ཞི་བའི་ཚལ་ཕོ་བྲང་ནས་ལ་དྭགས་མི་མང་ལ་གསུང་ཆོས་སྩལ་གཏན་ཁེལ།

ཟླ་རྗེས་མའི་ཚེས་ ༡༠ ཉིན་༧གོང་ས་མཆོག་ལ་དྭགས་སུ་ཆིབས་བསྒྱུར་བསྐྱངས་ཏེ་ལ་དྭགས་མི་མང་ལ་གསུང་ཆོས་དང་མཇལ་ཁ་སོགས་ཀྱི་མཛད་འཕྲིན་བསྐྱང་རྒྱུ་ཡིན་འདུག

འདི་གའི་གསར་འགོད་པས། ལ་དྭགས་ཀྱི་འབྲེལ་ཡོད་མི་སྣ་ཁག་ཅིག་ལ་བཀའ་འདྲི་ཞུས་པ་ལྟར་ན། ཁ་སང་ཕྱི་ཚེས་ ༡༦ ཉིན་ལ་དྭགས་ནང་པ་ཚོགས་པ་དང་དགོན་པ་ཚོགས་པ་གཉིས་ཀྱི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་སུ་ཆིབས་བསྒྱུར་གནང་ཕྱོགས་སྐོར་ལ་གསར་འགོད་གསལ་བསྒྲགས་ཤིག་སྤེལ་ཡོད་ཅིང་། སྐབས་དེར་ལ་དྭགས་ནང་པ་ཚོགས་པའི་ཚོགས་གཙོ་ཐུབ་བསྟན་ཚེ་དབང་ལགས་ཀྱིས། དགའ་ལྡན་ཕོ་བྲང་ཡིག་ཚང་ནས་བཀའ་ཡིག་འབྱོར་བ་བཞིན། ཕྱི་ཟླ་ ༧ ཚེས་ ༡༠ ཉིན་སྔ་དྲོའི་ཆུ་ཚོད་ ༡༠ ཙམ་ལ་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་གླེ་རུ་ཆིབས་བསྒྱུར་གནང་གྲུབ་རྗེས་ཉིན་གསུམ་བཞི་རིང་སྐུ་ངལ་གསོ་རྒྱུ་ཡིན་པ་དང་། དེ་ནས་ལ་དྭགས་གླེ་ཇོ་བོའི་གཙུག་ལག་ཁང་དུ་གཟིགས་སྐོར་ཕེབས་རྒྱུ་ཡིན་སྐོར་བརྗོད་འདུག

གསར་འགོད་པས་རྒྱུས་ལོན་བྱུང་བའི་གནས་ཚུལ་ལྟར་ན།  ཕྱི་ཟླ་ ༧ ཚེས་ ༢༡ ནས་ ༢༣ བར་ཉིན་གྲངས་གསུམ་རིང་གླེ་ལྕོག་ལམ་སར་ཞི་བའི་ཚལ་ཕོ་བྲང་དུ། ༧གོང་ས་མཆོག་གིས་ལ་དྭགས་མི་མང་ལ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་དང་། སྤྱན་རས་གཟིགས་ཀྱི་བཀའ་དབང་བསྩལ་རྒྱུ་དང་སྐབས་དེར་ལ་དྭགས་ནང་པའི་ཚོགས་པ་དང་དགོན་པ་ཚོགས་པ་ཐུན་མོང་ནས་བརྟན་བཞུགས་བསྡུས་པ་ཞིག་བསྟར་འབུལ་ཞུ་རྒྱུ་ཡིན་འདུག  དེ་བཞིན། ལོ་ལྟར་ལ་དྭགས་ཀྱི་དགོན་པ་ཁག་ནས་ཚོགས་སྲོལ་ཡོད་པའི་དབྱར་ཆོས་ཆེན་མོ་དེ་ལ་དྭགས་ལམ་སྒྲོན་བདེ་སྐྱིད་ཚོགས་པའི་གོ་སྒྲིག་འོག ལམ་སྒྲོན་དཔེ་གསར་མཐོ་རིམ་སློབ་གྲྭ་བཙུགས་ནས་ལོ་ ༥༠ འཁོར་བའི་མཛད་སྒོ་དང་སྟབས་བསྟུན་དབྱར་ཆོས་ཆེན་མོ་འཚོགས་རྒྱུ་ཡིན་འདུག་ཡིན་ཡང་། འདི་ལོའི་༧གོང་ས་མཆོག་གི་ལ་དྭགས་ཀྱི་མཛད་འཆར་ཁྲོད། ནུབ་ར་དང་ལ་དྭགས་གཤམ་ལྗོངས་སོགས་སུ་ཕེབས་འཆར་ཡོད་སྐོར་ཙམ་ལས། ད་ལྟ་ཡོངས་གྲགས་ཀྱི་ཐོག་ནས་འདི་ལོའི་༧གོང་ས་མཆོག་གི་ལ་དྭགས་ཀྱི་མཛད་འཆར་ཁག་གི་དུས་ཚེས་སོགས་གསལ་བསྒྲགས་བྱས་མེད་པ་རེད།

འདས་ལོའི་ཕྱི་ཟླ་༧ ཚེས་ ༡༥ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་དྭགས་སུ་ཆིབས་བསྒྱུར་བསྐྱངས་ཏེ། ཉིན་གསུམ་རིང་ཞི་བའི་གསུང་ཆོས་རྭ་བར་རྒྱལ་སྲས་ཞི་བ་ལྷའི་བཀའ་ཆོས་དང་ཐུགས་རྗེ་ཆེན་པོའི་བཀའ་དབང་བསྩལ་ཡོད་ཅིང་།  ལ་དྭགས་བོད་ཁྱིམ་དུ་ལ་དྭགས་བྱང་ཐང་གི་བོད་མི་རྣམས་དང་བསོད་ནམས་གླིང་གི་ཁོངས་གཏོགས་གཞིས་གྲོང་བཅུ་གཉིས་བཅས་ཀྱི་མང་ཚོགས་བཞི་སྟོང་ལྷག་ལ་བཀའ་སློབ་བསྩལ་ཡོད་པ་མ་ཟད།   ལིང་ཤེད་སྐུ་འབུམ་འོད་འབར་དགོན་གྱི་དབྱར་ཆོས་ཆེན་མོའི་ཚོགས་མགོན་དུ་ཕེབས་ཏེ་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་བཀའ་ཆོས་བསྩལ་བ། དེ་བཞིན་ཟངས་དཀར་སོ་ན་ཁ་ཆེའི་ལྷ་ཁང་དུ་མི་མང་བཀའ་སློབ་སོགས་བསྩལ་ཡོད་འདུག་ལ། ཕྱི་ཚེས་ ༢༦ ཉིན་༧གོང་ས་མཆོག་གི་ལ་དྭགས་ཀྱི་མཛད་འཕྲིན་ཁག་ལེགས་པར་གྲུབ་སྟེ་ལྡི་ལི་བརྒྱུད་བཞུགས་སྒར་དུ་ཆིབས་བསྒྱུར་བསྐྱངས་གནང་ཡོད།

གསར་འགོད་པ། བྱམས་པ་ཚེ་རིང་།