ཁ་སང་༧གོང་ས་རྒྱལ་བ་རིན་པོ་ཆེ་མཆོག་ནས་ལཱ་ཌི་ཝི་ཡའི(Latvia)སྲིད་འཛིན་གསར་པ་སྐུ་ཞབས་ཨེ་གྷར་སི་རིན་ཁེ་ཝེ་སི་(Edgars Rinkevics )ལགས་སུ་འཚམས་འདྲི་མཛད་འདུག
འཚམས་འདྲིའི་ནང་དུ་༧གོང་ས་རྒྱལ་བ་རིན་པོ་ཆེ་མཆོག་ནས། ཕྱི་ལོ་ ༡༩༩༡ ནས་བཟུང་ངོས་རང་ཁྱེད་ཀྱི་མཛེས་སྡུག་ལྡན་པའི་རྒྱལ་ཁབ་ནང་དུ་ཐེངས་ཁ་ཤས་བསྐྱོད་རྒྱུའི་སྐལ་བ་བཟང་པོ་བྱུང་ཞིང་། སྐབས་དེ་དུས་ངོས་ཀྱིས་འགྲོ་བ་མིའི་བཟང་སྤྱོད་དང་། ཆོས་ལུགས་ནང་ཁུལ་མཐུན་སྒྲིལ། འགྲོ་བ་མི་གཅིག་གྱུར་གྱི་འདུ་ཤེས་གོང་མཐོར་གཏོང་བཞིན་པའི་ཐོག་ལཱ་ཌི་ཝི་ཡ་རྒྱལ་ཁབ་ཀྱི་མི་མང་རྒན་གཞོན་དབྱེ་བ་མེད་པར་ཚང་མས་དགའ་མོས་ཆེས་ཆེར་གནང་སྟབས་ངོས་རང་ཧ་ཅང་སེམས་འགུལ་ཐེབས་བྱུང་། ཞེས་དང་། ཡང་མགོན་པ་གང་ཉིད་ཀྱིས། ལཱ་ཌི་ཝི་ཡ་རྒྱལ་ཁབ་ཀྱི་ལོ་རྒྱུས་ཁྲོད་དུ་ཁྱིམ་མཚེས་རྒྱལ་ཁབ་ཨེ་སི་ཌོ་ནི་ཡ་དང་། ལི་ཐུ་ཡ་ནི་ཡའི་རྒྱལ་ཁབ་ཀྱི་མི་མང་ལ་འཛམ་གླིང་གི་འཚེ་བ་མེད་པ་དང་། རང་དབང་། དམངས་གཙོ་བཅས་ཀྱི་རིན་ཐང་གསལ་སྟོན་བྱས་ཡོད། ད་ལྟའི་ཆར་འཛམ་གླིང་ཡོངས་གཉན་འཕྲང་ཅན་གྱི་དུས་ཚོད་དང་འཕྲད་བཞིན་ཡོད་པའི་སྐབས་འདིར། སྐུ་ཉིད་ཀྱིས་དུས་ཡུན་རིང་པོར་སྤྱི་ཚོགས་ནང་དུ་ཞབས་ཞུ་བསྒྲུབ་པའི་ཉམས་མྱོང་ལ་གཞིགས་ནས། ཁྱེད་ཀྱི་སྲིད་འཛིན་ལས་འགན་གྱི་དུས་ཡུན་ནང་དུ་སྲི་ཞུ་ཡག་པོ་བསྒྲུབ་དགོས། སྐུ་ཉིད་ཀྱིས་ལཱ་ཌི་ཝི་ཡ་རྒྱལ་ཁབ་ཀྱི་མི་མང་གི་རེ་བ་དང་མངོན་འདོད་རྣམས་བསྒྲུབ་ཐུབ་པའི་སྨོན་འདུན་ཞུ་རྒྱུ་ཡིན། ཞེས་གསུངས་འདུག
ཨེ་གྷར་སི་རིན་ཁེ་ཝེ་སི་(Edgars Rinkevics ལགས་ནི་ཕྱི་ལོ་ ༡༩༧༣ ཟླ་༩ ཚེས་ ༢༡ ཉིན་ཇུར་མཱ་ལཱ་(Jurmala)གྲོང་ཁྱེར་དུ་སྐྱེས་ཞིང་། ས་གནས་དེ་གར་འཛིན་རིམ་བཅུ་གཉིིས་བར་དུ་སློབ་སྦྱོང་བྱས། ཕྱི་ལོ་ ༡༩༩༣ ནས་ ༡༩༩༤ བར་ལཱ་ཌི་ཝི་ཡའི་རླུང་འཕྲིན་ཁང་དུ་རྒྱལ་སྤྱི་དང་ཕྱི་སྲིད་ཀྱི་འབྲེལ་ལམ་ཐོག་གསར་འགོད་པའི་ལས་ཀ་བྱས་ཅིང་། ཕྱི་ལོ་༡༩༩༥ ནས་ ༡༩༩༦ བར་རྒྱལ་སྲུང་ལྷན་ཁང་གི་སྲིད་དོན་ཚན་པར་བྱ་བ་སྒྲུབ་ཡོད་དང་། ཕྱི་ལོ་ ༡༩༩༧ ལོར་ཆབ་སྲིད་ཚན་རིག་ཐོག་གཙུག་ལག་རབ་འབྱམས་པའི་ལག་འཁྱེར་བླངས་འདུག སྔ་གཞུག་ཏུ་མངའ་སྡེའི་རྒྱལ་སྲུང་ལས་ཁུངས་ཀྱི་དྲུང་ཡིག་དང་། ཆབ་སྲིད་ཚོགས་པ་ཁག་གི་ཚོགས་མི་ཡིན་ཞིང་། ཕྱི་ལོ ༢༠༡༡ ཟླ་༡༠ བ་ནས་ཕྱི་ལོ་༢༠༡༩ བར་དུ་ལཱ་ཌི་ཝི་ཡའི་ཕྱི་སྲིད་བློན་ཆེན་གྱི་ཕྱག་ལས་གནང་ཡོད་འདུག་ལ། ཁོང་ནི་ཡོ་རོབ་མཐུན་ཚོགས་ཀྱི་རྒྱལ་ཁབ་ཁག་ཏུ་མཚན་མཐུན་དགའ་རོགས་སྒྲིག་པར་རང་དབང་སྤྲོད་མཁན་ཐོག་མའི་གྲས་ཀྱང་ཡིན་འདུག
གསར་འགོད་པ། བྱམས་པ་ཚེ་རིང་།
