ཉེ་ལམ་རྒྱ་གར་རྒྱལ་ས་ལྡི་ལི་ཁུལ་དུ་ཆར་པ་ཤུགས་ཆེན་བབས་པའི་རྐྱེན་གྱིས་གཙང་པོ་རྒྱས་ཏེ་སྡོད་ཁང་དང་ཚོང་ཁང་། ཞིང་ས་སོགས་སུ་ཆུས་ཁེངས་ཏེ་དཀའ་ངལ་ཆེན་པོ་འཕྲད་བཞིན་ཡོད་འདུག
འདས་པའི་ཉིན་ཤས་ནས་སྤྱི་ཚོགས་དྲ་ལམ་ཁག་ཏུ་ལྡི་ལི་བསམ་ཡས་གླིང་གི་ཟ་ཁང་ཚོང་ཁང་དང་སྡོད་ཁང་སོགས་སུ་ཆུས་ཁེངས་བའི་བརྙན་ཐུང་མང་པོ་ཁྱབ་བཞིན་འདུག་པས། དེ་རིང་འདི་གའི་གསར་འགོད་པས་ཁ་པར་བརྒྱུད་ལྡི་ལི་ས་གནས་མགོ་འཛིན་རྡོ་རྗེ་ཚུལ་ཁྲིམས་ལགས་སུ་གནས་སྟངས་གང་འདྲ་ཆགས་ཡོད་སྐོར་དྲིས་པར་ཁོང་གིས། ས་གནས་མགོ་འཛིན་ལས་ཁུངས་ནས་ཉེན་སྐྱོབ་ཚན་པར་འབྲེལ་བ་བྱས་ཏེ་མ་ཇ་ནུ་ཀ་ཊི་ལའི་ (Majnukatila) ཆུའི་ཉེ་འགྲམ་དུ་དཀའ་ངལ་འཕྲད་བཞིན་པའི་བོད་མི་རྣམས་ལ་རོགས་རམ་བྱས་ཏེ་སྡོད་ཁང་སོགས་གྲ་སྒྲིག་བྱས་ཡོད་པ་དང་། ཁ་སང་ལྡི་ལིའི་བྷུ་དྷ་ཝི་ཧར་ (Budh Vihar) ཁུལ་དུ་ཡོད་པའི་བོད་མི་ ༥༠ ཙམ་ས་གནས་གཞན་དུ་སྤོ་བཅུག་ཡོད་པ་མ་ཟད། དེ་རིང་བར་འཐུང་ཆུ་ལི་ཊར་ ༡༨༠༠ དང་འོ་མ་སོགས་སྤྲད་ཡོད་སྐོར་འགྲེལ་བརྗོད་གནང་བྱུང་།
ཡང་ཁོང་གིས། ཉེ་ལམ་རྒྱ་གར་གྱི་ས་གནས་མང་པོའི་ནང་ཆར་པ་ཤུགས་ཆེན་བབས་ཀྱི་ཡོད་པར་བརྟེན། ལྡི་ལི་ལ་ཡོད་པའི་ (Hathni Kund) ཆུ་མཛོད་ནས་ཆུ་ཤུགས་ཆེན་བཏང་བ་དང་ཡ་མུ་ནའི་ (Yamuna) རྒྱས་པའི་རྐྱེན་གྱིས། ལྡི་ལིའི་ནང་ཆུས་ཁེངས་པ་དང་། ཆུ་འགྲམ་དུ་ཡོད་པའི་ཚོང་ཁང་དང་སྡོད་ཁང་ནང་དུ་ཆུ་བླུགས་འདུག ད་ལྟའི་ཆར་ལྡི་ལིའི་ཡུལ་མི་ཁག་ཅིག་གིས་ཆུ་མར་འདོན་ཐབས་བྱེད་ཀྱི་ཡོད་པ་དང་། སང་ཉིན་བར་དུ་ཆུ་ཉུང་དུ་འགྲོ་རྒྱུའི་རེ་བ་བྱེད་བཞིན་འདུག ད་ལྟའི་ཆར་ཡུལ་མི་ལ་འཐུང་ཆུའི་དཀའ་ངལ་ཤུགས་ཆེན་འཕྲད་བཞིན་ཡོད་པར་བརྟེན། ས་གནས་མགོ་འཛིན་ལས་ཁུངས་ནས་ཁ་སང་འཐུང་ཆུ་ལི་ཊར་ ༦༠༠ (600litre) སྤྲད་ཡོད་པ་དང་། དེ་རིང་ཡང་འཐུང་ཆུ་ལི་ཊར་ ༦༠༠ སྤྲོད་འཆར་ཡོད། ཅེས་བརྗོད་བྱུང་།
རྒྱ་གར་གཞུང་གིས་རོགས་སྐྱོར་ག་རེ་གནང་གི་ཡོད་མེད་ཐད་ལ་ཁོང་གིས། རྒྱ་གར་གྱི་ཉེན་རྟོག་པ་དང་ཉེན་སྐྱོབ་ཚན་པས་མི་མང་ལ་རོགས་རམ་གནང་མུས་ཡིན་པ་མ་ཟད། མི་སྒེར་སུ་འདྲ་ཞིག་ལ་དཔལ་འབྱོར་གྱི་དཀའ་ངལ་དང་སྡོད་ཁང་མེད་པའི་དཀའ་ངལ་སོགས་བྱུང་ཚེ་མཐུན་འགྱུར་རོགས་རམ་གནང་གི་ཡོད་པ་དང་། ཁ་ལག་སོགས་ཀྱི་རོགས་རམ་ཡང་གནང་བཞིན་འདུག ཅེས་བརྗོད་བྱུང་།
རྒྱ་གར་གྱི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ད་ལྟ་བར་དུ་ལྡི་ལི་ཁུལ་གྱི་མི་གྲངས་ ༤༠,༠༠༠ ཙམ་གནས་སྤོ་དགོས་བྱུང་ཡོད་འདུག་ལ། དེ་རིང་སྔ་དྲོར་རྒྱ་གར་ནང་སྲིད་ལྷན་ཁང་གིས། ཆུ་ཚོད་ཉེར་བཞིའི་ནང་ལྡི་ལིའི་ཆུའི་ཚད་གཞི་དམའ་རུ་འགྲོ་རྒྱུ་ཡིན་སྐོར་བརྗོད་འདུག་ལ། གཟའ་ཉི་མ་བར་དུ་སློབ་གྲྭ་དང་མཐོ་སློབ་སོགས་གནས་སྐབས་རིང་སྒོ་བརྒྱབ་ཡོད་འདུག
ད་ལན་ལྡི་ལིའི་ནང་བྱུང་བའི་ཆུ་ལོག་གི་དཀའ་ངལ་ནི་འདས་པའི་ལོ་ངོ་ ༤༨ གོང་སྟེ་ཕྱི་ལོ་ ༡༩༧༨ ནས་ད་བར་གྱི་དཀའ་ངལ་ཆེ་ཤོས་ཤིག་ཡིན་པ་ངོས་འཛིན་བྱེད་ཀྱི་ཡོད་འདུག་ལ། དེ་ཡང་ཕྱི་ལོ་ ༡༩༧༨ ཟླ་ ༩ ཚེས་ ༦ ཉིན་ལྡི་ལིའི་ནང་ཆུ་ལོག་བྱུང་སྟེ། མི་གྲངས་འབུམ་ ༢།༥ གནས་སྤོས་དང་། མི་གྲངས་ ༢༠ རྐྱེན་འདས་སུ་ཕྱིན་ཡོད་འདུག
གསར་འགོད་པ། བསྟན་འཛིན་ཕུར་བུ།
