མེ་འཁོར་གདོང་ཐུག་བྱུང་ནས་མི་གྲངས་ ༢༣༣ ལྷག་རྐྱེན་འདས་སུ་གྱུར་བར་ཐུགས་སྨོན་མཛད།

༧གོང་ས་རྒྱལ་བ་རིན་པོ་ཆེ་མཆོག་གིས་མདང་དགོང་རྒྱ་གར་ཨོ་ཌི་ཤ་མངའ་སྡེའི་ནང་མེ་འཁོར་གདོང་ཐུག་བྱུང་ནས་མི་གྲངས་ ༢༣༣ ལྷག་རྐྱེན་འདས་དང་མི་གྲངས་༩༠༠ ལྷག་ལ་རྨས་སྐྱོན་ཕོག་པར་ཐུགས་སྨོན་མཛད་འདུག

མདང་དགོང་རྒྱ་གར་ཨོ་ཌི་ཤ་མངའ་སྡེའི་ནང་མེ་འཁོར་གདོང་ཐུག་བྱུང་ནས་མི་གྲངས་ ༢༣༣ རྐྱེན་འདས་སུ་གྱུར་ཡོད་པ་ལྟར། དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་ཨོ་ཌི་ཤ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནཱ་ཝིན་(Naveen Patnaik)མཆོག་གི་མཚན་ཐོག་ཏུ་ཐུགས་སྨོན་གྱི་གསུང་འཕྲིན་བསྩལ་བའི་ནང་། ངོས་རང་གིས་དོན་རྐྱེན་འདིའི་ཁྲོད་ནས་ཚེ་སྲོག་ཤོར་བའི་ཤུལ་ལུས་ནང་མི་རྣམས་ལ་གདུང་སེམས་མཉམ་སྐྱེད་དང་། རྨས་སྐྱོན་ཕོག་མཁན་རྣམས་ལ་སྨོན་ལམ་འདོན་གྱི་ཡོད། ངོས་རང་གིས་དབུས་གཞུང་ཚུད་པའི་མངའ་སྡེ་དང་། སྒྲིག་འཛུགས་ཁག་གིས་རྨས་སྐྱོན་ཐེབས་མཁན་རྣམས་གཙོས་གནོད་འཚེ་ཕོག་མཁན་རྣམས་ལ་སྨན་བཅོས་ལྟ་སྐྱོང་གི་ཐད་ནས་རོགས་འདེགས་གནང་བར་བསྔགས་བརྗོད་ཞུ་ཡི་ཡོད། ཨོ་ཌི་ཤ་མངའ་སྡེའི་མི་མང་ལ་གདུང་སེམས་མཉམ་སྐྱེད་མཚོན་སླད། ༧གོང་ས་ཏཱ་ལའི་བླ་མའི་དགེ་རྩ་ནས་མི་མང་ལ་སྨན་བཅོས་མཐུན་སྦྱོར་དང་། ངལ་སེལ། མྱུར་སྐྱོབ་སོགས་ཀྱི་སླད་ཞལ་འདེབས་ཤིག་དབུལ་རྒྱུ་ཡིན། ཞེས་གསུངས་འདུག

མདང་དགོང་རྒྱ་གར་ཤར་ཕྱོགས་ཨོ་ཌི་ཤ་མངའ་སྡེའི་བྷ་ལིས་ཝར་(Baleswar) གྱི་ཉེ་འགྲམ་དུ། ཁོ་རོ་མན་ཌལ་ ( Coromandel Express )མེ་འཁོར་དང་ཧ་ཝོ་རཱ་ཐི་(Howrah Superfast Express) གཉིས་གདོང་ཐུག་བྱུང་སྟེ།  ཉུང་མཐར་མི་གྲངས ༢༣༣ ལྷག་རྐྱེན་འདས་སུ་གྱུར་ཡོད་པ་དང་། མི་གྲངས་ ༩༠༠ ལྷག་ལ་རྨས་སྐྱོན་ཕོག་ཡོད་འདུག

རྒྱ་གར་གྱི་མེ་འཁོར་བློན་ཆེན་སྐུ་ཞབས་ཨ་སི་ཝི་ནི་(Ashwini Vaishnaw) ལགས་ཀྱི་སྒེར་གྱི་ཊི་ཝེ་ཊར་དུ། མེ་འཁོར་གདོང་ཐུག་གི་དོན་རྐྱེན་དེའི་ཁྲོད་དུ་རྨས་སྐྱོན་ཕོག་མཁན་ཚོར་གང་མགྱོགས་ཀྱིས་མྱུར་སྐྱོབ་སྨན་བཅོས་བྱས་ཏེ། གང་མགྱོགས་དྲག་སྐྱེད་ཡོང་བའི་སྨོན་འདུན་ཞུ་ཡོད་སྐོར་དང་། ད་ལན་གྱི་དོན་རྐྱེན་འདིའི་ཁྲོད་ནས་རྐྱེན་འདས་སུ་གྱུར་བ་རྣམས་ཀྱི་ཤུལ་ལུས་ནང་མི་སོགས་ལ་ཧིན་སྒོར་འབུམ་བཅུ་རེ་སྟེར་རྒྱུ་ཡིན་པ་མ་ཟད། གནོད་འཚེ་ཚབས་ཆེན་ཐེབས་པའི་མི་རྣམས་ལ་ཧིན་སྒོར་འབུམ་གཉིས་རེ། དེ་བཞིན་རྨས་སྐྱོན་ཕོག་མཁན་རྣམས་ལའང་ཧིན་སྒོར་ཁྲི་ལྔ་རེ་སྟེར་རྒྱུ་ཡིན་པའི་གསལ་བསྒྲགས་གནང་འདུག

དེ་བཞིན་ཨོ་ཌི་ཤའི་སྤྱི་ཁྱབ་བློན་ཆེན་སྐུ་ཞབས་(Naveen Patnaik) ལགས་ཀྱིས་དེ་རིང་ཨོ་ཌི་ཤའི་མངའ་སྡེ་ཡོངས་སུ་དོན་རྐྱེན་དེའི་ཁྲོད་ནས་རྐྱེན་འདས་སུ་འགྱུར་མཁན་རྣམས་ཀྱི་ཤུལ་ལུས་ནང་མི་གཙོས་འབྲེལ་ཡོད་ཚོར། གདུང་སེམས་མཉམ་སྐྱེད་བྱ་རྒྱུ་ཡིན་སྐོར་བསྒྲགས་འདུག

ད་ལྟ་ཨོ་ཌི་ཤའི་མངའ་སྡེ་གཞུང་གིས་དོན་རྐྱེན་བྱུང་བའི་ཡུལ་དངོས་ནས་གནོད་འཚེ་ཕོག་པའི་མི་རྣམས་མྱུར་སྐྱོབ་སླད། མྱུར་སྐྱོབ་རླངས་འཁོར་གྲངས ༢༠༠ དང་སྤྱི་སྤྱོད་རླངས་འཁོར་གྲངས་ ༥༠ ལྷག་མངག་གཏོང་བྱས་ཏེ། རྐྱེན་འདས་སུ་གྱུར་བའི་མིའི་ཕུང་པོ་དབོར་འདྲེན་དང་མི་མང་དབོར་འདྲེན་བྱེད་མུས་ཡིན་འདུག

རྒྱ་གར་ནི་འཛམ་གླིང་ནང་མེ་འཁོར་དོན་རྐྱེན་མང་ཤོས་འབྱུང་མཁན་གྱི་རྒྱལ་ཁབ་ཅིག་ཡིན་པ་དང་། དེ་སྔ་རྒྱ་གར་བྷི་ཧར་མངའ་སྡེའི་ནང་མེ་འཁོར་དོན་རྐྱེན་བྱུང་ནས་མི་གྲངས ༧༥༠ ལྷག་རྐྱེན་འདས་སུ་གྱུར་ཡོད་ཅིང་། དེ་ནི་རྒྱ་གར་ནང་མེ་འཁོར་དོན་རྐྱེན་ཁྲོད་རྐྱེན་འདས་སུ་གྱུར་བའི་མི་གྲངས་མང་ཤོས་དེ་རེད་འདུག་ལ། འདི་ལོ་གཅིག་པུར་རྒྱ་གར་ནང་མེ་འཁོར་གྱི་དོན་རྐྱེན་ཆེ་ཆུང་མི་འདྲ་བ་གྲངས་ ༥ ལྷག་བྱུང་ཟིན་ཡོད་འདུག

གསར་འགོད་པ། དཔལ་ལྡན།