བཙན་བྱོལ་བོད་མིའི་གཞིས་ཆགས་སྲ་བརྟན་དང་བོད་ནས་རྗེས་འབྱོར་བ་རྣམས་ལ་དམིགས་ཏེ། རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་ཕན་བདེ་གཞིས་གྲོང་དུ་རྗེས་འབྱོར་ཁྱིམ་ཚང་ ༤༠ ཁང་པ་བགོ་འགྲེམས་གནང་འདུག
ཁ་སང་ཕྱི་ཚེས་ ༣༠ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་གཞིས་གྲོང་བཅུ་པ་གསར་རྒྱག་གི་ལས་གཞི་ཁྱོན་ཡོངས་ནས་གྲུབ་སྟེ། ༧གོང་ས་མཆོག་གིས་གསོལ་སྩལ་མཛད་པའི་ཕན་བདེ་གཞིས་གྲོང་དངོས་སུ་དབུ་འབྱེད་གནང་བའི་མཛད་སྒོ་ཚོགས་ཡོད་ཅིང་། མཛད་སྒོའི་སྟེང་བོད་ནས་ཕེབས་པའི་རྗེས་འབྱོར་ཁྱིམ་ཚང་ ༤༠ ལ་རྒྱན་ཤོག་གི་ལམ་ནས་ཁང་པ་བགོ་འགྲེམས་བྱས་ཡོད་པ་ལྟར་དོ་བདག་སོ་སོར་ཁང་པའི་ལྡེ་མིག་བདག་སྤྲོད་བྱས་ཡོད་འདུག
འདི་གའི་གསར་འགོད་པས་ཁ་པར་བརྒྱུད་ནང་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་ས་གནས་མགོ་འཛིན་ལྷག་པ་སྒྲོལ་མ་ལགས་སུ་ལས་གཞི་དེ་ག་དུས་ནས་མགོ་བཙུགས་ཡོད་སྐོར་བཀའ་འདྲི་ཞུས་སྐབས། འཛུགས་སྐྲུན་གྱི་ལས་གཞི་དེ་ཕྱི་ལོ་ ༢༠༢༠ ཡི་ཟླ་དང་པོའི་ནང་མགོ་བཙུགས་པ་རེད། འོན་ཀྱང་། ལོ་དེའི་ཕྱི་ཟླ་ ༣ པའི་ནང་ཏོག་དབྱིབས་གཉན་རིམས་ཁྱབ་གདལ་རྐྱེན་གྱིས་ལས་གཞི་དེ་མཚམས་འཇོག་དགོས་བྱུང་བ་རེད། དེ་ནས། ཕྱི་ལོ་ ༢༠༢༢ ཟླ་ ༢ པའི་ནང་ལས་གཞི་བསྐྱར་དུ་མགོ་བཙུགས་པ་ནས། ཉེ་ཆར་ཕྱི་ལོ་ ༢༠༢༣ ཟླ་ ༣ ནང་ལས་གཞི་ཆ་ཚང་གྲུབ་ཟིན་པ་རེད། འོན་ཀྱང་། ཕྱི་ཟླ་ ༣ པ་ནས་ ༥ བར་ལས་ཀ་ཙག་ཙིག་རིགས་ཚར་བ་བྱས་ཏེ། ཟླ་འདིའི་ཕྱི་ཚེས་ ༢༨ ཉིན་ཁང་པ་རྒྱན་བརྒྱབ་པ་དང་། ཕྱི་ཚེས་ ༣༠ ཉིན་ནང་སྲིད་དྲུང་ཆེ་མཆོག་གིས་དབུ་འབྱེད་གནང་བ་རེད། ཅེས་དང་། སྡོད་ཁང་འཐོབ་པར་བོད་ནས་གསར་དུ་འབྱོར་བའི་སྣེ་ལེན་ཁང་གི་དཔང་ཡིག་དགོས་ཤིང་། ད་རེས་གསར་འབྱོར་སྐྱིད་སྡུག་ཚོགས་པའི་ཚོགས་མིའི་གྲངས་ཐོ་བཞིན་ཁང་པ་བགོ་འགྲེམས་གནང་ཡོད་པ་མ་ཟད། སྒུག་ཐོའི་ནང་ཁྱིམ་ཚང་ ༡༠ ལྷག་ཡོད་སྐོར་སོགས་བརྗོད་བྱུང་།
གཞན་ཡང་། འདི་གའི་གསར་འགོད་པས་ནང་སྲིད་ལས་ཁུངས་ལ་འབྲེལ་བ་བྱེད་སྐབས། དེང་སྐབས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་དང་འབྲེལ་ཡོད་ལས་བྱེད་རྣམས་རྒྱ་གར་ལྷོ་ཕྱོགས་སུ་སྐོར་སྐྱོད་གནང་གི་ཡོད་པས། ལས་བྲེལ་ཡིན་པ་སོགས་ཀྱི་འགྲེལ་བརྗོད་གནང་བྱུང་བས་འབྲེལ་མཐུད་བྱེད་ཐུབ་མ་སོང་ལ། བོད་མིའི་སྒྲིག་འཛུགས་ཀྱི་དྲ་རྒྱ་ལྟར་ན། ཁང་པ་གསར་རྒྱག་གི་ལས་གཞི་དེ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་རྐང་འགན་བཞེས་ཡོད་པ་ལྟར། མཛད་སྒོའི་སྐུ་མགྲོན་གཙོ་བོ་ནི་ནང་སྲིད་ལས་ཁུངས་ཀྱི་དྲུང་ཆེ་དཔལ་ལྡན་དོན་གྲུབ་ལགས་ཡིན་ཞིང་། བོད་མིའི་སྒྲིག་འཛུགས་ནས་བཙན་བྱོལ་བོད་མི་འཁོས་ཞན་དང་བོད་ནས་རྗེས་འབྱོར་བ་རྣམས་ལ་བཞུགས་གནས་མཁོ་སྤྲོད་གནང་རྒྱུའི་དམིགས་ཡུལ་ལྟར་ཁང་པ་གསར་རྒྱག་གི་ལས་གཞི་དེ་འཛུགས་སྐྲུན་བྱས་ཡོད་པ་དང་། ཐེངས་འདིའི་ཕན་བདེ་གཞིས་གྲོང་གི་ཁང་པ་བཞི་བཅུའི་ནང་ནས་ས་ཁྱོན་གྲུ་བཞི་མ་ ནང་གི་ཁང་མིག་ ༢༤ ཁེར་རྐྱང་ངམ་ནང་མི་གཉིས་ཅན་ལ་བགོ་འགྲེམས་དང་། ས་ཁྱོན་གྲུ་བཞི་མ་ ༦༠༠ ཡོད་པའི་ཁང་མིག་ ༡༦ གི་ནང་མི་གཉིས་ལས་མང་བའི་ཁྱིམ་ཚང་ལ་བགོ་འགྲེམས་གནང་ཡོད་འདུག
དེ་བཞིན། གཞིས་གྲོང་གསར་རྒྱག་ལས་གཞིའི་འགྲོ་གྲོན་ཁྱོན་ཧིན་སྒོར་བྱེ་བ་ ༤་༢༩ ཡིན་ཞིང་། གཞུང་ལམ་དང་ཆུའི་མཐུན་རྐྱེན་ཆེད་ཇར་མན་རོགས་ཚོགས་ (GAT) ནས་ཧིན་སྒོར་འབུམ་ ༢༩་༨༣ གནང་བ་དང་། ས་མཚམས་གྱང་དང་རྒྱལ་སྒོའི་ཆེད་ཨ་རིའི་རོགས་ཚོགས་ (PRM) ནས་ཧིན་སྒོར་འབུམ་ ༣༨་༩༦། ད་དུང་ས་གནས་དགོན་སྡེ་ཁག་ནས་ཧིན་སྒོར་འབུམ་ ༥་༧༦་གི་ཞལ་འདེབས་གནང་ཡོད་ཅིང་། དེ་འཕྲོས་ཀྱི་འགྲོ་གྲོན་བརྒྱ་ཆ་ ༨༤ བོད་མིའི་འཛིན་སྐྱོང་བདེ་དོན་ཚོགས་པ་བརྒྱུད་བོད་མིའི་སྒྲིག་འཛུགས་ནས་མཁོ་གཏོང་གནང་ཡོད་འདུག
གསར་འགོད་པ། སྐལ་བཟང་སྦྱིན་པ།
རྒྱ་བཤད་ཀྱང་། སྟོང་བཤད་ཀྱང་། ཁ་ཡོད་ལག་ཡོག་ཟེར་བ་འདི་ཚོ་རེད། ཐུགས་རྗེ་ཆེ།
ད་དུང་མུ་མཐུད་གང་ཐུབ་ཅི་ཐུབ་གནང་རོགས།