ལྷོ་ཀོ་རི་ཡས་རྒྱ་ནག་གི་གསང་བའི་ཉེན་རྟོག་ཁང་ཟེར་བ་རྩད་ཞིབ་གཏོང་གི་འདུག

རྒྱ་ནག་གཞུང་གིས་ཁུང་ཙི་སློབ་གསོ་ལྟེ་གནས་ཁང་དང་ཕྱིའི་ཉེན་རྟོག་ཟེར་བ་གཉིས་བེད་སྤྱད་ཀྱིས། ལྷོ་ཀོ་རི་ཡའི་ནང་རྒྱ་ནག་གི་ཤུགས་རྐྱེན་རྒྱ་སྐྱེད་དང་དམར་ཤོག་ཚོགས་པའི་ཁ་གཏད་གཅོག་མཁན་རྣམས་ལ་འཇིགས་སྐུལ་བྱེད་བཞིན་པ་ལྷོ་ཀོ་རི་ཡས་ཤེས་རྟོགས་བྱུང་སྟེ་རྩད་ཞིབ་གཏོང་གི་འདུག

དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་ལྷོ་ཀོ་རི་ཡའི་ནང་གི་རྒྱ་རིགས་དང་རྒྱ་ནག་གཞུང་གི་ཁ་གཏད་དུ་ལངས་མཁན་རྣམས་ལ་དམིགས་པའི་ཕྱིའི་ཉེན་རྟོག་ཁང་གསར་འཛུགས་བྱས་དང་བྱེད་མུས་ཡིན་པར་བརྟེན། ལྷོ་ཀོ་རི་ཡའི་གཞུང་གིས་རྒྱལ་ཡོངས་སུ་རྒྱ་ནག་གི་ཉེན་རྟོག་ཁང་དེ་དག་གང་དུ་ཡོད་མེད་སོགས་རྩད་གཅོད་དང་ཞིབ་འཇུག་བྱེད་བཞིན་པ་ཡོངས་བསྒྲགས་བྱས་འདུག

དེ་ཡང་ཐོག་མར་འདི་ལོའི་ལོ་མགོར་ལྷོ་ཀོ་རི་ཡའི་རྒྱལ་ས་སོལ་ (Seoul) ནང་རྒྱ་ནག་གི་ཕྱིའི་ཉེན་རྟོག་ཁང་ཟེར་བ་བཙུགས་ཡོད་པའི་གནས་ཚུལ་ཐོན་པ་དང་འབྲེལ། ལྷོ་ཀོ་རི་ཡའི་གསང་བའི་ལས་ཁུངས་དང་ཉེན་རྟོག་པས་རྩད་ཞིབ་བྱས་ཏེ། རྒྱལ་ས་སོལ་ནང་ཙམ་མིན་པར་ཇེ་ཇུ་(Jeju Island) གླིང་ཕྲན་ཚུད་པའི་ས་ཁུལ་མང་པོའི་རྒྱ་ནག་གི་ཉེན་རྟོག་ཁང་ཟེར་བ་ཡོད་པའི་དོགས་གཞི་བྱུང་ཡོད་འདུག

ཁ་སང་ལྷོ་ཀོ་རི་ཡའི་གཞུང་འཛིན་ཚོགས་པའི་མགྲིན་ཚབ་པ་ཆའོ་ཇེ་ (Choe Jae-hyeong) ཡིས། རྒྱ་ནག་གཞུང་གིས་ལྷོ་ཀོ་རི་ཡའི་ནང་ཁུང་ཙི་སློབ་གསོ་ལྟེ་གནས་ཁང་བཙུགས་ཏེ། རྒྱ་ནག་དམར་ཤོག་ཚོགས་པའི་དྲིལ་བསྒྲགས་རྒྱ་སྐྱེད་དང་། ཧོང་ཀོང་གི་མང་གཙོའི་ལས་འགུལ་ལ་རྒྱབ་སྐྱོར་བྱེད་པའི་ལས་འགུལ་གྱི་རིགས་དང་རྒྱ་ནག་ལ་ཁ་གཏད་གཅོག་ཐབས་སོགས་ཀྱི་ལས་འགུལ་རིགས་ལ་གདོང་ལེན་དང་གནོད་ཤུགས་སྤྲོད་ཀྱི་ཡོད་པ་མ་ཟད། དམིགས་བསལ་རྒྱ་ནག་དང་འབྲེལ་བའི་ལྷོ་ཀོ་རི་ཡ་རྒྱལ་ཡོངས་ཀྱི་སློབ་ཆེན་སློབ་མའི་ལས་འགུལ་རིགས་ལ་གནོད་ཤུགས་སྤྲོད་ཐབས་བྱེད་བཞིན་འདུག་ཅེས་བརྗོད་ཡོད་པ་དང་།  ཡང་འདི་ལོའི་ཕྱི་ཟླ་ ༥ པའི་ནང་ལྷོ་ཀོ་རི་ཡའི་གསང་བའི་ལས་ཁུངས་ཀྱིས་ཞིབ་འཇུག་བྱས་པ་བརྒྱུད། རྒྱ་ནག་གཞུང་གིས་ལྷོ་ཀོ་རི་ཡའི་རྒྱལ་ས་སོལ་གྱི་སོང་པ་ (Songpa) རྫོང་དུ་ཡོད་པའི་རྒྱ་ནག་གི་ཟ་ཁང་ཞིག་གིས་རྒྱ་ནག་གཞུང་གི་ཚབ་ཏུ་ཉེན་རྟོག་ཁང་ཟེར་བའི་ལས་དོན་སྒྲུབ་ཀྱི་ཡོད་པ་ཤེས་རྟོགས་བྱུང་ཡོད་འདུག

ལྷོ་ཀོ་རི་ཡའི་ཇེ་ཇུ་གླིང་ཕྲན་དུ་ཡོད་པའི་རྒྱ་ནག་གི་དོན་གཅོད་ལས་ཁུངས་ཀྱིས། ང་ཚོས་དངོས་བདེན་མིན་པའི་གནས་ཚུལ་འདི་ལ་མཐའ་གཅིག་ཏུ་ངོ་རྒོལ་བྱེད་བཞིན་ཡོད། ཅེས་དང་ལྷོ་ཀོ་རི་ཡའི་ཇེ་ཇུ་གླིང་ཕྲན་ནང་རྒྱ་ནག་གི་གསང་བའི་ཉེན་རྟོག་ཁང་མེད་པ་དང་། གསར་ཁང་ཁག་གིས་དྲང་བདེན་མིན་པའི་གནས་ཚུལ་སྤེལ་གྱི་ཡོད་པའི་ལན་འདེབས་བྱས་འདུག་ལ། འདི་ལོའི་ཕྱི་ཟླ་ ༥ ཚེས་ ༡༥ ཉིན་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་ཝང་ཝེ་བྷིན་ (Wang Wenbin) གྱིས། ཕྱིའི་རྒྱལ་ཁབ་ཁག་ཏུ་རྒྱ་ནག་གི་ཉེན་རྟོག་ཁང་མེད་པ་དང་། རྒྱ་ནག་གཞུང་གིས་རྒྱལ་ཁབ་གཞན་གྱི་ནང་སྲིད་ལ་ཐེ་ཇུས་མི་བྱེད་པ་དང་། རྒྱལ་ཁབ་གཞན་གྱི་དབང་ཚད་ལ་བརྩི་བཀུར་བྱེད་ཀྱི་ཡོད་སྐོར་བརྗོད་ཡོད་འདུག

འོན་ཀྱང་། རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་བྱེད་པའི་ (Safeguard Defenders) ཚོགས་པའི་གནས་ཚུལ་ལྟར་ན། རྒྱ་ནག་གཞུང་གིས་ལྷོ་ཀོ་རི་ཡ་ཙམ་དུ་མ་ཟད། འཛམ་གླིང་རྒྱལ་ཁབ་ ༥༣ ལྷག་གི་ནང་གསང་བའི་ཉེན་རྟོག་ཁང་ཟེར་བ་བཙུགས་ཏེ། རྒྱལ་སྤྱིའི་སྟེང་རྒྱ་ནག་གི་ཤུགས་རྐྱེན་རྒྱ་སྐྱེད་གཏོང་ཐབས་བྱེད་ཞོར་དུ། རྒྱ་ནག་དམར་ཤོག་ཚོགས་པའི་ཁ་གཏད་དུ་ལངས་མཁན་དང་རྒྱ་ནག་གི་མང་གཙོ་དང་འགྲོ་བ་མིའི་ཐོབ་ཐང་དོན་གཉེར་བ་སོགས་སུ་འཇིགས་སྐུལ་བྱེད་བཞིན་ཡོད་འདུག

གསར་འགོད་པ། བསྟན་འཛིན་ཕུར་བུ།