ཧྥ་རན་སིའི་གྲོས་ཚོགས་གོང་མའི་སྐུ་ཚབ་ཚོགས་ཆུང་ཞིག་གིས་བཞུགས་སྒར་རྒྱལ་བའི་ཕོ་བྲང་དུ་༧གོང་ས་མཆོག་ལ་མཇལ་བཅར་ཞུས་ཡོད་པ་དང་སྐབས་དེར་མགོན་པོ་གང་ཉིད་ནས་ང་ཚོ་ཚང་མ་འགྲོ་བ་མི་གཅིག་པ་ཡིན་པའི་འདུ་ཤེས་འཛིན་དགོས་ཞེས་བཀའ་སློབ་བསྩལ་འདུག
ཟླ་འདིའི་ཕྱི་ཚེས་ ༢༠ ནས་ཉིན་གྲངས་ལྔའི་རིང་ཧྥ་རན་སིའི་གྲོས་ཚོགས་གོང་མའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་རམ་ས་ལ་ཁུལ་དུ་འཚམས་གཟིགས་སུ་ཕེབས་ཡོད་པ་ལྟར། དེ་རིང་ཕྱི་ཚེས་ ༢༤ ཉིན་བཞུགས་སྒར་རྒྱལ་བའི་ཕོ་བྲང་དུ། ཧྥ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ཇེ་ཁེ་ལིན་ (Jacqueline Eustache-Brinio) མཆོག་དང་། ཧྥརན་སིའི་གྲོས་ཚོགས་གོང་མིའི་འཐུས་མི་ལྕམ་སྐུ་ཨེལ་སེ་ཇོ་སེ་ཧྤི་ (Else Joseph) ལགས་དང་། ཧྥ་རན་སིའི་གྲོས་ཚོགས་གོང་མིའི་འཐུས་མི་སྐུ་ཞབས་ཨུ་ལི་ཝིར་རི་ཌི་མན་ (Olivier Rietmann) ལགས། ལས་བྱེད་སྐུ་ཞབས་ཐེ་རེ་མུ་ནིར་ (Thierry Munier) ལགས་བཅས་ཚོགས་མི་བཞི་ལས་གྲུབ་པའི་སྐུ་ཚབ་ཚོགས་ཆུང་ཞིག་གིས། ༸གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་འདུག
སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གིས། ང་ཚོས་འཛམ་གླིང་ཞི་བདེ་ལེགས་གྲུབ་ཡོང་བར་བསམ་བློ་གཏོང་དགོས་ཀྱི་འདུག དཀའ་ངལ་གྱི་འབྱུང་ཁུངས་གཅིག་ནི་ངའི་རྒྱལ་ཁབ་དང་། ངའི་ཆོས་ལུགས་ཀྱི་དབྱེ་འབྱེད་ལས་འབྱུང་གི་ཡོད། ད་ལྟའི་དུས་ལ་ང་ཚོས་འགྲོ་བ་མི་གཅིག་པ་ཡིན་པར་བསམ་བློ་གཏོང་དགོས་ཀྱི་འདུག འཛམ་གླིང་གི་མི་གྲངས་ཐེར་འབུམ་བདུན་བརྒྱད་ཡོད་པ་ཚང་མ་གཅིག་པ་རེད། ངོས་རང་ཞོགས་པ་ཡར་ལངས་དུས་ནས་ང་ཚོ་ཚང་མ་འགྲོ་བ་མི་གཅིག་པར་བསམ་བློ་གཏོང་གི་ཡོད། ང་ཚོ་ཚང་མར་བདེ་སྐྱིད་ཀྱི་མི་ཚེ་དགོས་ཀྱི་ཡོད། ང་ཚོ་ལྷན་སྐྱེས་ཀྱི་བྱམས་བརྩེ་ཡོད་པ་ཞིག་རེད། ཡིན་ནའང་། ང་ཚོ་ཚོགས་པའི་ནང་དུ་ཞུགས་རྗེས་དབྱེ་འབྱེད་བྱེད་རྒྱུ་བྱུང་བ་རེད། རྒྱལ་ཁབ་དེ་དང་འདི། ཆོས་ལུགས་དེ་དང་འདི། འདི་ནི་དབྱེ་འབྱེད་ཀྱི་དཀའ་ངལ་འབྱུང་བའི་རྩ་བ་རེད། ཅེས་གསུངས་སོང་།
དེ་བཞིན་ཟླ་འདིའི་ཕྱི་ཚེས་ ༢༡ ཉིན་བོད་མི་མང་སྤྱི་འཐུས་ལྷན་ཁང་དུ། སྤྱི་འཐུས་ཚོགས་གཙོ་བསོད་ནམས་བསྟན་འཕེལ་མཆོག་དང་། ཚོགས་གཞོན་སྒྲོལ་མ་ཚེ་རིང་མཆོག་གི་དབུས་སྤྱི་འཐུས་རྒྱུན་ལས་རྣམས་ཀྱིས་ཧྥ་རན་སིའི་སྐུ་ཚབ་ཚོགས་ཆུང་དང་མཇལ་འཕྲད་གནང་ཡོད་འདུག
སྐབས་དེར་བོད་མི་མང་སྤྱི་འཐུས་ཚོགས་གཙོ་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་དང་ཧྥ་རན་སིའི་མི་མང་བར་དུས་ཡུན་རིང་པོར་དམིགས་བསལ་གྱི་འབྲེལ་བ་ཡོད་པས། བོད་དང་ཧྥ་རན་སིའི་བར་འབྲེལ་བ་དམ་ཟབ་བྱུང་ཡོད་པའི་སྐོར་དང་། ཐེངས་འདིར་ཧྤ་རན་སི་གྲོས་ཚོགས་གོང་མའི་འཐུས་མི་རྣམས་བོད་མི་མང་སྤྱི་འཐུས་དང་མཉམ་དུ་མཇལ་འཛོམས་བྱུང་བ་དེས་བོད་དང་ཧྤ་རན་སི་གྲོས་ཚོགས་གཉིས་ཀྱི་འབྲེལ་བའི་ཐོག་ནས་ལོ་རྒྱུས་རང་བཞིན་ལྡན་པ་ཞིག་ཆགས་ཀྱི་ཡོད་སྐོར་དང་། དེ་བཞིན་ཧྥ་རན་སི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ཇེ་ཁེ་ལེན་ཨུ་ས་ཊ་ཆི་བྷི་རི་ནའོ་མཆོག་ཨ་རིའི་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པའི་ཐོག་མཉམ་ཞུགས་གནང་ཡོད་པ་དང་། གྲོས་ཚོགས་འཐུས་མི་རྣམ་པས་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞེས་གསུངས་འདུག
བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས། ཐེངས་འདིར་ཧྥ་རན་སི་གྲོས་ཚོགས་གོང་མའི་སྐུ་ཚབ་ཚོགས་ཆུང་བོད་མིའི་སྒྲིག་འཛུགས་སུ་ཕེབས་པ་དེས་བོད་དོན་ལ་གདུང་སེམས་མཉམ་སྐྱེད་གནང་བ་མཚོན་གྱི་ཡོད་པ་དང་། བོད་རྒྱའི་དཀའ་རྙོག་སེལ་བར་བོད་མི་རྣམས་ལ་སེམས་ཤུགས་སྤར་ངེས་ཡིན་སྐོར་དང་། འཛམ་གླིང་གི་གནམ་གཤིས་འགྱུར་ལྡོག་ཐོག་བོད་ཀྱི་ཁོར་ཡུག་གི་གལ་གནད་དང་། ཧྥ་རན་སི་གྲོས་ཚོགས་འཐུས་མི་རྣམས་ཀྱིས་ཧྤ་རན་སི་གཞུང་ནས་བོད་ཀྱི་ཁོར་ཡུག་གི་གལ་གནད་ཐོག་ཞིབ་འཇུག་གི་སྙན་ཐོ་ཞིག་འདོན་དགོས་བའི་འབོད་སྐུལ་ཞུ་དགོས་སྐོར་དང། བོད་ཀྱི་བྱིས་པ་མང་པོ་རྒྱ་གཞུང་གི་གཏན་འཇགས་སློབ་གྲྭར་བཙན་བཅུག་བྱས་ནས་རྒྱ་བསྒྱུར་སློབ་གསོ་སྤེལ་བའི་ཛ་དྲག་གི་གནས་སྟངས་སྐོར་། དེ་བཞིན་བོད་ཀྱི་གནད་དོན་དེ་རྒྱལ་སྤྱིའི་གནད་དོན་ཞིག་ཏུ་ངོས་འཛིན་བྱེད་དགོས་སྐོར་སོགས་གསུངས་འདུག
གསར་འགོད་པ་བྱམས་པ་ཚེ་རིང་གིས་བོད་མིའི་སྒྲིག་འཛུགས་ཀྱི་དྲ་བ་སོགས་ནས་བསྡུས།
