རྒྱ་ནག་གཞུང་གིས་ཀློད་གྲོལ་བཏང་བའི་རྔ་བ་ཀིརྟི་དགོན་གྱི་དགེ་བཤེས་བསོད་ནམས་རྒྱ་མཚོ་ལགས་དང་ཁོང་གི་སྲིང་མོ་ཚེ་རིང་ལྷ་མོ་ལགས་གཉིས་ཀྱི་གཟུགས་གཞིའི་གནས་སྟངས་ཧ་ཅང་སྐྱོ་བོར་གྱུར་འདུག
རྔ་བ་ཀིརྟི་དགོན་གྱི་དགེ་བཤེས་བསོད་ནམས་རྒྱ་མཚོ་ལགས། འགྲེལ་ཡོད་ཀྱིས་འདི་གར་བོད་ནས་མཁོ་སྤྲོད་བྱས།
རྔ་བ་ཀིརྟི་དགོན་པའི་དགེ་བཤེས་བསོད་ནམས་རྒྱ་མཚོ་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དང་༧སྐྱབས་རྗེ་ཀིརྟི་རིན་པོ་ཆེ་མཆོག་རྣམས་སུ་བསྔོ་རྟེན་སོགས་ཕུལ་བའི་ཉེས་མིང་འོག ཕྱི་ལོ་ ༢༠༢༡ ཟླ་ ༤ ཚེས་ ༣ ཉིན་རྒྱ་ནག་གཞུང་གིས་འཛིན་བཟུང་བྱས་ཏེ་ལོ་གཉིས་བཙོན་འཇུག་ཁྲིམས་ཐག་བཅད་ཡོད་པ་དང་། ཟླ་འདིའི་ཕྱི་ཚེས་ ༢༥ ཉིན་བཙོན་འཇུག་དུས་ཡུན་ཚང་ནས་ཀློད་གྲོལ་བྱས་ཡོད་ཀྱང་། བཙོན་ཁང་དུ་འཚོ་བའི་མཐུན་རྐྱེན་དང་གཙང་སྦྲ་འཕྲོད་བསྟེན་ཞན་པའི་ཁར། ངལ་རྩོལ་སྒྱུར་བཀོད་དུ་བཏང་བར་བརྟེན་ཁོང་དང་ཁོང་གི་སྲིང་མོ་རྒན་པ་ཚེ་རིང་ལྷ་མོ་གཉིས་ཀྱི་གཟུགས་གཞིའི་གནས་སྟངས་ཧ་ཅང་སྐྱོ་བོར་གྱུར་ཡོད་འདུག
འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར། སྤྱིར་རྒྱ་ནག་གཞུང་གིས་ཕྱི་ལོ་ ༢༠༢༡ ལོར་དགེ་བཤེས་བསོད་ནམས་རྒྱ་མཚོ་དང་ཁོང་གི་སྲིང་མོ་ཚེ་རིང་ལྷ་མོ། དེ་བཞིན་ཀིརྟི་དགོན་གྱི་གྲྭ་རྭ་ཆུང་དགེ་འདུན་གསུམ་གྱིས་བསྔོ་རྟེན་སོགས་ཕུལ་ལུགས་བཤད་ནས་འཛིན་བཟུང་བཀག་ཉར་བྱས་ཡོད་ཅིང་། ཁོང་རྣམས་ལོ་གཅིག་ལྷག་རིང་བཀག་ཉར་གྱིས་འདྲི་བརྩད་བྱས་མཐར། དགེ་བཤེས་བསོད་ནམས་རྒྱ་མཚོ་ལགས་ལོ་གཉིས་དང་། གྲྭ་རྭ་ཆུང་དགེ་འདུན་ལགས་སུ་ལོ་གསུམ་དང་ཟླ་དྲུག་གི་བཙོན་འཇུག་ཁྲིམས་ཐག་བཅད་དེ། ཁ་སང་ཕྱི་ཚེས ༢༥ ཉིན་དགེ་བཤེས་བསོད་ནམས་རྒྱ་མཚོ་ལགས་ཀྱི་བཙོན་འཇུག་དུས་ཡུན་ཚང་ནས་ཀིརྟི་དགོན་པར་ཕྱིར་ཕེབས་ཡོད་སྐོར་འགྲེལ་བརྗོད་གནང་བྱུང་།
ཡང་ཁོང་གིས། རྒྱ་ནག་གཞུང་གིས་དགེ་བཤེས་བསོད་ནམས་རྒྱ་མཚོ་ལགས་ཀློད་གྲོལ་བཏང་ཡོད་ཀྱང་། ཁོང་གི་གཟུགས་པོ་སྐམ་པོ་ཆགས་ཡོད་པའི་ཁར། གཟུགས་གཞིའི་གནས་སྟངས་ཧ་ཅང་སྐྱོ་བོར་གྱུར་ཡོད་ཅིང་། དེ་བཞིན་ཟླ་གཅིག་ཙམ་གྱི་གོང་དུ་ཁོང་གི་སྲིང་མོ་རྒན་པ་ཚེ་རིང་ལྷ་མོ་ལགས་ཀྱང་ཀློད་གྲོལ་བཏང་ཡོད་ཀྱང་། རྒྱ་ནག་གཞུང་གིས་ཁོང་མོ་ལས་གནས་ནས་ཕྱིར་ཕུད་བཏང་ཡོད་པ་མ་ཟད། གཟུགས་གཞིའི་གནས་སྟངས་སྐྱོ་བོར་གྱུར་ནས་ད་ལྟ་ཁྲིན་ཏུའུ་རུ་སྨན་བཅོས་བྱེད་མུས་ཡིན་སྐོར་འགྲེལ་བརྗོད་གནང་བྱུང་།
དགེ་བཤེས་བསོད་ནམས་རྒྱ་མཚོ་ལགས་ཆུང་དུས་ནས་རྔ་ཡུལ་ཀིརྟི་དགོན་དགེ་ལྡན་ལེགས་བཤད་གླིང་གི་ཆོས་སྒོར་ཞུགས་ཏེ། ཨ་ཁུ་བློ་བསྟན་ལགས་ཀྱི་དྲུང་ནས་གཞུང་ཆེན་བཀའ་པོད་ལྔར་སློབ་གཉེར་གནང་ནས་དགེ་བཤེས་ཀྱི་མཚན་བཏགས་བཞེས་ཡོད་ཅིང་། ཁོང་གིས་ཀིརྟི་དགོན་པའི་དགེ་བསྐོས་དང་ཆོས་ལུགས་དོ་དམ་ཨུ་ཡོན་ལྷན་ཁང་གི་ལས་འགན་ཁུར་མྱོང་འདུག་ལ། ནམ་རྒྱུན་དགོན་པ་དང་འབྲེལ་བའི་ཆབ་སྲིད་ཀྱི་དཀའ་ངལ་མང་དག་ཅིག་ལ་གདོང་ལེན་གནང་སྟེ། ཀིརྟི་དགོན་པའི་དགེ་བཤེས་ཤེས་འཇོན་གཉིས་ལྡན་ཞིག་ཡིན་འདུག
གསར་འགོད་པ། དཔལ་ལྡན།
