རྒྱ་དཀར་ནག་གི་རྒྱལ་སྲུང་བློན་ཆེན་གཉིས་ཐུག་འཕྲད་བྱས་ཏེ་ས་མཚམས་རྩོད་རྙོག་སྐོར་གླེང་སློང་བྱ་རྒྱུ་ཡིན་སྐོར་རྗོད་ཀྱིན་འདུག
རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། སང་ཉིན་དང་གནངས་ཉིན་བཅས་ཉིན་གྲངས་གཉིས་རིང་རྒྱ་གར་གྱི་རྒྱལ་ས་ལྡི་ལི་གསར་པ་རུ་འཚོགས་གཏན་ཁེལ་བའི་ཧྲང་ཧེ་མཉམ་ལས་ཁེ་འདུས་ཚོགས་པའི་ (SCO)ཚོགས་འདུ་དང་འབྲེལ། དེ་རིང་རྒྱ་ནག་གི་རྒྱལ་སྲུང་བློན་ཆེན་ལི་ཧྲན་ཧྥོ་(li shangfu) ཟེར་བ་རྒྱ་གར་དུ་ཡོང་ནས། རྒྱ་གར་གྱི་རྒྱལ་སྲུང་བློན་ཆེན་ར་ཇི་ན་ཐི་སིན་ (rajnath singh)ལགས་དང་ཐུག་འཕྲད་བྱ་རྒྱུ་ཡིན་འདུག
སྤྱིར་ཧྲང་ཧེ་མཉམ་ལས་ཁེ་འདུས་ཚོགས་འདུའི་སྟེང་། རྒྱ་དཀར་ནག་གི་གཙོས་ཨུ་རུ་སུ་དང་ཨེ་རན་སོགས་འཛམ་གླིང་རྒྱལ་ཁབ་ ༩ ཡི་རྒྱལ་སྲུང་བློན་ཆེན་རྣམས་ལྷན་འཛོམས་ཀྱིས། རྒྱལ་ཁབ་ཕན་ཚུན་བར་གྱི་ས་ཁུལ་བདེ་འཇགས་དང་ཞི་བདེ། འཇིགས་རྒོལ་དྲག་སྐུལ་ལ་མཉམ་འབྲེལ་ཁ་གཏད་གཅོག་ཐབས། དེ་བཞིན། ཕྱོགས་ཡོངས་ནས་རྒྱལ་ཁབ་དེ་དག་བར་གྱི་འབྲེལ་ལམ་སྤྱི་གོང་མཐོར་གཏོང་ཐབས་སོགས་ཀྱི་སྐོར་ལ་གླེང་སློང་བྱ་རྒྱུ་ཡིན་ཞིང་། དམིགས་བསལ་རྒྱ་དཀར་ནག་གི་བློན་ཆེན་གཉིས་ཚོགས་འདུའི་སྔོན་ནས་ཐུག་འཕྲད་ཀྱིས། རྒྱལ་ཁབ་གཉིས་ཀྱི་ས་མཚམས་རྩོད་རྙོག་གི་གཙོས་གནད་དོན་ཁག་ཅིག་གི་ཐོག་གླེང་མོལ་བྱ་རྒྱུ་ཡིན་པ་དབྱེ་ཞིབ་པས་བརྗོད་འདུག
ད་རེས་རྒྱ་ནག་གི་རྒྱལ་སྲུང་བློན་ཆེན་ལི་ཧྲན་ཧྥོ་ཟེར་བ། ཕྱི་ལོ་ ༢༠༢༠ ལོར་གྷ་ཝན་ལུང་གཤོངས་སུ་རྒྱ་དཀར་ནག་གཉིས་ཀྱི་དམག་མིའི་བར་གདོང་ཐུག་བྱུང་རྗེས། རྒྱ་གར་ནང་ཡོང་བ་ཐོག་དང་པོ་ཆགས་ཀྱི་ཡོད་པ་དང་། ཟླ་འདིའི་ཕྱི་ཚེས་ ༢༤ ཉིན་ལ་དྭགས་ཀྱི་ཆུ་ཤུལ་ཁུལ་དུ་རྒྱ་དཀར་ནག་གཉིས་བར་ས་མཚམས་རྩོད་རྙོག་དང་འབྲེལ་བའི་གྲོས་མོལ་ཐེངས་ ༡༨ པ་བྱས་ཡོད་ཀྱང་གྲུབ་འབྲས་གང་ཡང་བྱུང་མེད་པ་དང་། ད་རེས་རྒྱ་གར་ཕྱོགས་ནས་རྒྱལ་སྲུང་བློན་ཆེན་གཉིས་ཀྱི་ཐུག་འཕྲད་བརྒྱུད་ས་མཚམས་རྩོད་རྙོག་ཐོག་བཟང་ཕྱོགས་ཀྱི་གྲུབ་འབྲས་ཤིག་འཐོན་སྲིད་སྐོར་རྒྱ་གར་གསར་འགྱུར་བརྒྱུད་ལམ་ཕལ་ཆེ་བའི་སྟེང་འགྲེལ་བརྗོད་བྱས་འདུག
