དོན་དུ་སྐུ་ཚེ་ཞབས་པད་ཡུན་ནས་ཡུན་དུ་བརྟན་པའི་གསོལ་བ་ཕུར་ཚུགས་སུ་འདེབས། ཞེས་གསུངས་འདུག
ཁ་སང་ཕྱི་ཚེས་ ༡༣ ཉིན་དཔལ་ས་སྐྱ་གོང་མ་ཁྲི་ཆེན་མཆོག་གིས་བསྒྲགས་གཏམ་ཞིག་སྤེལ་བའི་ནང་། ཉེ་ལམ་གསར་འགྱུར་བརྒྱུད་ལམ་ཁག་གི་ནང་༧གོང་ས་རྒྱལ་བ་རིན་པོ་ཆེ་མཆོག་གི་ཡང་དག་པའི་གཤིས་རྒྱུད་དང་འབྲེལ་ནས་རྩོད་རྙོག་ཤུགས་ཆེན་བྱུང་བར་བློ་ཕམ་ཆེན་པོ་ཡོད་པ་དང་། ལོ་ངོ་བཅུ་ཕྲག་མང་པོའི་རིང་༧གོང་ས་རྒྱལ་བ་རིན་པོ་ཆེ་མཆོག་གིས་འགྲོ་བ་མིའི་རིགས་ཀྱི་དོན་དུ་སྐུ་ལས་བསྐྱོན་པ་དང་། ཁོང་གིས་བྱམས་བརྩེ་དང་སྙིང་རྗེའི་ཐོག་ནས་བོད་མི་རྣམས་ལ་ལམ་སྟོན་དང་སྲུང་སྐྱོབ་གནང་བ་ཙམ་མིན་པར། འཛམ་གླིང་སྟེང་གི་མི་མང་པོ་ཞིག་ལ་སེམས་སྐུལ་ཐེབས་ཀྱི་ཡོད་པ་རེད། ༧གོང་ས་མཆོག་གིས་བྱང་ཆུབ་སེམས་ཀྱི་སྒོ་ནས་སྙིང་རྗེ་ཆེན་པོས་ཕྱག་ལས་མང་པོ་གནང་ཡོད་པ་དང་། སྐབས་འགར་༧མགོན་པོ་མཆོག་གི་བོད་ཀྱི་རིག་གཞུང་དང་འབྲེལ་ནས་རྣམ་འགྱུར་བཏོན་པ་དང་། བོད་མི་མིན་པའི་མི་རིགས་གཞན་གྱིས་ཁྱད་མཚར་པོ་མཐོང་སྟེ་བརྩི་མཐོང་སྤྲད་ཁག་པོ་ཆགས་ཀྱི་ཡོད་པ་རེད། ༧གོང་ས་རྒྱལ་བ་རིན་པོ་ཆེ་མཆོག་ནི་ངའི་མཐར་ཐུག་གི་སློབ་དཔོན་ཡིན་པ་དང་། ང་རང་དུས་རྟག་ཏུ་༧མགོན་པོ་མཆོག་གི་དྲིན་འོག་ཏུ་གནས་ཡོད། དེ་ཡང་༧གོང་ས་མཆོག་གིས་རྩ་ཆེ་བའི་གསུང་ཆོས་མང་པོ་སྩལ་བ་ཙམ་མིན་པར། དཀའ་ངལ་གང་འདྲ་ཞིག་འཕྲད་རུང་ཁོང་གིས་སྙིང་སྟོབས་དང་གཡོ་བ་མེད་པའི་ཐོག་ནས་དཀའ་ངལ་དེ་དག་གདོང་ལེན་བྱས་པས་ཡིན། མི་ཚང་མས་༧གོང་ས་རྒྱལ་བ་རིན་པོ་ཆེ་མཆོག་ལ་མུ་མཐུད་ནས་དད་གུས་དང་མོས་མཐུན་ལྷད་མེད་བྱ་རྒྱུ་དང་། འབྱུང་འགྱུར་གྱི་ལོ་མང་པོའི་རིང་ཁོང་གིས་མུ་མཐུད་དུ་ང་ཚོར་བྱིན་རླབས་གནང་བའི་སྨོན་ལམ་འདེབས་ཀྱི་ཡིན། ཞེས་གསུངས་ཡོད་འདུག
ཡང་ཕྱི་ཚེས་ ༡༣ ཉིན་དཔལ་༧ཇོ་ནང་རྒྱལ་ཚབ་རིན་པོ་ཆེ་མཆོག་གིས་བསྒྲགས་གཏམ་ཞིག་སྤེལ་བའི་ནང་། ཉེ་ཆར་དད་ལྡན་སློབ་མ་ཞིག་ལ་རྣམ་རྟོག་དང་འཛིན་པ་མེད་པར་ཐུགས་བརྩེ་བ་ཆེན་པོས་མ་ཡིས་བུ་གཅིག་བཞིན་ཞལ་རྩེད་དང་བཅས་བརྩེ་གཟིགས་གནང་བ་དེ་ལ། ལས་སྣང་མ་དག་པ་འགའ་ཞིག་གིས་སོ་སོའི་རང་རྒྱུད་ཀྱི་ཚོར་སྣང་དང་མི་རིགས་ཀྱི་ལུགས་སྲོལ་གཞི་རྩར་བཟུང་ནས་གཞན་ལ་ཚད་འཇལ་བྱས་པའམ་ཡང་ན་ཀུན་སློང་ངན་པས་དང་སྐབས་འཚོལ་སོགས་ཀྱིས་སྤྱི་ཚོགས་དྲྭ་ལམ་འགའ་ཞིག་ཏུ་ལོག་འགྲེལ་བྱེད་བཞིན་འདུག་མོད། དོན་དངོས་ཐོག་དེ་ནི་སེམས་དཔའ་མཆོག་དགུང་གྲངས་བཅུ་དྲུག་ཙམ་ནས་བཟུང་ད་བར་གཞན་དོན་ལག་ལེན་དངོས་ཀྱིས་སྒྲུབ་པར་རྩེ་གཅིག་ཏུ་གཞོལ་ནས་གཞན་དོན་ཁུར་ཁྱེར་གྱི་སྙིང་རྗེ་བཅོས་མིན་དང་། བྱང་ཆུབ་སེམས་མཆོག་ཐུགས་རྒྱུད་ལ་འཁྲུངས་བས་དགྲ་གཉེན་བར་མ་གསུམ་མཉམ་པ་ཉིད་དུ་བརྩེ་གཟིགས་ཀྱི་རང་མདངས་ཕྱི་རུ་མངོན་པའི་རྟགས་མཚན་གྱི་ཁྱད་ཆོས་ཤིག་ཡིན་པ་ལས་གཞན་ཆགས་སྲེད་སོགས་ཀྱི་དྲི་ཙམ་ཡང་མེད་པ་ནི་བརྙན་དེར་ཧྲིལ་བོར་མཇལ་བ་ཙམ་གྱིས་ཤེས་ཐུབ་མོད་ད་དུང་དེ་ལ་ལོག་འགྲེལ་བྱས་པ་འདིས་པདྨ་འདམ་གྱིས་མ་གོས་པ་ལྟར་༧སྐྱབས་མགོན་མཆོག་གི་མཛད་འཕྲིན་དང་ཡོན་ཏན་སོགས་ལ་ཅི་ཡང་མི་གནོད་མོད་རང་ཉིད་ཀྱི་གནས་སྐབས་ཀྱི་དགེ་རྩ་གཅོད་པ་དང་ངན་འགྲོ་སྐྱེ་བའི་རྒྱུ་གསོག་པ་དང༌། སྐྱེ་བུ་དམ་པ་སྐྱོན་མེད་ཡང་དག་ཞིག་ལ་སྐུར་འདེབས་ཀྱི་སྐྱོན་བརྗོད་ཁོ་ན་ལས་མ་འདས་པས་སྤྱི་སྒེར་གྱི་དྲྭ་རྒྱ་སོགས་ལས་ངེས་པར་དུ་ཕྱིར་འཐེན་བྱེད་དགོས་པའི་འབོད་སྐུལ་སྙིང་ནས་ཞུའོ། ཞེས་གསུངས་འདུག
གསར་འགོད་པ། བྱམས་པ་ཚེ་རིང་། བསྟན་འཛིན་ཕུར་བུ།
