ཨ་རིའི་ཕྱི་སྲིད་བློན་ཆེན་རྒྱ་ནག་ཏུ་ཕེབས་ནས་ཨ་རྒྱ་གཉིས་བར་གྱི་སྲིད་འབྱོར་རིག་གསུམ་གྱི་དཀའ་རྙོག་སེལ་ཐབས་སྐོར་གོ་བསྡུར་གནང་འཆར་ཡོད་འདུག
ཁ་སང་ཨ་རིའི་ཕྱི་སྲིད་ལས་ཁུངས་ཀྱིས་བདུན་ཕྲག་འདིའི་གཟའ་མཇུག་ཙམ་ལ་ཨ་རིའི་ཕྱི་སྲིད་བློན་ཆེན་ཨན་ཐོ་ནེ་བྷི་ལི་ཀན་ (Antony Blinken)མཆོག་རྒྱ་ནག་ཏུ་ཕེབས་ཏེ། ཨ་རྒྱ་གཉིས་བར་བྱུང་དང་འབྱུང་བཞིན་པའི་དཀའ་རྙོག་སོགས་ཀྱི་ཐོག་གླེང་སློང་བྱ་རྒྱུ་ཡིན་པའི་ཡོངས་ཁྱབ་ཀྱི་གསལ་བསྒྲགས་སྤེལ་འདུག་ལ། དེ་ནི་ཕྱི་ལོ་ ༢༠༡༩ རྗེས་ནས་ཨ་རིའི་གནད་ཡོད་མི་སྣ་ཞིག་དང་དམིགས་བསལ་སྲིད་འཛིན་བྷའེ་ཌན་སྲིད་གཞུང་གི་ཆེས་མཐོའི་མི་སྣ་ཞིག་རྒྱ་ནག་ཏུ་སྐྱོད་ཐེངས་དང་པོར་གྱུར་ཡོད་པ་རེད།
ད་ལྟ་ཨ་རིའི་ཕྱི་སྲིད་བློན་ཆེན་མཆོག་རྒྱ་ནག་ཏུ་བསྐྱོད་རྒྱུ་ཡིན་པ་ཙམ་ལས་གཞུང་འབྲེལ་གྱི་ལས་རིམ་གང་ཡང་ཁ་གསལ་མེད་ཁར། ཁ་སང་ཕྱི་ཚེས་ ༡༤ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཝང་ཝིན་བྷིན་ (Wang Wenbin) གྱིས་རྒྱུན་ལྡན་གྱི་གསར་འགོད་གསལ་བསྒྲགས་ཤིག་གི་སྟེང་ད་ལྟ་ཨ་རིའི་ཕྱི་སྲིད་བློན་ཆེན་བྷི་ལི་ཀན་རྒྱ་ནག་ཏུ་ཕེབས་མིན་ཅི་ཡང་གོ་ཐོས་མ་བྱུང་ཡང་། གལ་ཏེ་ཁོང་ཉིད་ཕེབས་འཆར་ཡིན་ན་རྒྱ་ནག་གཞུང་གིས་དུས་དང་འཚམ་པའི་ཐོག་ནས་ཕྱིར་བསྒྲགས་བྱ་རྒྱུ་ཡིན་ལུགས་དང་། ཨ་རིས་རྒྱ་ནག་གཞུང་གི་ཁྲིམས་སྒྲིག་སོགས་ལ་བརྩི་སྲུང་དང་། རྒྱ་ནག་གི་མངའ་ཁུལ་དང་ནང་སྲིད་ལ་ཐེ་ཇུས་བྱེད་མཚམས་འཇོག་དགོས་ལུགས་སོགས་བརྗོད་འདུག
འོན་ཀྱང་། སི་ཨན་ཨན་དང་བྷི་བྷི་སི་སོགས་རྒྱལ་སྤྱིའི་གསར་ལམ་ཁག་ཏུ་ཐོན་པའི་གནས་ཚུལ་ལྟར་ན། ད་ལྟ་ཨ་རྒྱ་གཉིས་ཀྱི་འབྲེལ་ལམ་ངེས་གཏན་མེད་པའི་གནས་སྟངས་འོག་ཡོད་སྟབས། ཨ་རིས་ཐེངས་འདིར་ཨ་རྒྱ་གཉིས་ཀྱི་གནད་ཡོད་མི་སྣ་ཁག་རྒྱ་ནག་གི་རྒྱལ་ས་པེ་ཅིན་ནས་ཐུག་འཕྲད་བྱས་ཏེ། རྒྱལ་ཁབ་གཉིས་བར་དོན་མེད་རྙོག་གྲ་འབྱུང་རྒྱུ་སྔོན་འགོག་དང་། ཨ་རིའི་ངོས་ནས་རྒྱ་ནག་དང་ལྷན་དུ་གནོན་ཚབས་ཆེ་བའི་འཐབ་འཁྲུག་བྱེད་པར་འདོད་བློ་མེད་སྐོར་བསྟན་འདུག་ལ། དེའི་ཐད་ཨ་རིའི་རྒྱལ་སྲིད་བདེ་འཇགས་ཀྱི་སློབ་སྟོན་པ་སྐུ་ཞབས་ཀི་ཌིན་བྷི་རིན་ཀི་ (Kritenbrink) ལགས་ཀྱིས་ད་ལན་ཨ་རིའི་ཕྱི་སྲིད་བློན་ཆེན་མཆོག་གི་གཞུང་འབྲེལ་ཕྱོགས་ཕེབས་སྐབས། ཨ་རྒྱ་གཉིས་ཀྱི་དམག་དོན་གྱི་ཐད་ནས་གླེང་སློང་གནང་རྒྱུ་ཡིན་པའི་ཁར། ཨ་རྒྱ་གཉིས་ཀྱི་གུ་ཡངས་ཀྱི་ཐོག་ནས་གལ་གནད་ཆེ་བའི་འགལ་ཟླའི་སྐོར། ཕན་ཚུན་གོ་ནོར་ཐེབས་པའི་གནད་དོན་དང་། གོ་ནོར་ཐེབས་པའི་གནད་དོན་གྱི་ཉེན་ཁའི་རིགས་གཙང་སེལ་བྱ་རྒྱུ་བཅས་དམིགས་བསལ་དོན་ཚན་གསུམ་གྱི་ཐོག་གྲོས་བསྡུར་བྱ་སྲིད་སྐོར་དང་། དེ་བཞིན་རྒྱ་ནག་གཞུང་གིས་དོན་མེད་འཛིན་བཟུང་བྱས་པའི་ཨ་རི་བ་མཀ་སི་ཌན་(Mark Swidan )། ཀའེ་ལི་(Kai Li)། ཌ་ཝི་ཌི་ལིན་(David Lin ) གསུམ་གྱི་སྐོར་ལའང་གླེང་སློང་གནང་བའི་ཚོད་དཔག་ཀྱང་གནང་འདུག
དེ་རིང་སི་ཨན་ཨན་གསར་ཁང་གིས་སྤེལ་བའི་གནས་ཚུལ་ལྟར་ན། ཁ་སང་ཕྱི་ཚེས་ ༡༤ ཉིན་ཨ་རིའི་ཕྱི་སྲིད་བློན་ཆེན་སྐུ་ཞབས་བྷི་ལི་ཀན་མཆོག་གིས་རྒྱ་ནག་གི་ཕྱི་སྲིད་བློན་ཆེན་ཆིན་གང་ (Qin Gang) དང་ཁ་པར་བརྒྱུད་ཁ་བརྡ་བྱས་ཏེ། ཨ་རིའི་ཕྱི་སྲིད་བློན་ཆེན་གྱི་ཕྱོགས་སྐྱོད་འདི་དང་བསྟུན། ཨ་རྒྱ་གཉིས་མཉམ་འབྲེལ་རྒྱ་སྐྱེད་དང་། ཕྱོགས་གཉིས་ཀྱི་རྩོད་རྙོག་ཆེ་བའི་ས་ཁུལ་ཁག་ཏུ་ཞི་འཇམ་ཡོང་ཐབས། དེ་བཞིན་ཨ་རྒྱ་གཉིས་ཀྱི་དམག་མིའི་གདོང་ཐུག་དང་རྙོག་གླེང་ཞི་ཐབས། ཐའེ་ཝན་དང་ཡོ་ཁུ་རེན་གྱི་གནད་དོན་སོགས་ཀྱི་ཐད་ལ་གྲོས་བསྡུར་བྱ་རྒྱུ་ཡིན་སྐོར་གསལ་འདུག
སྤྱིར་བཏང་ཨ་རིའི་ཕྱི་སྲིད་བློན་ཆེན་མཆོག་འདི་ལོའི་ཕྱི་ཟླ་ ༢ ཚེས་ ༥ ནས་ ༦ བར་ཉིན་གྲངས་གཉིས་རིང་རྒྱ་ནག་གི་རྒྱལ་ས་པེ་ཅིན་དུ་ཕེབས་ཏེ་རྒྱ་ནག་གི་མགོ་ཁྲིད་ཞི་ཅིན་ཕིན་དང་ཕྱི་འབྲེལ་མི་སྣ་སོགས་སུ་ཐུག་འཕྲད་གནང་འཆར་ཡོད་ཀྱང་། ཟླ་དེའི་ཕྱི་ཚེས་ ༢ ཉིན་རྒྱ་ནག་གཞུང་གིས་ཨ་རིའི་མཁའ་དབྱིངས་སུ་མྱུལ་ཞིབ་ལྒང་ཕུག་ (surveillance balloon) ཅིག་མངག་གཏོང་བྱས་ཏེ། ཨ་རིའི་གཞུང་གི་ལས་དོན་ཁག་ལ་གསང་བའི་ལྟ་ཞིབ་བྱེད་བཞིན་ཡོད་པ་ཤེས་རྟོགས་བྱུང་རྗེས། བློན་ཆེན་ཨེན་ཊོ་ནི་བྷི་ལི་ཀན་མཆོག་རྒྱ་ནག་ཏུ་ཕེབས་རྒྱུའི་གཞུང་འབྲེལ་ཕྱོགས་སྐྱོད་དེའང་ཕྱིར་འགྱངས་བྱས་ཡོད་འདུག
འདས་པའི་ལོ་ཤས་རིང་རྒྱ་ནག་གཞུང་གིས་ཐའེ་ཝན་མཚོ་འགག་ཁུལ་དུ་གནམ་མཚོ་གཉིས་ཀྱི་དྲག་རྒོལ་དམག་མི་མངག་གཏོང་བྱས་ཏེ། ཐའེ་ཝན་གཞུང་མང་གཉིས་ལ་སུན་གཙེར་ཡང་ཡང་བཟོས་དང་བཟོ་མུས་ཡིན་སྟབས། ཨ་རིས་ཐའེ་ཝན་གཙོས་ཨེ་ཤ་ཡའི་མཚོ་གླིང་རྒྱལ་ཁབ་ཁག་ཏུ་རྒྱ་ནག་གི་དམག་ཤུགས་སྐྱེད་པར་རྒོལ་ལན་ཡང་ཡང་སློག་གི་ཡོད་པ་མ་ཟད། འདས་ལོར་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་བ་ལྕམ་པེ་ལོ་སི་མཆོག་གིས་ཀྱང་། རྒྱ་ནག་གཞུང་གིས་གནོན་ཤུགས་དང་བཙན་བཀའ་སྣང་མེད་དུ་བཞག་ནས། ཐའེ་ཝན་དུ་གཞུང་འབྲེལ་འཚམས་གཟིགས་སུ་ཕེབས་པར་བརྟེན། ཕྱོགས་ཡོངས་ནས་ཨ་རྒྱ་གཉིས་ཀྱི་འབྲེལ་ལམ་ཇེ་ཞན་དུ་གྱུར་ཡོད་ཅིང་། རྒྱ་ནག་གཞུང་གིས་ཨ་རིས་ཐའེ་ཝན་གྱི་བདེ་འཇགས་སྲུང་སྐྱོབ་སླད་རོགས་འདེགས་བྱེད་མུས་ཡིན་པ་དེར་སྐྱོན་བརྗོད་ཤུགས་ཆེན་བྱེད་ཀྱིན་ཡོད་འདུག
གསར་འགོད་པ། དཔལ་ལྡན།
