སྲིད་སྐྱོང་མཆོག་ནས་རྒྱ་ནག་གཞུང་གིས་དམིགས་ཡུལ་ཡོད་པའི་ཐོག་ནས་བོད་ཀྱི་སྐད་ཡིག་དང་། ཆོས་ལུགས། རིག་གཞུང་། ཁོར་ཡུག་བཅས་རྩ་གཏོར་གཏོང་བའི་སྲིད་ཇུས་ལག་བསྟར་བྱེད་བཞིན་ཡོད་པས་བོད་དང་བོད་མིའི་ངོ་བོ་མཚོན་བྱེད་ཡོད་ཚད་ག་ལེར་ཉམས་རྒུད་དུ་འགྲོ་བཞིན་ཡོད་སྐོར་གསུངས་འདུག
ཟླ་འདིའི་ཕྱི་ཚེས་ ༢༡ ནས་ཉིན་གྲངས་ ༡༩ རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དབྱིན་ཡུལ་དང་། ནོར་ཝེ། ཌེན་མག འཇར་མན་བཅས་ནང་དུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༢༤ ཉིན་དབྱིན་ཡུལ་གྱི་རྒྱལ་ས་ལོན་ཌོན་དུ་རྟེན་གཞི་བྱས་ཡོད་པའི་དམངས་གཙོའི་གླེང་སྟེགས་(The Democracy Forum)་ཚོགས་པའི་གོ་སྒྲིག་འོག རྒྱ་གཞུང་གིས་ལོ་ངོ་ ༧༢ རིང་བོད་དུ་མི་སེར་སྤེལ་བའི་དབང་བསྒྱུར་བྱས་པ་ཞེས་པའི་དྲ་ལམ་ཚོགས་འདུ་ཞིག་འཚོགས་འདུག ཚོགས་ཐོག་ཏུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། དབྱིན་ཡུལ་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཁི་རི་སི་ལོ་( Chris Law) ལགས། སི་ཁོ་ཌི་ཤི་ཧི་མ་ལ་ཡ་ཞིབ་འཇུག་ལྟེ་གནས་ཁང་གི་འགན་འཛིན་མར་ཌིན་མིལ་སི་(Martin Mills) ལགས། ཝི་སི་ཌི་མན་སི་ཌིར་གཙུག་ལག་སློབ་གླིང་གི་སློབ་དཔོན་ཌི་བྷེ་ཤི་ཨ་ནན་ཌི་(Dibyesh Anand)ལགས། དམངས་གཙོའི་གླེང་སྟེགས་ཚོགས་པའི་ཚོགས་གཙོ་ལོར་ཌི་ཆིར་ལི་སི་བྷི་ར་སི་(lord Charles Bruce)་ལགས། དམངས་གཙོ་གླེང་སྟེགས་ཚོགས་པའི་ཚོགས་གཞོན་བྷེ་རི་གྷར་ཌི་ནར་(Barry Gardiner)་ལགས། ཐེངས་འདིའི་གཙོ་སྐྱོང་གནང་མཁན་རྩོམ་པ་པོ་དང་བྷི་བྷི་སིའི་གསར་འགོད་པ་ཟུར་པ་ཧུམ་ཧྤེ་རི་(Humphrey Hawksley)ལགས་བཅས་མཉམ་ཞུགས་གནང་ཡོད་འདུག
སྐབས་དེར་སྲིད་སྐྱོང་མཆོག་གིས་རྒྱ་ནག་གཞུང་གིས་ལོ་ངོ་ ༧༢ རིང་བོད་དུ་མི་སེར་སྤེལ་བའི་དབང་བསྒྱུར་བྱས་པའི་འབྲས་བུ་ནི་རང་དབང་ཁང་པའི་སྙན་ཐོའི་ནང་དུ། བོད་ནི་འཛམ་གླིང་སྟེང་གི་ཆེས་རང་དབང་མེད་པའི་རྒྱལ་ཁབ་ཅིག་ཏུ་བཏོན་ཡོད་པ་ལྟར། རྒྱ་གཞུང་གིས་དམིགས་ཡུལ་ཡོད་པའི་ཐོག་བོད་ཀྱི་སྐད་ཡིག་དང་། ཆོས་ལུགས། རིག་གཞུང་། ཁོར་ཡུག་བཅས་རྩ་གཏོར་གཏོང་བའི་སྲིད་ཇུས་ལག་བསྟར་བྱེད་བཞིན་ཡོད་པས། བོད་དང་བོད་མིའི་ངོ་བོ་མཚོན་བྱེད་ཡོད་ཚད་ག་ལེར་ཉམས་རྒུད་འགྲོ་བཞིན་ཡོད་ཅེས་གསུངས་འདུག
ཐེངས་འདིའི་སྲིད་སྐྱོང་མཆོག་གི་གཞུང་འབྲེལ་ཕྱོགས་ཕེབས་སྐབས་སུ་སི་ཀོ་ཌ་ལན་ཌི་གཞུང་གི་མཐོ་རིམ་མི་སྣ་དང་། གྲོས་ཚོགས་འཐུས་མི། བོད་དོན་རྒྱབ་སྐྱོར་བ། གྲོས་ཚོགས་ཀྱི་ཕྱི་འབྲེལ་དང་། འགྲོ་བ་མིའི་ཐོབ་ཐང་། ཆོས་དད་རང་དབང་བཅས་ཀྱི་ལས་དོན་ཚོགས་ཆུང་གི་ཚོགས་མི་སོགས་དང་མཇལ་འཕྲད་གནང་རྒྱུ་མ་ཟད། དེ་རིང་ཕྱི་ཚེས་ ༢༥ ཉིན་དབྱིན་ཡུལ་གྲོས་ཚོགས་འོག་མའི་འཐུས་མི་དང་། གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་ལྕམ་ཨ་ལི་སི་ཡ་ཀན་སི་(Alicia Kearns) ལགས་དང་ལྷན་མཇལ་འཕྲད་གནང་ཡོད་པ་དང་། དེ་བཞིན་དབྱིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་གྲོས་ཚོགས་འཐུས་མིའི་རྒྱལ་སྤྱིའི་ཆོས་དད་རང་དབང་རྒྱབ་སྐྱོར་ཚོགས་པའི་གོ་སྒྲིག་འོག་དབྱིན་ཡུལ་གྲོས་ཚོགས་སུ་གསུང་བཤད་གནང་གི་ཡོད་འདུག
དེ་བཞིན་ཕྱི་ཚེས་ ༢༦ དང་ ༢༧ ཉིན་སྲིད་སྐྱོང་མཆོག་གིས་ཝེས་མིན་ཊར་གཙུག་ལག་སློབ་གཉེར་ཁང་ (Westminster University) དང་། ཨེ་ཤི་ཡ་སི་ཀོ་ཌ་ལན་ཌི་བསྟི་གནས་ཁང་ (Asia Scotland Institute)། ཨཱ་བྷིར་ཌིན་གཙུག་ལག་སློབ་གཉེར་ཁང་ (Aberdeen University) བཅས་སུ་གསུང་བཤད་གནང་རྒྱུ་ཡིན་པ་དང་། དེ་བཞིན་གཞུང་ཁོངས་མིན་པའི་ཚོགས་པ་དང་། བསམ་མཛོད་བསྟི་གནས་ཁང་། འགྲོ་བ་མིའི་ཐོབ་ཐང་ཚོགས་པ། ནང་པའི་ཆོས་ཚོགས། གསར་འགོད་པ། བོད་རིགས་མི་མང་བཅས་ལ་ཐུག་འཕྲད་དང་གསུང་བཤད་གནང་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་།
