བོད་རང་སྐྱོང་ལྗོངས་ལྷ་རྩེ་རྫོང་གཞིས་ཆེན་ཡུལ་ཚོ་སྒང་བཞི་གྲོང་ཚོའི་དེ་སྔོན་གྱི་རྩྭ་རའི་ནང་དུ་རྫོང་ཐོག་གི་གད་སྙིགས་རྣམས་དབོར་འདྲེན་བྱས་ཏེ་སྤུངས་གསོག་ཆེན་པོ་བྱས་པར་བརྟེན་ས་གནས་མི་མང་ལ་ཁོར་ཡུག་འབག་བཙོག་དང་སྒོ་ཟོག་སེམས་ཅན་ལ་འཆི་སྐྱོན་སོགས་ཀྱི་དཀའ་ངལ་འཕྲད་ཀྱི་ཡོད་འདུག
ཟླ་འདིའི་ཕྱི་ཚེས་ ༡ ཉིན་བོད་གནས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། བོད་རང་སྐྱོང་ལྗོངས་ལྷ་རྩེ་རྫོང་གཞིས་ཆེན་གྲོང་ཚོའི་ཉེ་འདབས་སུ་གད་སྙིགས་སྤུངས་གསོག་བྱེད་ས་ཆེན་པོ་ཞིག་ཡོད་སྟབས། གནམ་གཤིས་དྲོ་བའི་སྐབས་སུ་ཉེ་འཁོར་དུ་གནས་སྡོད་བྱེད་མཁན་རྣམས་ལ་དྲི་ངན་གྱིས་སྡོད་བཟོད་དཀའ་བ་མ་ཟད། སྒོ་ཟོག་སེམས་ཅན་གྱིས་གད་སྙིགས་ཟོས་ཏེ་འཆི་སྐྱོན་བྱུང་བ་སོགས་དཀའ་ངལ་མང་པོ་ཡོང་གི་ཡོད་སྐོར་བརྗོད་བྱུང་།
གནས་ཚུལ་མཁོ་སྤྲོད་པས་འདི་གའི་གསར་འགོད་པར། ཉེ་སྔོན་གོང་རིམ་གྱིས་སྣོད་བཅུད་ཁོར་ཡུག་སྲུང་སྐྱོབ་དང་གྲོང་གསེབ་དར་རྒྱས་སོགས་ལ་ཁ་གཡར་ཏེ། ལྷ་རྩེ་རྫོང་ཐོག་གི་དུས་ཚོད་ཡོལ་བའི་ཟས་རིགས་དང་གད་སྙིགས། རླངས་འཁོར་ཆག་རོ་སོགས་ཚང་མ་ཁོ་ཚོའི་ཉེ་འདབས་ལ་སྤུངས་གསོག་རྒྱག་གི་ཡོད་པ་དང་། བདུན་ཕྲག་གཅིག་ཙམ་ནང་གད་སྙིགས་རི་བཞིན་སྤུངས་ཡོད་པ་དེ་ས་སྔོག་འཕྲུལ་ཆས་གཉིས་གསུམ་རེ་བཏང་ཡོང་ནས་མར་སྙོམས་པོ་བཟོ་ཡི་ཡོད་པ་དང་། ས་གནས་བོད་མི་རྣམས་ཀྱིས་གད་སྙིགས་དེ་རུ་མ་སྤུངས་རོགས་ཟེར་ནས་ཡར་ཞུ་ཡི་གེ་མང་པོ་བཏང་ཡོད་པ་མ་ཟད། འུ་ཐུག་ཐབས་ཟད་ཀྱིས་ངོ་རྒོལ་ཡང་བྱས་ཡོད་ཀྱང་། བརྡ་ལན་གང་ཡང་མ་སྤྲད་པར་གད་སྙིགས་སྤུངས་གསོག་བྱས་ནས་ཟླ་ ༦ ལྷག་འགྲོ་བཞིན་ཡོད་པ་མ་ཟད། རྒྱལ་ཁབ་ཀྱི་ཁོར་ཡུག་སྲུང་སྐྱོབ་ཀྱི་ལས་དོན་ལ་སུས་འགོག་རྐྱེན་བཟོས་ན་ཁྲིམས་ཆད་ལྗིད་པོ་ཡོད་ལུགས་བརྗོད་ཡོད་འདུག
ད་ལྟ་གད་སྙིགས་སྤུངས་གསོག་བྱེད་ས་དེ་སྔོན་ཆད་གཞིས་ཆེན་གྲོང་ཚོ་སྤྱིའི་རྩྭ་ར་ཡིན་པ་དང་། ཕྱིས་སུ་མི་མང་གྲོང་གསེབ་ཏུ་ཕབ་རྗེས་རྩྭ་ར་ཡོད་ས་དེ་སྟོང་པར་ལྷག་ནས་ལོ་ ༧ ཙམ་འགྲོ་བཞིན་ཡོད་པ་དང་། ད་ལྟ་གད་སྙིགས་ཕོན་ཆེན་དབོར་འདྲེན་བྱེད་བཞིན་ཡོད་སྟབས། མ་འོངས་པར་དག་གཙང་གི་གྲོང་གསེབ་དེ་གད་སྙིགས་དང་དྲི་ངན་གྱིས་ཁེངས་ཏེ་མི་ཕྱུགས་ཀྱི་འཕྲོད་བསྟེན་ལའང་གནོད་ཚབས་ཆེན་པོ་བཟོ་རྒྱུ་ཡིན་པའི་སེམས་ཁྲལ་བྱེད་ཀྱི་ཡོད་འདུག
