ཧི་མ་ཅལ་མངའ་སྡེ་ནང་ཆུ་ལོག་རྒྱུགས་ཏེ་མི་རྒྱུ་གཉིས་ལ་གནོད་སྐྱོན་བྱུང་བར་༧གོང་ས་མཆོག་གིས་གདུང་སེམས་མཉམ་སྐྱེད་ཀྱི་ཐུགས་གསོ་མཛད།
ཉེ་ལམ་ཧི་མ་ཅལ་མངའ་སྡེའི་ནང་ཆུ་ལོག་བརྒྱུགས་ཏེ། མི་རྒྱུ་གཉིས་ལ་གནོད་སྐྱོན་ཚབས་ཆེན་ཐེབས་ཡོད་སྟབས། དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་ལ་དྭགས་ཞི་བའི་ཚལ་ཕོ་བྲང་ནས་ཧི་མ་ཅལ་མངའ་སྡེ་སྤྱི་ཁྱབ་བློན་ཆེན་ (Sukhvinder Singh Sukhu) ལགས་ཀྱི་མཚན་ཐོག་ཏུ། ཧི་མ་ཅལ་མངའ་སྡེ་མི་མང་ལ་གདུང་སེམས་མཉམ་སྐྱེད་ཀྱི་ཐུགས་གསོ་བསྩལ་འདུག
དེ་ཡང་༧མགོན་པོ་གང་ཉིད་ཀྱི་ཐུགས་གསོའི་ནང་། ངོས་འདས་པའི་ལོ་ངོ་དྲུག་ཅུའི་རིང་ཧི་མ་ཅལ་ནང་སྡོད་རྒྱུ་བྱུང་བས། ཧི་མ་ཅལ་གྱི་མི་མང་ལ་དམིགས་བསལ་དགའ་ཚོར་ཡོད། ཅེས་དང་། ངོས་ནས་རང་བྱུང་གོད་ཆག་འདིའི་ཁྲོད་འདས་གྲོངས་སུ་ཕྱིན་པ་དང་གནོད་སྐྱོན་ཐེབས་པ། དེ་བཞིན་ཁོང་ཅག་གི་ཤུལ་ལུས་ནང་མི་ཡོངས་ལ་གདུང་སེམས་མཉམ་སྐྱེད་དང་སྨོན་ལམ་འདེབས་ཀྱི་ཡོད། མངའ་སྡེ་གཞུང་གིས་གང་ཐུབ་ཅི་ཐུབ་ཀྱིས་གནོད་སྐྱོན་ཐེབས་པའི་མི་མང་ལ་ངལ་སེལ་རོགས་སྐྱོར་དང་རྒྱབ་སྐྱོར་གྱི་འབོད་བརྩོན་གནང་བཞིན་པ་ཤེས་རྟོགས་བྱུང་ལ། ངོས་ནས་ཧི་མ་ཅལ་མངའ་སྡེ་མི་མང་ལ་གདུང་སེམས་མཉམ་སྐྱེད་མཚོན་སླད། དགའ་ལྡན་ཕོ་བྲང་ཡིག་ཚང་བརྒྱུད་མྱུར་སྐྱོབ་དང་ངལ་སེལ་གྱི་ལས་དོན་ཆེད་ཞལ་འདེབས་ཤིག་རྒྱག་གི་ཡིན། ཞེས་གསུངས་འདུག
ཟླ་འདིའི་ཕྱི་ཚེས་ ༨ ཉིན་ནས་ཉིན་གྲངས་གསུམ་རིང་བསྟུད་མར་རྒྱ་གར་བྱང་ཤར་ཁུལ་གྱི་དམིགས་བསལ་ཧི་མ་ཅལ་མངའ་སྡེའི་ནང་ཆར་བ་ཤུགས་ཆེན་བབས་པའི་རྐྱེན་གྱིས་ཆུ་ལོག་དང་ས་རུད་བྱུང་སྟེ། ཉུང་མཐར་མི་གྲངས་ ༡༥ ཙམ་རྐྱེན་འདས་སུ་ཕྱིན་ཡོད་པ་དང་། ཕྱི་ཚེས་ ༡༠ དང་ ༡༡ བཅས་ཉིན་གཉིས་རིང་ཧི་མ་ཅལ་མངའ་གཞུང་གི་བཀོད་ཁྱབ་འོག མངའ་སྡེའི་སློབ་གྲྭ་ཡོངས་སྒོ་བརྒྱབ་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
