༧གོང་ས་རྒྱལ་བ་རིན་པོ་ཆེ་མཆོག་གིས་བླ་མ་བཟོད་པ་རིན་པོ་ཆེ་ཞེ་དྲགས་ཡག་པོ་ཡོད་ལ་ཡང་སྲིད་འཁྲུལ་བྲལ་ཞིག་ཕེབས་ནས་བསྟན་པའི་བྱ་བ་མཛད་ཐུབ་པར་ངོས་ལ་ལས་འགན་ཡོད་སྐོར་སོགས་གསུངས་སོང་།
ཉེ་ཆར་བཞུགས་སྒར་རྒྱལ་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་བླ་མ་བཟོད་པ་རིན་པོ་ཆེའི་སློབ་མ་ཁག་ཅིག་ལ་ཡང་སྲིད་དང་འབྲེལ་བའི་བཀའ་སློབ་སྩལ་སྐབས། བླ་མ་བཟོད་པ་རིན་པོ་ཆེ་ནི་བློས་འཁེལ་བའི་ཆོས་གྲོགས་ཡིན། དངོས་གནས་དྲང་གནས་ཧུར་ཐག་འབད་ཐག་བྱས་སོང་། ངོས་ཀྱི་བློས་ཐུབ་ཆོས་གྲོགས་ཆགས་བསྡད་ཡོད། དེ་འདྲ་ཡིན་དུས། ངོས་རང་དགུང་ལོ་ ༨༠ ལྷག་ཟིན་ཡོད་ཀྱང་། ད་དུང་དགུང་ལོ་བཅུ་བཅོ་ལྔ་ལྷག་སྐུ་འཚོ་བཞུགས་ཐུབ་པའི་སྟེང་དུ། བླ་མ་བཟོད་པ་རིན་པོ་ཆེའི་ཡང་སྲིད་ཅིག་མུ་མཐུད་དུ་ཕེབས་ཐུབ་པའི་སྨོན་ལམ་རྒྱག་བཞིན་ཡོད། རེ་བའང་ཡོད། ངོས་ཀྱི་མཚན་མ་ཡོང་སྟངས་ལ་བལྟས་པ་ཡིན་ན། དགུང་ལོ་བརྒྱ་ལྷག་བཞུགས་པ་དེ་འདྲ་ཡོང་གི་འདུག དེ་དུས་བླ་མ་བཟོད་པའི་ཡང་སྲིད་ཆེན་པོ་ཞིག་ཆགས་ཀྱི་རེད་བསམ་གྱི་འདུག བླ་མ་བཟོད་པ་རིན་པོ་ཆེའི་ཡང་སྲིད་ངོས་འཛིན་བྱེད་པའི་དུས་ལ་བབ་ཡོད་མེད་མོ་བརྒྱག་རྒྱུ་ཡིན་ལ། ས་གནས་རྒྱ་གར་དང་། བལ་ཡུལ། བོད། དེ་མིན་ཕྱི་རྒྱལ་གྱི་ཡུལ་ལུང་དུ་ཕེབས་ཡོད་མེད་སོགས་ཞིབ་ཚགས་ཀྱིས་མོ་བརྒྱག་རྒྱུ་ཡིན། བླ་མ་བཟོད་པ་ཞེ་དྲགས་ཡག་པོ་ཡིན། ཡང་སྲིད་འཁྲུལ་བྲལ་ཞིག་ཕེབས་ནས་བསྟན་པའི་བྱ་བ་མཛད་ཐུབ་པར་ངོས་ལ་ལས་འགན་ཡོད་ལ། བླ་མ་བཟོད་པའི་ཡང་སྲིད་འཚུབ་པོ་ཞིག་བྱུང་ན་ངོས་ཀྱིས་འདི་གར་ཉར་རྒྱུ་ཡིན། ཞེས་གསུངས།
ཡང་ཁོང་གིས། བླ་མ་བཟོད་པ་རིན་པོ་ཆེ་བཞུགས་པའི་སྐབས་སུ་བསྟན་པའི་བྱ་བ་བསྒྲུབས་པ་དང་། དགེ་འདུན་གྱི་སྡེ་སྐྱོང་བར་སེམས་འཁུར་ཞེ་དྲགས་བྱེད་ཀྱི་ཡོད་པ་རེད། ང་ཚོའི་ངོས་ནས་བླ་མ་འཚོ་བཞུགས་བྱེད་པའི་སྐབས་སུ་ནང་བཞིན་རིན་པོ་ཆེའི་དགོངས་པ་བསྒྲུབ་རྒྱུ་གལ་ཆེན་པོ་རེད། ངོས་ཀྱང་བླ་མ་རིན་པོ་ཆེ་སྐུ་འཚོ་བཞུགས་བྱེད་པ་ནང་བཞིན་མཐུན་རྐྱེན་དང་རྒྱབ་སྐྱོར་ཅི་དགོས་བྱེད་ཀྱི་ཡིན། ངོས་ཀྱིས་ཁྱེད་ཚོ་བཀའ་གཏང་རྒྱུ་གང་ཡང་མེད། ཁྱེད་ཚོས་དངོས་ཡོད་གནས་ཚུལ་ལ་ཉམས་ཞིབ་ཡག་པོ་བྱས་ནས། ཕན་ཚུན་མཐུན་སྒྲིལ་གྱི་ཐོག་ནས་ལས་དོན་བྱེད་ཕྱོགས་ཡག་པོ་བྱུང་བ་ཡིན་ན། ངོས་ཀྱིས་ཀྱང་རྒྱབ་སྐྱོར་བྱ་རྒྱུ་ཡིན། ངོས་རང་དམངས་གཙོ་ལ་དགའ་བོ་ཡོད། ༧རྒྱལ་བ་རིན་པོ་ཆེའི་དབང་ཆ་འཛིན་པ་དེ་བཞག་པ་རེད། མི་མང་གིས་འོས་འདེམས་བྱས་པའི་སྤྱི་འཐུས་ཀྱི་འགན་འཁུར་རྒྱུ་དེ་རེད། ཁྱེད་ཚོས་དངོས་ཡོད་གནས་ཚུལ་ལ་རྒྱུས་མངའ་དང་ཉམས་མྱོང་ཡོད་པས། དེའི་ཐོག་ནས་ཁྱོད་ཚོས་བསམ་ཚུལ་གོ་བསྡུར་ཡག་པོ་བྱས་ནས། དེ་ནས་ངོས་རང་ལ་བཤད་དང་ཁྱེད་ཚོ་རྒྱབ་སྐྱོར་བྱ་རྒྱུ་ཡིན། བླ་མ་བཟོད་པ་རིན་པོ་ཆེས་ཡང་སྲིད་ལ་བརྟག་དཔྱད་བྱས་ནས་ངོས་འཛིན་བྱས་ཏེ་ཆེན་པོ་ཆགས་སོང་བ་ཡིན་ན། སློབ་སྦྱོང་སྤྲད་རྒྱུ་ཧ་ཅང་གལ་ཆེན་པོ་རེད། ངོས་རང་ལོ་རྒན་པ་ཆགས་དུས་བླ་མ་བཟོད་པ་རིན་པོ་ཆེ་ཡང་སྲིད་མཚོན་པའི་གཞོན་སྐྱེས་རྣམས་ཀྱིས་རིམ་བཞིན་འགན་འཁུར་མཁན་ཞིག་ཆགས་དགོས་པ་རེད། ཞེས་གསུངས་སོང་།
དེ་བཞིན་ཁ་སང་ཕྱི་ཚེས་ ༢ ཉིན་བཞུགས་སྒར་རྒྱལ་བའི་ཕོ་བྲང་དུ། ༧མགོན་པོ་མཆོག་གིས་དད་ལྡན་མང་ཚོགས་ཁག་ཅིག་ལ་བཀའ་སློབ་སྩལ་སྐབས། རྒྱལ་བ་རིན་པོ་ཆེས་མགོ་ཁྲིད་པའི་གཞིས་ལུས་རྒྱ་ཆེའི་མི་མང་གི་སེམས་ཤུགས་ངོས་ཀྱིས་བཟུང་བསྡད་ཡོད། བཙན་བྱོལ་ལ་ཡོད་པའི་བོད་མི་རྣམས་ཀྱི་སེམས་ཤུགས་ཀྱང་ངོས་བཟུང་བསྡད་ཡོད་པས། ངོས་རང་ལོ་བརྒྱ་ལྷག་ཅིག་བསྡད་རྒྱུ་ཡིན། ཤེས་སོང་ངམ། ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང༌།། ཚེ་རིང་ནད་མེད་བདེ་སྐྱིད་ཕུན་སུམ་ཚོགས།། ཐེག་པ་མཆོག་ལ་ངེས་པར་འབྱུང་བ་སྟེ།། བཀྲ་ཤིས་དེས་ཀྱང་དེང་འདིར་བདེ་ལེགས་ཤོག། བློ་བདེ་པོ་དང་སེམས་སྐྱིད་པོ་བྱས་ཏེ་སྡོད། ང་ཚོ་བོད་གངས་ཅན་པའི་ལྷ་སྐལ་འཕགས་པ་སྤྱན་རས་གཟིགས་ཡིན་པས། སྤྱི་ཡོངས་ཀྱིས་བཤད་ན་བོད་པའི་ཕྲུ་གུ་ཆུང་ཆུང་ཚོས་ཀྱང་འབུ་མ་གསོད་ཟེར་བའི་གོམས་གཤིས་ཤིག་ཡོད་པ་རེད། ཕྱི་རྒྱལ་གྱི་ཕྲུ་གུ་ཚོས་འབུ་གསད་རྒྱུ་དེ་སྣང་མེད་རེད། བོད་པ་ཚོ་ཆུང་ཆུང་སྐབས་ནས་འབུ་མ་གསོད་ཅེས་བཤད་ཀྱི་རེད། ང་ཚོ་འཕགས་པ་སྤྱན་རས་གཟིགས་ཀྱི་རྒྱུན་འཛིན་གྱི་མི་རིགས་ཤིག་ཆགས་ཡོད། ངོས་རང་འཕགས་པ་སྤྱན་རས་གཟིགས་ཀྱི་མགྲོན་གཉེར་གྱི་བཟོ་ལྟ་བུ་ཆགས་ཡོད་པས། ངོས་ཀྱིས་འཕགས་པ་སྤྱན་རས་གཟིགས་ཀྱི་མགྲོན་གཉེར་བྱེད་པ་དང་། བོད་པ་ཚོའི་ཚབ་བྱས་ནས་ཞུ་སྐུལ་བྱེད་ཀྱི་ཡོད། ཅེས་གསུངས་སོང་།
དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་མི་མང་ཁག་ཅིག་ལ་མཇལ་ཁ་སྩལ་སྐབས། ང་ཚོས་བོད་པའི་ཆོས་དང་རིག་གཞུང་ཞེས་སྐད་བརྒྱབ་བསྡད་པ་རེད། བོད་པའི་རིག་གཞུང་གིས་གཞན་ལ་བརྩེ་བ་བྱེད་པ་དང་། ཐ་ན་འབུ་ཚུན་ཆད་ལའང་གནོད་པ་མ་བྱས་པའི་གོམས་གཤིས་ཤིག་ཡོད་བསྡད་པ་རེད་ལ། དེས་འཛམ་གླིང་ལ་ཕན་ཐོགས་ཀྱི་འདུག འཛམ་གླིང་དུ་འབུ་སྲིན་རིགས་ལ་བརྩེ་བ་མེད་པའི་སྟེང་དུ། མིའི་ནང་ཁུལ་དུ་མེ་མདའ་འཁྱེར་ནས་གསོད་རེས་བྱེད་པ་གོམས་གཤིས་ཆགས་བསྡད་ཡོད། ང་ཚོ་ཚང་མར་འབུ་སྲིན་ཚུན་ཆད་གནོད་པ་མི་བྱེད་པའི་ཕ་མེས་ནས་བརྒྱུད་པའི་གོམས་གཤིས་ཡོད་པ་དེ་རྩ་ཆེན་པོ་ཞེ་དྲགས་རེད། ཆོས་ལ་དད་པ་བྱས་དང་མ་བྱེད་ཟེར་བ་རང་དབང་རེད། གང་ལྟར་སྲོག་གཅོད་མི་བྱ་རྒྱུ་དང་། ཐ་ན་འབུ་སྲིན་ལའང་འཚེ་བ་མི་བྱེད་པའི་གོམས་གཤིས་ཤིག་ཡོད་པ་དེར། འཛམ་གླིང་དུ་ག་ལེར་ཁྱབ་སྤེལ་གཏང་རྒྱུ་ནི་བོད་པའི་ལས་འགན་རེད། སྐབས་སུ་བབ་པའི་བོད་ཀྱི་གནས་སྟངས་ཐབས་སྐྱོ་བོ་ཞིག་གི་སྟེང་དུ་བསྡད་ཡོད་ཀྱང་། དེང་སྐབས་རྒྱ་ནག་ཏུ་འགྱུར་བ་འགྲོ་བསྡད་ཡོད་པ་དང་། ནང་པའི་ཆོས་ལ་དོ་སྣང་བྱེད་མཁན་ཤུགས་ཆེ་རུ་འགྲོ་བཞིན་འདུག དེ་དང་ཆབས་ཅིག་ཏཱ་ལའི་བླ་མ་ཟེར་དུས་དགའ་མོས་བྱེད་མཁན་ཤུགས་ཆེ་རུ་འགྲོ་བཞིན་འདུག ང་ཚོ་བོད་པའི་ཆོས་དང་རིག་གཞུང་ཡང་བོད་པའི་མི་གྲངས་ཉུང་ཤོས་ཤིག་གིས་བདག་པོ་བརྒྱབ་པ་མིན་པར། འཛམ་གླིང་མི་ཚང་མར་བྱམས་བརྩེ་ལྡན་པ་ཞིག་བཟོ་ཐུབ་པར་ང་ཚོའི་ལས་འགན་ཆགས་བསྡད་ཡོད། བོད་པར་ཡ་རབས་དང་སྤྱོད་བཟང་ཡོད་བསྡད་པ་དེ་ང་ཚོའི་རིག་གཞུང་དང་གོམས་གཤིས་རེད་ལ། དེ་བདག་པོ་རྒྱག་པར་ཧ་ཅང་གལ་ཆེན་པོ་རེད། ཁྱེད་ཚོ་མི་རབས་གསར་བ་དེ་ཚོས་སྤགས་བཟོ་ཤེས་ཀྱི་ཡོད་དམ། བོད་པའི་ཁ་ལག་གཙོ་བོ་སྤགས་རེད། ངོས་ཀྱིས་མགྲོན་ཁང་དུ་འགྲོ་དུས་ཀྱང་རྩམ་པ་མཉམ་དུ་འཁྱེར་བཞིན་ཡོད། སྤགས་རྟག་པར་ཟ་བཞིན་ཡོད། སྤགས་བྲོ་བ་ཞེ་དྲགས་ཡག་པོ་རེད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་།
