གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་ལགས་སྐུ་གྲོངས། 

བོད་ནང་གི་གློག་བརྙན་འཁྲབ་ཁྲིད་པ་གྲགས་ཅན་དང་རྩོམ་པ་པོ་པདྨ་ཚེ་བརྟན་ལགས་དགུང་ལོ་ ༥༤ ཐོག་བོད་ཀྱི་རྒྱལ་ས་ལྷ་སར་སྐུ་གྲོངས་ཡོད་ཀྱང་ཁོང་གི་གྲོངས་རྐྱེན་སོགས་གསལ་ཁ་གང་ཡང་མི་འདུག

མདང་དགོང་བོད་ནང་གི་གློག་བརྙན་འཁྲབ་ཁྲིད་པ་གྲགས་ཅན་དང་རྩོམ་པ་པོ་པདྨ་ཚེ་བརྟན་ལགས་སྐུ་གྲོངས་པར་བརྟེན། བོད་ཀྱི་སྙན་ངག་པ་གྲགས་ཅན་སྐྱབས་ཆེན་བདེ་གྲོལ་ལགས་དང་། སྒྱུ་རྩལ་བ་ཞི་བདེ་ཉི་མ་ལགས་སོགས་བོད་ནང་གི་སྙན་ངག་པ་དང་། རྩོམ་པ་པོ། སྒྱུ་རྩལ་བ་སོགས་ཁོང་གི་བརྩམས་ཆོས་རྣམས་ལ་དགའ་མོས་བྱེད་མཁན་ཧ་ཅང་མང་པོས་དྲ་ལམ་དུ་སྐྱོ་གདུང་ཆེན་པོས་ཁོང་གི་པར་དང་བརྩམས་ཆོས་རྣམས་བཞག་ནས་མྱ་ངན་རྗེས་དྲན་ཞུ་བཞིན་འདུག

ད་ལྟའི་ཆར་ཁོང་གི་གྲོངས་རྐྱེན་དང་ཆུ་ཚོད་སོགས་གསལ་ཁ་མི་འདུག་ཀྱང་། བོད་ནང་གི་གནས་ཚུལ་མཁོ་སྤྲོད་པ་ཞིག་གིས་འདི་གའི་གསར་འགོད་པར། ཉེ་སྔོན་ཁོང་གི་གློག་བརྙན་གསར་པ་མི་ཆ་མེད་(陌生人)ཅེས་པ་དེ་ལྷ་ས་ཕྱོགས་ནས་ཕབ་སྐྲུན་གནང་ཡོད་པ་དང་། སྐབས་དེར་ལ་དུག་ཕོག་ནས་མྱུར་སྐྱོབ་བྱས་ཡོད་ཀྱང་མ་ཕན་པར་སྐུ་གྲོངས་ཡོད་ཚུལ་བརྗོད་བྱུང་ལ། ཡང་སྤྱི་ཚོགས་དྲ་ལམ་གཞན་གྱི་རྒྱ་ཡིག་གནས་ཚུལ་ནང་སྙིང་ཁམས་ཀྱི་ན་ཚའི་རྐྱེན་པས་སྐུ་གྲོངས་ཡོད་སྐོར་བརྗོད་འདུག

ཟླ་འདིའི་ཕྱི་ཚེས་ ༥ ཉིན་པདྨ་ཚེ་བརྟན་ལགས་ཀྱི་སྒེར་གྱི་སྐད་འཕྲིན་རྒྱབ་ངོས་སུ། ལེགས་སྐྱེས་ཞེས་པའི་གློག་བརྙན་གྱི་མདུན་ངོས་མ་འདྲ་བ་གསུམ་བཞག་སྟེ་གློག་བརྙན་ལས་རིགས་གཉེར་མཁན་གཞོན་སྐྱེས་ལ་འཚམས་འདྲི་ཡོད་ཅེས་བྲིས་འདུག་ལ། དེ་ནི་ཁོང་གིས་སྒེར་གྱི་སྐད་འཕྲིན་ཐོག་བཞག་གནང་བའི་གནས་ཚུལ་མཐའ་མ་དེ་རེད་འདུག

ཉེ་སྔོན་ཕྱི་ཟླ་ ༣ ཚེས་ ༢༩ ཉིན་ཀྲུང་གོ་བོད་ཀྱི་གསར་འགྱུར་དྲ་ཚིག་ཟེར་བའི་ནང་དུ། ཁོང་གི་བརྩམས་ཆོས་གསར་པ་མི་ཆ་མེད་ཅེས་པ་དེའི་སྐོར་ལ་གནས་ཚུལ་སྤེལ་བ་ལྟར་ན། གློག་བརྙན་དེ་བོད་འབའ་ཐང་རྫོང་ཁོངས་ནས་ལེགས་པར་གྲུབ་ཡོད་ཅིང་། དེ་ནི་རྒྱ་ནག་ཧང་ཀྲུའུ་ཆིན་ཙའི་ཙའི་ཟེར་བའི་གློག་བརྙན་བཟོ་སྐྲུན་ཁང་ཞིག་གིས་ཕབ་སྐྲུན་བྱས་པ་ཞིག་ཡིན་འདུག གློག་བརྙན་དེ་པདྨ་ཚེ་བརྟན་ལགས་ཀྱིས་འཁྲབ་ཁྲིད་གནང་སྟེ། བོད་ཀྱི་གླུ་མ་དབང་སྒྲོན་མཚོ་དང་སྦྱིན་པ། དགེ་འདུན་སོགས་ཀྱིས་གཙོ་འཁྲབ་བྱས་པ་ཞིག་ཡིན་འདུག གློག་བརྙན་དེའི་ནང་དུ་སྐྱེས་པ་ཆ་མེད་ཅིག་བོད་ཀྱི་གྲོང་ཚོ་ཆུང་ཆུང་ཞིག་གི་ནང་དུ་བསླེབས་ཏེ། གྲོང་ཚོ་དེ་སྒྲོལ་མ་ཉེར་གཅིག་གི་ཕ་ས་ཡིན་པར་བརྗོད་དེ། ཁོང་གིས་སྒྲོལ་མ་འཚོལ་སྐབས་སྒྲོལ་མ་ཞེས་པའི་བུ་མོ་འདྲ་མི་འདྲ་མང་པོར་ཐུག་ཡོད་ཀྱང་། ཁོང་གི་སེམས་གཏིང་དུ་ཡོད་པའི་སྒྲོལ་མ་རྙེད་མ་ཐུབ་པའི་བོད་ཀྱི་དམངས་ཁྲོད་ཀྱི་བཤད་རྒྱུན་དང་འབྲེལ་བ་ཡོད་པའི་གློག་བརྙན་ཞིག་ཡིན་འདུག

པདྨ་ཚེ་བརྟན་ལགས་ཀྱི་གློག་བརྙན་གྲགས་ཅན་ཐར་ལོ་ཡི་མི་སྣ་གཙོ་བོ་འཁྲབ་མཁན་སྒྱུ་རྩལ་བ་ཞི་བདེ་ཉི་མ་ལགས་སོགས་ཀྱིས་པདྨ་ཚེ་བརྟན་ལགས་ཀྱི་འདྲ་པར་རེ་བཞག་ནས་ཧ་ཅང་སྐྱོ་བྱུང་ཞེས་མྱ་ངན་ཞུས་འདུག་ལ། བོད་མི་ཞིག་གིས། པདྨ་ཚེ་བརྟན་གྱི་འདྲ་པར་ཞིག་དྲ་ལམ་དུ་བཞག་ནས་བོད་ཀྱི་སྐད་ཡིག་གི་གོད་ཆག སྒྱུ་རྩལ་གྱི་གོད་ཆག བསམ་བློ་ཡི་གོད་ཆག གསར་གཏོད་ཀྱི་གོད་ཆག མི་རིགས་ཀྱི་གོད་ཆག  ཅེས་དང་། བོད་ཟེར་བ་འདི་གློག་བརྙན་ལས་རིགས་ཀྱི་ཁང་བཟང་དུ་འཇུག་མཁན་ཁོ་ཡིན། འཛམ་གླིང་གི་མིག་ཟུང་གློག་བརྙན་བརྒྱུད་དེ་བོད་ལ་ཐོན་དུ་འཇུག་མཁན་ཡང་ཁོ་ཡིན། ཁོས་བོད་ཀྱི་རིག་གནས་དང་སྲོལ་རྒྱུན། དེང་རབས་སོགས་མང་པོ་ཞིག་གློག་བརྙན་གྱི་ལམ་ནས་འཛམ་གླིང་གི་མི་རིགས་ལ་བག་ཆགས་ཐེབས་སུ་བཅུག་ཡོད། འདི་ནི་མི་གཞན་ཚོས་བསྒྲུབ་དཀའ་བའི་ལས་ཀ་རླབས་ཆེན་ཞིག་རེད། ཨ་ཁ་ཁ་ཁ། བོད་ཀྱི་ཐོད་པ་འདི། ཞེས་བྲིས་འདུག

ཕྱི་ལོ ༢༠༡༦ ཟླ ༦ ཚེས་ ༢༥ ཉིན་མཚན་མོར། པདྨ་ཚེ་བརྟན་ལགས་རྒྱ་ནག་པེ་ཅིན་ནས་ཟི་ལིང་གྲོང་ཁྱེར་གྱི་གནམ་གྲུ་འབབ་ཚིགས་སུ་འབྱོར་ཏེ། གནམ་གྲུ་འབབ་ཚིགས་ནས་དྲུད་སྒམ་ལྷག་སྟེ་ཕྱིར་ལེན་དུ་འགྲོ་སྐབས། གནམ་ཐང་གི་སྒྲིག་ལམ་ལ་གཏོར་བརླག་བཏང་བའི་ཉེས་མིང་འོག གནམ་ཐང་ཉེན་རྟོག་པས་ཁོང་འཛིན་བཟུང་བྱས་ཏེ་གནམ་ཐང་མངག་གཏོང་ཁང་དུ་བཙན་འཁྲིད་བྱས་པ་མ་ཟད། ཟི་ལིང་གི་བཀག་ཉར་ཁང་ཞིག་ཏུ་བཅུག་སྟེ་འདྲི་རྩད་གཅར་རྡུང་བཏང་བར་བརྟེན། ཕྱི་ཚེས་ ༢༧ ཉིན་ཁོང་མགོ་ཡོམ་འཁོར་བ་དང་བྲང་གཟེར་བ། ཡན་ལག་སྦྲིད་པ་སོགས་བྱས་ནས་གཟུགས་པོའི་གནས་སྟངས་ཛ་དྲག་ཆགས་པར་བརྟེན། བཀག་ཉར་ཁང་ནས་ཟི་ལིང་གི་སྨན་ཁང་ཞིག་ཏུ་བསྐྱལ་ཏེ་སྨན་བཅོས་བྱས་ཡོད་པ་དང་།  ཁོང་ལ་གཅར་རྡུང་དྲག་པོ་བཏང་བར་བརྟེན་ལུས་སྟེང་དུ་སྔོག་ཐིག་མང་པོ་ཡོད་པ་མ་ཟད། རྨ་ཤུལ་ཚབས་ཆེན་བཟོས་ཡོད་པ་རེད། ཕྱིས་སུ་ཁོང་གི་འགྲོ་འདུག་ལ་རྒྱ་ནག་གཞུང་གིས་རྟོག་ཞིབ་ནན་པོ་བྱེད་ཀྱི་ཡོད་སྐོར་འབྲེལ་ཡོད་ནས་བརྗོད་བྱུང་།

སྐུ་ཞབས་པདྨ་ཚེ་བརྟན་ལགས་ནི་ཕྱི་ལོ་ ༡༩༦༩ ལོར་མཚོ་ལྷོ་ཁྲི་ཀའི་འབྲོག་པའི་ཁྱིམ་ཚང་ཞིག་ཏུ་སྐྱེས་ཤིང་། གློག་བརྙན་འཁྲབ་ཁྲིད་པ་དང་། རྩོམ་པ་པོ། ལོ་ཙཱ་བ་བཅས་ཡིན་ལ། ཕྱི་ལོ་ ༢༠༠༢ ལོར་པེ་ཅིན་གློག་བརྙན་སློབ་གླིང་དུ་གློག་བརྙན་སྐོར་ལ་ཆེད་སྦྱོང་གནང་རྗེས། འཁྲབ་གཞུང་རྩོམ་པ་པོ་དང་འཁྲབ་ཁྲིད་པ་བཅས་ཀྱི་ལས་ཀ་གཅིག་ལྕོགས་སུ་གནང་།   ཁོང་གིས་ད་བར་ལྷིང་འཇགས་ཀྱི་མ་ཎི་རྡོ་འབུམ་དང་འཚོལ། ཁྱི་རྒན་དང་གཡང་མདའ། ཐར་ལོ་སོགས་གློག་བརྙན་རིགས་ ༡༤ ལྷག་འཁྲབ་འཁྲིད་གནང་སྟེ་བོད་ཕྱི་ནང་གཉིས་ནས་དགའ་བསུ་ཆེན་པོ་ཐོབ་ཡོད་པ་མ་ཟད། རྒྱལ་སྤྱིའི་གློག་བརྙན་དུས་སྟོན་ཆེ་ཁག་ནས་གཟེངས་རྟགས་ཁག་ཅིག་ཀྱང་ཐོབ་སྟེ། བོད་པ་རང་གིས་བཟོས་པའི་གློག་བརྙན་གྱིས་རྒྱལ་སྤྱིའི་སྐད་གྲགས་ཅན་གྱི་གློག་བརྙན་ཚོང་རའི་ནང་གོམ་པ་དང་པོ་སྤོས་ཡོད་པ་རེད། དེ་བཞིན་ཁོང་གི་གློག་བརྙན་ཐར་ལོ་དང་ཁྱི་རྒན། ལག་དམར།  དབུགས་ལྒང་བཅས་ལ་རྒྱལ་སྤྱིའི་ཝཱ་ནེ་སི་(Venice) དང་། ཨ་རིའི་བྷིར་ཀི་ལིན་(Brooklyn) ། ཐའེ་ཝན་དང་རྒྱ་ནག་གི་གློག་བརྙན་དུས་སྟོན་སོགས་ཀྱི་ཐོག་གཟེངས་རྟགས་བྱ་དགའ་ཐོབ་སྟེ། རྒྱལ་སྤྱིའི་སྟེང་པདྨ་ཚེ་བརྟན་ལགས་ནི་བོད་ཀྱི་གློག་བརྙན་འཁྲབ་འཁྲིད་པའི་ཚབ་མཚོན་མི་སྣ་ལྟ་བུར་གྱུར་ཡོད་ལ། ཁོང་གི་གློག་བརྙན་གྲགས་ཅན་ཐར་ལོ་ལོ་རྒྱལ་ཕྱི་ནང་གི་གཟེངས་རྟགས་མི་འདྲ་བ་ ༡༢ ཐོབ་ཡོད་འདུག

གསར་འགོད་པ། དཔལ་ལྡན།