༧གོང་ས་རྒྱལ་བ་རིན་པོ་ཆེ་མཆོག་ནས་སྔགས་འདོན་པ་དང་སྦུགས་དཀྲོལ་བ་སོགས་བྱེད་ཀྱི་ཡོད་མེད་གང་ཡང་སེམས་བཟང་པོ་བྱེད་རྒྱུ་དེ་གཙོ་ཆེ་ཤོས་ཡིན་པས་སྙིང་རྗེ་སྒོམ་པར་དོ་སྣང་མེད་པའམ་ལྷོད་གཡེང་དུ་གཏོང་རྒྱུ་མེད་སྐོར་བཀའ་སློབ་བསྩལ།
དྷ་ས་ནང་ཆོས་གོ་སྒྲིག་ཚོགས་ཆུང་གིས་ཇི་ལྟར་གསོལ་འདེབས་ཞུས་པ་ལྟར། དེ་རིང་ཕྱི་ཚེས་ ༣༠ ནས་ཉིན་གཉིས་རིང་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་གཞོན་སྐྱེས་རྣམས་གཙོ་བོར་གྱུར་བའི་དད་ལྡན་དོན་གཉེར་ཅན་རྣམས་ལ་ནང་ཆོས་ངོ་སྤྲོད་དབུ་འཛུགས་གནང་སོང་། ཐོག་མར་༧གོང་ས་རྒྱལ་བ་རིན་པོ་ཆེ་མཆོག་ནས། དེ་རིང་བོད་རིགས་གཞོན་ནུ་རྣམས་གཙོ་བོ་བྱས་ནས་སེམས་བསྐྱེད་ཀྱི་སྐོར་བཤད་པར་རེ་འདུན་བྱུང་བ་རེད། སེམས་བསྐྱེད་ཟེར་བ་ཞེ་བོ་བཟང་པོ་ཞིག་རེད། སེམས་པ་བཟང་པོ་བྱས་ནས་སྤྱི་སེམས་འཁྱེར་རྒྱུ་དེ་ཞེ་བོ་རྩ་ཆེན་པོ་རེད། ངའི་ངོས་ནས་ཆ་བཞག་པ་ཡིན་ནའང་། ཞོགས་པར་ཡར་ལངས་པ་དང་། སེམས་བསྐྱེད་ལ་བསམ་བློ་གཏོང་གི་ཡོད། ནམ་མཁའི་མཐའ་དང་མཉམ་པའི་སེམས་ཅན་ཡོངས་སུ་རྫོགས་པ་དང་། བྱེ་བྲག་ཏུ་མིའི་འགྲོ་བ་གཙོ་བོར་གྱུར་བའི་སེམས་ཅན་གྱི་དོན་དུ་ཉིན་ལྟར་སྨོན་ལམ་འདེབས་བཞིན་ཡོད། དེ་དངོས་གནས་དྲང་གནས་སེམས་སུ་ཞི་བདེ་སླེབས་རྒྱུ་དང་། སེམས་ལྷོད་ལྷོད་ཆགས་པར་ཕན་ཐོགས་འདུག ངོས་ཀྱིས་བྱང་ཆུབ་ཀྱི་སེམས་སྒོམ་པར་གལ་ཆེན་པོ་བརྩི་ཡི་ཡོད། དེའི་གྲོགས་བྱེད་མཁན་སྟོང་ཉིད་ཀྱི་ལྟ་བ་རེད། ཉིན་ལྟར་བསམ་བློ་གཏོང་བཞིན་ཡོད། སེམས་བཟང་པོ་བྱེད་པ་ཞེ་བོ་ཕན་ཐོགས་འདུག ངོས་ཀྱིས་སྨོན་ལམ་འདེབས་པ་དེའང་། ཇི་སྲིད་ནམ་མཁའ་གནས་པ་དང་།། འགྲོ་བ་ཇི་སྲིད་གནས་གྱུར་བ།། དེ་སྲིད་བདག་ནི་གནས་གྱུར་ནས།། འགྲོ་བའི་སྡུག་བསྔལ་སེལ་བར་ཤོག། ཅེས་འགྲོ་བའི་སྡུག་བསྔལ་མ་སེལ་བར་དུ་སེམས་ཅན་གྱི་དོན་བྱ་རྒྱུ་དེ་ཡིན། དེ་འདྲའི་སེམས་ཤུགས་ཞེ་བོ་འདུག ངའི་ངོས་ནས་ཆ་བཞག་ན་སེམས་ལྷོད་ལྷོད་ཆགས་པའི་རྐྱེན་ལ་བརྟེན་ནས་དགོང་མོ་གཉིད་ཡག་པོ་ཁུག སེམས་ལ་ཁོང་ཁྲོ་ཟ་བ་དང་འཁྲུག་པ་སོགས་ཁྱོན་ནས་ཡོང་གི་མི་འདུག སེམས་ལྷོད་ཤིག་ཤིག་ངང་ནས་བསྡད་ཀྱི་འདུག དགོང་མོ་ཉལ་དུས་སེམས་ལྷོད་ལྷོད་བསྡད་ཀྱི་འདུག བོད་གངས་ཅན་གྱི་ལྷ་སྐལ་འཕགས་པ་སྤྱན་རས་གཟིགས་སྤྱི་བོར་སྒོམ་གྱི་ཡོད་ལ། དེ་ནས་མ་ཎི་བགྲང་བཞིན་ཉལ་གྱི་ཡོད། དངོས་ཡོད་གནས་ཚུལ་གྱི་སྟེང་ནས་སེམས་ལྷོད་ལྷོད་ཆགས་དུས། ལུས་ཀྱི་འབྱུང་བ་དེ་དག་ཀྱང་རང་བཞིན་གྱིས་བདེ་བོ་ཆགས་ནས་ཕན་ཐོགས་ཞེ་བོ་འདུག བོད་གངས་ཅན་པར་དམིགས་བསལ་གྱིས་འཕགས་མཆོག་ཕྱག་ན་པདྨོའོ་འདུལ་ཞིང་ཟེར་གྱི་རེད་ལ། དམིགས་བསལ་གྱིས་སྤྱན་རས་གཟིགས་ལ་འབྲེལ་བ་ཡོད་བསྡད་པ་ཞིག་རེད། རྒྱ་ནག་ལ་ཆ་བཞག་ནའང་རི་བོ་རྩེ་ལྔ་དང་འབྲེལ་ནས་འཇམ་པའི་དབྱངས་ལ་འབྲེལ་བ་ཡོད་བསྡད་པ་བཤད་ཀྱི་ཡོད། ང་ཚོ་བོད་གངས་ཅན་པ་འཕགས་པ་སྤྱན་རས་གཟིགས་དང་ཐུན་མོང་མ་ཡིན་པའི་འབྲེལ་བ་ཡོད་བསྡད་དུས། ངའི་ངོས་ནས་འཕགས་པ་སྤྱན་རས་གཟིགས་ལ་གསོལ་བ་འདེབས་པ་དང་སྤྱི་བོར་སྒོམ་བཞིན་ཡོད། ཅེས་གསུངས་སོང་།
ཡང་མགོན་པོ་གང་ཉིད་ཀྱིས། དེ་རིང་འདིར་བོད་རིགས་གཙོ་བོ་གྱུར་བའི་དད་ལྡན་གང་འཚམ་ཞིག་འཛོམས་ཡོད་པ་རེད། སང་ཉིན་ཤེས་རབ་ཀྱི་ལྷ་འཇམ་པའི་དབྱངས་ཀྱི་རྗེས་གནང་ཡོད། གཞོན་སྐྱེས་ཚོའི་ཤེས་རབ་གོང་ནས་གོང་དུ་འཕེལ་བར་གཙོ་བོ་དམིགས་ནས་རྗེ་བཙུན་འཇམ་པའི་དབྱངས་ཀྱི་རྗེས་གནང་ཡིན། དེ་རིང་འདིར་སེམས་བསྐྱེད་སྐོར་ནས་རེད། རྗེ་རིན་པོ་ཆེ་ལམ་རིམ་ཆེན་མོའི་ནང་དུ་སེམས་བསྐྱེད་ཀྱི་སྐོར་ཡོད་ཀྱང་། དེ་རྒྱས་བ་ཞེ་དྲགས་ཡིན་པས་འདིར་དགོས་ཀྱི་མི་འདུག གང་ལ་སེམས་ཀྱི་དམ་པ་རང་བཞིན་དེ།། བསྐྱེད་པ་དེ་ཡི་ཀུན་ལ་ཕྱག་འཚལ་ཞིང་།། གང་ལ་གནོད་པ་བྱེད་ཀྱང་དེ་འབྲེལ་བ།། དེ་ཡི་འབྱུང་གནས་དེ་ལ་སྐྱབས་སུ་མཆི།། ཞེས་སྤྱོད་འཇུག་ལས་གསུངས་བ་བཞིན། བྱང་ཆུབ་ཀྱི་སེམས་ལ་གཞན་ཕན་བློ་མཐའ་གཅིག་ཏུ་ཡོད་བསྡད་པ་དེ་ཕྱག་འཚལ་འོས་པ་རེད། བྱང་ཆུབ་ཀྱི་སེམས་བཟང་པོ་ཡོད་པར་ཕར་གནོད་པ་བསྐྱལ་ཡང་། གནོད་ལེན་གནོད་པས་མི་བྱེད་པར་ཚུར་ཕན་ཐོགས་པ་ཡོང་བསྡད་ཀྱི་ཡོད། འཛམ་གླིང་དུ་བདེ་སྐྱིད་ཡོང་བའི་རྩ་བ་སེམས་པ་བཟང་པོ་རེད། སེམས་པ་བཟང་པོ་ཡོད་ན་སོ་སོའི་སེམས་སྐྱིད་པ་དང་། ཐ་ན་གཉིད་ཀྱང་སྐྱིད་པ་རེད། སེམས་འཁྲུག་བསྡད་ན་གཉིད་དུས་ཀྱང་དབུགས་རིང་པོ་བཏང་ནས་ཕར་སློག་ཚུར་སློག་བྱས་ཏེ་མ་སྐྱིད་པ་བྱུང་གི་རེད། གཞན་ཕན་གྱི་བློ་ཡག་པོ་ཞིག་ཡོད་ན་སེམས་ལྷོད་བཤིག་བཤིག་བསྡད་རྒྱུ་འབྱུང་གི་རེད། བྱང་ཆུབ་ཀྱི་སེམས་ཟེར་བ་སངས་རྒྱས་ཀྱི་གོ་འཕངས་ཐོབ་པར་ཨ་ཅང་ཅང་། ཉིན་རེ་བཞིན་དུ་སེམས་ལྷོད་ལྷོད་ཆགས་པར་ཁྱད་པར་ཞེ་བོ་འདུག རང་གཞན་དོན་ནི་རབ་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱི།། རང་དོན་བསྒྲུབ་ན་བྱང་ཆུབ་ཀྱི་སེམས་སྒོམ་རྒྱུ་རེད། གཞན་དོན་བསྒྲུབ་ཡང་བྱང་ཆུབ་ཀྱི་སེམས་སྒོམ་རྒྱུ་རེད། འཕྲལ་གྱི་བདེ་བ་བྱང་ཆུབ་ཀྱི་སེམས་སྒོམ་རྒྱུ་རེད། ཚེ་རབས་ནས་ཚེ་རབས་བདེ་བ་དང་། མངོན་པར་རྫོགས་པ་སངས་རྒྱས་པར་བྱང་ཆུབ་ཀྱི་སེམས་ལ་བརྟེན་ས་ཡོང་གི་ཡོད། བྱང་ཆུབ་སེམས་ནི་སེམས་པ་བཟང་པོའི་མཐར་ཐུག་རེད། སེམས་ཅན་ཐམས་ཅད་ལ་སྙིང་ཁོངས་རིས་པའི་གཏིང་ནས་བརྩེ་བའི་བློ་ཡག་པོ་སླེབས་པ་དེ་ཞེ་བོ་རྩ་ཆེན་པོ་རེད། བྱང་ཆུབ་ཀྱི་སེམས་ཡོད་ན་མཐའ་གཅིག་ཏུ་ཕན་སེམས་ཡོད་དུས། གང་ཟག་ཁ་ཤས་ཀྱི་ཕྱིན་ཅི་ལོག་པའི་གོ་བ་ལེན་པ་དང་། དཔེར་ན། ལྷ་དང་། མི། ལྷ་མ་ཡིན་གྱི་ནང་དུ་སེམས་མི་སྐྱིད་པ་དེ་འདྲ་ཡོང་གི་ཡོད་ཀྱང་། སྙིང་རྗེ་བའི་ཡུལ་རེད་མ་གཏོགས། ང་ལ་མ་དགའ་བ་བྱེད་ཀྱི་འདུག་བསམ་པ་རྩ་བ་ཉིད་ནས་བྱེད་ཀྱི་མི་འདུག སེམས་ཅན་ཀུན་ལ་བརྩེ་བའི་བློ་བསྐྱེད་པ་ལས། ང་ལ་མི་དགའ་བ་བྱེད་ཀྱི་འདུག་བསམ་རྒྱུ་མི་འདུག ཁ་གཏོང་བའི་བསམ་པ་དེ་རྨོངས་པའི་དབང་གིས་བྱས་པ་ཞིག་ཡིན་པ་དང་། ལྷག་པར་དུ་སྙིང་རྗེ་ཆེན་པོ་སྐྱེ་དགོས་པ་ཞིག་ཆགས་ཀྱི་འདུག བྱང་ཆུབ་སེམས་ཀྱི་ཕན་པའི་བསམ་པ་ཞེ་བོ་རྩ་ཆེན་པོ་རེད། ངོས་ཀྱིས་བྱང་ཆུབ་ཀྱི་སེམས་ཞེ་བོ་སྒོམ་བཞིན་ཡོད། བྱང་ཆུབ་ཀྱི་སེམས་ལ་མྱོང་བ་གང་ལ་གང་འཚམ་ཆགས་བསྡད་ཡོད། རྒྱ་གཞུང་གིས་བོད་མིར་མནར་གཅོད་གཏོང་བ་དང་། སྐུ་གསུང་ཐུགས་རྟེན་བཤིག་པ་དེ་འདྲ་བྱས་དུས། ལྷག་པར་བརྩེ་བའི་བློ་སྐྱེ་བ་གཏོགས། དེ་ལ་ཁོང་ཁྲོ་ཟ་བ་དང་། སེམས་མ་སྐྱིད་པ་ཁྱོན་ནས་མི་འདུག དེ་ཞེ་བོ་རྩ་ཆེན་པོ་རེད། བོད་མི་ཚོ་ཆུང་དུས་ནས་ལྷན་སྐྱེས་ཀྱིས་འབུ་མི་གསོད་པ་དང་། སེམས་བཟང་པོ་བྱེད་པའི་གོམས་གཤིས་ཡོད། ངོས་ཀྱིས་ཆུང་དུས་ནས་འབུ་མི་གསོད་པའི་ཡིད་གཟབ་བྱེད་ཀྱི་ཡོད། རྒྱ་མི་རིགས་ཀྱིས་བོད་པར་སྡང་སེམས་བྱས་པར་ལྷག་པར་དུ་བརྩེ་བའི་བློ་སྐྱེ་བཞིན་འདུག ཞེ་སྡང་སྐྱེ་སའི་ཡུལ་ལ་བརྩེ་བ་སྐྱེ་ཡོང་དུས། ཞེ་སྡང་ལངས་སའི་གཞི་མེད་པ་ཆགས་ཀྱི་འདུག ང་ཚོས་བྱང་ཆུབ་ཀྱི་སེམས་ལ་དང་དོད་བྱ་རྒྱུ་གལ་ཆེན་པོ་རེད། ཅེས་གསུངས་སོང་།
དེ་བཞིན་༧མགོན་པ་གང་ཉིད་ཀྱིས། ཁ་ནས་སྔགས་འདོན་པ་དང་། སྦུགས་དཀྲོལ་བ་སོགས་བྱེད་ཀྱི་ཡོད་ན་རེད། མེད་ནའང་རེད། སྙིང་པོ་སེམས་བཟང་པོ་བྱེད་རྒྱུ་གཙོ་ཆེ་ཤོས་རེད། སྙིང་རྗེ་སྒོམ་པར་དོ་སྣང་མེད་པའམ་ལྷོད་གཡེང་དུ་བཏང་ནས་ལྷ་སྒོམ་པ་དང་། རྔ་བརྡུང་བ། སྦུགས་དཀྲོལ་བ། ལྷའི་ནང་ནས་ལྷ་དྲག་པོར་སེམས་ཐག་ཉེ་བོ་བྱེད་པ་དེ་འགྲིག་མེད་སྐོར་བཀའ་སློབ་གནང་སོང་།
གསར་འགོད་པ། བྱམས་པ་ཚེ་རིང་།
