བོད་ཀྱི་བུ་མོ་བསྟན་འཛིན་འཛོམས་སྐྱིད་ལགས་སུ་ཕྱི་ལོ་ ༢༠༢༣ ལོའི་ (Miss Glam World) མཛངས་མའི་འགྲན་སྡུར་ཁྲོད་ཨང་རིམ་དང་པོ་ཐོབ་ཡོད་འདུག
ཟླ་འདིའི་ཕྱི་ཚེས་ ༡༥ ནས་ ༢༡ བར་རྒྱ་གར་ཀེ་རེ་ལ་མངའ་སྡེའི་ཁུལ་དུ་ (Pegasus Global Pvt Ltd.) ཚོགས་པས་གོ་སྒྲིག་བྱས་པའི་རྒྱལ་སྤྱིའི་མཛངས་མའི་འགྲན་སྡུར(Miss Glam World) ནང་། བོད་ཀྱི་བུ་མོ་བསྟན་འཛིན་འཛོམས་སྐྱིད་ལགས་སུ་ཕྱི་ལོ་ ༢༠༢༣ ལོའི་ (Miss Glam World) མཛངས་མའི་འགྲན་སྡུར་ཁྲོད་ཨང་རིམ་དང་པོ་ཐོབ་ཡོད་པ་མ་ཟད། ཁོང་མོས་བོད་ཀྱི་བུད་མེད་དག་གིས་རྒྱལ་སྤྱིའི་གར་སྟེགས་སུ་ཆ་ཤས་བླང་དགོས་པ་མ་ཟད། མི་སུ་ཞིག་ཡིན་རུང་ཕུགས་བསམ་མངོན་འགྱུར་གྱི་ཆེད་ནམ་ཡང་སེམས་ཤུགས་ཆག་མི་ཉན་པའི་རེ་སྐུལ་གནང་སོང་།
བསྟན་འཛིན་འཛོམས་སྐྱིད་ལགས་ཀྱིས་འདི་གའི་གསར་འགོད་པར། ད་ལན་གྱི་འགྲན་སྡུར་དེ་ནི་གཙོ་བོ་ཀེ་ར་ལའི་ཐུན་མོང་མ་ཡིན་པའི་རིག་གཞུང་གསལ་སྟོན་དང་། ཡུལ་སྐོར་སྤྲོ་འཆམ་གོང་སྤེལ་གཏོང་ཐབས། དེ་བཞིན་རྒྱལ་སྤྱིའི་མཛངས་མ་རྣམས་ཀྱིས་སྒེག་ཉམས་ངོམ་སའི་གར་སྟེགས་གསར་པ་ཞིག་རེད། ང་རང་ལ་གར་སྟེགས་དེའི་ཐོག་ལ་རྒྱུས་མངའ་ཡོད་པས། ལོ་ཤས་གོང་ནས་དེའི་ནང་འཛུལ་ཞུགས་བྱ་རྒྱུར་ཐོ་འགོད་བྱས་པ་ཡིན། ད་ལོར་ང་རང་ལ་གོ་སྐབས་དེ་ཐོབ་བྱུང་། ཞེས་བརྗོད་བྱུང་།
ཁོང་མོས། ང་རང་ཕྱི་ལོ་ ༢༠༢༣ ལོའི་ (Miss Glam World) མཛངས་མའི་འགྲན་སྡུར་གྱི་ཨང་རིམ་དང་པོ་ཐོབ་ཡོད་ཅིང་། དེ་ནི་བློ་ཡུལ་དུ་ཤོང་དཀའ་བ་ཞིག་ཡིན་ཡང་། ངས་མུ་མཐུད་ (Glam) འཛམ་གླིང་མཛངས་མའི་མཚན་སྙན་གྱི་གཟི་བརྗིད་མ་བརླག་པར་བྱས་ཏེ་མདུན་སྐྱོད་བྱ་རྒྱུ་ཡིན། ཞེས་བརྗོད་འདུག
འདི་གའི་གསར་འགོད་པས་ཁྱེད་རང་བོད་མི་ཞིག་ཡིན་པའི་ཆ་ནས་ཕྱི་ལོ་ ༢༠༢༣ ལོའི་ (Miss Glam World) མཛངས་མའི་འགྲན་སྡུར་གྱི་ཨང་རིམ་དང་པོ་ཐོབ་པར་ཚོར་སྣང་ག་རེ་བྱུང་ཡོད་དྲིས་པར། ཁོང་མོས། ང་རང་ལ་རྒྱལ་ཁ་ཐོབ་པ་དེའི་བརྒྱུད་ནས་མི་མང་པོར་རེ་བ་སྤྲད་ཡོད་པ་མ་ཟད། བོད་པའི་གཞོན་སྐྱེས་བུད་མེད་རྣམས་ཀྱིས་མཛེས་མའི་གར་སྟེགས་ནང་འཛུལ་ཞུགས་བྱ་རྒྱུའི་སེམས་ཤུགས་དང་རེ་བ་སྤྲད་ཐུབ་ཡོད་བསམ་གྱི་ཡོད་ལ། མི་སུ་ཞིག་ཡིན་རུང་རང་གི་ཕུགས་བསམ་མངོན་འགྱུར་སླད་གཏན་ནས་སེམས་ཤུགས་ཆག་མི་ཉན་པ་ཡིན། ཞེས་བརྗོད་བྱུང་།
བསྟན་འཛིན་འཛོམས་སྐྱིད་ལགས་ནི་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ནས་འཚར་ལོངས་བྱུང་སྟེ། ད་ལྟའི་ཆར་སྦེལ་ཇམ་ནང་གནས་སྡོད་བྱེད་ཀྱིན་འདུག་ལ། ཕྱི་ལོ་ ༢༠༡༧ ལོའི་ཟླ་ ༤ ནང་སྦེལ་ཇམ་གྱི་བུད་མེད་ཤོམ་སྟོན་མ་རྩེ་ཕུད་ཀྱི་(Belgium Top Model) འགྲན་སྡུར་ཞིག་གི་ནང་དུའང་མཉམ་ཞུགས་བྱས་མྱོང་ཡོད་པ་དང་། འགྲན་སྡུར་དེའི་ཁྲོད་མཉམ་ཞུགས་པ་བུད་མེད་ ༤༠༠ ཡོད་པའི་ནང་ནས། དངོས་གཞིའི་འགྲན་སྡུར་ཁྲོད་བུད་མེད་ ༦༥ ནང་འདེམས་ཐོན་བྱུང་ཡོད་འདུག་ལ། དེ་བཞིན་ཁོང་མོར་ཕྱི་ལོ་ ༢༠༢༡ ལོར་སྦེལ་ཇམ་མཛངས་མ་ཆེན་པོའི་འགྲན་སྡུར་ཁྲོད་ཨང་རིམ་དང་པོ་ཐོབ་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
