ནོར་བྷེལ་རྫས་འགྱུར་གྱི་གཟེངས་རྟགས་བཞེས་མཁན་སྐུ་ཞབས་ཇོན་བྷི་ལགས་དགུང་ལོ་བརྒྱའི་ཐོག་སྐུ་གྲོངས་པའི་གནས་ཚུལ་ཐོན་འདུག
ཟླ་འདིའི་ཕྱི་ཚེས་ ༢༦ ཉིན་ཨ་རིའི་གྲོང་ཁྱེར་ཨོ་སི་ཊིན་དུ་རྟེན་གཞི་བྱས་པའི་ཊེག་སི་སུ་གཙུག་ལག་སློབ་གཉེར་ཁང་( University of Texas ) གིས་གནས་ཚུལ་བསྒྲགས་པ་ལྟར་ན། ཟླ་འདིའི་ཕྱི་ཚེས་ ༢༥ ཉིན་ལི་ཐི་ཡིམ་གློག་རྫས་གསར་སྐྲུན་ཐད་ལ་ནུས་པ་ཆེན་པོ་བཏོན་ནས། ཕྱི་ལོ་ ༢༠༡༩ ལོར་ནོར་བྷེལ་རྫས་འགྱུར་གྱི་གཟེངས་རྟགས་བཞེས་མཁན་སྐུ་ཞབས་ཇོན་(John B. Goodenough) ལགས་དགུང་ལོ་ ༡༠༠ ཡི་ཐོག་སྐུ་གྲོངས་ཡོད་པ་རེད།
ཊེག་སི་སུ་གཙུག་ལག་སློབ་གཉེར་ཁང་གི་འགན་འཛིན་ཇེ་ཧར་ཛེལ་(Jay Hartzell) ལགས་ཀྱིས། ཁོང་གི་མི་ཚེའི་ཁྲོད་རྣོ་ངར་ལྡན་པའི་ཐོག་ནས་ཚན་རྩལ་ཞིབ་འཇུག་གི་ལས་དོན་གྱི་དབུ་འཁྲིད་གནང་ཡོད་ཅིང་། ཚན་རྩལ་རིག་གནས་ཀྱི་གྲུབ་དོན་འཚོལ་ཞིབ་སླད་ཁོང་གིས་ལས་དོན་མཚམས་འཇོག་བྱས་མ་མྱོང་། ཁོང་ནི་ཚན་རྩལ་རིག་གནས་ཀྱི་ཉམས་ཞིབ་པ་ཚད་ལྡན་ཞིག་ཡིན་པ་མ་ཟད། རླབས་ཆེན་གྱི་དགེ་རྒན་ཚད་ལྡན་ཞིག་ཀྱང་ཡིན་ལ། ཁོང་གི་ཚན་རྩལ་གྱི་གྲུབ་དོན་ལས་མི་གྲངས་ཐེར་འབུམ་ལྷག་གི་འཚོ་གནས་ལ་རོགས་འདེགས་ཆེན་པོ་བྱས་ཡོད་སྐོར་སོགས་བརྗོད་འདུག
སྐུ་ཞབས་ཇོན་ལགས་ནི་ཕྱི་ལོ་ ༡༩༢༢ ཟླ་ ༧ ཚེས་ ༢༥ ཉིན་འཇར་མན་གྱི་ཇི་ན་གྲོང་ཁྱེར་དུ་ཨ་མི་རི་ཁའི་ཁྱིམ་ཚང་ཞིག་གི་བུར་སྐྱེས། སྐབས་དེར་ཁོང་གི་པཱ་ལགས་ཀྱིས་ཧ་ཝར་ཌིར (Harvard Divinity School) འབུམ་རམས་པའི་སློབ་གཉེར་བྱེད་མུས་ཡིན་ཞིང་། ཕྱིས་སུ་ཡ་ལི་གཙུག་ལག་སློབ་གཉེར་ཁང་(Yale University) གི་སློབ་དཔོན་ཆེན་མོར་གྱུར། སྐུ་ཞབས་ཇོན་ལགས་ཀྱིས་གཞི་རིམ་དང་འབྲིང་རིམ་གྱི་སློབ་གཉེར་ཡོངས་སུ་བྱས་རྗེས་ཡ་ལི་གཙུག་ལག་སློབ་གཉེར་ཁང་དུ་འགྲིམས། འཛམ་གླིང་གི་དམག་ཆེན་གཉིས་པའི་སྐབས་སུ་ཁོང་ཨ་རིའི་དམག་ཁོངས་སུ་ཞུགས་ནས་གནམ་གཤིས་རིག་པ་བའི་ལས་གནས་གཉེར། དམག་ཆེན་གཉིས་པ་མཇུག་སྒྲིལ་རྗེས་ཆི་ག་གྷོ་གཙུག་ལག་སློབ་གཉེར་ཁང་(The University of Chicago) དུ་སློབ་ཞུགས་བྱས་ཏེ་དངོས་ཁམས་རིག་པའི་འབུམ་རམས་པའི་ལག་ཁྱེར་བླངས།
ཕྱི་ལོ་ ༡༩༧༠ དོན་གྲངས་ནས་ ༡༩༨༠ ལྷག་བར་ཨོ་སི་ཧྥོ་ཌི་གཙུག་ལག་སློབ་གཉེར་ཁང་(University of Oxford) དུ་ལས་གནས་གཉེར། ཕྱི་ལོ་ ༡༩༨༦ ལོ་ནས་ཊེག་སི་སུ་གཙུག་ལག་སློབ་གཉེར་ཁང་དུ་དགེ་རྒན་ཆེན་མོའི་ལས་གནས་གཉེར་མགོ་བཙུགས་ཤིང་། སློབ་ཁྲིད་ཀྱི་ཞོར་དུ་ཚན་རྩལ་ཞིབ་འཇུག་དང་འཚོལ་ཞིབ་སྣ་ཚོགས་གནང་མཐར། ཁོང་གིས་ཚན་རིག་གི་གྲུབ་དོན་མང་པོ་ཞིག་རྙེད་དེ། རྫས་འགྱུར་དང་དངོས་ཁམས་ཀྱི་ཐད་ནས་གྲུབ་འབྲས་གཡུར་དུ་ཟ་བ་མང་པོ་ཞིག་བླངས་པའི་ཁྲོད། ཕྱི་ལོ་ ༢༠༡༣ ལོར་ཨ་རིའི་སྲིད་འཛིན་ཨོ་བྷ་མས་སྐུ་ཞབས་ཁོང་ལ་རྒྱལ་ཡོངས་གཟེངས་ཐོན་ཚན་རིག་པའི་བྱ་དགའ་གནང་ཡོད་པ་མ་ཟད། ཕྱི་ལོ་ ༢༠༡༩ སྟེ་ཁོང་ཉིད་དགུང་ལོ ༩༧ སྟེང་ནོར་བྷེལ་རྫས་འགྱུར་གྱི་བྱ་དགའ་ཐོབ།
ཁོང་གིས་ད་བར་ཊེག་སི་སུ་གཙུག་ལག་སློབ་གཉེར་ཁང་དུ་འཕྲུལ་ལས་དང་། དངོས་ཁམས་ཚན་རིག གློག་རྡུལ་སོགས་ཀྱི་སྐོར་ལ་སློབ་ཁྲིད་གནང་ཡོད་ཅིང་། ཁོང་གིས་གསར་གཏོད་བྱས་པའི་ལི་ཐི་ཡིམ་གློག་རྫས་(lithium-ion battery) ནི་དེང་སང་གི་གློག་ཆས་ཕལ་ཆེ་བའི་ནང་བཀོལ་སྤྱོད་བྱེད་ཀྱི་ཡོད་པ་མ་ཟད། དེ་ནི་ལི་ཐི་ཡིམ་གྱིས་བཟོས་པའི་གསོག་འཇོག་བྱ་རྒྱུ་ཡོད་པའི་གློག་རྫས་ཀྱི་རིགས་ཤིག་ཡིན་འདུག་ལ། དེས་ཁ་པར་སོགས་ཀྱི་འཆར་ངོས་ཤར་ཐུབ་པར་བྱེད་ཀྱི་ཡོད་འདུག
གསར་འགོད་པ། དཔལ་ལྡན།
