ཨ་རིའི་སྲིད་འཛིན་ལས་ཐོག་རྗོ་བྷའེ་ཌིན་མཆོག་དང་སྲིད་འཛིན་ཟུར་པ་ཊོམ་ཕུ་གཉིས་ཀྱིས་ཕྱི་ལོ་ ༢༠༢༤ ལོར་ཡང་བསྐྱར་སྲིད་འཛིན་གྱི་རྒྱལ་ཕམ་རྩོད་དགོས་ཆགས་སྲིད་པ་རེད།
Joseph Biden & Donald Trump
ཕྱི་ལོ་ ༢༠༢༠ ལོའི་ཨ་རིའི་སྲིད་འཛིན་གྱི་རྒྱལ་ཡོངས་འོས་བསྡུའི་ཁྲོད། ཊོམ་ཕུ་མཆོག་ལ་འོས་གྲངས་བརྒྱ་ཆའི་ ༤༦།༩ དང་། རྗོ་བྷའེ་ཌིན་མཆོག་ལ་འོས་གྲངས་ཀྱི་བརྒྱ་ཆའི་ ༥༡།༣ ཐོབ་སྟེ། རྗོ་བྷའེ་ཌིན་མཆོག་ཨ་རིའི་སྲིད་འཛིན་ ༤༦ པར་བདམས་ཏེ་ད་ལྟ་ཁོང་གི་ལས་ཡུན་རྫོགས་གྲབས་ཡོད་པ་རེད། ཉེ་ལམ་ནས་ཨ་རིའི་སྲིད་འཛིན་ཟུར་པ་ཊོམ་ཕུ་མཆོག་དང་། ད་ལྟའི་སྲིད་འཛིན་གཞོན་པ་ལྕམ་སྐུ་ཀ་མ་ལ་ཧ་རི་སི་ (Kamala Harris) མཆོག་གི་གཙོས་དམངས་གཙོ་ཚོགས་པ་དང་སྤྱི་མཐུན་ཚོགས་པའི་འཐུས་མི་གྲངས་ ༡༡ གིས་སྲིད་འཛིན་གྱི་འོས་མིར་བཞེངས་སྲིད་པའི་ཚོད་དཔག་བྱེད་ཀྱི་འདུག་ལ། ཕྱི་ལོ་ ༢༠༢༤ ལོ་ནི་བྷའེ་ཌིན་དང་ཊོམ་ཕུ་གཉིས་ཀྱི་འོས་བསྡུའི་རྒྱལ་ཕམ་རྩོད་པའི་ལམ་དུ་ཞུགས་པ་ཐེངས་གཉིས་པ་དེ་ཆགས་ཡོད་པ་རེད།
ཟླ་འདིའི་ཕྱི་ཚེས་ ༢༥ ཉིན་ཨ་རིའི་སྲིད་འཛིན་བྷའེ་ཌིན་མཆོག་གིས་ད་ནི་ལས་ཀ་མཇུག་བསྡུ་བའི་དུས་ཚོད་ཡིན་ (It’s time to finish the job) ཞེས་པའི་འོས་བསྡུའི་དྲིལ་བསྒྲགས་ཀྱི་འབོད་ཚིག་བསྒྲགས་ཏེ། སྐར་མ་གསུམ་ཅན་གྱི་འོས་བསྡུའི་གཏམ་བཤད་ཅིག་སྤེལ་བའི་ནང་། ད་ནི་ཡིད་ཚིམས་ནས་བསྡད་པའི་དུས་ཚིགས་ཤིག་གཏན་ནས་མིན་པས། ང་ཨ་རིའི་སྲིད་འཛིན་གྱི་འོས་མིར་ལང་གི་ཡོད། མི་རྣམས་ཀྱིས་ངའི་ལོ་ཚད་ཀྱི་ཐད་ནས་རྙོག་གླེང་བཟོ་སྲིད་ཀྱང་། ངས་བཤད་ཐུབ་པ་ཁོ་ན་ནི་“ཁྱེད་ཚོས་ང་ལ་བལྟས་ནས་སྡོད་” ཅེས་པ་དེ་ཡིན། ཞེས་དང་། ཡང་ཁོང་གིས། ངས་ལོ་བཞི་ཡི་རིང་ལ་ཨ་རིའི་སྲིད་འཛིན་གྱི་ལས་གནས་ཁུར་བ་རེད། ངས་ང་ཚོ་ཨ་རིའི་ཚེ་སྲོག་གི་ཆེད་དུ་གཡུལ་སར་ཡོད་ཅེས་བཤད་མྱོང་བ་བཞིན། ང་ཚོ་ད་ལྟའང་ཨ་རིའི་ཚེ་སྲོག་གི་ཆེད་དུ་གཡུལ་སར་གནས་མུས་ཡིན་པས། ང་རང་ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་གྱི་འོས་མིར་ལང་གི་ཡོད། ཅེས་གསུངས་ཡོད་པ་རེད།
ཁོང་གི་ཁ་གཏད་དུ་ལངས་བའི་ཨ་རིའི་སྲིད་འཛིན་ཟུར་པ་དང་ཕྱུག་བདག་པ་སྐུ་ཞབས་ཊོམ་ཕུ་མཆོག་གིས། ཁྱེད་ཚོའི་ཨ་རིའི་ལོ་རྒྱུས་ཀྱི་ཁྲོད་དུ་ཆེས་སྐྱོ་བའི་ཨ་རིའི་སྲིད་འཛིན་ལྔའི་ལས་གནས་ཐེར་འདོན་བྱས་ཀྱང་། དེ་དག་ཚང་མས་བྷའེ་ཌིན་གྱིས་གཏོར་བརླག་བཏང་བ་བཞིན་བཏང་མེད་པ་རེད། ང་ཚོ་ནི་རང་ལམ་བོར་བའི་ཉམས་རྒྱུད་ཤུགས་ཆེན་འགྲོ་མུས་ཡིན་པའི་རྒྱལ་ཁབ་ཅིག་རེད་ལ། ང་ཚོར་རེ་བ་མེད་པའི་མི་སྣ་ཞིག་གིས་མགོ་ཁྲིད་ཀྱིན་ཡོད་ཀྱང་། ཕྱི་ལོ་ ༢༠༢༤ ལོར་ང་ཚོ་རྣམ་པར་རྒྱལ་ནས་སྟོབས་འབྱོར་ལྡན་པའི་ཨ་རི་སླར་ཡང་བསྐྲུན་ཐུབ་ངེས་རེད། ཅེས་གསུངས་འདུག
A kolam, to welcome Joe Biden and Kamala Harris, is an Indian art form of geometric patterns
ཡང་ཨ་རིའི་སྲིད་འཛིན་གྱི་འོས་མི་ད་ལྟའི་སྲིད་འཛིན་གཞོན་པ་དང་དམངས་གཙོ་ཚོགས་པའི་འཐུས་མི་ལྕམ་སྐུ་ཀ་མ་ལ་ཧ་རི་སི་ལགས་ཀྱིས། ཊོམ་ཕུ་ཨ་རིའི་སྤྱི་མཐུན་ཚོགས་པའི་སྲིད་འཛིན་གྱི་འོས་མིར་ལངས་བ་དེ་ང་ཚོའི་རྒྱལ་ཁབ་ཉམས་རྒུད་དུ་གཏོང་འདོད་པ་ཡིན་པས། ཕྱི་ལོ་ ༢༠༢༠ ལོ་བཞིན་ང་ཚོས་ཨ་རི་བ་ཡོངས་སྔོན་ཐོན་དང་འཕེལ་རྒྱས་གཏོང་བར་རྒྱུན་མཐུད་ནས་མཉམ་རུབ་ཀྱི་ཐོག་འཐབ་རྩོད་བྱ་དགོས་ཤིང་། ང་དང་སྐུ་ཞབས་བྷའེ་ཌིན་གཉིས་ཀྱིས་ལས་དོན་མཇུག་སྐྱོང་དང་། ཨ་རིའི་མི་དམངས་ལ་ཞབས་འདེགས་ཞུ་སླད། སླར་ཡང་ད་ལན་གྱི་འོས་བསྡུ་ལས་རྣམ་པར་རྒྱལ་ནས་ལོ་བཞི་རིང་ཨ་རིའི་ཕོ་བྲང་དཀར་པོའི་ནང་འདུག་འདོད་ཡོད། ཅེས་གསུངས་ཡོད་འདུག
དེ་ནི་སྲིད་འཛིན་བྷའེ་ཌིན་དང་ཊོམ་ཕུ་གཉིས་ཀྱི་རྒྱལ་ཕམ་རྩོད་པའི་སྲིད་འཛིན་གྱི་འཐབ་རྩོད་གཉིས་པ་དེ་ཡིན་ཞིང་། ཕྱི་ལོ་ ༢༠༢༠ ལོའི་ཨ་རིའི་སྲིད་འཛིན་གྱི་འོས་བསྡུའི་ཁྲོད་ཊོམ་ཕུ་མཆོག་ལ་འོས་གྲངས་བརྒྱ་ཆའི་ ༤༦།༩ དང་། རྗོ་བྷའེ་ཌན་མཆོག་ལ་འོས་གྲངས་ཀྱི་བརྒྱ་ཆའི་ ༥༡།༣ ཐོབ་སྟེ། ཁོང་ཨ་རོའི་སྲིད་འཛིན་ཐེངས་ ༤༦ པ་དེ་གྱུར་ཡོད་ཀྱང་། གནད་དོན་དབྱེ་ཞིབ་པ་མང་པོ་ཞིག་གིས། སྐུ་ཞབས་བྷའེ་ཌིན་མཆོག་ད་ལྟ་ནས་ཨ་རིའི་སྲིད་འཛིན་དགུང་ལོ་མཐོ་ཤོས་དེར་གྱུར་ཡོད་ཅིང་། འདས་པའི་ལོ་ཤས་རིང་དང་ལྷག་པར་ཏོག་དབྱིབས་རིམས་ནད་ཀྱི་སྐབས་སུ་དམིགས་བསལ་གྱི་ལས་དོན་སྐྱོང་ཐུབ་མེད་པས། སྲིད་འཛིན་ཟུར་པ་ཊོམ་ཕུ་མཆོག་ཕྱི་ལོ་ ༢༠༢༠ ལོའི་འོས་བསྡུ་ལས་འགྲན་ཕམ་བྱུང་ཡོད་ཀྱང་། ད་ལན་ཁོང་ལ་རྒྱལ་ཁ་འཐོབ་སྲིད་པའི་ཚོད་དཔག་ཀྱང་བྱེད་ཀྱི་ཡོད་འདུག
ཕྱི་ལོ་ ༢༠༢༤ ཟླ་ ༡༡ ཚེས་ ༥ ཉིན་ཨ་རིའི་སྲིད་འཛིན་སྐབས་ ༤༧ པའི་འོས་ཤོག་ལྡུག་མགོ་བརྩམ་རྒྱུ་ཡིན་ཞིང་། སྤྱི་མཐུན་ཚོགས་པའི་ཁོངས་ནས་ཊོམ་ཕུ་མཆོག་དང་། མའེ་ཀི་པེན་སི་ (Mike Pence)། མའེ་ཀི་པོམ་པུཡུ་ (Mike Pompeo) ། ཊོམ་གྱི་བུ་མོ་ཨེ་ཝན་ཀ་ཊོམ་ཕུ་ (Ivanka Trump) བཅས་དང་། དམངས་གཙོ་ཚོགས་པའི་ཁོངས་ནས་སྐུ་ཞབས་བྷའེ་ཌིན་མཆོག་དང་། ཀ་མ་ལ་ཧ་རི་སི་ (Kamala Harris)། ཨེ་ལི་ཛེ་བྷེ་ཐི་ཝ་རན་ (Elizabeth Warren)། པི་ཊིབྷ་ཊི་གུག་ (Pete Buttigieg) ཧེ་ལེ་རི་སི་ལི་ཁོན་ (Hillary Clinton)། ཁོ་རི་བྷུག་ཀིར་(Cory Booker)། ཨེ་མི་ཀོ་ལོ་བྷུ་ཆར་(Amy Klobuchar) བཅས་ཀྱིས་འོས་མིར་ལངས་སྲིད་པའི་ཚོད་དཔག་བྱེད་ཀྱི་ཡོད་འདུག
གསར་འགོད་པ་དཔལ་ལྡན་གྱིས་སྒྱུར་སྒྲིག་བྱས།
