ཧི་མ་ལ་ཡའི་རི་རྒྱུད་ཀྱི་ནང་པའི་སྤྱི་ཚོགས་ནང་ས་ག་ཟླ་བ་གཙོ་བྱས་པའི་ནང་པའི་དུས་ཆེན་ནམ་ཡིན་ལ་ཤ་ཉོ་ཚོང་བྱེད་ཆོག་གི་མེད་ཁར་ཟ་ཁང་དག་གིས་ཀྱང་ཤ་ཡོད་ཟས་རིགས་བཙོང་ཆོག་གི་མེད་པ་རེད།
དེའི་ཐད་རྒྱ་གར་མངའ་སྡེ་འབྲས་གཞུང་དགོན་གནས་ལས་ཁུངས་ཀྱིས། ཟླ་འདིའི་ཕྱི་ཚེས་ ༢༧ ཉིན་ནས་ཕྱི་ཟླ་ ༦ ཚེས་ ༤ བར་ཤའི་ཚོང་ཁང་ཁག་གིས་ཉའི་རིགས་འབུ་སྲིན་གྱི་མཚོན་པའི་སེམས་ཅན་གྱི་ཤ་བཙོང་མི་ཆོག་པའི་བཀའ་རྒྱ་བསྒྲགས་འདུག་པ་དང་། གལ་སྲིད་ཤ་འཚོང་མཁན་གྱི་རིགས་བྱུང་ཚེ། ཉེས་ཆད་ཧིན་སྒོར་ ༡༠༠༠ ཡས་མས་གཅོད་རྒྱུ་ཡིན་སྐོར་བརྗོད་འདུག
འདི་གའི་གསར་འགོད་པས་ཁ་པར་བརྒྱུད་ཧི་མ་ལ་ཡའི་རི་རྒྱུད་ཀྱི་ས་གནས་མི་མང་ཁག་ཅིག་ལ་བཀའ་འདྲི་ཞུས་སྐབས། འབྲས་ལྗོངས་སུ་ཆོས་རྒྱལ་གྱི་སྐབས་ནས་བཟུང་ནང་པའི་དུས་ཆེན་ཚེས་ ༡༠ དང་ ༡༥ ། དེ་བཞིན་ཚེས་ ༣༠ སོགས་ནང་པའི་དུས་ཆེན་ནམ་ཡིན་ལ་ཤ་བཙོང་ཆོག་གི་མེད་པ་དང་། ཨ་རུ་ན་ཅལ་མངའ་སྡེའི་ནང་ཕྱི་ལོ་ ༢༠༠༩ ལོར་༧གོང་ས་ཆིབས་སྒྱུར་བསྐྱངས་རྗེས། མངའ་སྡེ་དེའི་ནང་༧གོང་ས་མཆོག་གི་བླ་གཟའ་ལྷག་དཀར་གྱི་གཙོས་ནང་པའི་དུས་ཆེན་ཁག་ཏུ་ཤ་བཙོང་གི་ཆོག་གི་མི་འདུག་ལ། ཡང་ལ་དྭགས་ཀྱི་གཙོས་རྒྱ་གར་གྱི་བྱང་ཕྱོགས་སུ་ཆགས་པའི་ནང་པའི་སྤྱི་ཚོགས་ནང་ཤ་བཙོང་ཆོག་གི་མེད་པ་མ་ཟད། ནང་པའི་དུས་ཆེན་ནམ་ཡིན་ལ་ཟ་ཁང་ཁག་གིས་ཤ་ཡོད་ཟས་རིགས་བཙོང་ཆོག་གི་མེད་པ་རེད་འདུག
གསར་འགོད་པ། སྐལ་བཟང་སྦྱིན་པ།
