དཀར་གཞུང་བཀྲ་ཤིས་རྡོ་རྗེ།
རྒན་རྒྱལ་ལོ་ལགས་ནས་༧གོང་ས་མཆོག་ལ་མཇལ་ཁ་ཞུས།
ཕྱི་ལོ་ཉིས་སྟོང་བཅུ་གསུམ་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་འདུ་ཐེངས་བཅུ་གསུམ་པ་སོག་པོའི་རྒྱལ་ས་ཨོ་ལན་བྷ་ཏུར་དུ་ཚོགས་པ་རེད། གེ་སར་སྒྲུང་གི་སྐོར་ཚོགས་ཐུན་འགའ་ཉན་པར་ཕྱིན་པ་ཡིན། རྒྱུ་མཚན་ནི་བྱང་འབྲོག་ནག་ཆུའི་མི་ཞིག་ཡིན་ཕྱིན་གེ་སར་གྱི་བབ་སྒྲུང་དང། ཡིག་སྒྲུང། ངག་སྒྲུང་བཅས་པར་རྒྱུས་མངའ་ཟབ་མོ་ཡོད་པ་མ་ཟད། ནག་ཆུ་ནི་གེ་སར་སྒྲུང་གི་ཕ་ས་ཡིན་ཞེས་བརྗོད་ནའང་རྫུན་དུ་མི་འགྲོ།
ཚོགས་ཆུང་གི་བརྗོད་གཞི་ནི། གེ་སར་རྒྱལ་པོའི་སྒྲུང་གི་སྐོར་རེད། མི་ཞིག་གིས་ཨིན་སྐད་ཀྱིས་གེ་སར་གྱི་སྒྲུང་གི་སྐོར་བཤད་སོང། བརྗོད་བྱ་ལ་དམིགས་བསལ་གྱི་ཚོར་བ་མ་བྱུང་ཡང་རྗོད་བྱེད་ཨིན་སྐད་ཀྱིས་གེ་སར་སྒྲུང་གི་སྐོར་བཤད་པ་གོ་བ་དང་པོ་ཡིན། གང་ལྟར་ཁོའི་གཏམ་བཤད་བྱས་རྗེས་ང་ཚོ་བགྲོ་གླེང་བྱས་པ་ཡིན། སྐད་ཆ་ཕར་བཤད་ཚུར་ཉན་གྱིས་ཁོའི་མིང་ལ་རྒྱལ་ལོ་ཟེར་གྱི་ཡོད་པ་དང་འབུམ་རམས་པའི་དམ་བཅའ་འཇོག་གྲབས་ཡོད་པའང་ཤེས་རྟོགས་བྱུང། གཅོད་པ་དོན་གྲུབ་དང། ཁོང་གཉིས་ཀྱིས་ང་ལ་ཁྱོད་ནག་ཆུ་བ་ཞིག་ཡིན་པའི་ཆ་ནས་གེ་སར་སྒྲུང་གི་སྐོར་ཞིབ་འཇུག་བྱེད་པའི་ཆ་རྐྱེན་ཚང་ཡོད་པས་གེ་སར་སྒྲུང་གི་སྐོར་ཞིབ་འཇུག་བྱས་ན་བཟང་ཚུལ་བཤད་བྱུང་ཡང་ཁས་ལེན་བྱས་མེད། ཡིན་ཡང་ལོ་འགའི་རིང་དོ་སྣང་ཅུང་ཙམ་བྱས་ནས་ཨ་མདོ་བོད་རིག་པའི་ཞིབ་འཇུག་ཚོགས་འདུའི་ཐོག (སྐལ་བཟང་གྲགས་པའི་ཡིག་སྒྲུང་དང་ནག་ཆུའི་བབ་སྒྲུང་གི་ཁྱད་པར།) ཞེས་པའི་བརྗོད་གཞིའི་ཐོག་གཏམ་བཤད་བྱས་པ་ཡིན་པས་ཁོང་རྣམ་པ་གཉིས་བློ་བ་དགའ་བའི་རེ་བ་ཡོད།
གཅོད་པ་དོན་གྲུབ་ཀྱིས་རྒྱ་གར་ལ་སྒྲུང་ཡིག་འདྲ་ཡོད་རེད་དམ། ཞེས་དྲིས་བྱུང། ངས་ཤེས་རིག་ལས་ཁུངས་ནས་བསྡུ་སྒྲིག་བྱས་པ་ཞིག་ཡོད་རེད་ཅེས་བཤད་པ་ཡིན། དེ་དག་ང་ལ་གཏོང་རོགས་ཞེས་བཤད་བྱུང་། ངས་དེ་དག་བོད་ནས་ཐོན་པའི་སྒྲུང་ཡིག་ཁག་ནས་བསྡུས་པ་ལས་གསར་བ་གང་ཡང་ཡོོད་མ་རེད་ཅེས་བཤད། ཁོང་གིས་དེ་ཡང་སྒྲུང་ཡིག་ཅིག་ཆགས་ཀྱི་རེད། ང་ལ་ངེས་པར་དུ་གཏོང་རོགས་ཅེས་བཤད་དེ། ཁ་བྱང་དང་གློག་འཕྲིན་ཁ་བྱང་ང་ལ་སྤྲད་བྱུང། ངས་གཏོང་ཐུབ་མ་སོང་བས་རྩོམ་ཡིག་འདི་བརྒྱུད་ནས་ཁོང་ལ་དགོངས་དག་ཞུ་གི་ཡོད།
ཚོགས་འདུ་གྲོལ་ཁའི་དགོང་མོར་ཐུགས་སྤྲོ་ཞིག་འདུག ང་ཚོགས་འདུ་མ་གྲོལ་ཙམ་ལ་འགྲོན་ཁང་ལ་ཅ་ལག་ཅིག་ལེན་པར་ཕྱིན་ནས་ཚུར་ཡོང་སྐབས་ཚོགས་མི་ཚང་མ་ཐུགས་སྤྲོ་ལ་ཕྱིན་ཚར་འདུག ལམ་གྱི་ཕར་ཕྱོགས་ལ་མི་ཞིག་མོ་ཊ་ནས་བབས་སོང། ཁོང་རྒྱལ་ལོ་ལགས་རེད། ངས་ཚོགས་མི་ཚང་མ་ཕྱིན་ཚར་འདུག་ཅེས་བཤད་པ་ཡིན། ཁོང་གིས་དེ་སྐྱོན་མེད། ང་གཉིས་མོ་ཊའི་ནང་འགྲོ་ཟེར་གྱི་འདུག ངས་ཐག་ཉེ་པོ་ཡིན་པས་གོམ་པ་བརྒྱབ་ནས་འགྲོ་ཞེས་བཤད་པ་ཡིན། ཁོས་དུས་ཚོད་འགོར་གྱི་རེད་ཟེར། ཁོང་རྐང་པ་ཡང་དེ་ཙམ་བདེ་པོ་མེད་པ་མཐོང་སོང་བས་མོ་ཊ་ཞིག་གླས་ན་ཏག་ཏག་རེད་བསམ་བྱུང། དེ་ལྟར་ཤོད་གིན་འགྲོ་གིན་ཐུགས་སྤྲོ་གཏོང་སར་འབྱོར་ཚར་སོང།
དེའི་སང་ཉིན་ཚོགས་མི་ཚོ་སོག་པོར་ནང་པའི་དགོན་པ་འགའ་འདུག་པ་དེར་གནས་མཇལ་ལ་ཁྲིད་བྱུང། འགྲུལ་འཁོར་ཆེ་བ་འགའ་འདུག་པར་ཚོགས་མི་རྣམས་འཚང་ཁ་བརྒྱབ་ནས་ཕྱིན་སོང། ང་དང་མི་ཁ་ཤས་ཤིག་ལྷག་འདུག དེ་དག་གི་ཆེད་འགྲུལ་འཁོར་ཆུང་བ་ཞིག་གོ་སྒྲིག་བྱས་བྱུང། ཡང་འགྲུལ་འཁོར་དེའི་ནང་རྒྱལ་ལོ་ལགས་ངེད་གཉིས་རྐུབ་བཀྱག་ཕར་ཚུར་ཁ་སྤྲོད་ལ་ཁེལ་འདུག དེ་འདྲ་ཞིག་ལ་ཁོའི་མགོ་ངའི་རྣ་རྩར་བསྲིངས་ནས་སྐད་མགོ་དམའ་མོས་ཁྱོད་ཚོས་༸རྒྱལ་བ་རིན་པོ་ཆེ་སྐུ་བཞུགས་པའི་རིང་ཐག་ཆོད་པ་བྱས་ཤོག ཁོང་སྐུ་མ་བཞུགས་ན་གང་ཡང་ཡོད་མ་རེད་ཅེས་བཤད་བྱུང། ངས་ཅི་ཤོད་འདི་ཤོད་མ་ཤེས་པར་གང་བྱས་ནས། ཞེས་ཁ་ནས་ཐོན་སོང། ཁོས་མགོ་གཡུག་གཡུག་བྱེད་བཞིན། “འུན་…”ཁོང་མ་བཞུགས་ན་གང་ཡང་ཡོད་མ་རེད། སྐུ་བཞུགས་སྐབས་ཐག་ཆོད་པ་བྱས་ཤོག་ཟེར་ཞིན་ཕར་རང་གནས་ལ་བསྡད་སོང། ཁོ་འབུམ་རམས་པའི་དམ་བཅའ་བཞག་རྗེས་བོད་ལ་སོང་ནས་ལས་ཀ་བྱེད་རྩིས་ཡོད་པ་ཡང་བགྲོ་གླེང་སྐབས་གླེང་སློང་བྱུང་ཡོད། ངའི་སེམས་སུ་ཁོས་སྐད་ཆ་འདི་འདྲ་ཞིག་ཤོད་དོན་གང་ཡིན་ནམ། ཁོ་བོད་ལ་གང་འདྲ་བྱས་ནས་ལོག་རྩིས་ཡིན་ནམ། དེ་ཡང་ང་ལ་ཤོད་དོན་ཅི་ཡིན་ནམ་ཞེས་ལན་མི་ཕོག་པའི་དྲི་རྟགས་མང་པོ་ཞིག་ང་ལ་བཞག་བྱུང།
དེ་ནས་བཟུང་ངེད་གཉིས་བར་ལ་འབྲེལ་གང་ཡང་མེད། ཡིན་ཡང་ཁོའི་སྐད་ཆ་དེའི་ཐད་བསམ་བློ་འགའ་འཁོར་མྱོང། དཔེར་ན། གཅིག་བྱས་ན་ཁོ་ལྷག་བསམ་ཅན་ཞིག་ཡིན་གྱི་རེད་ལ། ང་ལ་བློ་ཁེལ་བའི་ངང་ཚུལ་འདྲ་མཐོང་ཡོད་སྲིད། གཅིག་བྱས་ན་རྒྱ་ཡིས་བཏང་བའི་བཙན་བྱོལ་བོད་མིར་ཁ་ཁོག་འདྲུ་མཁན་ཞིག་ཡིན་ཡང་སྲིད། དེ་མིན་སྐད་དེ་འདྲ་ཞིག་ང་ལ་ཤོད་དོན་ཅི་ཡོད་བསམས། གང་ལྟར་ཁོང་གིས་བཞག་པའི་དྲི་རྟགས་རྣམས་དྲི་རྟགས་རང་བྱས་ཏེ་ངས་ལོ་བཅུ་ཙམ་ཉར་འདུག
སྤྱིར་ཁོས་ཕྱི་ལོ་༢༠༡༡ ༸གོང་ས་མཆོག་མཇལ་བར་གོ་ཐོས་རབ་རིབ་ཙམ་ཞིག་ཡོད་ཀྱང་དེ་ལ་དོ་སྣང་གང་ཡང་བྱས་མེད། འདི་ལོར་ཁོང་གིས་༸སྐྱབས་མགོན་རིན་པོ་ཆེར་འཇལ་ཁ་ཞུས་ཚུལ་དང། བཙན་བྱོལ་བོད་མིའི་སྒྲིག་འཛུགས་ཀྱི་མཛད་གཙོ་རྣམས་ཐུག་རབས། དྷ་ས་བདེ་དོན་ཚོགས་ཁང་དང་ལྷག་པར་དུ་ས་རྰ་བོད་ཀྱི་མཐོ་རིམ་སློབ་གཉེར་ཁང་དུ་གཏམ་བཤད་བྱས་པ་དང། སློབ་ཁྲིད་བྱས་པ། དུས་བབ་ཀྱིས་གཙོས་རྒྱུད་ལམ་དང་ཚོགས་པ་འགར་གཏམ་བཤད་བྱས་པ་མཐོང་ཐོས་བྱུང། ཁོང་གི་ཐག་གཅོད་དང་གནང་བབ་དེ་དག་བསམ་གཞིག་བྱེད་སྐབས། ཨོ་…ཨ་མ་ཞིག་གིས་ཨ་མའི་བུ་ཞིག་སྐྱེས་འདུག་བསམས་ཏེ་དགའ་པོ་བྱུང་ལ་ལོ་བཅུ་ཙམ་ཉར་བའི་དྲི་རྟགས་རྣམས་ཀྱང་ལན་རག་ཟིན།
གཞན་ལ་ཞུ་དག་གཏོང་མཁན་དངོས་གྲུག་ལགས་ཀྱིས་བྲིས་དོན།. (བོད་ཡིག་ལ་གཏོར་སྐྱོན་ཀྱང་མང་པོ་གཏོང་གི་འདུག་པས་ཀུན་གྱིས་གཟབ་དགོས.) གཞན་ལ་ཞུ་དག་གཏོད་བའི་ཆུ་ཚད་མཐོ་པོ་འདུག
མཆན་འབྲི་མཁན་དངོས་གྲུབ་ཟེར་བ་འདི་ཡང་བོད་ཡིག་མི་ཤེས་བཞིན་དུ་བོད་ཡིག་ལ་བརྟེན་ནས་འཚོ་བ་སྐྱེལ་མཁན་ཞིག་ཡིན་ཚོད་གདའ། ཕྲད་མི་དགོས་བཞིན་དུ་འབྲི་དགོས་ཟེར་ན་དགོད་བྱེད་ཅིག་རེད། ཨ་ལ་སྙིང་རྗེ། རང་གིས་བྲིས་པའི་མཆན་ལ་བལྟས་ན་ངུ་བྲོ་བ་ཞིག་འདུག
རྒྱལ་ལོ་ལགས་ལ་ཐུག་པ་་་ཟེར་ནས་ཕྲད་ཅིག་དགོས་ཀི་རེད། དེ་མིན་་རྒྱལ་ལོ་ལགས་སུ་ལ་ཐུག་པ་རེད་དམ། ཞེས་དྲི་བ་ཞིག་ཡོང་གི་རེད། བོད་ཡིག་གི་རྩ་བའི་རྨང་གཞི་མ་སྦྱང་ན་སྐྱོན་འདི་ཡོང་གི་རེད། བོད་ཡིག་གི་བརྡ་སྤྲོད་གཞུང་མ་སྦྱང་བར་ཡི་གེ་སྐྱ་མོ་ཙམ་སྦྱང་པ་ལ་བརྟེན་ནས་་རྩོམ་ཡིག་འབྲི་བ་ལེགས་པོ་འདུག་ཀྱང་། བོད་ཡིག་ལ་གཏོར་སྐྱོན་ཀྱང་མང་པོ་གཏོང་གི་འདུག་པས་ཀུན་གྱིས་གཟབ་དགོས