ཁ་ན་ཌའི་བྷི་སི་མངའ་སྡེར་ནང་པའི་རིག་གཞུང་ཉིན་མོ་སྲུང་གཙི་གནང་བར་གཞུང་འབྲེལ་བཀའ་འཁྲོལ་ཐོབ་འདུག

ལོ་ལྟར་ཕྱི་ཟླ ༥ ཚེས ༧ ཉིན་ཁ་ན་ཌའི་བྷིར་ཌི་ཤི་ཀོ་ལིམ་བྷི་ཡ་མངའ་སྡེའི་ནང་ནང་པའི་རིག་གཞུང་ཉིན་མོར་སྲུང་གཙི་གནང་རྒྱུར་མངའ་སྡེ་གཞུང་ནས་བཀའ་འཁྲོལ་ཐོབ་འདུག

ཁ་ན་ཌའི་བྷིར་ཌི་ཤི་ཀོ་ལིམ་བྷི་ཡ་མངའ་སྡེའི་གྲོས་ཚོགས་ཀྱིས་ལོ་ལྟར་ཕྱི་ཟླ་ ༥ བའི་རེས་གཟའ་ཉི་མ་དང་པོ་དེ་མངའ་སྡེ་ཡོངས་སུ་ནང་པའི་རིག་གཞུང་ཉིན་མོར་སྲུང་གཙི་གནང་གཏན་འཁེལ་བ་ལྟར། ཟླ་འདིའི་ཕྱི་ཚེས་ ༣ ཉིན་བྷི་ཌི་ཤི་ཀོ་ལིམ་བྷི་ཡ་མངའ་སྡེའི་གྲོས་ཚོགས་ཚོགས་ཁང་དུ། ནང་པའི་རིག་གཞུང་ཉིན་མོར་གཞུང་འབྲེལ་བཀའ་འཁྲོལ་ཐོབ་པའི་ཡིག་ཆ་བཅས་གནང་སྟེ་དབུ་འབྱེད་མཛད་སྒོ་འཚོགས་ཡོད་པ་དང་། མཛད་སྒོའི་ཐོག་མངའ་སྡེའི་བློན་ཆེན་སྐུ་ཞབས་ཌེ་ཝེ་ཌི་ཨེ་བྷེ་(Premier of B. C .David Eby)་མཆོག་དང་། མངའ་སྡེའི་དམངས་གཙོ་ཚོགས་པའི་ཚོགས་གཙོ་ཁེ་ཝིན་ཧྥེལ་ཁོན་(Kevin Falcon)ལགས། དམངས་གཙོ་ཚོགས་པའི་ཚོགས་མི་ཌེ་རེ་སཱ་ཝེ་ཌི་(Teresa Wat MLA) ལགས། དགའ་བྱང་ཀླུ་འབུམ་མཚན་སྒྲོགས་རིན་པོ་ཆེ་མཆོག ས་གནས་བོད་རིགས་ཚོགས་པའི་ཚོགས་གཙོ་པདྨ་དབང་ཆེན་ལགས་བཅས་ཆོས་ལུགས་འདྲ་མིན་གྱི་སྐུ་ཚབ་དང་ཚོགས་སྡེ་ཁག ་༣༣ ཡི་གནད་ཡོད་མི་སྣ་ ༣༠༠ ལྷག་མཉམ་ཞུགས་གནང་ཡོད་འདུག 

ཁ་ན་ཌའི་དམངས་གཙོ་ཚོགས་པའི་ཚོགས་མི་ཌི་རི་ས་ཝ་ཌི(Teresa Wat) ལགས་ཀྱིས། ནང་པའི་མཐུན་ཚོགས་ཁག་གིས་བྷི་སི་མངའ་སྡེའི་ཡོངས་སུ་ཆོས་རིག་སྲུང་སྐྱོབ་དང་གོང་འཕེལ་གཏོང་བའི་ལས་དོན་རླབས་ཆེན་གཉེར་མུས་ཡིན་པའི་སྐབས་འདིར། ལོ་ལྟར་ཕྱི་ཟླ ༥ ཚེས ༧ ཉིན་ནང་པའི་རིག་གཞུང་ཉིན་མོར་སྲུང་གཙི་བྱ་རྒྱུ་ཡིན་ལ། དེ་ནི་ཁོང་ཚོས་ནང་པའི་མཐུན་ཚོགས་དང་ལྷན་གཅིག་ཏུ་ལོ་རྒྱུས་རང་བཞིན་གྱི་ཟིན་ཐོ་གསར་པ་ཞིག་བསྐྲུན་ཡོད་སྐོར་སོགས་བརྗོད་ཡོད་འདུག

འདི་གའི་གསར་འགོད་པས་ནང་པའི་རིག་གཞུང་དུས་ཆེན་གྱི་ལས་དོན་ཐོག་ཕྱག་ལས་ཤུགས་ཆེན་གནང་མཁན་དགའ་བྱང་ཀླུ་འབུམ་མཚན་སྒྲོགས་རིན་པོ་ཆེ་མཆོག་ལ་ཁ་པར་བརྒྱུད་དེའི་སྐོར་བཀའ་འདྲི་ཞུས་པར་ཁོང་གིས། ཕྱི་ལོ་ ༢༠༡༤ ལོར་༧གོང་ས་རྒྱལ་བ་རིན་པོ་ཆེ་མཆོག་བྷི་སི་མངའ་སྡེ་ནང་ཆིབས་བསྒྱུར་བསྐྱངས་བ་རེད། དེའི་སྐབས་སུ་ལོ་རྗེས་མ་ནས་ནང་པའི་ཆོས་ཚོགས་ཚང་མ་མཉམ་རུབ་ཀྱི་ཐོག་ནས་ས་ག་ཟླ་བའི་དུས་ཆེན་གཙི་སྲུང་བྱེད་པའི་ཐུགས་རེ་གནང་བ་ལྟར། ཆོས་ཚོགས་ཚང་མས་ཁ་གཅིག་གྲགས་ལྟར་འདོད་མོས་གནང་འདུག་པ་མ་ཟད།  ཕྱི་རྒྱལ་དུ་ཡོང་དུས་སོ་སོའི་ཆོས་ཚོགས་ཡར་རྒྱས་གོང་སྤེལ་གཏོང་བ་གཅིག་པོ་ཙམ་མ་ཡིན་པར། ནང་པའི་བསྟན་པ་སྤྱིའི་ཐོག་ལ་ནུས་ཤུགས་སྤུངས་བའི་བསམ་བློ་ཡོད་པར་བརྟེན་ནས། ཕྱི་ལོ་ ༢༠༡༥ ལོར་ཐོག་དང་པོར་ས་གནས་ནང་པའི་ཆོས་ཚོགས་ཁག་ ༢༨ གྱི་ཚོགས་མི་སྟོང་དྲུག་ལྷག་གིས་ནང་པའི་དུས་ཆེན་སྲུང་གཙི་ཞུ་བར་མཉམ་ཞུགས་བྱས་ཡོད་པ་རེད། དེ་ནས་རིམ་བཞིན་ལོ་གསུམ་རིང་ངས་དུས་ཆེན་སྲུང་གཙི་ཞུ་བའི་འགན་འཁུར་བ་ཡིན་ལ། ཕྱི་ལོ་ ༢༠༡༧ ཟླ་ ༥ བའི་ནང་བྷི་སི་གྲོང་ཁྱེར་སྤྱི་ཁྱབ་བློན་ཆེན་མདུན་དུ་བཅར་ནས་ནང་པའི་དུས་ཆེན་མངའ་སྡེའི་གཞུང་འབྲེལ་ཐོག་ནས་རྒྱབ་སྐྱོར་ངོས་འཛིན་ཡོད་པའི་རེ་འདུན་ཞུས་པར། ས་གནས་གྲོང་ཁྱེར་གྱི་ངོས་འཛིན་ཡོད་པའི་ཡིག་ཆ་ཞིག་ཕུལ་བྱུང་། ངས་ཆོས་ཚོགས་ཁག་རེས་མོས་བྱས་ནས་དུས་ཆེན་སྲུང་གཙི་ཞུ་བར་རེ་བ་བཏོན་ཡང་འགན་ལེན་བྱེད་མཁན་མ་བྱུང་། ཕྱི་ལོ་ ༢༠༡༩ ལོར་དབྱིན་ཇི་རྒྱལ་མོའི་གླིང་ཁ་ནས་འཚོགས་ཅིང་། སྐབས་དེར་ཆོས་ཚོགས་ཁག་༦༤ དང་མི་གྲངས་ཁྲི་བརྒྱད་དང་དྲུག་སྟོང་ལྷག་འཛོམས་ཡོད་ལ། དེ་དུས་ནང་ཆོས་ངོ་སྤྲོད་དང། རིག་གཞུང་སོགས་ཀྱི་མཛད་རིམ་འཚོགས་ཐུབ་ཡོད་པ་རེད། དེ་ནས་ལོ་གསུམ་རིང་ཏོག་དབྱིབས་གཉན་རིམས་ཀྱི་རྐྱེན་གྱིས་དུས་ཆེན་སྲུང་གཙི་ཞུ་ཐུབ་མེད། ད་ལོ་ཕྱི་ཟླ་དང་པོའི་ནང་མངའ་སྡེའི་གྲོས་ཚོགས་འཐུས་མི་ཞིག་གིས་རིན་པོ་ཆེས་སྣེ་འཁྲིད་དེ་མངའ་སྡེ་གཞུང་ལ་ཞུ་ཐུབ་ན་དགེ་མཚན་ཆེ་བའི་སྐད་ཆ་བྱུང་བ་བཞིན། ཕྱི་ཟླ་ ༢ ཚེས་ ༢༧ ཉིན་ངས་སྣེ་འཁྲིད་ཀྱིས་ཆོས་ཚོགས་ཁག་གི་མི་སྣ་ ༡༢༧ མངའ་སྡེའི་གྲོས་ཚོགས་སུ་མངའ་སྡེའི་བློན་ཆེན་མཆོག་གིས་དབུས་སྲིད་དོན་ཚོགས་པ་ཁག་ལ་ཞུས་པ་ཡིན། སྐབས་དེར་མངའ་སྡེའི་བློན་ཆེན་མཆོག་ནས་ངག་ཐོག་ནས་འགྲིག་འགྲོ་བ་ཙམ་ལས་གསུངས་མ་སོང་ཡང་། བརྒྱུད་རིམ་མང་པོ་ཞིག་བརྒྱུད་མཐར་ཕྱི་ཟླ་ ༥ གཟའ་འཁོར་དང་པོའི་གཟའ་ཉི་མར་ནང་པའི་དུས་ཆེན་གཙི་སྲུང་བྱེད་པར་བྷི་སི་མངའ་སྡེའི་གཞུང་འབྲེལ་ནས་གཏན་འབེབས་བྱུང་བ་རེད་ལ། ཕྱི་ཚེས་ ༣ ཉིན་རྒྱལ་བའི་ལྷག་དཀར་ཉིན་མོར་ནང་པ་དང་ཆོས་ལུགས་འདྲ་མིན་གྱི་སྐུ་ཚབ་མི་སྣ་མང་པོ་མཉམ་འཛོམས་ཐོག་གཞུང་འབྲེལ་ངོས་འཛིན་ཡིག་ཆ་ཕུལ་བའི་མཛད་སྒོ་རྒྱ་ཆེན་པོ་ཞིག་འཚོགས་པ་རེད། ཞེས་གསུངས་བྱུང་།

གསར་འགོད་པ། བྱམས་པ་ཚེ་རིང་།