ཁོ་ལོམ་བྷི་ཡའི་གནམ་གྲུ་ཞིག་ལ་བརྡབ་སྐྱོན་བྱུང་ཡོད་ཀྱང་འགྲུལ་བ་བྱིས་པ་ཆུང་ཆུང་བཞི་སྲོག་ཉེན་ལས་ཐར་བ་མ་ཟད་ཉིན་གྲངས་ ༤༠ རྗེས་སུ་ཡུལ་དེའི་ཨེ་མེ་རྫོན་ནགས་ཚལ་ཁྲོད་ནས་གསོན་པོར་རྙེད་སོན་བྱུང་འདུག
The wreckage of the Cessna was found two weeks after it disappeared, but there was no sign of the children. Photo: Colombian army/Getty Images.
འདི་ལོའི་ཕྱི་ཟླ་ ༥ ཚེས་ ༡ ཉིན་ཁོ་ལོམ་བྷི་ཡ་ནས་གནམ་གྲུ་ཞིག་བོར་བརླག་ཏུ་ཕྱིན་ཏེ་དམག་དཔུང་དང་མྱུར་སྐྱོབ་མི་སྣས་ཡུན་རིང་འཚོལ་ཞིབ་བྱས་རྗེས། ཁོ་ལོམ་བྷི་ཡའི་ཨེ་མེ་རྫོན་(Colombia’s Amazon jungle) ནགས་ཚལ་ནས་གནམ་གྲུ་བརྡབ་སྐྱོན་བྱུང་བའི་ཡུལ་དངོས་རྙེད་ཡོད་པ་མ་ཟད། གནམ་གྲུའི་ཁ་ལོ་བ་གཉིས་དང་བྱིས་པ་བཞི་ཅན་གྱི་ཨ་མ་དེའི་ཕུང་པོ་རྙེད་སོན་བྱུང་ཡོད་འདུག ཡིན་ནའང་། བྱིས་པ་རྣམས་གསོན་པོར་གནས་ཡོད་པའི་རྗེས་ཤུལ་རྙེད་པར་བརྟེན། ཡུལ་དེའི་སྲིད་གཞུང་གིས་དམག་མི་སྔར་ལས་མང་པོ་བཏང་སྟེ་འཚོལ་ཞིབ་བྱས་པ་བརྒྱུད་ཟླ་འདིའི་ཕྱི་ཚེས་ ༩ ཉིན་ཏེ་ཉིན་གྲངས་ ༤༠ རྗེས་སུ་བྱིས་པ་རྣམས་གསོན་པོར་རྙེད་སོན་བྱུང་ཡོད་འདུག
ཁོ་ལོམ་བྷི་ཡའི་སྲིད་བློན་གྷོ་སི་ཊ་ཝོ་པེ་ཌོ་ (Gustavo Petro) ལགས་ཀྱིས་བྱིས་པ་དེ་རྣམས་ནི་ནགས་ཚལ་གྱི་བྱིས་པ་ཡིན་ལ། ཁོ་ལོམ་བྷི་ཡའི་བྱིས་པ་ཡང་ཡིན། ཞེས་བརྗོད་དེ་ཁོང་ཚོར་སྨན་བཅོས་གང་ལེགས་བྱེད་དགོས་སྐོར་བརྗོད་ཡོད་པ་དང་། བྱིས་པ་བཞི་དེས་ད་ལྟའང་ཟ་མ་བཟའ་ཐུབ་ཀྱི་མེད་ཀྱང་། ཁོ་ལོམ་བྷི་ཡའི་རྒྱལ་སར་ཡོད་པའི་དབུས་དམག་མིའི་སྨན་ཁང་དུ་བསྐྱལ་ཏེ་གསོ་སྨན་གྱིས་ལུས་ཕུང་གསོ་བཞིན་ཡོད་འདུག་ལ། བྱིས་པ་རྣམས་ལ་འཚོ་བཅུད་ཀྱིས་མ་འདང་བའི་ནད་དང་། འབུ་སྲིན་རིགས་ཀྱིས་རྨུག་པ་སོགས་རྨས་སྐྱོན་ཕྲན་བུ་མང་པོ་བཟོས་ཡོད་འདུག
མྱུར་སྐྱོབ་རུ་ཁག་གིས་ཐེངས་དང་པོ་བྱིས་པ་རྣམས་རྙེད་སྐབས། རང་ལོ་ ༡༣ ཅན་གྱི་བུ་མོ་ལི་སི་ལེ་ (Lesly)ཡིས་ལོ་གཅིག་ཡིན་པའི་བྱིས་པ་ཆུང་ཆུང་དེ་པང་དུ་བཟུང་ནས་རྒྱུག་ཡོང་སྟེ། གྲོད་ཁོག་ལྟོགས་ཀྱི་འདུག ཅེས་བརྗོད་ཡོད་པ་དང་། བྱིས་པ་གཅིག་སར་བསྡད་ནས་མགོ་བོ་སྨད་དེ་སྐྱོ་སྣང་དང་བཅས་ངའི་ཨ་མ་ལགས་གྲོངས་སོང་ཞེས་བརྗོད་ཡོད་སྐོར་བཤད་འདུག
བྷི་བྷི་སི་གསར་ཁང་གི་གནས་ཚུལ་ལྟར་ན། སྲོག་ཉེན་ཆེན་པོ་ལས་ཐར་བའི་བྱིས་པ་རྣམས་ནི་རང་ལོ་བཅུ་གསུམ་དང་། དགུ། ལྔ། གཅིག་བཅས་ཡིན་ཞིང་། ཁོང་ཚོ་གནམ་གྲུ་བརྡབ་སྐྱོན་ནས་ཐར་བ་མ་ཟད། ཉིན་གྲངས་ ༤༠ རིང་ནགས་ཚལ་ཁྲོད་བཀྲེས་སྐོམ་དང་ཆར་རླུང་། གཅན་གཟན་གྱི་འཇིགས་པ་སོགས་ལས་རྣམ་པར་ཐར་བ་དེ་ངོ་མཚར་བའི་ངང་གླེང་སློང་བྱེད་བཞིན་འདུག་ལ། ལྷག་པར་དུ་འཚོལ་ཞིབ་པ་ཚོའི་ཡུན་རིང་དཀའ་སྡུག་མང་པོར་གདོང་ལེན་བྱས་ཏེ་བྱིས་པ་རྣམས་རྙེད་སོན་བྱུང་བ་དེ་ནི་ཆེས་ཚད་མཐོ་བའི་མྱུར་སྐྱོབ་ཀྱི་གྲུབ་འབྲས་ཤིག་ཏུ་ངོས་འཛིན་བྱེད་བཞིན་འདུག
བྱིས་པ་ཚོས་གསར་འགོད་པར་བརྗོད་པ་ལྟར་ན། གནམ་གྲུར་དོན་རྐྱེན་བྱུང་ནས་ཉིན་གྲངས་བཞི་ཡི་རྗེས་སུ་ཨ་མ་འདས་གྲོངས་སུ་གྱུར་ཡོད་ཅིང་། ཁོང་མོ་མ་གྲོངས་གོང་དུ། བྱིས་པ་རྣམས་ཀྱིས་ཕན་ཚུན་བདག་སྐྱོང་དང་གཅེས་སྤྲས་བྱེད་དགོས་པ་མ་ཟད། ནགས་ཚལ་ནས་ཐོན་ཐབས་དང་མི་གཞན་གྱི་རོགས་སྐྱོབ་འཐོབ་རྒྱུར་རེ་བས་ཁེངས་དགོས་པའི་མངག་བཅོལ་བྱས་ཡོད་འདུག འདས་པའི་ཉིན་གྲངས་བཞི་བཅུའི་རིང་བྱིས་པ་ཚོས་བརྡབ་སྐྱོན་བྱུང་བའི་གནམ་གྲུ་ལས་རྙེད་པའི་ཟས་རིགས་དང་། ནགས་ཚལ་ཁྲོད་ཀྱི་ཤིང་འབྲས་སོགས་ཟོས་ནས་འཚོ་ཐབས་བྱས་ཡོད་སྐོར་བཀོད་འདུག
བྱིས་པ་ཚོའི་སྤོ་ལགས་ཝི་ལིན་སི་ཡ་ (Fidencio Valencia) ལགས་ཀྱིས་གསར་འགོད་པར། ང་ཚོའི་བྱིས་པ་རྣམས་འཚོལ་ཞིབ་ཐུབ་པར་རོགས་འདེགས་དང་སྨོན་ལམ་འདེབས་མཁན་ཚང་མར་ཐུགས་རྗེ་ཆེ་ཞུ་རྒྱུ་ཡིན་ལ། ད་ལྟ་མིང་སྲིང་བཞིའི་གཟུགས་པོའི་གནས་སྟངས་ཧ་ཅང་སྐྱོ་བོ་གྱུར་ཡོད་ཀྱང་། སྲོག་ཉེན་ལས་བསྐྱབས་ནས་ལྷན་འཛོམས་བྱུང་བར་དགའ་ཚོར་ཧ་ཅང་ཆེན་པོ་བྱུང་ཡོད་སྐོར་བརྗོད་འདུག
གསར་འགོད་པ། དཔལ་ལྡན།
