ཕྱི་ལོ་ ༢༠༢༣ ཟླ་ ༤ ཚེས་ ༡༣ ཉིན། ལྡི་ལིར་རྟེན་གཞི་བྱས་པའི་ལྷོ་ཨེ་ཤ་ཡའི་གསར་འགོད་མཐུན་ཚོགས་(FCC)ཀྱི་གོ་སྒྲིག་འོག །སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་དང་རྒྱ་ནག །བོད་ཅེས་པའི་བརྗོད་གཞིའི་ཐོག་གསུང་བཤད་དང་། དྲི་བར་དྲིས་ལན་གནང་སྐབས། ཕྱི་ཟླ་ ༢ ཚེས་ ༢༨ ཉིན་སློབ་ཕྲུག་ཁག་ཅིག་ལ་མཇལ་ཁ་སྩལ་སྐབས་ཀྱི་གནས་ཚུལ་ཞིག་ཉེ་ལམ་གསར་འགྱུར་བརྒྱུད་ལམ་དང་། སྤྱི་ཚོགས་དྲ་ལམ་ཁག་ཏུ་གྱར་འགྲེམས་ཕྱིན་པའི་སྐོར་ལ་གསར་འགོད་པ་ཞིག་གིས་དྲི་བར་ལན་འདེབས་གནང་བ་དབྱིན་སྐད་ནས་བོད་བསྒྱུར་ཞུས་པ་གཤམ་གསལ།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཕྲུ་གུ་དེར་མཇལ་ཁ་བསྩལ་བའི་གནས་ཚུལ་དེ་ནི་ཚོར་ཤུགས་ཆེན་པོའི་དྲི་བ་ཞིག་ཆགས་ཡོད། ངས་ཁྱེད་རང་ཚོར་དྲི་བ་ཞིག་འདྲི་རྒྱུ་ཡོད། གནས་ཚུལ་འདིའི་ནང་གནོད་འཚེ་ཕོག་མཁན་ངོ་མ་དེ་སུ་རེད། ཁ་ཤས་ཀྱིས་བུ་དེ་དང་ནང་མི་རེད་ཟེར་གྱི་འདུག ངས་བལྟས་ན་བུ་དེར་སྣང་དག་མི་འདུག ཁོས་མཛད་སྒོའི་རྗེས་ལ་སྐད་ཆ་ཡག་པོ་བཤད་འདུག ཨ་མ་ལགས་དེར་སྣང་དག་མི་འདུག མཛད་སྒོའི་རྗེས་ལ་མོ་རང་གིས་ཀྱང་སྐད་ཆ་ཡག་པོ་བཤད་འདུག མཛད་སྒོར་ཞུགས་མཁན་སློབ་ཕྲུག་ ༡༢༠ ལ་སྡུག་ཡུས་གང་ཡང་མི་འདུག ངས་བོད་པའི་གསར་འགྱུར་བརྒྱུད་ལམ་ཁག་གིས་མཛད་སྒོའི་རྗེས་ལ་བཅར་འདྲི་བྱས་པ་ཚང་མར་ཉན་པ་ཡིན། སྐབས་དེར་གང་ཡང་མི་འདུག དྲ་རྒྱའི་བརྒྱུད་ལམ་ཁག་གི་ཐོག་བཞག་འདུག དོན་དངོས་ཐོག སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་ ༨༧ ལ་ཕེབས་ཡོད་རེད། ཁོང་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་དགེ་སློང་ཞིག་ཡིན་པར་བརྟེན། འཁོར་བའི་འདོད་ཡོན་ལ་ཞེན་ཆགས་སྤངས་ཏེ། སྐུ་ཚེ་ཧྲིལ་པོར་གཏན་བདེའི་གོ་འཕང་དོན་གཉེར་མཛད་བཞིན་ཡོད།
༧གོང་ས་མཆོག་གི་སྐུ་ཚེ་ཧྲིལ་པོར་སྐུ་སྒེར་གྱི་ཚུལ་ཁྲིམས་ཐོག་དོགས་སློང་བྱེད་མཁན་ད་བར་བྱུང་མྱོང་མེད། ནམ་རྒྱུན་༧གོང་ས་མཆོག་གིས་སྐྱོན་བྲལ་གྱི་སྒོ་ནས་བྱམས་བརྩེ་དང་། འཚེ་བ་མེད་པ། འགྲོ་བ་མི་རྣམས་གཅིག་གྱུར་གྱི་འདུ་ཤེས་སོགས་ཁྱབ་སྤེལ་དང་ཉམས་ལེན་གནང་བཞིན་ཡོད་ནའང་། ཉེ་ལམ་མི་མང་འདུ་འཛོམས་སར་ཕྲུ་གུ་ཞིག་གིས་༧གོང་ས་མཆོག་ལ་མཇལ་ཁ་ཞུས་པའི་སྐོར་དེར་མང་ཚོགས་ནང་མཐོང་སྣང་དང་འགྲེལ་བཤད་འདྲ་མིན་བྱུང་འདུག་པ་དང་། དྲང་བདེན་མིན་པའི་སྒོ་ནས་༧གོང་ས་མཆོག་ལ་སྒྲོ་སྐུར་སྣ་ཚོགས་ཤིག་ཞུས་པ་དེས་ཁོང་གི་རྗེས་འཇུག་པ་རྣམས་ཀྱི་སེམས་ཚོར་ལ་དོ་ཕོག་ཆེན་པོ་བྱུང་ཡོད། ང་ཚོར་མཚོན་ན་༧གོང་ས་༧སྐྱབས་མགོན་ཆེན་པོ་མཆོག་ནི་སྙིང་རྗེའི་ལྷ་མཆོག་འཕགས་པ་སྤྱན་རས་གཟིགས་ཀྱི་རྣམ་སྤྲུལ་ཡིན། ཁོང་གི་བྱམས་པ་དང་བརྩེ་བ་ནི་དེ་ཚོའི་རིགས་ལས་རྦད་དེ་བརྒལ་ཡོད། དེས་དངོས་གནས་ང་ཚོར་སེམས་ངལ་བཟོས་བྱུང་། དེ་མཁྱེན་པ་གནང་རོགས། འཆལ་གཏམ་དེ་རིགས་ཀྱིས་ང་ཚོར་སེམས་ངལ་བཟོས་བྱུང་།
༧གོང་ས་མཆོག་གིས་རྣམ་ཀུན་ཞལ་འཛུམ་འཛུམ་ངང་ཆབ་སྲིད་དབུ་ཁྲིད་དང་ཆོས་ལུགས་ཀྱི་དབུ་ཁྲིད། ལས་རིགས་འདྲ་མིན་གྱི་མི་མང་དཀྱུས་མ་ཚོར་མཇལ་འཕྲད་གནང་སྐབས། ལག་འཇུ་དང་། སྣ་གཏུག །འཐམ་པ། དབུ་གཏུག་སོགས་ཀྱི་རྣམ་པས་འཚམས་འདྲི་གནང་གི་ཡོད་པ་དེ་ནི་སྤྱི་ཚོགས་ཀྱི་གོ་གནས་ཇི་ཡིན་ལ་མ་ལྟོས་པར་འགྲོ་བ་མི་སྤྱི་ལ་བྱམས་བརྩེའི་འདུ་ཤེས་གཅིག་གྱུར་འཛིན་བཞིན་པའི་མངོན་རྟགས་ཤིག་ཡིན། ༧གོང་ས་མཆོག་གིས་ཚོགས་འཛོམས་བྱེད་མཁན་ཚོར་སྤྲོ་སྣང་སྤེལ་ཆེད་རྩེད་མཚར་དང་བཞད་གད་སློང་བའང་རྒྱུན་ལྡན་གྱི་གནས་ཚུལ་ཞིག་ཡིན།
དོན་དངོས་བྱུང་རིམ་ནི། གནས་ཚུལ་དེ་ ༢༠༢༣ ཟླ་ ༢ ཚེས་ ༢༨ ཉིན་གཙུག་ལག་ཁང་དུ་བྱུང་བ་ཞིག་དང་། M3M ཐེབས་རྩ་ཁང་གི་མཐུན་འགྱུར་ལ་བརྟེན་ནས་མཐོ་སློབ་མཐར་ཕྱིན་པའི་སློབ་ཕྲུག་ ༡༢༠ མཉམ་ཞུགས་བྱས་འདུག གསར་འགྱུར་འགྱུར་ལམ་ཡང་མཉམ་ཞུགས་བྱས་འདུག ༧གོང་ས་མཆོག་ཚོགས་རར་ཆིབས་བསྒྱུར་གནང་སྐབས། ཕྲུ་གུ་དེས་བེ་ཏའི་འབྲས་བུ་བཀད་དེ་ཕེབས་བསུ་ཞུས་ཡོད། ཐེབས་རྩ་ཁང་ཚོགས་མི་གཉིས་ཀྱིས་མཛད་སྒོའི་ཐོག་གཏམ་བཤད་བྱས་རྗེས། ༧གོང་ས་མཆོག་གིས་བཀའ་སློབ་གནང་ཡོད། བཀའ་སློབ་ཀྱི་གལ་གནད་ཐོག་བགྲོ་གླེང་བྱེད་མཁན་བྱུང་མེད། དེས་སུ་ལའང་ཁེ་ཕན་སྤྲོད་ཐུབ་ཀྱི་མེད་པ་དང་། བརྙན་འཕྲིན་ལྟ་མཁན་གྱི་གྲངས་འབོར་ TRP འཕར་ཐུབ་ཀྱི་མ་རེད་བསམ་ཡོད་པ་འདྲ། དྲི་བར་དྲིས་ལན་གྱི་སྐབས་སུ་དར་མ་གསུམ་གྱིས་དྲི་བ་བཀོད་མཚམས། ཕྲུ་གུ་དེས་༧གོང་ས་མཆོག་ལ་འཐམ་ཆོག་པའི་རེ་འདུན་ཞུས་པར། ༧གོང་ས་མཆོག་གིས་བཅོས་མིན་ལྷད་མེད་ཀྱི་སྤོ་སྤོ་ལྟ་བུའི་རྣམ་འགྱུར་གྱིས་ཕྲུ་གུ་དེར་འཚམས་འདྲི་མཛད་པ་དང་། དེའི་རྗེས་ཕྲུ་གུའི་ཨ་མ་དང་མཇལ་བཅར་བ་རྣམས་ཀྱི་མཐོང་སར་རྩེད་མཚར་གནང་ཡོད།
ཕྲུ་གུ་དེས་༧གོང་ས་༧སྐྱབས་མགོན་ཆེན་པོ་མཆོག་ལ་འཐམ་རྗེས། ༧གོང་ས་མཆོག་གིས། ང་ཚོ་ཚང་མ་འགྲོ་བ་མིའི་ཕུ་ནུ་མིང་སྲིང་གཅིག་པ་རེད། ད་ཆ་ཁྱེད་རང་གིས་ཞི་བདེ་དང་བདེ་སྐྱིད་སྐྲུན་མཁན་གྱི་མི་ཡག་པོ་དེ་ཚོར་ལྟ་དགོས་ཀྱི་རེད། མི་གཞན་གྱི་སྲོག་འཕྲོག་མཁན་གྱི་སྡུག་ཅག་དེ་ཚོའི་རྗེས་སུ་འབྲང་མི་ཉན། མི་དེ་ཚོར་ལྟ་ཉན་གྱི་མ་རེད་ཅེས་བཀའ་གནང་ཡོད་པ་དང་། མཛད་སྒོ་གྲོལ་རྗེས། མ་བུ་གཉིས་ཀས་ཨེ་ཤ་ཡ་རང་དབང་རླུང་འཕྲིན་ཁང་དང་། ནོར་ཝེ་བོད་ཀྱི་རླུང་འཕྲིན་ཁང་གཉིས་ཀྱིས་བཅར་འདྲི་ལ་དང་ལེན་བྱས་ཡོད་པ་དང་། བུ་དེས་ནོར་ཝེ་བོད་ཀྱི་རླུང་འཕྲིན་ཁང་ལ་ལན་འདེབས་བྱེད་སྐབས།༼༧གོང་ས་མཆོག་མཇལ་ཐུབ་པ་དེ་ནི་ངོ་མཚར་ཅན་ཞིག་རེད། བཟང་པོའི་ནུས་མཐུ་དེ་འདྲ་མཐོ་པོ་ཡོད་པའི་མི་ཞིག་མཇལ་ཐུབ་པ་ནི་དངོས་གནས་དྲང་གནས་ཀྱི་ཉམས་མྱོང་རླབས་པོ་ཆེ་ཞིག་རེད། ཁོང་མཇལ་ནས་སེམས་པ་དཔེ་སྐྱིད་པོ་བྱུང་། བཟང་པོའི་ནུས་མཐུ་མང་པོ་ཐོབ་བྱུང་། དེ་ཙམ་ཞིག་མ་རེད། བཟང་པོའི་ནུས་མཐུ་ཐོབ་པ་ཡིན་ན་སེམས་པ་དེ་ལས་ཀྱང་སྐྱིད་པ་དང་། འཛུམ་མདངས་དེ་ཀྱང་མཚར་སྡུག་ལྡན་པ་ཞིག་ཡོང་གི་རེད་བསམ་གྱི་འདུག འདི་དོན་དག་ཡག་པོ་ཞིག་རེད། དངོས་གནས་དྲང་གནས་ཉམས་མྱོང་ཧ་ཅང་ཡག་པོ་ཞིག་བྱུང་༽ཞེས་བརྗོད་ཡོད།
ནོར་ཝེ་བོད་ཀྱི་རླུང་འཕྲིན་ཁང་ལ་བུ་དེའི་ཨ་མས་ལན་འདེབས་བྱེད་སྐབས། ༼ང་ཚོས་དུས་རྒྱུན་༧གོང་ས་ཏཱ་ལའི་བླ་མ་མཆོག་གི་ཐུགས་སྨོན་བྱིན་རླབས་འཐོབ་རྒྱུའི་རེ་བ་འཆང་བཞིན་ཡོད་པ་དེ་རིང་གོ་སྐབས་འདི་བྱུང་སོང་། ལྷག་པར་དུ་ང་དང་ངའི་ནང་མི་མཉམ་དུ་ཡོད། IM Power ལག་རྩལ་སློབ་གཉེར་ཁང་ནས་མཐར་ཕྱིན་པའི་སློབ་མ་ཚང་མའང་མཉམ་དུ་ཡོད། ༧གོང་ས་ཏཱ་ལའི་བླ་མ་མཆོག་གི་ཐུགས་སྨོན་བྱིན་རླབས་ཆ་ཚང་རག་ནས་སྐྱིད་པོ་ཞེ་དྲག་བྱུང་། ཁོང་ཚོགས་རར་ཕེབས་ནས་བཀའ་སློབ་སྩལ་བྱུང་། འཛམ་བུ་གླིང་འདིར་ཞི་བདེ་དགོས་མཁོ་ཡོད་པ་དང་། མི་རེ་ངོ་རེ་ཕུ་ནུ་མིང་སྲིང་ལྟ་བུ་ཚོར་ཐུབ་དགོས་སྐོར་བཀའ་སྩལ་བྱུང་། ང་ལ་ཁོང་གི་བྱིན་རླབས་ཐོབ་པའི་ཚོར་བ་འདི་སྨྲ་བརྗོད་ཀྱི་ཡུལ་ལས་འདས་པ་ཞིག་རེད། ཐུགས་རྗེ་ཆེ་༽ཞེས་བརྗོད་ཡོད།
ང་ཚོས་ཐོག་མའི་ཞིབ་འཇུག་བྱས་པ་ལྟར་ན། དང་ཐོག་ངན་སློང་བྱེད་མཁན་ནི་རྒྱ་ནག་ལ་ཕྱོགས་གཏོགས་བྱེད་པའི་གནས་ཚུལ་ཡོང་ཁུངས་དེ་ཚོ་རེད་འདུག་པས། བརྙན་ཐུང་འདི་བཅད་གཏུབ་ཀྱིས་ཕྱིར་བསྒྲགས་བྱེད་མཁན་དེའི་ཀུན་སློང་ཇི་ཡིན་གསལ་པོ་རེད། ༧གོང་ས་༧སྐྱབས་མགོན་ཆེན་པོ་མཆོག་གི་སྣང་བརྙན་དང་། མཚན་སྙན། མཛད་རྗེས་ལ་དམའ་འབེབས་ཞུས་ནས་ཁེ་ཕན་ལེན་མཁན་དེ་སུ་ཡིན་མིན་འགྲེལ་བཤད་རྒྱག་དགོས་དོན་མི་འདུག ཞིབ་ཚགས་ཀྱིས་བྱུས་འགོད་བྱས་པའི་དམའ་འབེབས་ལས་འགུལ་འདིའི་གཞི་ཁྱོན་དང་ཚད་རིམ་ལ་བལྟས་ན། དོན་རྐྱེན་འདིའི་ཆབ་སྲིད་ཀྱི་ལྟ་ཕྱོགས་དེ་ཡང་སྣང་མེད་དུ་འཇོག་ཐུབ་པ་ཞིག་རེད་མི་འདུག
དོན་རྐྱེན་འདིར་བློ་མི་བདེ་བའི་བསམ་ཚུལ་འཛིན་མཁན་མང་ཚོགས་ཚོས་བརྙན་འཕྲིན་ཆ་ཚང་ལ་གསན་གཟིགས་གནང་སྟེ། ༧གོང་ས་མཆོག་གི་བཀའ་སློབ་ཀྱིས་མཚོན་པའི་མཛད་སྒོའི་ཕྱོགས་ཡོངས་ལ་རྒྱུས་ལོན་གནང་ཐུབ་པ་ཡིན་ན། ཁྱེད་ཅག་གིས་ཆགས་སྲེད་དང་བྱམས་བརྩེ་གཉིས་ཀྱི་དབྱེ་བ་འབྱེད་ཐུབ་པའི་ཡིད་ཆེས་ཡོད། འཛམ་གླིང་འདིར་བརྩི་བཀུར་དང་དགའ་མོས་ཞུ་ཡུལ་གྱི་ཞི་བདེའི་དེད་དཔོན་ཞིག་ལ་མཚན་ཤས་བཟོ་བ་ནི་དྲང་བདེན་མིན། དེས་ཞིབ་འཇུག་འཐུས་ཚང་དང་དཔྱད་སྡོམ་ཐག་གཅོད་ཀྱི་འཁོར་རྒྱ་དོག་པོ་བཟོ་གི་ཡོད།
