སྤྱི་ཟུར་བློ་བཟང་ཡེ་ཤེས།
འདས་པའི་ཉིན་འགའི་རིང་འཛམ་གླིང་ས་ཕྱོགས་གང་སར་གནས་པའི་བོད་མི་རྣམས་གོང་ན་མེད་པའི་དབུ་ཁྲིད་༧གོང་ས་༧སྐྱབས་མགོན་ཆེན་པོ་མཆོག་ལ་གསར་ཁང་ཁག་གིས་དྲག་རྒོལ་ཞུས་པར་བློ་ཕམ་གྱི་གནས་སུ་བཀོད་ཡོད་ལ། འཛམ་གླིང་མི་མང་ཡིད་མི་ཆེས་པར་ཧད་དེ་གནས་ཡོད། འདི་ནི་འཛམ་གླིང་གི་ཞིེ་བདེའི་མཚོན་རྟགས་ཁོང་གི་དྲི་མས་མ་གོས་པའི་གཟུགས་བརྙན་དེའི་མདངས་ཉམས་པའི་ཕྱིར་དུ་རྒྱ་ནག་གིས་བསླངས་པའི་གཏིང་གནག་པའི་གཡོ་བྱུས་ཤིག་ཡིན་པ་སུས་ཀྱང་ཤེས་མེད།
༸གོང་ས་མཆོག་ལ་ཁ་གཏད་པའི་གཏིང་གནག་པའི་དྲག་རྒོལ་དེའི་འབྱུང་ཁུངས་ལ་དངོས་སུ་དཔྱད་པ།
སྤྱི་ཟླ་༢ པའི་ཚེས ༢༨ ཉིན་སློབ་ཕྲུག་༡༢༠ དང་། རོགས་སྐྱོར་ཚོགས་པ་M3M ཡི་ཚོགས་མི་རྣམས། ད་དུང་གསར་འགོད་པ་མི་ཉུང་བ་ཞིག་བཅས་༸གོང་ས་མཆོག་མཇལ་དུ་བཅར་ཏེ་གཙུག་ལག་ཁང་གི་མདུན་དུ་ཚོགས་པའི་མཛད་སྒོ་དེའི་རྗེས་ཀྱི་བདུན་ཕྲག་འགའི་ནང་རྒྱ་ནག་གི་དྲ་བའི་དམག་མི་དང་། དྲ་སེར། དམར་ཤོག་ཚོགས་པའི་རྒྱུགས་ཁྱི་བཅས་ཀྱིས་༸གོང་ས་མཆོག་དང་རྒྱ་གར་གྱི་བྱིས་པ་དེ་གཉིས་ཐུག་འཕྲད་བྱས་པའི་བརྙན་དུམ་ཞིག་བཅོས་སྒྲིག་དང་བཅད་གཏུབ་བྱས་ཏེ་བོད་དང་རྒྱ་ནག་ཏུ་གང་སར་བཀྲམས་ཡོད་ལ། བོད་དང་རྒྱ་ནག་ཏུ་གནས་པའི་བོད་མི་ཚོས་གསུངས་པ་ལྟར་ན་བརྙན་དུམ་འདི་རྒྱ་ནག་གཞུང་གི་རམ་འདེགས་དང་བཅས་རྒྱ་ནག་གི་སྤྱི་ཚོགས་དྲ་བ་གང་སར་ཁྱབ་ཡོད་འདུག
ཟླ་བ་གཅིག་གི་རིང་རྒྱ་ནག་གིས་སྦྱིན་བདག་བྱས་པའི་དྲ་དམག་ཚོས་བོད་དང་རྒྱ་ནག་ཏུ་༸གོང་ས་མཆོག་གི་མཚན་མཐོང་ཉམས་ཆག་འགྲོ་ཕྱིར་འདི་ནི་ལོག་གཡེམ་ཡིན་ཚུལ་བཤད་དེ་གང་སར་བརྒྱུད་སྐུལ་བྱས་ཡོད་འདུག
བོད་དང་རྒྱ་ནག་ཏུ་བརྙན་དུམ་འདི་འགྲོ་བཞིན་པའི་སྐབས་‘Yin Sun@NiSiv4’ཟེར་བའི་དྲ་མིང་སྤྱོད་མཁན་ཞིག་གིས་འཕྲུལ་སྒྲའི་དྲ་བར་ཁ་བྱང་ཞིག་དང་། རོ་བེར་རིཌ་ཟེར་བ་ཞིག་གིས་ཡུའུ་ཊུབ་ཀྱི་དྲ་བ་ཞིག བྱིས་པར་བརྙན་བཅོས་བྱེད་པར་རྒོལ་བ་ཞེས་པའི་ངོ་དེབ་ཁ་བྱང་ཞིག་བཅས་སྤྱི་ཟླ་བཞི་པའི་ཚེས་གཅིག་དང་ཚེས་བཅུ་བཅས་ལ་རིམ་བཞིན་བཟོས་འདུག
འཕྲུལ་སྒྲའི་ཁ་བྱང་‘Yin Sun@NiSiv4’ཞེས་པའི་དྲ་བྱང་རྫུན་མ་དེས་སྤྱི་ཟླ་བཞི་པའི་ཚེས་༨ ཉིན་ཐོག་མར་སྤེལ་བའི་བརྙན་དུམ་དེ་ནི་༸གོང་ས་མཆོག་དང་རྒྱ་གར་གྱི་བྱིས་པ་དེ་མཇལ་འཕྲད་སྐོར་གྱི་བརྙན་དེ་རེད་ལ། དེ་བཞིན་བྱིས་པར་བརྙས་བཅོས་བྱེད་པར་རྒོལ་བ་ཞེས་པའི་ངོ་དེབ་ཁ་བྱང་རྫུན་མ་དེ་དང་རོ་བེར་རི་ཌ་ཟེར་བས་སྤེལ་བའི་བརྙན་དང་པོ་དེའང་བཅད་གཏུབ་བྱས་པའི་བརྙན་དེ་རེད་ལ། དེ་ནི་དེ་གཉིས་ཀྱིས་སྤེལ་བའི་བརྙན་གཅིག་པུ་དེའང་རེད། བྱིས་པར་བརྙས་བཅོས་བྱེད་པར་རྒོལ་བ་ཞེས་པའི་ངོ་དེབ་རྫུན་མ་དེས་སྤྱི་ཟླ་༤ ཚེས་༧ ཉིན་འགྱུར་བ་ཞེས་པའི་དྲ་གནས་གྲགས་ཅན་དེར་ཏཱ་ལའི་བླ་མ་ལས་བྱིས་པ་སྐྱོབས། བྱིས་པར་བརྙས་བཅོས་བྱ་མཚམས་ཞོག་ཅེས་པའི་སྙན་ཞུ་ཞིག་བྲིས་པ་དང་། དེ་རྗེས་གསར་འགྱུར་དེ་རྒྱ་གར་གྱི་གསར་ཁང་ཁག་གི་ལག་ཏུ་ཐེབས་ནས་བརྟག་དཔྱད་དང་ཞིབ་འཇུག་གང་ཡང་མེད་པར་ཡོངས་ཁྱབ་ཏུ་བསྒྲགས་ཡོད།
རྒྱ་གར་གྱི་གསར་ཁང་ཕལ་ཆེ་བ་གསར་འགོད་ཀྱི་ཀུན་སྤྱོད་ལས་འདས་ནས་སྨྱོ་ཧམ་ཆེ་ཞིང་གཞི་རྒྱ་ཆེ་བའི་སྐད་ཅོར་འདི་ལ་མཉམ་ཞུགས་བྱས་ཡོད།
འཕྲུལ་སྒྲའི་ཁ་བྱང་‘Yin Sun@NiSiv4’ ཟེར་བས་སྤྱི་ཟླ་བཞི་པའི་ཚེས་བཅུའི་དགོང་མོར་འཕྲུལ་སྒྲའི་ངོས་སུ་ “གློག་བརྙན་དེ་ལ་བལྟས་རྗེས་འཛམ་གླིང་མི་མང་གིས་ཐག་གཅོད་བྱས་ཟིན།… མི་མང་ཆེ་བས་སྐྱེ་བོ་ག་ག་མོ་དེ་ལ་ལུགས་སྲོལ་ཁྱད་མཚར་ཞིག་ཡོད་པ་ང་དང་མོས་མཐུན་བྱ་གི་རེད། ངས་ཁོའི་སྙན་གྲགས་རྩ་མེད་བྱས་ཟིན།”ཅེས་ཕོ་ཤོབ་བཤད་ཡོད། འཕྲུལ་སྒྲའི་རྩོམ་ཐུང་འདི་ལས་རྒྱ་དམར་གྱི་སོ་པ་ཡིན་སུན་ཞེས་པས་བྱ་ངན་འདི་ནི་རྒྱ་མིའི་རྒྱུགས་ཁྱི་ཚོས་སྦྱིན་བདག་དང་། མཉམ་ལས། མཉམ་འབྲེལ་བཅས་ཀྱི་ཐོག་ནས་པེ་ཅིན་དུ་ཡོད་པའི་དཔོན་པོ་ཚོའི་ཆེད་དུ་བྱས་པ་གསལ་པོ་རེད། ལྐོག་ཇུས་འདི་ནི་༸གོང་ས་མཆོག་གི་བསྲེ་ལྷད་མ་ཞུགས་པའི་སྙན་གྲགས་དེ་ཉམ་ཆག་གཏོང་ཕྱིར་དམིགས་པ་ཆེས་གསལ་པོ་རེད། དེ་བས། ད་ཐེངས་ཀྱི་རྒྱ་ནག་གི་དམའ་འབེབས་འདི་ནི་༸གོང་ས་མཆོག་གི་རྩ་ཆེའི་སྐུ་ཡི་གསང་བ་གསུམ་ལ་སྒྲོ་སྐུར་བྱ་ཕྱིར་བརྩམས་པའི་ལམ་དུ་མ་ལྷོང་བའི་ལྐོག་ཇུས་ཤིག་ཡིན་པ་ལྷང་ལ་བུད་ཟིན།
དཀོན་མཆོག་མཁྱེན། དེ་ནི་བྱམས་བརྩེའི་ངང་ནས་འོ་བྱེད་པ་ཞིག་དང་། ཐུགས་ཁུར་དང་། བབས་ཕེབས། བྱམས་པ་བཅས་ཕྱི་རུ་མངོན་སྟངས་ཤིག་རེད།
བྱེད་སྒོ་དེ་ནི་༸གོང་ས་མཆོག་དང་ཁོང་ལ་ཐུག་འཕྲད་དུ་ཡོང་བ་རྣམས་ཀྱི་བར་གྱི་དགའ་སྤྲོ་དང་། བྱིན་རླབས། དྲང་ཕྱོགས་ཀྱི་སྟོབས་ཤུགས་བཅས་ཀྱིས་ཁེངས་པའི་བྱེད་སྒོ་ཞིག་ཡིན་པ་དེ་ཉིད་ལ་ལྟ་མཁན་ཚང་མར་དོ་སྣང་བྱུང་ཡོད། བྱེད་སྒོ་དེ་ནི་༸སྐུ་ཚབ་ཚོས་༸གོང་ས་མཆོག་དང་མཉམ་དུ་པར་ཞིག་བསྒྲོན་ཏེ་ཞི་བདེ་ལྷིང་འཇགས་ངང་ནས་མཇུག་བསྒྲིལ་ཡོད། བྱིས་པ་དེས་༸གོང་ས་མཆོག་མཇལ་ནས་ཁོང་ལ་བརྩེ་བས་འཐམ་འཁྱུད་ཞུས་པའི་དགའ་སྤྲོའང་འགྲེལ་བརྗོད་ཞུས་ཡོད། ཁོས་ཨེ་ཤི་ཡ་རང་དབང་རླུང་ཁང་ལ་ “ང་དངོས་གནས་༸གོང་ས་མཆོག་མཇལ་འདོད་ཆེན་པོ་ཡོད། འདི་ནི་ཉམས་མྱོང་བཟང་པོ་ཞིག་རེད། ཁོང་གི་བྱིན་རླབས་ཐོབ་པ་དང་། ཁོང་ལ་འཐམ་འཁྱུད་བྱས་པ་དེ་ཅི་འདྲ་བྱིན་རླབས་ཅན་ཞིག་ཡིན་པ་བརྗོད་དུ་མེད་པ་རེད། ངས་ཁོང་ཐག་ཉེ་ནས་མཇལ་བ་དེ་རང་བྱིན་རླབས་རེད། ཁོང་ནི་སྐྱེས་བུ་ཡ་རབས་ཤིག་རེད། ཁོང་ལ་ཡ་རབས་ཀྱི་སྟོབས་ཤུགས་དང་ལྡན་འདུག མདོར་ན་འདི་ནི་ཉམས་མྱོང་བཟང་པོ་ཞིག་རེད།”ཅེས་བརྗོད་ཡོད།
བསམ་ཡུལ་ལས་འདས་པའི་དོན་རྐྱེན་དེ་བྱུང་རྗེས། ཕྲུ་གུ་དེའི་ཕ་མ་གཉིས་པོས་༸གོང་ས་མཆོག་གི་སྐུ་སྒེར་ཡིག་ཚང་དུ་ཕྱག་བྲིས་ཤིག་ཕུལ་ནས་ཁོང་ཚོ་ནི་༸གོང་ས་མཆོག་ལ་དད་དམ་འགྱུར་མེད་ཡིན་ཚུལ་ཞུས་ཡོད་འདུག
ང་ཚོ་ནི་ཕ་མ་ཚོས་རང་གི་བུ་ཕྲུག་ལ་བྱམས་པས་འོ་བསྐྱལ་བ་ལའང་སྐྱོན་བརྗོད་དང་ཁ་རྡུང་བྱེད་སའི་དུས་རབས་ཤིག་ཏུ་འཚོ་བཞིན་པ་ནི་སེམས་སྐྱོ་དགོས་པའི་དོན་དངོས་ཤིག་རེད། ང་ཚོས་ཌེ་བིད་བྷེ་ཁམ་དང་། ཝི་ཊོ་རི་ཡ། ད་དུང་རྒྱ་གར་གྱི་བྷོ་ལི་ཝོ་ཌི་གློག་བརྙན་འཁྲབ་མཁན་ཆ་ཝི་མི་ཊལ་བཅས་ཀྱིས་རང་གི་བུ་ཕྲུག་ལ་བྱམས་པས་འོ་བསྐྱལ་བའི་པར་ཕྱི་རུ་བསྟན་པར་ཁ་རྡུང་ཇི་ལྟར་བྱས་པ་བརྗེད་ག་ལ་ཐུབ། བོད་མི་རིགས་ནི་རང་གི་བུ་ཕྲུག་དང་སྤུན་མཆེད་ཚོ་ལ་བརྩེ་བ་དང་སེམས་ཁུར་མངོན་འགྱུར་དུ་བསྟན་པར་དགའ་ལ། ༸གོང་ས་མཆོག་ནི་བྱམས་བརྩེ་དང་ཐུགས་ཁུར་མངོན་འགྱུར་དུ་སྟོན་གནང་མཁན་ཞིག་དང་གཟི་བྱིན་ཅན་ཞིག་ཡིན་པ་ཡོངས་སུ་གྲགས། མི་ས་ཡ་མང་པོས་༸གོང་ས་མཆོག་ལ་ཡོད་པའི་བྱམས་བརྩེ་དང་བྱིན་རླབས་ཀྱི་ཚན་ཁ་བཅས་ལའང་མྱོང་རོལ་བྱེད་ཐུབ་ཀྱི་ཡོད།
བྱམས་པ་དང་བརྩེ་བ་དགོས་མཁོ་ཆེ་བའི་སྐོར་ལ་༸གོང་ས་མཆོག་གིས་ཡང་ནས་ཡང་དུ “ཕྲུ་གུ་སྐྱེ་བ་ནས་ཉུང་མཐའང་ལོ་གསུམ་མམ་བཞིའི་བར་དུ་ཀླད་པ་འཚར་ལོངས་ཡོང་གི་ཡོད་ཅིང་། དེའི་རིང་ཕྱི་ལུས་ཀྱི་བྱམས་སྐྱོང་ནི་ཕྲུ་གུ་འཚར་ལོངས་ལེགས་པོ་ཡོང་བའི་རྐྱེན་གཙོ་བོ་དེ་རེད། གལ་སྲིད་ཕྲུ་གུ་ལ་འཐམ་འཁྱུད་དང་། བྱིལ་བྱིལ། བྱམས་པོ་སོགས་མ་བྱས་པ་ཡིན་ན་ཁོང་གི་འཚར་ལོངས་ཡ་མ་ཟུང་གྱུར་ནས་ཀླད་པ་འཚར་ལོངས་ཡག་པོ་ཡོང་མི་ཐུབ། ཕྲུ་གུ་ལ་གཞན་གྱི་བྱམས་སྐྱོང་མེད་པར་འཚོ་མི་ཐུབ་པར་སོང་ཁོ་ལ་དགོས་པའི་བྱམས་སྐྱོང་གལ་ཆེ་ཤོས་དེ་ནི་བརྩེ་བ་རེད། དེང་སང་ཕྲུ་གུ་མང་པོ་ཞིག་བདེ་སྐྱིད་མེད་པའི་ཁྱིམ་ཚང་དུ་འཚར་ལོངས་ཡོང་གི་ཡོད། ཁོ་ཚོ་ལ་བརྩེ་བ་མ་ཐོབ་ཚེ་ཁོ་ཚོ་རང་གི་ཕ་མ་ལ་དེ་ཙམ་མི་དགའ་བར་འགྱུར་འགྲོ་ལ། ཁོ་ཚོས་མི་གཞན་ལ་དགའ་པོ་བྱ་རྒྱུ་ནི་དེ་ལས་ཀྱང་ཁག་པོ་རེད། དེ་ཧ་ཅང་སྐྱོ་དགོས་པ་ཞིག་རེད།”ཅེས་གསུང་གི་ཡོད།
ད་ལྟ་མཛད་སྒོ་དེ་དང་འབྲེལ་བའི་བརྙན་ཆ་ཚང་བ་སྤྱི་ཚོགས་ཁྲོད་དུ་ཐོན་ཡོད་ལ། མི་སྣ་གྲགས་ཅན་མང་པོ་ཞིག་གིས་ནོར་འཁྲུལ་ངོས་ལེན་ཞུས་ནས་༸གོང་ས་མཆོག་ལ་སྐྱོན་བརྗོད་དང་ཁ་རྡུང་བཏང་པར་དགོངས་དག་ཞུས་ཟིན། ད་ནི་ཐལ་སྨུག་དྭངས་ཏེ་སེམས་རྣལ་དུ་བབས་ཟིན། དུས་འདི་ནི་འགན་ཁུར་མེད་པའི་གསར་ཁང་དེ་ཚོས་འཚབ་འཚུབ་ངང་༸གོང་ས་མཆོག་གི་ཀུན་སྤྱོད་ལ་སྐྱོན་བརྗོད་དང་ཁ་རྡུང་བཏང་པ་དང་། བོད་པ་དང་ནང་པ་། གཞན་ཡང་༸གོང་ས་མཆོག་ལ་དགའ་མོས་ཞུ་མཁན་ས་ཡ་མང་པོའི་སེམས་ལ་རྨ་ཁ་བཟོས་པར་དགོངས་དག་ཞུ་དགོས་པའི་དུས་རེད།
འཛམ་གླིང་ལ་༸གོང་ས་མཆོག་ཡོད་པའི་སྐབས་འདིར་ཁོང་གདུག་པ་ཅན་གྱི་རྒྱ་ནག་ལས་སྐྱོབས་ཤིག བོད་མི་རྣམས་ལ་མ་ཉེས་ཁག་གཡོགས་བྱས་པ་གྲངས་མང་བས་ད་ཡང་བསྐྱར་མ་ཉེས་ཁག་གཡོགས་བྱ་རུ་མ་འཇུག་ཅིག
(རྩོམ་འདིའི་བྱེད་པོ་བློ་བཟང་ཡེ་ཤེས་ལགས་ནི་བོད་མི་དམངས་སྤྱི་འཐུས་ཟུར་པ་ཞིག་ཡིན་པར་མ་ཟད། དེ་སྔར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་གྱི་ཐུགས་འགན་ཡང་བཞེས་མྱོང་། ད་ལྟ་བོད་དོན་ལ་ཞིབ་འཇུག་གནང་བཞིན་ཡོད།)
