བོད་གཞིས་བྱེས་གཉིས་མཉམ་འཛོམས་ཡོང་བར་ཐུགས་རེ་ཡོད།

༧གོང་ས་མཆོག་གིས་ས་ག་ཟླ་བའི་ཉིན་དང་པོར་བོད་གཞིས་བྱེས་མཉམ་འཛོམས་ཡོང་བ་དང་བོད་ཀྱི་རྒྱལ་ས་ལྷ་སར་བཀའ་ཆོས་འཁྲིད་ཐུབ་པའི་ཐུགས་རེ་ཡོད་སྐོར་གསུངས་སོང་།

དེ་རིང་སྔ་དྲོ་ཆུ་ཚོད་ ༧ སྟེང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ ས་ག་ཟླ་བའི་ཉིན་དང་པོའི་མ་ཎི་དུང་སྒྲུབ་ཀྱི་ཚོགས་མགོན་དུ་ཆིབས་སྒྱུར་བསྐྱངས་ཏེ། ༧གོང་ས་མཆོག་གང་མགྱོགས་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏ་ལར་ཞབས་སོར་བདེ་བར་འཁོད་ཐུབ་པའི་ཐུགས་རེ་ཆེན་པོ་ཡོད་སྐོར་གསུངས་སོང་།

སྐབས་དེར་༧མགོན་པོ་གང་ཉིད་མཆོག་གིས། ཆོས་གྲོགས་རྣམ་པ་ལྷན་རྒྱས་ལ་ཞུ་རྒྱུར། དེ་རིང་འདིར་སྐབས་སུ་འབབ་པ་ལ་མ་ཎི་དུང་སྒྲུབ་དབུ་འཛུགས་ཞུ་ཡི་ཡོད་དུས། འཕགས་པ་སྤྱན་རས་གཟིགས་ཀྱི་གཟུང་སྔགས་བགྲང་བ་དང་ཆབས་གཅིག གཙོ་བོ་འཕགས་པ་སྤྱན་རས་གཟིགས་སྙིང་རྗེའི་ལྷ་ཡིན་སྟབས། སྙིང་རྗེ་དང་བྱང་ཆུབ་ཀྱི་སེམས་སྒོམ་རྒྱུ་གལ་ཆེན་པོ་ཞེ་དྲགས་རེད་འདུག སྤྱིར་བཏང་ང་ཚོ་བོད་པ་ཚོ་མི་གཞན་དང་བསྡུར་ན་འཛུམ་ཞིག་ཞིག་ཡོད། དེ་མུ་མཐུད་རྒྱུན་འཛིན་ཐུབ་པ་དང་མི་རབས་གསར་པ་ཚོས་རང་ཉིད་འཕགས་པ་སྤྱན་རས་གཟིགས་ཀྱི་གདུལ་བྱའི་མི་ཡིན་བསམས་ཏེ། ཆུང་ཆུང་གི་སྐབས་ནས་བཟུང་སེམས་ལ་འཇགས་ཐུབ་པ་ཞིག་ཚང་མས་གནང་ཤོག་ཨཱ

ང་ཚོས་མ་ཎི་གསོག་པའི་ཚིག་ཙམ་མ་ཡིན་པར་དོན་དག་ལ་བསམ་བློ་ཡག་པོ་བཏང་སྟེ་གང་ཐུབ་ཅི་ཐུབ་ཀྱིས་ལག་ལེན་ཐོག་གཞན་ཕན་གྱི་ལས་ལ་བརྩོན་དགོས་པ་དང་། གཞན་ལ་གནོད་སེམས་བརྣག་སེམས་སོགས་མི་བྱེད་པ་ནི་ང་ཚོ་བོད་པའི་གོམས་གཤིས་རེད་ལ། འཕགས་པ་སྤྱན་རས་གཟིགས་ཀྱི་བྱིན་རླབས་ཀྱི་རྟགས་མཚན་ཡང་དེ་དག་ཆགས་ཡོད། དེར་བརྟེན། ངོས་རང་ཚུད་པའི་ང་ཚོ་ཚང་མས་ཧུར་ཐག་འབད་ཐག་གནང་ཤོག་ཨཱ། མ་ཎི་དུང་སྒྲུབ་ཀྱི་སྙིང་བོ་ནི་བྱང་ཆུབ་ཀྱི་སེམས་སྒོམ་ནས་བསམ་བློ་ཡག་པོ་གཏོང་རྒྱུ་དེ་རེད།

ཡང་བོད་དོན་ལ་འགྱུར་བ་ཡོང་རྒྱུ་ཡིན་སྐོར་ལ་༧གོང་ས་མཆོག་གིས། བོད་ལ་འགྱུར་བ་གཏན་ཏན་ཡོང་ས་རེད། དེ་རིང་ཁ་སང་རྒྱ་ནག་ལ་འགྱུར་བ་འགྲོ་ཡི་ཡོད། ངོས་ལའང་ཚུར་འབྲེལ་བ་དེ་འདྲ་ཡོང་གི་འདུག རིང་པོར་མ་གཏོགས་པར་ང་རང་ཚོ་བོད་གཞིས་ལུས་རྒྱ་ཆེ་མི་མང་དང་ཐུག་ནས་རྩེ་ཕོ་བྲང་པོ་ཏ་ལ་དང་ལྷ་སའི་ཇོ་བོ་སོགས་སུ་ཡག་པོ་མཇལ་བ་དང་། ངོས་ནས་རྟག་པར་ལྷ་སའི་བཞུགས་ཁྲི་གླིང་ག་ཟེར་ནས་རྒྱ་ཆེན་པོ་ཞིག་ཡོད་པ་དེ་དྲན་གྱི་འདུག ངོས་ནས་དེར་སངས་རྒྱས་པའི་ཆོས་ངོ་སྤྲོད་དང་འབྲེལ་ནས། སོ་སོར་བསམ་ཚུལ་ཡོད་པ་དག་བཤད་པའི་གོ་སྐབས་ཤིག་ཕལ་ཆེ་ཡོད་པའི་བཟོ་འདུག དེ་ནས་ཚང་མས་ཧུར་ཐག་གནང་ཤོག དེ་རིང་ང་ཚོས་འཕགས་པ་སྤྱན་རས་གཟིགས་ལ་གསོལ་བ་བཏབ་ནས་མ་ཎི་དུང་སྒྲུབ་བྱེད་ཀྱི་ཡོད། ཁ་ནས་ཨོཾ་མ་ཎི་པདྨེ་ཧཱུྃ་ཞེས་ཚིག་བརྗོད་པ་ཙམ་མ་ཡིན་པར་སེམས་གཏིང་ནས་བསམ་པ་བཟང་པོ་བྱང་ཆུབ་སེམས་དང་སྟོང་ཉིད་ཀྱི་ལྟ་བ་དང་འབྲེལ་ནས་ཐབས་ཤེས་ཟུང་འབྲེལ་གྱི་ཐོག་ནས་ག་ཚོད་ཐུབ་ཐུབ་ཀྱིས་བློ་སྦྱོང་གནང་ཤོག ངོས་རང་གིས་ཀྱང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་གྱི་ཡོད། ཁྱེད་རང་ཚོ་ངོས་ཀྱི་ཆོས་གྲོགས་ཡིན་པས། ཞོགས་པ་ཡར་ལངས་པ་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་ཤོག ཅེས་གསུངས།

གསར་འགོད་པ། སྐལ་བཟང་སྦྱིན་པ།