རྒྱ་གར་བྱང་ཤར་ཁུལ་གྱི་མངའ་སྡེ་མང་པོའི་ནང་འདས་པའི་ཉིན་ཤས་རིང་དྲག་ཆར་བབས་པའི་རྐྱེན་གྱིས་ཆུ་ལོག་དང་རི་ཉུལ་བྱུང་སྟེ་མི་མང་སྟོང་ཕྲག་མང་པོའི་འཚོ་གནས་ལ་གནོད་སྐྱོན་ཐེབས་བཞིན་ཡོད་འདུག
སྤྱི་ཚོགས་དྲ་ལམ་ཁག་ཏུ་ཧི་མ་ཅལ་མངའ་སྡེའི་མ་ན་ལིའི་ཁུལ་དུ་ཆུ་ལོག་གནོད་སྐྱོན་བྱུང་སྟེ་ས་གནས་བོད་མིའི་གཞིས་ཆགས་ནང་ལའང་དཀའ་ངལ་འཕྲད་པའི་བརྙན་ཐུང་ཁག་ཅིག་ཁྱབ་བཞིན་ཡོད་པ་ལྟར། དེ་རིང་འདི་གའི་གསར་འགོད་པས་ཁ་པར་བརྒྱུད་མ་ན་ལིའི་ས་གནས་མགོ་འཛིན་ཚུལ་ཁྲིམས་རྡོ་རྗེ་ལགས་སུ་ས་གནས་ཀྱི་གནས་སྟངས་གང་འདྲ་ཡོད་སྐོར་དྲིས་པར། ཁོང་གིས། ཀུ་ལུ་མ་ན་ལིའི་ཁུལ་དུ་ཆར་པ་ཤུགས་ཆེན་བབས་པར་བརྟེན། ཆུ་རགས་གཏོར་ནས་གཞིས་ཆགས་ཀྱི་གཞུང་ལམ་ལའང་གནོད་སྐྱོན་ཐེབས་ཡོད་པ་མ་ཟད། གཞིས་ཆགས་ཀྱི་ཁང་པ་ཁག་ཅིག་ནང་ཆུས་ཁེངས་པར་བརྟེན། ས་གནས་མགོ་འཛིན་དང་བརྒྱ་དཔོན་སོགས་ཀྱིས་སྣེ་འཁྲིད་དེ་གནས་སྤོས་བྱས་དང་བྱེད་མུས་ཡིན་ལ། ལོ་ན་རྒན་པ་རྣམས་ལ་མགྲོན་ཁང་གྲ་སྒྲིག་བྱས་ཏེ་གནས་སྤོས་བྱས་ཟིན་ཡོད་འདུག་ལ། ད་བར་མི་ལ་སྲོག་སྐྱོན་བྱུང་མེད་སྐོར་དང་། ཆུ་ལོག་གནོད་སྐྱོན་བྱུང་རྗེས་ཉིན་གྲངས་ ༢ རིང་གློག་ཆད་པ་དང་། དྲ་ལམ་མེད་པར་བརྟེན་བོད་མིའི་སྒྲིག་འཛུགས་ལའང་འབྲེལ་ཞུ་ཐུབ་མེད་སྐོར་བརྗོད་བྱུང་།
དེང་སང་རྒྱ་གར་གྱི་བྱང་ཕྱོགས་ཁུལ་དུ་ཆར་པ་ཤུགས་ཆེན་འབབ་བཞིན་ཡོད་པའི་རྐྱེན་གྱིས། རྒྱ་གར་རྒྱལ་ས་ལྡི་ལི་དང་ཧི་མ་ཅལ་མངའ་སྡེའི་ནང་ཉིན་གྲངས་གསུམ་ནང་ཆུ་ལོག་དང་ས་རུད་བྱུང་སྟེ། ཉུང་མཐར་མི་གྲངས་ ༡༥ ཙམ་རྐྱེན་འདས་སུ་ཕྱིན་འདུག་ལ། ས་གནས་ཀྱི་སློབ་ཆུང་དང་མཐོ་སློབ་ཁག་ཉིན་གྲངས་ ༢ རིང་སྒོ་བརྒྱབ་ཡོད་འདུག དེ་བཞིན་རྒྱ་གར་གྱི་ཨུ་ཏ་ར་ཁན་ཌི་ཁུལ་དུའང་ཆར་ཆུས་གནོད་སྐྱོན་ཐེབས་བཞིན་ཡོད་པར་བརྟེན་ཡུལ་སྐོར་སྤྲོ་འཆམ་གྱི་ས་ཁུལ་མང་དག་ཅིག་སྒོ་བརྒྱབ་ཡོད་འདུག
ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་སུག་ཝིན་ཌར་སིང་ (Sukhvinder Singh Sukhu) མཆོག་གིས། མི་མང་གིས་མཉམ་རུབ་ཐོག་དཀའ་ངལ་དེ་ལ་གདོང་ལེན་བྱ་རྒྱུ་དང་། མི་རྣམས་རང་ཁྱིམ་དུ་སྡོད་དགོས་པའི་སྐུལ་མ་གནང་འདུག་ལ། གལ་ཏེ་ཛ་དྲག་གི་རོགས་རམ་དགོས་ཚེ་ཁ་པར་ཨང་གྲངས་ ༡༡༠༠ དང་ ༡༠༧༠། ༡༠༧༧ ལ་འབྲེལ་བ་གནང་དགོས་སྐོར་གསུངས་འདུག པན་ཇབ་སྤྱི་ཁྱབ་བློན་ཆེན་བྷག་ཝན་ཊི་ (Bhagwant Mann)མཆོག་གིས། རྒྱ་གར་གཞུང་པན་ཇབ་ཀྱི་མི་མང་དང་མཉམ་དུ་ཡོད་པས་ཞེད་སྣང་མི་དགོས་ལ། གནོད་ཐེབས་མི་མང་ལ་རོགས་སྐྱོར་གང་ཐུབ་གནང་གི་ཡོད་སྐོར་བརྗོད་འདུག་ལ། པན་ཇབ་ནང་ཆུ་ལོག་གནོད་སྐྱོན་མུ་མཐུད་ཡོང་བཞིན་ཡོད་པའི་རྐྱེན་གྱིས་ཟླ་འདིའི་ཕྱི་ཚེས་ ༡༣ བར་སློབ་གྲྭ་ཡོངས་རྫོགས་སྒོ་བརྒྱབ་ཡོད་འདུག རྒྱ་གར་བྱང་ཤར་ཁུལ་གྱི་ཨ་སམ་དང་ན་ག་ལེན་ཌི་ནང་ཆར་པ་ཤུགས་ཆེན་འབབ་བཞིན་ཡོད་པར་བརྟེན། ཆུ་ལོག་རྐྱེན་གྱིས་ཨ་སམ་ཁུལ་གྱི་ཡུལ་མི་སྟོང་ཕྲག་ལྷག་གནས་སྤོ་དགོས་ཁེལ་ཡོད་འདུག
རྒྱ་གར་གྱི་གནམ་གཤིས་བརྟག་དཔྱད་ཁང་གིས། རྒྱ་གར་གྱི་བྱང་ཕྱོགས་ཁུལ་དུ་མུ་མཐུད་ཆར་པ་ཤུགས་ཆེན་བབ་ཉེན་ཡོད་པའི་ཉེན་བརྡ་བཏང་འདུག
