༧གོང་ས་མཆོག་ལ་དྭགས་སུ་ཆིབས་བསྒྱུར་བསྐྱང་རྒྱུ་རེད་འདུག

༧གོང་ས་མཆོག་ལ་དྭགས་སུ་ཆིབས་བསྒྱུར་བསྐྱང་རྒྱུ་གཏན་འཁེལ་ཡོད་ཀྱང་ག་དུས་ཕེབས་མིན་གྱི་ཟླ་ཚེས་སོགས་ད་དུང་གཏན་འཁེལ་བྱུང་མི་འདུག

ཁ་སང་ཇཱ་མུ་ཉིན་རེའི་གསར་ཁང་(Daily Excelsior) གིས་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་སུ་ཆིབས་བསྒྱུར་བསྐྱང་རྒྱུ་ཡིན་པའི་གནས་ཚུལ་སྤེལ་ཡོད་པ་ལྟར། འདི་གའི་གསར་འགོད་པས་གནས་ཚུལ་དེའི་སྐོར་ལ་དགའ་ལྡན་ཕོ་བྲང་གི་དྲུང་ཆེ་དང་འབྲེལ་མཐུད་པ་ཚེ་བརྟན་བསམ་འགྲུབ་ལགས་སུ་བཀའ་འདྲི་ཞུས་སྐབས་ཁོང་གིས། ༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་སུ་ཆིབས་བསྒྱུར་བསྐྱང་རྒྱུ་ཡིན་པ་གཏན་འཁེལ་ཡོད་ཀྱང་། ག་དུས་ཕེབས་མིན་གྱི་ཟླ་ཚེས་སྐོར་ལ་གཏན་འཁེལ་ཅི་ཡང་བྱུང་མེད་སྐོར་འགྲེལ་བརྗོད་གནང་བྱུང་།

ཇཱ་མུ་ཉིན་རེའི་གསར་ལམ་དུ་ཐོན་པའི་གནས་ཚུལ་ནང་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་སུ་དབྱར་ཁའི་ཟླ་གཅིག་ཙམ་རིང་བཞུགས་རྒྱུ་ཡིན་ཅིང་། ད་ལྟའི་ཆར་ལ་དྭགས་ནང་པ་ཚོགས་པ་དང་། ལ་དྭགས་རང་སྐྱོང་རི་ལྗོངས་ཡར་རྒྱས་ཚོགས་པ་གཉིས་ཀྱིས་ཆིབས་བསྒྱུར་གྱི་ལས་དོན་བྱེད་ཕྱོགས་ཐད་གོ་སྒྲིག་གནང་བཞིན་ཡོད་སྐོར་བརྗོད་འདུག

གནས་ཚུལ་ནང་ད་དུང་། ལ་དྭགས་ནང་པ་ཚོགས་པའི་ཚོགས་གཙོ་ཐུབ་བསྟན་ཚེ་དབང་ལགས་ཀྱིས། ལ་དྭགས་ཀྱི་གནད་ཡོད་མི་སྣ་ཁག་ཅིག་གིས་དྷ་ས་དང་ལྡི་ལི་ནང་པའི་ཚོགས་ཆེན་སྐབས་སུ་ཐེངས་གསུམ་རིང་ཆེད་བཅར་གྱིས་༧གོང་ས་མཆོག་ལ་ཆིབས་བསྒྱུར་བསྐྱང་རྒྱུའི་གསོལ་འདེབས་སྙན་སེང་ཞུས་པ་བཞིན་བཀའ་འཁྲོལ་བྱུང་ཡོད་ཀྱང་། ད་དུང་ག་དུས་ཕེབས་མིན་གྱི་ཟླ་ཚེས་སྐོར་ལ་དགའ་ལྡན་ཕོ་བྲང་གི་ཡིག་ཚང་ནས་གཏན་འཁེལ་བྱུང་མེད་ཅིང་། ཕྱི་ཟླ་བདུན་པའི་ཟླ་མཇུག་དང་ཕྱི་ཟླ་བརྒྱད་པའི་ཟླ་མགོ་ཙམ་ལ་ཆིབས་བསྒྱུར་གནང་སྲིད་ལ། ༧གོང་ས་མཆོག་གི་ཆིབས་བསྒྱུར་གྱི་དུས་ཡུན་ནང་ལ་དྭགས་ཀྱི་ས་ཁུལ་ཁག་ཅིག་ཏུ་མཛད་འཆར་སྐྱོང་རྒྱུ་ཡིན་པ་མ་ཟད། དགོན་སྡེ་ཁག་ཅིག་གི་ནང་དུ་ཆོས་ལུགས་ཀྱི་ཆོ་ག་ཁག་བསྐྱང་རྒྱུ་ཡིན་པའི་གནས་ཚུལ་སོགས་དུས་ཐོག་ཏུ་གསར་ལམ་ཁག་ཏུ་གཏོང་རྒྱུ་ཡིན་སྐོར་བརྗོད་འདུག ཡང་རི་ལྗོངས་ཡར་རྒྱས་ཚོགས་པའི་ཚོགས་གཙོ་བཀྲ་ཤིས་རྒྱལ་མཚན་ལགས་ཀྱིས་ཀྱང་༧གོང་ས་མཆོག་ལ་དྭགས་སུ་ཆིབས་བསྒྱུར་བསྐྱང་རྒྱུ་གཏན་ཁེལ་ཡོད་པ་མ་ཟད། ༧གོང་ས་མཆོག་གི་ཆིབས་བསྒྱུར་གྱི་ལས་དོན་བྱེད་ཕྱོགས་ལ་གྲ་སྒྲིག་བྱེད་མུས་ཡིན་སྐོར་བརྗོད་འདུག

འདས་ལོའི་ཕྱི་ཟླ་བདུན་པའི་ནང་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་སུ་ཆིབས་བསྒྱུར་བསྐྱངས་ཏེ་གླེ་ཞི་བའི་ཚལ་ནས་སྤྱོད་མཇུག་ཆེན་མོའི་བཀའ་ཆོས་འཕྲོ་སྐྱོང་བསྩལ་ཡོད་པ་དང་། ལ་དྭགས་ཟངས་དཀར་དང་ལིང་ཤེད་དགོན་པ་སོགས་སུའང་ཆིབས་སྒྱུར་བསྐྱངས་གནང་མཛད་ཡོད་འདུག

མཛད་འཆར་ལྟར་ན། ཟླ་འདིའི་ཕྱི་ཚེས་ ༢༤ ཉིན་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ།༸གོང་ས་རྒྱལ་བ་རིན་པོ་ཆེ་མཆོག་ལ་ཐེག་ཆེན་སྲོལ་རྒྱུན་མི་ཉམས་རྒྱུན་འཛིན་ཐེབས་རྩ་ཁང་(the Foundation for the Preservation of the Mahayana Tradition)གིས་ཇི་ལྟར་གསོལ་བ་བཏབ་པ་ལྟར་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག དེ་བཞིན། ཟླ་འདིའི་ཕྱི་ཚེས་ ༣༠ ནས་ཉིན་གཉིས་རིང་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་མཆོག་གིས་བོད་རིགས་གཞོན་སྐྱེས་རྣམས་ལ་སྐྱབས་འགྲོ་ངོ་སྤྲོད་དང་། སེམས་བསྐྱེད། རྗེ་བཙུན་འཇམ་པའི་དབྱངས་ཀྱི་རྗེས་གནང་གི་གསུང་ཆོས་བསྩལ་རྒྱུ་ཡིན་འདུག ཕྱི་ཟླ་ ༦ ཚེས་ ༤ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་མཆོག་གིས་ས་ག་ཟླ་བའི་དུས་ཆེན་དང་བསྟུན་ནས་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མ་དང་སེམས་བསྐྱེད་ཀྱི་གསུང་ཆོས་བསྩལ་རྒྱུ་བཅས་ཡིན་འདུག

གསར་འགོད་པ། བྱམས་པ་ཚེ་རིང་།