༧གོང་ས་རྒྱལ་བ་རིན་པོ་ཆེ་མཆོག་ནས་ལ་དྭགས་རྒྱལ་ས་གླེ་རུ་ནང་པ་དང་ཁ་ཆེ་སོགས་ཀྱི་སེར་སྐྱ་མི་མང་ལ་ཆོས་ལུགས་ཚང་མས་དམ་ཚིག་གཙང་མའི་ཐོག་ནས་གཅིག་གིས་གཅིག་ལ་གུས་ཞབས་དང་མཐུན་སྒྲིལ་བྱ་རྒྱུ་གལ་ཆེན་པོ་ཞེ་དྲགས་ཡིན་སྐོར་བླང་དོར་བཀའ་སློབ་བསྩལ།
དེ་རིང་ཞོགས་པར་༧གོང་ས་རྒྱལ་བ་རིན་པོ་མཆོག་ལ་དྭགས་ཞི་བའི་ཚལ་ཕོ་བྲང་ནས་ལ་དྭགས་ཀྱི་རྒྱལ་ས་གླེའི་ཇོ་ཁང་དུ་ཆིབས་བསྒྱུར་གྱིས་ཇོ་བོ་ཐུགས་རྗེ་ཅན་གྱི་སྐུ་མདུན་དུ་ཐུགས་སྨོན་མཛད་རྗེས། དད་ལྡན་སེར་སྐྱ་མི་མང་ལ་བཀའ་སློབ་བསྩལ་བ་མ་ཟད། ལྷ་ས་ཁ་ཆེ་བ་རྣམས་ལ་དམིགས་བསལ་མཇལ་ཁ་བསྩལ་གནང་སོང་། སྐབས་དེར་མགོན་པོ་གང་ཉིད་ཀྱིས་ཆོས་ལུགས་ཚང་མའི་ཕན་ཚུན་གཅེན་གཅུང་གི་འདུ་ཤེས་བཟུང་ནས་ཆོས་ལུགས་མཐུན་འབྲེལ་གནང་སྟེ་འཛམ་གླིང་ཞི་བདེ་བསྐྲུན་ཐབས་གནང་རྒྱུ་གལ་ཆེན་ཡིན་སྐོར་སོགས་བཀའ་སློབ་བསྩལ་སོང་།
༧གོང་ས་རྒྱལ་བ་རིན་པོ་ཆེ་མཆོག་ནས། ངོས་རང་གིས་ནམ་མཁའ་མ་ཟད་ཀྱི་བར་དུ་གཞན་དོན་བསྒྲུབ་བསམ་པའི་སྨོན་ལམ་རྒྱག་གི་ཡོད། བཅོམ་ལྡན་འདས་ཁྱེད་ལ་ཆ་བཞག་ནའང་གྲངས་མེད་གསུམ་གྱི་ཚོགས་བསག་རྒྱུའི་རྩ་བའི་ཀུན་སློང་སྟེ། གཞན་དོན་གྱི་བསམ་པ་དེས་ཀུན་ནས་བསླངས་ཏེ། གྲངས་མེད་གསུམ་གྱི་ཚོགས་བསགས་ནས་མཐར་མངོན་པར་རྫོགས་པར་སངས་རྒྱས་པ་རེད། ང་རང་ཚོ་ཚང་མའི་རྒྱུད་ལ་ཁམས་བདེ་གཤེགས་སྙིང་པོ་ཡོད་རེད། སེམས་རང་བཞིན་གྱིས་འོད་གསལ་བ་ཟེར་བ་དེ་ང་རང་ཚོ་ཚང་མའི་རྒྱུད་ལ་ཡོད་ཡོད་པ་རེད། གསར་དུ་བསྒྲུབ་དགོས་པ་ཞིག་མ་རེད། སེམས་རང་བཞིན་གྱིས་འོད་གསལ་བའི་བློ་ཞིག་ཡོད་པ་འདི། སྟོན་པ་བཅོམ་ལྡན་འདས་ཀྱི་གསུང་ལ་བརྟེན་ནས་གློ་བུར་བའི་དྲི་མ་དེ་དག་གསལ་ནས། མཐར་གཉུག་མ་ལྷན་ཅིག་སྐྱེད་པའི་འོད་ཟེར་སྟོན་པ་བཅོམ་ལྡན་འདས་ཀྱི་ཡེ་ཤེས་ཆོས་ཀྱི་སྐུ་དེ་མངོན་བར་བྱས་པའི་རྒྱུ་ཆ་དེ་ང་ཚོ་ལ་ཡོད་ཡོད་པ་རེད། ང་ཚོས་བཅོམ་ལྡན་འདས་ལ་སྐྱབས་སུ་མཆི་ཟེར་དུས་སྟོན་པའི་སྐྱབས་འདི་འདྲ་ཞིག་ལ་བཞག་ནས། ང་ཚོ་འདི་ནས་གྲོལ་བ་ཟེར་བའི་སྐད་ཆ་ཞིག་མ་རེད། རང་རྒྱུད་ལ་སེམས་རང་བཞིན་གྱིས་འོད་གསལ་བའི་རང་བཞིན་རྣམ་དག་ཅིག་ང་ཚོའི་རྒྱུད་ལ་ཡོད་ཡོད་པ་རེད། རང་བཞིན་རྣམ་དག་ཡོད་ཡོད་པ་དེ་གློ་བུར་བའི་དྲི་མས་སྒྲིབ་པ་འདི། བསླབ་པ་གསུམ་གྱི་ཉམས་ལེན་གྱི་བསམ་བློ་ག་ལེར་གཏོང་ཡོང་དུས། གློ་བུར་བའི་དྲི་མ་དེ་དག་སྲབ་ཏུ་སྲབ་ཏུ་ཕྱིན་ནས་མཐར་དྲི་མ་མཐའ་དག་སྤང་ཡོང་དུས། བཅོམ་ལྡན་འདས་ཁྱེད་ཀྱི་ཐུགས་ཡེ་ཤེས་ཆོས་སྐུ་དེ་ནང་བཞིན་ཞིག་ང་རང་ཚོས་མངོན་དུ་བྱེད་ཐུབ་པ་ཞིག་ཡིན་པ་རེད། སྟོན་པ་བཅོམ་ལྡན་འདས་ལ་སྐྱབས་སུ་འགྲོ་སྟངས་ངོ་མ་དེ་རང་གི་མངོན་དུ་བྱ་རྒྱུའི་འབྲས་སྐྱབས་ལ་སྐྱབས་སུ་འགྲོ་རྒྱུ་དེ་གལ་ཆེ་ཤོས་རེད་འདུག ཅེས་གསུངས་སོང་།
ཡང་༧མགོན་པོ་གང་ཉིད་ཀྱིས། ང་རང་ཚོ་ཚང་མས་ཤེས་གསལ་རེད། འཛམ་བུ་གླིང་འདིའི་སྒང་ལ་ཆོས་ལུགས་འདྲ་མི་འདྲ་མང་པོ་ཡོད་རེད། ངོས་རང་གིས་ངོས་ཤེས་པ་དེ་སྔ་བོད་ནས་ངོས་རང་གི་གྲོགས་པོ་ཁ་ཆེ་མང་པོ་ཡོད། ལྷ་སར་ཡོད་པའི་ཁ་ཆེ་ཚོ་བོད་གཞུང་གིས་ངོས་འཛིན་ཡོད་པ་བྱས་ནས་བོད་གཞུང་གི་མཛད་སྒོ་ཁག་ལ་ལྷ་ས་ཁ་ཆེ་ཡི་ཚོགས་པ་ཞིག་རྟག་པར་ཐུག་བསྡད་ཀྱི་ཡོད་རེད། ང་ཚོ་བོད་ལ་སྔ་ས་ནས་ཁ་ཆེ་གྲོགས་པོ་མང་པོ་ཞིག་ཡོད། དུས་རབས་གསར་པའི་ནང་ལ་ཆོས་མེད་མཁན་ནང་བོད་ཀྱི་རིག་གཞུང་ལ་དགའ་མོས་བྱེད་མཁན་མང་པོ་ཞིག་ཡོང་གི་འདུག དེ་སྔ་སངས་རྒྱས་ཀྱི་ཆོས་དར། བར་སྐབས་ཏོག་ཙམ་ཉམས་ཆག་ཕྱིན་པའི་ལུང་པ་དེ་ཚོའི་གྲས་དང་། དེ་སྔ་སངས་རྒྱས་ཀྱི་ཆོས་མ་དར་སའི་ལུང་པ་ཚོས་ཀྱང་སངས་རྒྱས་ཀྱི་ཆོས་སྙིང་རྗེ་རྩ་བར་འགྱུར་བའི་སེམས་སྐྱེད་བཟང་པོ་བྱ་རྒྱུ་དེར་དགའ་མོས་བྱེད་ཀྱི་འདུག བྱས་ཙང་ཁ་ཆེའི་ཆོས་པ་ཚོ་ཡིན་ན་འདྲ། དེ་བཞིན་མུ་སྟེགས་པའི་ཆོས་པ་སོགས་དངོས་གནས་དྲང་གནས་འཛམ་བུ་གླིང་འདིའི་སྒང་ལ་ཡོད་པའི་སྤུན་ཟླ་མི་རིགས་ཚང་མ་གཅིག་གྱུར་རེད། ང་ཚོ་ཚང་མས་གཅིག་གིས་གཅིག་ལ་ཕན་སེམས་ཀྱི་ཐོག་ནས་རོགས་བྱས། ཞབས་འདེགས་བསྒྲུབས། དེ་འདྲ་ཞིག་གི་ཐོག་ནས་དངོས་གནས་འཛམ་གླིང་ཞི་བདེ་ཡོང་ཐུབ་ཐབས་ཤིག དེ་རིང་ཁ་སང་སེམས་སྐྱོ་བ་ཞིག་ལ་ཆོས་ལུགས་མི་འདྲ་བ་རྒྱུ་མཚན་དུ་བྱས་ནས་ཏོག་ཙམ་འཐེན་འཁྱེར་ཡོང་བའི་ཟོལ་ཞིག་ཡོང་གི་འདུག ང་རང་ཚོ་ཆོས་པ་ཚང་མར་ལྟ་གྲུབ་མི་འདྲ་བ་ཡོད་རེད་དེ། ཆོས་ལུགས་ཚང་མས་སེམས་པ་བཟང་པོ་བྱ་དགོས་རེད། གཞན་ལ་རོགས་བྱ་དགོས་རེད་ཅེས་པ་ཆོས་ལུགས་ཚང་མས་གསུངས་ཀྱི་ཡོད་རེད། དེ་འདྲ་ཡིན་དུས་འཛམ་བུ་གླིང་འདིའི་སྒང་ལ་ཡོད་པའི་ཆོས་ལུགས་རིས་སུ་མ་ཆད་པའི་ཆོས་བྱེད་མཁན་ཚང་མ་དངོས་གནས་དྲང་གནས་ཀྱི་སྤུན་ཟླ་ནང་བཞིན་གྱི་འདུ་ཤེས་བཞག་ནས་མཐུན་སྒྲིལ་གོང་བུ་གཅིག་གྱུར་ཅིག་ཡོང་རྒྱུར་ངོས་རང་གིས་འབད་བརྩོན་བྱེད་ཀྱི་ཡོད། ངོས་ལ་གྲོགས་པོ་མང་པོ་ཡོད་རེད། ངོས་རང་ས་གནས་འདྲ་མི་འདྲར་འགྲོ་བའི་སྐབས་ཁ་ཆེ་ལྷ་ཁང་ལ་རྟག་པར་འགྲོ་བསྡད་ཀྱི་ཡོད། ཧིན་དྷུ་ལྷ་ཁང་དང་ཇེན་གྱི་ལྷ་ཁང་ལ་འཆར་ཅན་འགྲོ་བསྡད་ཀྱི་ཡོད། ངོས་རང་སྒེར་གྱི་ངོས་ནས་ནང་པའི་ཆོས་པ་ཞིག་རེད། ཡིན་ན་ཡང་། འཛམ་བུ་གླིང་གི་ཆོས་ལུགས་ཚང་མས་སེམས་པ་བཟང་པོ་དང་མི་ལ་རོགས་བྱ་རྒྱུའི་བསླབ་བྱ་གཅིག་གྱུར་རེད། ནང་པ་སངས་རྒྱས་པའི་ཆོས་ལུགས་ལ་ཆ་བཞག་ན་མདོ་སྡེ་པ། བྱེ་བྲག་སྨྲ་བ། སེམས་ཙམ་པ། དབུ་མ་པ་བྱས་ནས་འདྲ་མི་འདྲ་མང་པོ་ཞིག་ཡོད་པ་རེད་དེ། ཐམས་ཅད་སངས་རྒྱས་པའི་ཆོས་པ་གཅིག་པ་ཆགས་བསྡད་ཡོད་རེད། དེ་བཞིན་འཛམ་གླིང་སྒང་གི་ཆོས་བརྒྱུད་ཚོར་རང་རང་གི་ལྟ་གྲུབ་ཀྱི་ཐོག་ནས་མི་འདྲ་བ་གསུང་རྒྱུ་ཡོད་རེད་དེ། སེམས་པ་བཟང་པོ་བྱ་རྒྱུ་དང་། མི་ལ་གནོད་པ་མི་བྱ་རྒྱུ། གཞན་ཕན་བསྒྲུབ་རྒྱུའི་བསླབ་བྱ་གཅིག་གྱུར་རེད། དེ་འདྲ་ཡིན་དུས་ཆོས་ལུགས་ཚང་མས་དམ་ཚིག་གཙང་མའི་ཐོག་ནས་གཅིག་གིས་གཅིག་ལ་གུས་ཞབས་དང་ཆོས་ལུགས་མཐུན་སྒྲིལ་བྱ་རྒྱུ་གལ་ཆེན་པོ་ཞེ་དྲགས་རེད། ཅེས་གསུངས་སོང།
༧མགོན་པོ་གང་ཉིད་ཀྱིས། ང་ཚོ་སྐྱེས་པའི་ཁ་ཐུག་ནས་ཨ་མས་གསོ་སྐྱོང་བྱས་ནས་ནུ་ཆུ་འཐུང་ནས་འཚར་ལོངས་བྱས་པ་རེད། ང་ཚོའི་མི་ཚེ་མགོ་བཙུགས་པའི་ཁ་ཐུག་ནས་མ་ཡི་བྱམས་བརྩེ་ཡིས་འཚོ་ཐུབ་པར་བྱས་ཡོད་སྟབས། ང་ཚོའི་ལུས་འདི་ཨ་མའི་འོ་མས་འཚོ་བསྡད་པ་ཞིག་དང་ཨ་མའི་བྱམས་བརྩེས་འཚོ་བསྡད་པ་ཞིག་ཡིན་དུས། ལུས་འདིའི་སྟེང་ནས་བྱམས་པ་དང་བརྩེ་བའི་ཐོག་ནས་གཞན་ལ་ཕན་ཐོགས་བྱ་དགོས་པ་མ་གཏོགས། སུ་གཅིག་ལ་གནོད་པ་མི་བྱ་རྒྱུ་དེ་རང་བཞིན་ཆོས་ཉིད་ཀྱི་འགྲོ་སྟངས་ཤིག་ཆགས་འདུག འཛམ་གླིང་འདིའི་སྟེང་དུ་མི་གྲངས་ཐེར་འབུམ་བདུན་བརྒྱད་ཅིག་ཡོད་པ་ཚང་མ་མ་ཡི་མངལ་ནས་བཙས། མ་ཡི་ནུ་ཞོས་བསྐྱངས་བསྡད་པ་གཅིག་པ་རེད། དེ་འདྲ་ཡིན་དུས་འཛམ་གླིང་གི་མི་ཚང་མའི་བརྩེ་བའི་བསམ་པ་འདི་ཀུན་ལ་ཕན་བདེ་བསྒྲུབ་རྒྱུ་ཞིག་མ་གཏོགས། གཞན་ལ་གནོད་པ་བྱ་རྒྱུ་དེ་ང་ཚོར་རང་བཞིན་གྱིས་ལན་པོ་ཡོད་མ་རེད། ང་ཚོ་མི་ཞིག་ལ་ཐུག་དུས་སེམས་ཀྱི་གཏིང་ནས་མཛའ་བོ་བྱས་ནས་གད་མོ་བགད་ན་སྐྱིད་པོ་འདུག་ག རླུང་ལངས་ནས་བསྡད་ན་སྐྱིད་པོ་མི་འདུག་ག བྱས་ཙང་མི་ཚང་མ་མའི་མངལ་ནས་བཙས་ནས་མའི་ནུ་ཞོས་བསྐྱངས་པ་ཡིན་དུས། ང་ཚོས་དངོས་གནས་དྲང་གནས་བརྩེ་བ་ཡག་པོ་ཞིག་ཡོད་པ་བྱས་ནས། ཀུན་ལ་ཕན་བདེ་བསྒྲུབ་རྒྱུའི་ལྷག་བསམ་བརྟན་པོ་དགོས་རྒྱུ་གལ་ཆེན་པོ་རེད་འདུག ཅེས་གསུངས་སོང།
གསར་འགོད་པ་དཔལ་ལྡན་དང་དོན་གྲུབ་བཀྲིས་ཀྱིས་གླེ་ནས་སྤེལ།
