ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཁང་གི་ཕྱི་ལོ་ ༢༠༢༢ ལོ་ཧྲིལ་པོ་གཅིག་གི་སྙན་ཐོ་ཕྱིར་བསྒྲགས་གནང་བའི་ནང་རྒྱ་ནག་གཞུང་གིས་མུ་མཐུད་བོད་ནང་གི་དགོན་པ་ཁག་ལ་དམ་དྲག་དང་༧གོང་ས་མཆོག་དང་པཎ་ཆེན་རིན་པོ་ཆེ་རྣམ་གཉིས་ཀྱི་སྐུ་པར་མང་ཚོགས་ཀྱི་མཐོང་ལམ་ནས་ག་ལེར་མེད་པ་བཟོ་ཐབས་བྱེད་ཀྱི་ཡོད་སྐོར་བཀོད་འདུག
ཁ་སང་ཕྱི་ཟླ་ ༥ ཚེས་ ༡༥ ཉིན་ཨ་རིའི་ཕྱི་སྲིད་བློན་ཆེན་ཨིན་ཏོ་ནི་བྷི་ལིན་ཀིན་(Antony J. Blinken) མཆོག་དང་རྒྱལ་སྤྱིའི་ཆོས་དད་རང་དབང་གི་སྐུ་ཚབ་ར་ཤིཏ་ཧུ་སན་(Rashad Hussain)ལགས་རྣམ་གཉིས་ཀྱིས། ཕྱི་ལོ་ ༢༠༢༢ལོའི་རྒྱལ་སྤྱིའི་ཆོས་དད་རང་དབང་གི་སྙན་ཐོ་ཕྱིར་བསྒྲགས་གནང་བའི་ནང་། རྒྱ་ནག་གཞུང་གིས་བོད་དུ་ནང་ཆོས་ཉམས་ལེན་པ་རྣམས་ལ་བཙན་གནོན་བྱས་ཏེ། ༸གོང་ས་༧སྐྱབས་མགོན་ཆེན་པོ་མཆོག་དང་༸པཎ་ཆེན་རིན་པོ་ཆེ་རྣམ་གཉིས་མིག་ལམ་དུ་མཐོང་རྒྱུ་མེད་པ་བཟོ་རྒྱུའི་ཐབས་ཇུས་བྱེད་བཞིན་ཡིན་པ་ཐེར་འདོན་གནང་བ་དང་སྦྲགས། རྒྱ་ནག་གཞུང་གིས་༸གོང་ས་སྐྱབས་མགོན་ཆེན་པོ་མཆོག་གི་སྐུ་ཚབ་ལྷན་དུ་འབྲེལ་མོལ་མཐུད་ཐུབ་ཀྱི་མེད་པ་སོགས་བཀོད་འདུག་ལ། སྙན་ཐོ་འདི་ནི་ཕྱི་ལོ་ ༢༠༢༢ ཟླ་ ༡ ནས་ ༡༢ བར་གྱི་འཛམ་གླིང་རྒྱལ་ཁབ་ཁག་གི་ཆོས་དད་རང་དབང་གི་གནས་སྟངས་སྐོར་རེད་འདུག
དེ་བཞིན་སྙན་ཐོའི་ནང་། བོད་དུ་མཆོད་ཤོམ་ནང་༸གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་སྒྲིག་གཤོམ་མི་ཆོག་པ་དང་། དགོན་སྡེ་ཁག་ཏུ་རྒྱ་ནག་དམར་གཞུང་གི་མགོ་འཁྲིད་མའོ་ཙེ་ཏུང་དང་ཞི་ཅིན་ཕིང་གི་པར་འཇོག་དགོས་པའི་བཙན་སྐུལ་བྱས་དང་བྱེད་བཞིན་ཡོད་པ་དང་། དེའི་དཔང་རྟགས་སུ་འཛུམ་དཀར་དང་གཡུ་སྒྲོན་གཅེན་གཅུང་གཉིས་ཀྱིས་༸གོང་ས་རྒྱལ་བ་རིན་པོ་མཆོག་གི་སྐུ་པར་མཆོད་ཤོམ་དུ་སྒྲིག་འཇོག་བྱས་པའི་ཉེས་མིང་འོག་འཛིན་བཟུང་བྱས་ཡོད་པའི་སྐོར་དང་། དེ་བཞིན་༸གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༨༨ ལ་ཕེབས་ཀྱི་ཡོད་པ་དང་། རྒྱ་ནག་གཞུང་གིས་དེ་སྔོན་༸པཎ་ཆེན་བླ་མའི་ཡང་སྲིད་ངོས་འཛིན་ལ་ཐེ་ཇུས་བྱས་པ་ལྟར། ༸གོང་ས་མཆོག་ལའང་དེ་བཞིན་འཆར་གཞི་འདིང་ཡོད་པ་གསལ་པོ་ཡིན་སྟབས། ཨ་རིའི་གཞུང་གིས་ལོ་སྔོན་མའི་ནང་༸གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ངོས་འཛིན་གྱི་རང་དབང་ནི་བོད་མི་རང་ལ་ཡོད་པ་དང་། གཞན་གྱིས་དེའི་ཐོག་ལ་ཐད་ཇུས་བྱ་རྒྱུ་མེད་པ་མ་ཟད། ཕྱི་ལོ་ ༡༩༩༥ ལོར་རྒྱ་ནག་གཞུང་གིས་བཙན་འཁྲིད་བྱས་ཏེ་གར་སོང་ཆ་མེད་དུ་གྱུར་བའི་༸པཎ་ཆེན་རིན་པོ་ཆེ་མཆོག་གི་གནས་སྟངས་ཐད་སེམས་འཚབ་ཆེན་པོ་ཡོད་སྐོར་གསུངས་འདུག་ལ། སྙན་ཐོ་འདི་ནི་༸པཎ་ཆེན་ཆུང་སྲིད་རིན་པོ་ཆེ་རྒྱ་གཞུང་གིས་བཙན་འཁྲིད་བྱས་ཏེ་མི་ངོ་ ༢༨ འཁོར་བར་ཉིན་གཅིག་ལས་མེད་པའི་མཚམས་དེར་བཏོན་ཡོད་པ་རེད།
ཡང་སྙན་ཐོའི་ནང་བོད་ནང་དུ་དགོན་པ་དང་ཆོས་སྡེ་ཁག་ལ་དམ་དྲག་མུ་མཐུད་བྱེད་བཞིན་ཡོད་ལ། ཕྱི་ལོ་ ༢༠༡༦ ནས་བཟུང་དགོན་སྡེ་ཁག་ནས་གྲྭ་བཙུན་རྣམས་ཕྱིར་ཕུད་གཏོང་བའི་མགོ་བཙུགས་ཏེ། ད་བར་དུ་ཡ་ཆེན་སྒར་དང་བླ་རུང་སྒར་ཆོས་སྡེ་གཉིས་ནས་གྲྭ་བཙུན་བསྡོམས་པའི་ ༦༠༠༠ ནས་ ༡༧༠༠༠ བར་ཕྱིར་ཕུད་བཏང་ཟིན་ཡོད་པ་མ་ཟད། གྲྭ་བཙུན་དེ་དག་ལ་ཆོས་ཕྱོགས་ཀྱི་སློབ་གཉེར་ལ་བཀག་འགོག་བྱེད་ཀྱི་ཡོད་ཀྱང་། མང་པོ་ཞིག་ལ་བཙན་པོ་དབང་ཡོད་ཐོག་རྒྱལ་གཅེས་ཆོས་གཅེས་ཟེར་བའི་སློབ་གསོ་སྤྲད་དང་སྤྲོད་བཞིན་ཡོད་སྐོར་བཀོད་འདུག
གསར་འགོད་པ། ཉི་མ་ཚེ་རིང་།
