ཨེན་ཌི་ཊི་ཝི་ཡིས་༧གོང་ས་རྒྱལ་བ་རིན་པོ་ཆེ་མཆོག་ལ་དགོངས་སེལ་ཞུ་དགོས་པའི་རེ་འདུན་བཏོན། 

བོད་མི་དང་ཕྱི་གླིང་གི་མཁས་དབང་མང་པོས་རྒྱ་གར་དང་རྒྱལ་སྤྱིའི་གསར་ལམ་ཁག་ཅིག་ནས་༧གོང་ས་མཆོག་ལ་གཞི་མེད་མཚན་སྨོད་ཞུ་བཞིན་པ་མཚམས་འཇོག་དང་དགོངས་སེལ་ཞུ་དགོས་པའི་འབོད་སྐུལ་ཞུས་འདུག

ཁ་སང་ཕྱི་ཚེས་ ༢༣ ཉིན་བོད་རིགས་དང་བླངས་ལས་འགུལ་བ་ཁག་ཅིག་གིས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཨེན་ཌི་ཊི་ཝི་ (NDTV) དབུས་ལས་ཁུངས་ཀྱི་མདུན་ཐང་དུ།  ༧གོང་ས་རྒྱལ་བ་རིན་པོ་ཆེ་མཆོག་གིས་རྒྱ་གར་གྱི་བྱིས་པ་ཆུང་ཆུང་ཞིག་ལ་འཐམ་འཁྱུད་བྱས་པའི་གནད་དོན་དང་འབྲེལ་ནས། གནས་ཚུལ་རྫུན་མ་སྤེལ་ཏེ་མཚན་སྨོད་ཞུས་པར་ངོ་རྒོལ་གྱི་ལས་འགུལ་སྤེལ་ཡོད་པ་མ་ཟད། ཨེན་ཌི་ཊི་ཝི་གཙོས་རྒྱ་གར་གྱི་གསར་ཁང་ཁག་ཅིག་གིས་དབུས་ལས་ཁུངས་སུ་ཁ་པར་བཏང་བ་དང་སྦྲགས། གནས་ཚུལ་དེའི་ཐད་ཞིབ་འཇུག་མཐིལ་ཕྱིན་པ་བྱས་ཏེ། ༧གོང་ས་རྒྱལ་བ་རིན་པོ་ཆེ་མཆོག་ལ་དགོངས་སེལ་ཞུ་དགོས་པའི་རེ་འདུན་བཏོན་ཡོད་འདུག

དེའི་ཐད་འཚེ་མེད་ཞི་བའི་ལྟ་གྲུབ་སྦྱོང་བརྡར་བསྟི་གནས་ཁང་གི་ལས་འཆར་འགན་འཛིན་དང་ལས་འགུལ་བ་སྒྲོལ་མ་ལྷ་མོ་ལགས་ཀྱིས། ད་ལན་གྱི་ལས་འགུལ་དེ་ནི་ཚོགས་པ་སྒྲིག་འཛུགས་ཀྱིས་གོ་སྒྲིག་བྱས་པ་ཞིག་མ་ཡིན་པར། མི་སྒེར་ཁག་ཅིག་གིས་དང་བླངས་ཐོག་ནས་སྤེལ་བའི་འཚེ་མེད་ཞི་བའི་ལས་འགུལ་ཞིག་ཡིན་ཞིང་། ད་ལན་གྱི་ལས་འགུལ་སྐབས་ཨེན་ཌི་ཊི་ཝི་ཡི་མདུན་ཐང་དུ་ཁ་རས་ནག་པོ་གྱོན་ནས་སར་བསྡད་དེ་༧གོང་ས་རྒྱལ་བ་རིན་པོ་ཆེ་མཆོག་ལ་དགོངས་སེལ་ཞུ་དགོས་པའི་ལས་འགུལ་སྤེལ་ཡོད་ཅིང་། ཁ་རས་ནག་པོ་གྱོན་པ་ནི་ངག་མེད་སྐྱབས་བཅོལ་བ་ (silenced Refugees) སྟེ། རྒྱ་གར་གྱི་གསར་ཁང་ཁག་ཅིག་གིས་སྐྱབས་བཅོལ་བའི་རེ་འབོད་དང་། ལྟ་ཚུལ་སོགས་སྣང་མེད་དུ་བཞག་པར་མཚོན་གྱི་ཡོད་ཅིང་། ཨེན་ཌི་ཊི་ཝི་སོགས་གསར་ཁང་ཁག་གིས་བཅད་གཏུབ་བྱས་པའི་བརྙན་ཐུང་དེ་དྲ་ལམ་ཁག་ནས་བླང་དགོས་པའི་རེ་འདུན་བཏོན་ཡོད་སྐོར་དང་། དེ་བཞིན་དྲ་ལམ་ཁག་ཏུ་ཨེན་ཌི་ཊི་ཝི་ཡིས་༧གོང་ས་རྒྱལ་བ་རིན་པོ་ཆེ་མཆོག་ལ་དགོངས་སེལ་ཞུ་དགོས་(#NDTVapologisetoDalailama) ཞེས་བྲིས་ནས་པར་རིས་སོགས་འགྲེམ་སྤེལ་བྱས་ཡོད་པ་མ་ཟད། གསར་ཁང་དེའི་ཁ་པར་དང་གློག་བརྙན་སོགས་སུའང་ཡིག་ངག་གཉིས་ཀྱི་ཐོག་ནས་དགོངས་སེལ་ཞུ་དགོས་པའི་རེ་འདུན་བཏོན་ཡོད་སྐོར་སོགས་འགྲེལ་བརྗོད་གནང་བྱུང་།

ཟླ་འདིའི་ཕྱི་ཚེས་ ༢༡ ཉིན་མོམ་བྷེར་ཡོད་པའི་བོད་མི་ཁག་ཅིག་གིས་རྒྱ་གར་གྱི་གློག་བརྙན་འཁྲབ་སྟོན་མ་ཀང་གྷ་ན་རཱ་ན་ཌི་ཡི་ཡིག་ཚང་གི་མདུན་ཐང་དུ་ཚང་འཛོམས་བགྱིས་ནས།  མོས་༧གོང་ས་རྒྱལ་བ་རིན་པ་ཆེ་མཆོག་ལ་མཚན་སྨོད་བྱེད་མཚམས་བཞག་སྟེ། དགོངས་སེལ་ཞུ་དགོས་པའི་ངོ་རྒོལ་སྐད་འབོད་བྱས་ཡོད་པ་ལྟར། ཟླ་འདིའི་ཕྱི་ཚེས་ ༢༡ ཉིན་མོས་སྒེར་གྱི་ཨིན་སི་ཌ་གྷ་རམ་དུ། ནང་པ་མང་པོ་ཞིག་གིས་ངའི་ཡིག་ཚང་གི་ཕྱི་རོལ་དུ་ངོ་རྒོལ་བྱེད་ཀྱིན་འདུག ང་ལ་མི་གཞན་སུ་ལའང་གནོད་འཚེ་གཏོང་བའི་སེམས་འདུན་མེད་པར། ༧གོང་ས་རྒྱལ་བ་རིན་པོ་ཆེ་མཆོག་དང་བྷའེ་ཌན་གྱི་སྐུ་པར་དེ་རྩེད་མཚར་དུ་བཞག་པ་ཞིག་ཡིན། ངས་སྐུ་ཚེ་གང་བོར་སྤྱི་ཚོགས་ཞབས་ཞུ་ཡི་སླད་དུ་ཕྱག་ལས་གནང་མཁན་༧གོང་ས་རྒྱལ་བ་རིན་པོ་ཆེ་མཆོག་དང་། ནང་པ་སངས་རྒྱས་པའི་ཆོས་འགྲེལ་ཁག་ལ་དད་པ་ཆེན་པོ་བྱེད་ཀྱི་ཡོད། ཅེས་བརྗོད་ནས་གསལ་བཤད་བྱས་ཡོད་འདུག དེ་བཞིན་རྒྱ་གར་གྱི་གློག་བརྙན་འཁྲབ་སྟོན་པ་ཤེ་རཱ་ཌ་ཨར་ཡ་དང་། དེ་བཞིན་ཡུ་ཊུ་ཕུའི་བརྙན་བཤད་པ་  (youtuber) ཨ་ཀ་ཤི་ཨ་ཤོག་གུབ་ཌ་ (Akassh Ashok Gupta) སོགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་དགོངས་སེལ་ཞུས་ཡོད་འདུག

དེ་བཞིན་ཟླ་འདིའི་ཕྱི་ཚེས་ ༡༩ ཉིན་༧གོང་ས་མཆོག་ལ་མཚན་སྨོད་བྱས་པའི་གནད་དོན་ཐད་རྒྱ་གར་དབུས་གྲངས་ཉུང་མི་རིགས་ཀྱི་ལྷན་ཁང་གིས་ཕྱི་དྲིལ་བློན་ཆེན་ཨ་ནུ་སིང་ཐ་གུར་མཆོག་གི་མཚན་ཐོག་ཏུ་ཞུ་ཡིག་ཅིག་ཕུལ་བའི་ནང་། ཕྱི་ལོ་ ༢༠༢༣ ཟླ་ ༢ ཚེས་ ༡༨ ཉིན་བཞུགས་སྒར་དྷ་སའི་མཛད་སྒོ་ཞིག་གི་སྐབས་༧གོང་ས་མཆོག་གིས་བུ་ཕྲུག་ཞིག་ལ་འཐམ་འཁྱུད་བྱས་པའི་སྐོར་གསར་ལམ་ཁག་ནས་ལོག་འགྲེལ་བྱས་པའི་རྐྱེན་གྱིས། སྤྱི་ཚོགས་ཁྲོད་དུ་གནད་དོན་ཚབས་ཆེན་ཞིག་ཏུ་གྱུར་ཡོད་པ་མ་ཟད། གནད་དོན་དེས་ནང་པའི་སྤྱི་ཚོགས་ནང་དུ་རྨ་ཁ་ཆེན་པོ་ཞིག་བཟོས་ཡོད་ལ། ཟླ་འདིའི་ཕྱི་ཚེས་ ༡༤ དང་ཕྱི་ཚེས་ ༡༧ ཉིན་ལ་དྭགས་རང་སྐྱོང་ཁུལ་གྱི་མི་མང་དང་ས་གནས་གྲོས་ཚོགས་ཀྱིས་༧གོང་ས་མཆོག་ལ་མཚན་སྨོད་བྱས་པའི་གནད་དོན་སྐོར་ལ་ངོ་རྒོལ་བྱས་ཤིང་། ད་ལྟའི་ཆར་གནད་དོན་དེའི་རྐྱེན་གྱིས་ཨ་རུ་ན་ཅལ་དང་། ཨ་སམ། འབྲས་ལྗོངས། ཧི་མ་ཅལ། ནུབ་བྷང་གྷལ། ཀར་ན་ཊ་ཀ  ཅན་ཌི་གྷར། ཇཱ་མུ། གྷོ་བ། ལྡི་ལི་སོགས་ཀྱི་ནང་དུ་ངོ་རྒོལ་བྱེད་བཞིན་འདུག ཟླ་གཉིས་ཙམ་སྔོན་ལ་བྱུང་བའི་གནད་དོན་ཞིག་གསར་ལམ་ཁག་གིས་བེད་སྤྱོད་ལོག་པ་བཏང་ནས་༧གོང་ས་རྒྱལ་བ་རིན་པོ་མཆོག་ལ་མཚན་སྨོད་ཞུས་པ་ཞིག་ཡིན་པ་གསལ་བོ་རེད། རྒྱ་གར་གྱིས་ཆོས་ལུགས་ཚང་མའི་བླ་མར་གུས་བཀུར་བྱེད་པའི་སྲོལ་རྒྱུན་བཟང་པོ་ཡོད་ཅིང་། ལྷན་ཁང་གིས་ཀྱང་གསར་ལམ་ཁག་གིས་གནད་དོན་དེའི་ཐོག་གཞི་མེད་སྙོན་འཛུགས་བྱེད་པར་སྐྱོན་བརྗོད་ཤུགས་ཆེན་བྱེད་ཀྱི་ཡོད་ལ། གསར་ལམ་ཁག་གིས་ཆོས་ལུགས་ཀྱི་དབུ་ཁྲིད་རྣམས་ལ་གཞི་མེད་སྙོན་འཛུགས་བྱས་པར་ཚུལ་དང་མཐུན་པའི་སྒོ་ནས་གནད་དོན་གསལ་ཁ་བཟོ་བར་འབོད་སྐུལ་བྱེད་ཀྱི་ཡོད། ཞེས་གསུངས་འདུག་ལ།  དེ་བཞིན་འཛམ་གླིང་གི་མཐོ་སློབ་འདྲ་མིན་གྱི་སློབ་དཔོན་ཁག་ཅིག་གིས་༧གོང་ས་མཆོག་ལ་མཚན་སྨོད་བྱས་པའི་གནད་དོན་ཐད་གསལ་བསྒྲགས་ཤིག་སྤེལ་ཡོད་པའི་ནང་། ང་ཚོས་བོད་གཞིས་བྱེས་གཉིས་ཀྱི་བོད་མི་ཡོངས་ལ་རྒྱབ་སྐྱོར་བྱས་ཏེ། ༧གོང་ས་མཆོག་ལ་གཞི་མེད་སྙོན་འཛུགས་བྱེད་བཞིན་པར་ངོ་རྒོལ་བྱེད་ཀྱི་ཡོད་ཅིང་། འཛམ་གླིང་གི་གསར་ལམ་ཁག་ཚང་མར་གནས་ཚུལ་དྲང་བདེན་དང་ཕྱོགས་སུ་མ་ལྷུང་ཆེད་གནད་དོན་དབྱེ་ཞིབ་ཡག་པོར་བྱེད་དགོས། ཞེས་འཁོད་ཡོད་འདུག

ཁ་སང་ཕྱི་ཚེས་ ༢༣ ཉིན་མོན་རྟ་དབང་དང་། འབུམ་སྡེ་ལ། སྡེ་རིང་བཅས་སུ་དུས་གཅིག་ལ་ངོ་རྒོལ་སྐད་འབོད་ཀྱི་ལས་འགུལ་སྤེལ་ཡོད་པ་དང་།  དེ་བཞིན་ལ་དྭགས་ཁུལ་དང་། ལྷོ་ཕྱོགས་དང་ལྡི་ལི། དྷ་རམ་ས་ལ། སྤི་ཏི། དབྱིན་ཡུལ་དང་སུད་སི། ཧྥ་རན་སི། ཨོ་གླིང་། ཨ་རི། ཁེ་ན་ཌ་སོགས་སུ་བོད་རིགས་དང་ནང་པ་སྟོང་ཕྲག་མང་པོས་ངོ་རྒོལ་སྐད་འབོད་བྱས་ཏེ། གསར་ཁང་དང་མི་སྒེར་ཁག་གིས་༧མགོན་པོ་གང་ཉིད་ལ་མཚན་སྨོད་ཞུ་མཚམས་བཞག་སྟེ། དངོས་ཡོད་ཀྱི་གནས་སྟངས་གསལ་སྟོན་བྱ་དགོས་པའི་རེ་འདུན་ཡང་བཏོན་ཡོད་འདུག

གསར་འགོད་པ། བྱམས་པ་ཚེ་རིང་། དཔལ་ལྡན།