Aha Moments! དང་བསྟན་འཛིན་ཀུན་གསལ། 

གངས་ལྷ་མེ་ཏོག

ཐོག་མར་ག་དུས་འགོ་བཙུགས་མིན་མི་ཤེས་ལ། དོ་སྣང་ཀྱང་བྱས་མེད། འོན་ཀྱང་། དོ་སྣང་བྱུང་བ་ནི་ཉེ་དུས་དྲྭ་ལམ་ལ་ Aha Moments! ཨ་ཧ། ཞེས་པའི་བཅའ་འདྲི་དང་། བགྲོ་གླེང། གླེང་མོལ། ཅི་འཕྲོས་མོལ་འཕྲོས་ཀྱི་ལེ་ཚན་གཅིག་མུ་མཐུད་ནས་འདོན་སྤེལ་བྱེད་བཞིན་པ་མཐོང་ཆོས་སུ་གྱུར་པ་དེ་རེད། ལེ་ཚན་དེ་གཉེར་མཁན་ནི་ཆུང་དུས་བོད་ནས་རྒྱ་གར་ལ་སློབ་སྦྱོང་ཆེད་འབྱོར་བ་དང་། རྒྱ་གར་ལ་ཚེ་འདིའི་ཤ་ཁྲག་འདྲེས་པའི་སྤུན་ཉེ་མེད་ཀྱང་། ༧གོང་ས་མཆོག་གི་ཐུགས་རྗེའི་འོད་ཟེར་འོག་བོད་ཁྱིམ་དང་། བོད་མིའི་སྒྲིག་འཛུགས་ནས་རོགས་སྐྱོར་འོག་གཞི་རིམ་དང་། མཐོ་རིམ་སློབ་གསོ་ཐོབ་པ་མ་ཟད། དེང་སྐབས་རང་མགོ་ཐོན་ངེས་ཀྱི་གནས་སྟངས་ཆགས་པའི་བོད་པའི་ཕོ་གསར་གཅིག་རེད་འདུག

ཐོག་མར་ལེ་ཚན་དེའི་མིང་ལ་དོ་སྣང་བྱུང་། Aha moment ཞེས་པ་ཐོག་མར་ལེ་ཚན་དེའི་མིང་མི་ཤེས་སྔོན་ལ། ཕྲན་བྱང་ཨ་རིའི་མཐོ་སློབ་གཅིག་ལ་སློབ་སྦྱོང་བྱེད་སྐབས་སློབ་ཚན་སྦྱངས་ཟིན་རྗེས་བརྗོད་གཞི་དེ་དང་དེ་སྦྱངས་པ་དང་བསམ་བློ་བཏང་རྗེས་ Aha moment ག་རེ་བྱུང་བ་དང་། སློབ་ཚན་དང་འབྲེལ་བའི་དྲྭ་རྒྱའི་ཐོག་ལ་བགྲོ་གླེང་དང་། མཉམ་སྤྱོད། སྐབས་རེ་ནང་སྦྱོང་ནང་ལ་ཡང་འབྲི་དགོས་ཀྱི་ཡོད། ཐོག་མར་གོ་ཁག་ཙམ་བྱུང་ཡང་། རྗེས་སུ་བྱང་ཨ་རིའི་མཐོ་སློབ་གཞན་གཅིག་གི་དགེ་རྒན་ནང་ཆོས་མཁས་པ་གཅིག་གི་གསུང་བཤད་ལས། Aha moment ཞེས་པ་ནི་ཁྱེད་རང་གིས་སྦྱངས་པའི་སློབ་ཚན་གྱི་ནང་དོན་གཅིག་ཐོས་པ་ཙམ་མིན་པར་། དེའི་ཐོག་ལ་བསམ་བློ་བཏང་པ་དང་། བརྟག་དཔྱད་བྱས་རྗེས་དེ་འདྲ་རེད་འདུག་བསམ་ནས་སེམས་ནང་ལ་ངེས་ཤེས་རྙེད་པའི་གནས་སྐབས་ལ་ཟེར་གྱི་ཡོད་རེད་ཅེས་གསུངས། ཟེར་ལོ་ཐོས་ལོ་ཙམ་མིན་པར་བསམ་བྱུང་གི་ཤེས་བརྟེན་ནས་གནས་དོན་གང་ཡང་རུང་བར་ངེས་ཤེས་རྙེད་པའི་དོན་ལ་ཟེར་གྱི་ཡོད་འདུག ཇི་ལྟར་ཐོས་པའི་དོན་ལ་རིགས་པ་བཞིས་ཡང་ཡང་བརྟག་དཔྱད་དང་བསམ་བྱུང་ཤེས་རབ་ལ་བརྟེན་ནས་བསམ་བྱའི་གནས་ལ་རྣམ་དཔྱོད་ཀྱིས་ཐེ་ཚོམ་སེལ་བའི་སྐབས་སུ་ཨ་ཧ་ཞེས་སེམས་ནང་སྤྲོ་སྣང་ཆེན་པོ་བྱུང་བའི་གནས་སྐབས་དེ་འདྲ་ལ་ཟེར་གྱི་ཡོད་པ་འདྲ།

དེ་རིང་གཟའ་མཇུག་ལ་ལས་ཀ་མེད་ཀྱང་། གཉིད་སྔ་པོ་ནས་སད་པ་དང་། དབྱར་དུས་ནམ་ཡང་སྔ་པོ་ལངས་ཀྱི་ཡོད་སྟབས། དྲྭ་ཐོག་ནས་ཨ་ཧ་ལེ་ཚན་ཐོག Tenzin Kunsel | Artist | Bioinformatics Engineer #53 ཞེས་པའི་བརྙན་ཐུང་ཆུ་ཚོད་ ༡ གཅིག་གི་གོང་ལ་དྲྭ་ཐོག་ལ་བཞག་པ་དེ་མཐོང་བས་བལྟ་ཉན་བྱས་པ་དང་། དེ་དང་མཉམ་དུ་བརྗེད་ཐོའམ་ཡིག་ཉོག་འདི་བྲིས་པ་ཡིན། བོད་ཡིག་འབྲི་བསྐལ་དབེན་པའི་ནུབ་ཕྱོགས་སུ་གུང་སེང་སྐབས་རང་ཁྱིམ་ལ་བོད་ཡིག་མ་བྲིས་ན་འབྲི་ས་དཀོན་པས་བོད་ཡིག་འབྲི་སྦྱོང་ཐེངས་ཤིག་ཡིན། ཀུན་གསལ་ལགས་ལ་དངོས་སུ་ཐུག་འཕྲད་བྱ་མྱོང་མེད་ཀྱང་། དྲྭ་ཐོག་ནས་མང་པོ་མཐོང་མྱོང་། ད་དུང་རང་ཉིད་གཞས་ལ་དོ་དབྱིངས་དེ་ཙམ་མེད་ཀྱང་། བོད་མིའི་འདུ་འཛོམས་སྐབས་སུ་ཀུན་གསལ་ལགས་ཀྱིས་གསར་རྩོམ་དང་། བོད་ནང་གི་གཞས་སྣ་བསྐྱར་ལེན་གནང་བ་མང་པོ་མཐོང་ཐོས་ཡོང་མྱོང་། དམིགས་གསལ་ཀུན་གསལ་ལགས་ཆུང་དུས་༧རྒྱལ་བ་རིན་པོ་ཆེའི་སྐུ་མདུན་ལ་ (དང་པོ་ནང་ནས་ཡོང་དུས། སྐེ་ལ་ཁ་བཏགས་གྱོན་ཡོད། ་་་ གམ་པ་ལ་མོ་རྒྱབ་དུས། །སུས་ཀྱང་ཡ་བྱེད་མཁན་མི་འདུག ཕར་ལ་མིག་གཅིག་བལྟས་པས། ཚུར་ལ་སྤྱན་གཅིག་གཟིགས་བྱུང་། ༧སྐྱབས་མགོན་ཡིད་བཞིན་ནོར་བུ་མཇལ་དུས། མིག་ཆུ་རང་དབང་མེད་པར་ཤོར་བྱུང་།) ཞེས་པའི་གཞས་དེ་ཐོས་པ་ནས་བཟུང་སེམས་ནང་ལ་དགའ་སྐྱོ་འདྲེས་མའི་ཚོར་སྣང་གཅིག་གིས་བག་ཆགས་གཟབ་མོ་བཞག་པར་བརྟེན་ངས་ཀུན་དགའ་ལགས་ག་དུས་དྲྭ་ལམ་ནས་མཐོང་ནའང་། སྐབས་དེ་དུས་ཀྱི་བུ་མོ་ཆུང་ཆུང་དེ་རང་སྣང་བར་འཆར་གྱི་འདུག བག་ཆགས་ཟེར་པ་དེ་སྟོབས་ཤུགས་ཆེན་པོ་རེད་མི་འདུག་གམ། ངའི་དགེ་རྒན་གཅིག་གིས་བག་ཆགས་ལ་ black box ཞེས་འགྲེལ་བརྗོད་སྙིང་རྗེ་པོ་ཞིག་སྐྱོན་གྱི་རེད། རྒན་ལགས་ཁོང་ཨ་རིའི་ནང་གཞི་རིམ་སློབ་གྲྭའི་ཨིན་ཡིག་རྩོམ་རིགས་དགེ་རྒན་ལོ་མང་གནང་ནས་ད་ལྟ་བགྲེས་ཡོལ་ལ་ཕེབས་ཡོད། རྒན་ལགས་ཀྱིས། ངས་དུས་རབས་མང་པོའི་ཨིན་ཡིག་སྒྱུ་རྩལ་རྩོམ་རིགས་ཀྱི་བསྟན་བཅོས་ཆ་ཚང་སྦྱངས་པ་ཡིན། སྐད་ཡིག་གི་སྒྱུ་རྩལ་དང་སྙན་ཆ་ཧ་ལས་པ་རེད། ཡིན་ནའང་། ནང་པའི་བཀའ་བསྟན་མཇལ་བ་ཁག་དང་བསྡུར་ན་ཆུ་ཆུ་རྐྱང་རེད། ཅེས་ང་ཚོ་ལ་ལན་མང་གསུངས་མྱོང་ཡོད་ལ། ཉེ་ལམ་དྲྭ་ཐོག་ནས་རྒན་ལགས་ཀྱིས་ཟབ་སྦྱོང་གནང་བ་གཅིག་མཇལ་དེའི་ནང་ལ་ཡང་གསུངས་པ་མཇལ། རྒན་ལགས་ཁོང་ནི་དེ་སྔ་ཨ་རིའི་གཞི་རིམ་སློབ་གྲྭའི་ཨིན་རྩོམ་དགེ་རྒན་གནང་བ་ཙམ་དུ་མ་ཟད། ཨིན་ཡིག་དགེ་རྒན་ཡོངས་ཀྱི་རྒྱུས་སྟོན་པ་ཡང་གནང་མྱོང་ཡོད། ད་ལྟ་རྒན་ལགས་བགྲེས་ཡོལ་ལ་ཕེབས་ཡོད་ནའང་། ཆོས་ཚོགས་ཀྱི་གསུང་བསྒྱུར་ཞབས་ཞུ་བསྒྲུབ་བཞིན་པ་གོ་ཐོས་བྱུང་། ད་ལྟ་བསྟན་འཛིན་ཀུན་གསལ་ལགས་དང་། ངའི་རྒན་ལགས་གཉིས་ཨ་རིའི་མངའ་སྡེ་གཅིག་གི་ནང་ལ་བཞུགས་ཡོད། བཅའ་འདྲི་ཞུ་མཁན་གྱིས་ཀུན་གསལ་ལགས་སུ་མི་ཚེའི་ནང་ལ་ད་བར་དུ་འཁྲབ་སྟོན་བྱས་པ་ལས་རང་ཉིད་ལ་ཤུགས་རྐྱེན་ཆེ་ཤོས་ག་རེ་ཡིན་ནམ་དྲིས་པར། ཀུན་གསལ་ལགས་ཀྱིས་ལམ་སེང་ལན་མ་རྒྱབ་པར་བསམ་བློ་ཡུན་རིང་བཏང་པ་དང་། དེ་ནས། ང་ལོ་ ༡༡ ཙམ་ལ་༧རྒྱལ་བ་རིན་པོ་ཆེའི་སྐུ་མདུན་ལ་ (མིག་ཆུ་རང་དབང་མེད་པ་ཤོར་བྱུང་།) ཞེས་པའི་གཞས་ཕུལ་པ་དེ་ཡིན། སྐབས་དེ་དུས་ངའི་སེམས་ནང་ལ་ལྷ་ཞེས་པ་ཡོད་པ་དང་། ལྷ་ཞེས་སེམས་ནང་ལ་འཆར་པ་དང་༧གོང་ས་མཆོག་གི་སྐུ་པར་དྲན་གྱི་ཡོད། གཞས་དེ་ཕུལ་དུས་ལྷ་ཡི་མདུན་ལ་གཞས་ཕུལ་པ་ལྟ་བུའི་ཚོར་བས་མིག་ཆུ་རང་དབང་མེད་པར་ཤོར་ནས་ཚོར་བ་ཤུགས་ཆེ་ཤོས་བྱུང་སོང་། ཅེས་ལན་བཏབ་སོང་། ༧གོང་ས་མཆོག་གི་སྐུ་མདུན་ལ་གཞས་སྣ་གཟིགས་འབུལ་ཞུས་པ་དེ་ཀུན་གསལ་ལགས་ཀྱིས་རྩ་ཆེན་པོར་བརྩིས་ནའང་། བཅའ་འདྲི་བྱེད་མཁན་གྱིས་གལ་ཆེན་པོར་ངོས་འཛིན་བྱེད་ས་ནི་ཀུན་གསལ་ལགས་ཀྱིས་ཀར་ནི་ཀི་ལྡིངས་ཆའི་ཐོག་ལ་གཞས་བཏང་པ་དེ་ཡིན་ས་རེད། རིན་ཐང་བལྟ་ཚུལ་མི་འདྲ་བ་ཟེར་པ་དེ་ཁྱད་མཚར་པོ་མ་རེད་དམ།

བསྟན་འཛིན་ཀུན་གསལ་ལགས་ཀྱིས་མགོ་རིན་ཆེན་རྒྱན་ཆ་མང་པོ་བཏགས་པ་ལྟར། གཞས་མ་དང་། གློག་བརྙན་འཁྲབ་སྟོན་པ། ད་དུང་། Bioinformatics Engineer ལས་རིགས་འདྲ་མིན་གྱི་དབུ་རྒྱན་མང་པོ་བཏགས་འདུག ཀུན་གསལ་ལགས་ཀྱི་ལས་རིགས་ཀྱི་མིང་ཐོས་པ་ལས་རིགས་གང་ཡིན་ནམ་བསམ་པ་དང་། རང་ཉིད་བོད་པའི་སྤྱི་ཚོགས་ནང་ལ་ཤེས་ལྡན་མི་སྣ་མང་པོས་ལས་རིགས་འདེམས་སྟངས་ཐོག་ལ་དེ་སྔ་ནས་བསམ་ཚུལ་གཅིག་ཡོད་པ་དེའི་ཐོག་བསམ་གཞིགས་ཀྱི་ཀློང་དུ་ཚུད་སོང་། ཕྲན་གྱི་ད་ལྟའི་སྡོད་གནས་བྱང་ཨ་རིའི་ནང་ལ་ཡོད་པ་དང་། འདི་གར་བོད་པའི་གཞོན་སྐྱེས་མཐོ་སློབ་ཐོན་པ་མང་པོ་ཞིག་ལ་འབྲེལ་བ་ཡོད། ཁོ་ཚོའི་ཨིན་སྐད་ཀྱི་ཆུ་ཚད་ནི་སྐད་ཡིག་དང་པོའི་གནས་བབ་ལ་ཡོད་པ་དང་། གཞི་རིམ་སློབ་གྲྭའི་ཤེས་ཚད་ཀྱང་གང་ལེགས་ཡོད་ཀྱང་། མང་པོ་ཞིག་གིས་བོད་དང་བོད་མི་རིགས་ལ་བསམ་གཞིགས་མེད་པར་རང་ཉིད་ཀྱི་འཚོ་བའི་གནས་སྟངས་བརྟན་པོ་ཡོང་ཆེད་དང་། ཕ་མ་སྤུན་མཆེད་ཀྱི་རེ་བ་ལྟར་སྨན་ཞབས་པ་བྱེད་མཁན་ཧ་ཅང་མང་པོ་ལས། བོད་ལུང་པ་འཛིན་སྐྱོང་བྱེད་རྒྱུར་མཁོ་བའི་ལས་རིགས་སྣེ་འཛོམས་ཐོག་ལ་ཕྱག་ལས་མཁན་དཀོན་ཙམ་རེད་འདུག ངའི་གྲོགས་པོ་གཅིག་གིས། བོད་པའི་ཕྲུ་གུ་དང་ཚོང་པ་ཚང་མ་གཅིག་རེད་འདུག དང་པོ་ཡར་བླུགས་དུས་གྲུ་བཞི་དང་། མར་བཏོན་དུས་ཀྱང་ཚང་མ་གྲུ་བཞི་གྲུ་རྐྱང་ཡིན་པ་ལས་བཟོ་བལྟ་མི་འདྲ་བ་དེ་འདྲ་ཐོན་གྱི་མི་འདུག ལོ་གཞོན་པ་མང་ཆེ་བ་སྨན་ཞབས་པ་དང་། རྒྱ་གར་ནང་ལ་ཚོང་པ་མང་ཆེ་བ་བལ་གོས་བསིལ་ཚོང་རྒྱབ་མཁན་རེད་འདུག འགྱུར་བ་གཅིག་དགོས་ཀྱི་འདུག་ཀྱང་། འགྱུར་བ་མི་འགྲོ་བ་གང་རེད་དམ། ཅེས་བཤད་པ་དེ་དྲན། ད་ལྟ་ཀུན་གསལ་ལགས་ཀྱི་ལས་ཀ་དེ་འདྲ་གནང་མཁན་ཨ་རིའི་ནང་ལ་བོད་ཕྲུག་ག་ཚོད་ཡོད་དམ། སྨན་ཞབས་པ་གནང་མཁན་ག་ཚོད་ཡོད་དམ། ངས་སྨན་ཞབས་པའི་ལས་ཀ་ཡག་པོ་མ་རེད་ཟེར་གྱི་མེད་ལ། བྱ་མི་དགོས་པ་དེ་བས་ལབ་ཀྱི་མེད། གཞན་ཕན་གྱི་བྱ་བ་རླབས་ཆེན་རེད། ཡིན་ནའང་། བོད་མི་རིགས་མི་རིགས་གཞན་དང་འདྲ་མཉམ་གྱིས་འགྲོ་དགོས་ན། མ་འོངས་པར་བོད་ལ་ལོག་ནས་ལུང་པ་འཛིན་སྐྱོང་བྱ་དགོས་ན། ཚང་མ་སྨན་ཞབས་པ་བྱས་པས་ཕན་ཐོགས་ཡོད་དམ། ད་ལྟ་མི་རིགས་གཞན་དང་དཔུང་མཉམ་གཤིབ་ཀྱིས་འགྲོ་དགོས་ན། ཚང་མ་སྨན་ཞབས་པ་བྱས་པས་འགྲིག་གམ།

ནད་ཡམས་སྔོན་ལ་རྫོང་གསར་མཁྱེན་བརྩེ་རིན་པོ་ཆེས་འཁྲབ་འཁྲིད་གནང་བའི་གློག་བརྙན་མཁའ་འགྲོ་མ་ཞེས་པའི་གློག་བརྙན་ནང་ལ་ཀུན་གསལ་ལགས་ཀྱིས་གཙོ་འཁྲབ་པའི་འགན་བླངས་འདུག་ལ། གློག་བརྙན་དེ་དངོས་སུ་འགྲེམས་སྤེལ་བྱས་ཟིན་ཡོད་འདུག གློག་བརྙན་འཁྲབ་སྟོན་དང་། གཞས་གཏོང་བའི་གནས་བབ་ཐོག་ལ་ཀུན་གསལ་ལགས་ཀྱིས། གཞས་གཏོང་སྐབས་ངས་ང་རང་གི་ངོ་བོའི་ཐོག་ནས་གཏོང་གི་ཡོད་པ་དང་། གློག་བརྙན་འཁྲབ་དུས་ངས་མི་གཞན་གྱི་ཚབ་བྱས་ནས་འཁྲབ་དགོས་སྟབས་གཞས་གཏོང་དུས་རང་ཉིད་ལ་གདེངས་ཚོད་ཆེ་བ་དང་། བདེ་སྣང་ཆེ་བ་འདུག ཡིན་ནའང་། གློག་བརྙན་འཁྲབ་དུས་གཞན་གྱི་ཚབ་བྱེད་དགོས་པས་མི་བདེ་བ་ཡོང་གི་འདུག ད་ལན་རྫོང་གསར་མཁྱེན་བརྩེ་རིན་པོ་ཆེ་གུ་ཡངས་པོ་དང་། འདྲིས་བདེ་པོ། ཆོབ་ཚ་པོ། སེམས་ཞི་བདེའི་ཐོག་ལ་གནས་མཁན་ཞིག་ཡིན་སྟབས་ཁོང་དང་མཉམ་དུ་ལས་ཀ་བྱེད་རྒྱུ་བྱུང་བ་དེ་ནི་གནས་སྟངས་མི་འདྲ་བ་ཤིག་རེད་ལ། གློག་བརྙན་འཁྲབ་ཡུལ་བལ་ཡུལ་ནི་ང་ལ་མཚོན་ན་ས་ཆ་གཞན་དང་མི་འདྲ་བ་ཞིག་ཡིན་པ་ཚོར་སོང་། ཅེས་སོགས་དགད་མོ་དང་། དགའ་སྣང་བཅས་འགྲེལ་བརྗོད་བྱས། ཀུན་གསལ་ལགས་ཀྱིས་བཅའ་འདྲི་ལེ་ཚན་ནང་ལ་སྐད་ཆ་ཤོད་སྐབས་ཚབ་སྣང་དང་ཞེད་སྣང་གང་ཡང་མེད་པར། སྔར་བྱུང་གི་ལོ་རྒྱུས་སོ་སོ་དང་སེམས་ཐག་ཧ་ཅང་ཉེ་བའི་ཨ་མ་ལགས་སུ་བཤད་པ་ལྟ་བུ་ཡོད་པ་དེ་ཡང་སྐད་ཆ་བཤད་རྩལ་ communication skills ཡིན་ངེས། ཨ་རི་སོགས་ནུབ་ཕྱོགས་རྒྱལ་ཁབ་ནང་ལ་སློབ་སྦྱོང་ཟེར་པ་ནི། བློ་འཛིན་དང་ངག་སྐྱོར་གཏོང་ཐུབ་མཁན་ཙམ་ལ་མི་ཟེར་པར་། soft skills ཞེས་མི་གཞན་ལ་སྐད་ཆ་ཤོད་སྟངས་ཡག་པོ་དང་། སྐད་ཆ་ཤོད་མཁས་པོ་དང་འབྲེལ་བ་བྱ་མཁས་པོ་སོགས་ནི་ཉིན་རེའི་མི་ཚེའི་ནང་དང་། ཚོང་ལས་ལས་རིགས་ནང་ལ་མེད་ན་མེད་ཐབས་ཀྱི་རྩལ་ཡིན་པ་བརྗོད་པ་མ་ཟད། མཐོ་སློབ་ཀྱི་སློབ་ཚན་མང་པོའི་ནང་ལ་ Business Communication ཞེས་པའི་སློབ་ཚན་སྦྱོང་དགོས་ཀྱི་ཡོད།

བསྟན་འཛིན་ཀུན་གསལ་ལགས་ཀྱིས་འཁྲབ་པའི་གློག་བརྙན་མཁའ་འགྲོ་མ་ཞེས་པ་དེ་གང་འདྲ་ཞིག་ཡིན་ནམ། ངས་གློག་བརྙན་དེ་བལྟ་མྱོང་མེད་ལ། ལེ་ཚན་དེ་བརྒྱུད་ནས་མིང་ཐོས་པ་ཐེངས་དང་པོ་ཡིན། ཡིན་ནའང་། ཀུན་གསལ་ལགས་ཀྱིས་གློག་བརྙན་གྱི་ནང་དོན་འགྲེལ་བཤད་མདོར་ཙམ་གནང་བ་དེ་ལྟར། གློག་བརྙན་དེའི་ནང་ལ་གཙོ་འཁྲབ་པ་ཕོ་གསར་གཅིག་ཡོད་པ་ཁོང་ཆོས་དད་མེད་པ་ཙམ་དུ་མ་ཟད་ཆོས་ལ་དགག་པ་བྱེད་མཁན་གཅིག་ཡིན་པ་དང་། ཁོང་ལ་རྨི་ལམ་འཚུབ་པོའམ། ཡང་ན། འཆར་སྣང་ཁྱད་མཚར་པོ་གཅིག་བྱུང་བའི་ནང་ལ་ཁོ་རང་གི་སྤུན་མཆེད་འདས་པོ་དྲན་ལམ་ལ་འཆར། ཁོས་དེ་དོན་ཁོ་རང་གི་གྲོགས་པོ་ཆོས་དད་ཅན་དང་། ད་དུང་རྨོངས་དད་ལ་ཡིད་ཆེས་བྱེད་མཁན་ལ་བརྗོད་པར། གྲོགས་པོས་དེ་ནི་ངན་ལྟས་ཡིན་པས་ལྷ་དང་བླ་མར་ཡར་ཞུ་གསོལ་འདེབས་བྱ་དགོས་པ་བརྗོད། སྒྲུང་གི་ནང་དོན་ལས་མི་ཚེའི་ནང་ལ་ཆོས་དད་དང་། དངོས་ཡོད་འཚོ་བ་གཉིས་གཤིབ་བསྡུར་བྱ་དགོས་པ་བསྟན་སྐོར་བརྗོད། ངས་སྒྲུང་གི་ནང་དོན་མདོར་ཙམ་ཐོས་པ་དང་། ལམ་སེང་དྲན་ལམ་ལ་འཆར་པ་ནི་གློག་བརྙན་དེའི་འཁྲབ་འཁྲིད་པ་མི་རིགས་འབྲུག་པ། ནང་ཆོས་དར་ཁྱབ་ཆེ་བའི་ལུང་པ་ནས་སྐྱེས་པ་དང་། ད་དུང་བོད་ཀྱི་བླ་མའི་མིང་མཚན་གནས་ཐོབ་པ་རྫོང་གསར་མཁྱེན་བརྩེ་རིན་པོ་ཆེ་དང་། ཁོང་གིས་དེ་སྔ་འཁྲབ་འཁྲིད་གནང་བའི་གློག་བརྙན་དང་། རྩོམ་ཡིག་ཁ་ཤས་དྲན། ནད་ཡམས་སྐབས་སུ་ངས་ཁོང་གི་ཨིན་དེབ་གཉིས་བཀླགས་པ་ཡིན། དེབ་གཅིག་ཁོ་རང་གི་ལོ་རྒྱུས་དང་། གཞན་དེ་ནི་ ་་་ གང་ལྟར། ཁོང་གི་མི་ཚེའི་ལོ་རྒྱུས་ནང་ལ་ཅུང་ཟད་དྲང་པོ་བྲིས་མེད་དམ་བསམ། ཡིན་ནའང་། འབྲུག་པ་ཀུན་ལེགས་ཀྱི་རང་རྣམ་ལྟ་བུ་འབྲི་རྒྱུར་འབད་བརྩོན་བྱས་ཡོད་སྲིད་ཀྱང་དེ་ལྟར་བྱུང་མེད་པ་གསལ་པོ་རེད་འདུག རྫོང་གསར་མཁྱེན་བརྩེ་ཁོང་གིས། མཁའ་འགྲོ་མ་ ཞེས་པའི་གློག་བརྙན་འཁྲབ་འཁྲིད་གནང་དགོས་དོན་སོགས་བརྗོད་འདོད་ཆེ་ཡང་སྔོན་ལ་གློག་བརྙན་བལྟ་དགོས་པ་དང་། དེ་ནས་བསམ་གཞིགས་བྱ་དགོས། དངོས་དོན་རྙེད་ན་ཕན་ཐོགས་ཆེ་བས་དེ་མུར་འཇོག་རྒྱུ་ལས་མ་འདས།

དེ་སྔ་ཨེ་མོ་རི་གཙུག་ལག་སློབ་ཆེན་ལ་ཡོད་པའི་བོད་པ་འབུམ་རམས་པ་གཅིག་གིས། ཕྱི་མི་གཞིས་སྤོས་པ་ཚོས་གལ་སྲིད་མི་རིགས་གཞན་དང་དཔུང་མཉམ་གཤིབ་ཀྱིས་འགྲོ་བསྐྱོད་བྱ་དགོས་ན། ཐབས་ལམ་ལེགས་ཤོས་ནི་སློབ་སྦྱོང་ཚད་ལྡན་བྱ་དགོས། ཅེས་བཤད་པ་དེ་རེད། ཐོག་མར་ཉན་སྐབས་བཤད་མཁན་ཁོ་རང་ལ་ལམ་འགྲོ་རྒྱུགས་ནས་འབུམ་རམས་པའི་སློབ་སྦྱོང་གོ་སྐབས་ཐོབ་པས་གཞན་ལ་སྤོབས་སེམས་ཀྱིས་བཤད་པ་འདྲ་པོ་མཐོང་མཁན་བྱུང་འདུག་ཀྱང་། ཕྲན་གྱིས་དང་པོ་ཉིད་ནས་ཡིད་སྨོན་དང་རྒྱབ་སྐྱོར་ཞུ་དགོས་བྱུང་། ང་ལ་མཚོན་ན་ཆེས་དགའ་ཤོས་ནི་ཤེས་ཡོན་སློབ་སྦྱོང་སྤྱི་དང་། དམིགས་བསལ་དེང་དུས་ཤེས་ཡོན་དང་། སེམས་ཁམས་རིག་པའི་ཐོག་ལ་སློབ་སྦྱོང་གྲུབ་འབྲས་ཐོན་མཁན་གྱི་མི་སྣའི་གཏམ་བཤད་དང་། སློབ་སྦྱོང་གི་བརྒྱུད་ཉན་རྒྱུར་དགའ་པོ་ཡོད། དེ་རིང་ངས་ལེ་ཚན་དེ་ཉན་དགོས་དོན་གཙོ་བོ་ཀུན་གསལ་ལགས་ཀྱི་སློབ་སྦྱོང་བརྒྱུད་རིམ་ཉན་རྒྱུ་དེ་ཡིན། ཀུན་གསལ་ལགས་ཀྱིས། ངས་ Bioinformatic Engineer ཐོག་ལ་སློབ་སྦྱོང་བྱས་པ་ཡིན་ལ། Genetic ཐོག་ལ་ལས་ཀ་བྱེད་ཀྱི་ཡོད། གཙུག་ལག་སློབ་ཆེན་ནང་ལ་ཉེ་བའི་གཙུག་ལག་རབ་འབྱམས་སློབ་སྦྱོང་བྱེད་སྐབས་ Physics and Bio-Chimestry ཐོག་སློབ་སྦྱོང་བྱས་པ་དང་། དེ་ནས་ལོ་གཉིས་བར་མཚམས་བཞག་ནས་གཞས་དང་། གློག་བརྙན་འཁྲབ་པར་རྒྱ་གར་དང་བལ་ཡུལ་ལ་སྐོར་བ་རྒྱབ་པ་ཡིན། ཉེ་བའི་གཙུག་ལག་རབ་འབྱམས་སློབ་སྦྱོང་བྱ་སྐབས་སློབ་ཚན་ཆེན་པོ་གཉིས་མཉམ་དུ་བླངས་པས་ཡིད་ཐང་ཆད་ནས་སློབ་སྦྱོང་བྱེད་ཀྱི་མིན་བསམ་པའི་བསམ་ཚུལ་སླེབས་སོང་། དེ་ནས་བར་མཚམས་བཞག་ནས་རྒྱ་གར་དང་བལ་ཡུལ་ལ་ཕྱིན་པ་ཡིན། ཅེས་བཤད་པ་དང་། བར་མཚམས་འདིར་བཅའ་འདྲི་བྱེད་མཁན་གྱིས། གལ་སྲིད་ངས་ནོར་མེད་ན། ཁྱེད་རང་ Physics and Bio-Chimestry སློབ་སྦྱོང་གནང་དགོས་དོན་དེ་ཡང་ནང་ཆོས་ཀྱིས་ཤུགས་རྐྱེན་ཐེབས་ནས་གནང་བ་རེད་ཟེར་པ་བདེན་པ་རེད་དམ། ཅེས་དྲིས་པར། ཀུན་གསལ་ལགས་ཀྱིས། རེད། རེད། སྤྱིར་བཏང་ང་སློབ་ཚན་དེར་ཆུང་དུས་ནས་དགའ་མོས་ཡོད། ངས་སྐྱེས་མཚར་བྱུང་ས་ནི་གཞིས་ཆགས་སུ་ཡིན་པ་དང་། ཆུང་དུས་སློབ་ཁྲིད་གནང་མཁན་གྱིས་མ་འོངས་པར་དགེ་རྒན་དང་སྨན་པ་སོགས་བྱེད་རྒྱུ་ཡོད་པ་སོགས་སྣེ་ཁ་ལྔ་ཙམ་ལས་བཤད་ཀྱི་མེད། ང་ཆུང་དུས་ཚན་རིག་དང་ཨང་རྩིས་ལ་དགའ་པོ་ཡོད་ནའང་། Enginner བྱ་རྒྱུའི་གོ་སྐབས་ཡོད་མེད་ཤེས་ཀྱི་མེད། དེ་ནས་རིམ་པས་སོ་སོའི་གཟུགས་པོའི་ནང་དང་། ན་ཚའི་རིགས་ལ་དོ་སྣང་སླེབས་སོང་། དེ་ནས་ང་ལ་དགེ་རྒན་ཡག་པོ་རགས་སོང་། སྔོན་མ་རྒྱ་གར་ནང་ལ་ཡིན་ན་སློབ་སྦྱོང་ཡག་པོ་ཡོད་ཟེར་པ་ནི་ངག་སྐྱོར་དང་བློ་འཛིན་ཡག་པོ་བྱེད་མཁན་ལ་ལབ་ནའང་། རྒན་ལགས་ཁོང་གིས་སློབ་ཁྲིད་དེ་དང་མི་འདྲ་བ་གནང་གི་ཡོད། ངས་སློབ་སྦྱོང་བྱེད་སྐབས་དབྱར་ཀ་རྟག་པར་རྒྱ་གར་ལ་བསྐྱོད་ནས་ཚན་རིག་དང་ལྟ་གྲུབ་སོགས་སློབ་སྦྱོང་བྱས་པ་ཡིན། ཨ་རིར་ལྷ་ཞེས་ངོས་འཛིན་བྱེད་སྟངས་ནི་ལྷ་གནམ་ལ་ཡོད་པ་དང་། ཚང་མ་ལྷས་བཟོས་ཡོད་པ་ལབ་དུས་ངས་དེ་ལ་ཡིད་ཆེས་བྱེད་ཁག་པོ་བྱུང་། དེ་ནས་ཨ་རིར་རྒན་ལགས་གཅིག་གིས་འཛིན་གྲྭའི་ནང་ལ་བོད་ཀྱི་ནང་ཆོས་སྐོར་སྐར་མ་གཉིས་ཙམ་གསུངས་པ་དང་། བོད་བརྒྱུད་ནང་ཆོས་ནང་ལ་ GOD (འཇིག་རྟེན་བཀོད་པ་པོ་) ཡོད་མ་རེད་ལབ་པས། སྐབས་དེ་དུས་ང་ཧ་སངས་པ་དང་། ངས་ཡོད་རེད་ལབ་པ་ཡིན། དེའི་དགོང་དྲོ་ང་བསམ་བློ་གཏོང་དགོས་པ་བྱུང་བ་དང་། ངས་དྲྭ་ཐོག་ནས་འཚོལ་བཤེར་བྱས་པ་བརྒྱུད་བོད་ཀྱི་ནང་ཆོས་ནང་ལ་ GOD (འཇིག་རྟེན་བཀོད་པ་པོ་) མེད་པ་ཤེས་པས་ངའི་བསམ་བློ་དང་མཐུན་པ་མཐོང་པ་མ་ཟད། ལོ་རྒྱུས་རྒན་ལགས་ཁོང་གིས་ངའི་བསམ་བློ་གཏོང་སྟངས་ལ་གསར་བརྗེ་ཆེན་པོ་ཞིག་བྱས་སོང་། དེ་ནས་རྒྱ་གར་ལ་དབྱར་ཀ་བསྐྱོད་ནས་བོད་ཡིག་དང་ནང་ཆོས་དགེ་རྒན་གསུམ་ལ་བརྟེན་ནས་སྦྱངས་པས་དངོས་གནས་ཡག་པོ་བྱུང་། མདོར་བསྡུས་ནས་བཤད་ན་ངས་བདེན་པ་ཤེས་ཐབས་བྱ་ཡི་ཡོད། ཅེས་བཤད་སོང་། བདེན་པ་འཚོལ་བ་ཞེས་པ་དེ་ཐོས་པ་ཙམ་གྱིས། ངའི་སེམས་ལ་གཡོ་འགུལ་ཆེན་པོ་ཞིག་ཐེབས་བྱུང་། གཅིག་བྱས་ན། ངས་དེང་སྐབས་བལྟ་བཞིན་པའི་སྟོན་པ་སངས་རྒྱས་བཅོམ་ལྡན་འདས་ཀྱི་མཛད་རྣམ་བོད་བསྒྱུར་འཁྲབ་ཁྲིད་གནང་བ་དེའི་ནང་ལ། གཞོན་ནུ་དོན་གྲུབ་ཀྱིས་བདེན་པ་འཚོལ་ཕྱིར་རྒྱལ་སྲིད་དང་། བཙུན་མོ། སྲས་སྒྲ་གཅན་འཛིན་སོགས་བཞག་ནས་ནགས་ཁྲོད་ཕེབས་པའི་གནས་སྟངས་དེ་ཡང་དྲན་དུ་བཅུག་པ་དང་། དེས་ཀྱང་ཤུགས་རྐྱེན་བྱས་པ་མིན་ནམ། ད་དུང་། བོད་ཀྱི་དཔེ་མཛོད་ཁང་གི་དགེ་བཤེས་ལགས་གཅིག་གིས། ཞི་བདེ་འདོད་ན་བདེན་པ་འཚོལ། ཞེས་པའི་བརྗོད་གཞིའི་ཐོག་ལ་སློབ་ཁྲིད་མང་པོ་གནང་པ་ཡང་དྲན་དུ་བཅུག འོན་ཀྱང་། བདེན་པ་ཡོད་དམ། གནས་ལུགས་རྟོགས་པའི་དོན་དམ་བདེན་པ་ཡོད་དམ། ཨ་ཕ་འཚོལ་ནས་ཨ་མ་རྙེད་པ་གསུངས་པ་ལྟར། ཀུན་རྫོབ་བདེན་པ་འཚོལ་ནས་དོན་དམ་བདེན་པའི་གནས་ལུགས་ཤེས་ཐུབ་པ་ཤོག

༢༠༡༧ ལོར་ཀུན་གསལ་ལགས་ཀྱིས་མི་འགྱུར་རིན་པོ་ཆེ་མཇལ་འདུག སྐབས་དེ་དུས་ཀུན་གསལ་གྱི་སེམས་ཁམས་ནི་ནང་ཆོས་ལ་དོ་སྣང་ཡོད་པ་དང་མཉམ་དུ་སེམས་ནང་གི་དྲི་བ་མང་པོར་ལན་ཐེབས་རྒྱུར་གང་ཡོང་ཡོང་གི་འཚོལ་ཐབས་བྱེད་ཀྱི་ཡོད་ཀྱང་། ནང་སེམས་ཀྱི་རྣམ་རྟོག་སྤྲེའུ་ནང་བཞིན་ཡོད་པ་ཞི་ཐབས་སུ་མི་འགྱུར་རིན་པོ་ཆེས་སྒོམ་གྱི་སློབ་ཁྲིད་ཀྱང་གནང་འདུག་ལ། ད་ལྟ་ཡིན་ནའང་མི་འགྱུར་རིན་པོ་ཆེ་གྲོགས་པོ་ལྟ་བུ་བློ་ཐག་ཉེ་པོས་དྲི་བ་ཁ་པར་ཐོག་ནས་འདྲི་བཞིན་ཡོད་སྐོར་བརྗོད། གཞོན་སྐྱེས་དང་། དམིགས་བསལ་ཕྱི་གླིང་བ་ཚོར་ནང་ཆོས་སྤྱི་དང་དམིགས་བསལ་སྒོམ་ཁྲིད་ལ་དོ་སྣང་བསྐྲུན་རྒྱུའི་ཐད་མི་འགྱུར་རིན་པོ་ཆེའི་ཕྱག་རྗེས་ཆེན་པོ་ཡིན་པ་མངོན་གསལ་ཡིན་པ་ར་སྤྲོད་བྱས་སོང་དྲན།

ཡོངས་གྲགས་སུ་བཙན་བྱོལ་བོད་མིའི་སྤྱི་ཚོགས་ཁྲོད་དུ་ཀུན་གསལ་ནི་གཞས་མ་རེད་ལབ་ནའང་། མོ་རང་ཆུང་དུས་སྐད་ཡག་པོ་ཡོད་པ་ངོ་འཕྲོད་མི་འདུག རྒྱ་གར་ནས་ཨ་རིར་ཆུང་དུས་སླེབས་དུས་བོད་སྐད་གཙང་མ་རྒྱབ་པའི་གནས་སྟངས་ལ་རྒན་དབང་རྒྱལ་ལགས་ཞུ་བས་བསྟོད་བསྔགས་དང་། གཞས་གཏོང་རྒྱུའི་གོ་སྐབས་གནང་བར་བརྟེན་པ་དེས་རྒྱུ་རྐྱེན་འཛོམས་པ་ལྟ་བུས་གཞས་གཏོང་རྒྱུའི་ལམ་བུར་ཞུགས་འདུག དེ་ནས་ཨིན་ཡིག་འབྲིང་རིམ་སློབ་གྲྭའི་གཞས་སྣ་འགྲན་བསྡུར་ལ་ཚུད་རྒྱུགས་གཏོང་བར་འགྲོ་སྐབས་རེ་དོགས་ཀྱི་དྲ་བར་མ་ཚུད་པར་ལྷད་མེད་ཀྱི་ཀུན་སློང་ཐོག་ནས་བསྐྱོད་པར་བརྟེན་ནས་གྲུབ་འབྲས་བཟང་པོ་བྱུང་འདུག སྐབས་དེ་དུས་ངའི་སེམས་ནང་ལ་དྲན་པ་ནི། ༧གོང་ས་མཆོག་གིས་བཀའ་སློབ་གནང་སྐབས་མཐའ་གཅིག་ཏུ་གཞན་ཕན་ལ་དམིགས་པ་ལས་གྲགས་འདོད་ཁེ་འདོད་ཀྱི་ཀུན་སློང་རྩ་བ་ནས་མེད་པར་བརྟེན་ཡག་པོ་ཡོང་གི་འདུག་ཅེས་གསུངས་པ་དྲན་ལ། ཕྲན་གྱི་ལས་ཀའི་འགོ་ཁྲིད་བཀུར་དུ་འོས་པ་གཅིག་གིས། སོ་སོས་ལས་ཀ་ལྷག་བསམ་རྣམ་དག་གིས་བྱས་ནས་གཞན་གྱིས་རང་ལ་མགོ་ལྕགས་ཞུས་ནའང་བློ་ཕངས་དགོས་དོན་ཡོད་མ་རེད། ཅེས་གསུངས་པ་སོགས་དྲན། བཙན་བྱོལ་ནང་གི་གཞས་པ་མང་པོ་གཅིག་ནི་སྐད་ཡག་པོ་ཡོད་པར་བརྟེན་ནས་གཞས་བཏང་པ་ཙམ་ལས། གཞས་གཏོང་སྟངས་སོགས་ཆེད་ལས་སློབ་སྦྱོང་ཐོབ་མཁན་བརྒྱ་ཆ་ཉུང་ཉུང་རེད། བོད་པའི་གཞས་པ་དང་། གསར་འགོད་པ་སོགས་ལ་ཆེད་ལས་སློབ་སྦྱོང་ཐོབ་མྱོང་མཁན་དཀོན་པོ་ཡིན་དོན་ནི། འགྲིག་འགྲོ་ཡི་རེད། ཅེས་པའི་བསམ་བློ་གཏོང་སྟངས་ཀྱིས་ལན་པ་རེད་དྲན། ཀུན་གསལ་ལགས་ལ་གཞི་རིམ་སློབ་གྲྭའི་གནས་སྐབས་ནས་ཉིན་རེ་ལ་གཞས་གཏོང་སྟངས་སྦྱོང་བརྡར་ཆུ་ཚོད་གསུམ་ཙམ་རེའི་སློབ་སྦྱོང་གོ་སྐབས་ཐོབ་འདུག གཞས་དང་རོལ་དབྱངས་ཐོག་ལ་གོ་རྟོགས་དམན་པའི་ང་དང་ང་འདྲ་བ་ཚོས་མི་ཤེས་པའི་གནས་ཚུལ་མང་པོ་བཤད་སོང་། དཔེར་ན། ཀུན་གསལ་ལགས་ཀྱིས། གཞས་གཏོང་སྟངས་སྦྱོང་སྐབས། སྐད་ངག་ལ་མིད་པ་ནས་ཐོན་པའི་སྐད་དང་། མགོ་ནས་ཐོན་པའི་སྒྲ། བྲང་ཁོག་ནས་ཐོན་པའི་སྒྲ་སྐད་སོགས་དབྱེ་བ་མང་པོ་ཡོད་པ་དང་། སྐད་འདོན་སྟངས་སློབ་ཁྲིད་བྱེད་ཀྱི་ཡོད་འདུག ཀུན་གསལ་ལགས་ཀྱིས། གཅིག་བྱས་ན་རྩུབ་པོ་འདྲ་པོ་རེད། ཡིན་ནའང་། ངས་གོ་སྐབས་བཟང་པོ་ག་རེ་རགས་ནའང་ལེན་གྱི་ཡོད། ཅེས་བཤད། ང་སློབ་གྲྭར་ཡོད་དུས། རྒན་ལགས་ཀྱིས། གོ་སྐབས་རག་དུས་ལེན་དགོས་པ་ལས། གོ་སྐབས་ཀྱིས་ཁྱེད་རང་སྒུག་ནས་སྡོད་ཀྱི་མ་རེད། ཅེས་གསུངས་པ་དྲན། ངའི་མི་ཚེའི་ནང་ལ་གོ་སྐབས་རེ་ཟུང་མིག་མདུན་ནས་ཤོར་པས་ད་ལྟ་འགྱོད་ཀྱང་ཕྱིས་དྲགས་པ་དང་། ཕན་ཐོགས་མེད་པའི་དངོས་ར་འཕྲོད་པ་བྱུང་སོང་།

ཀུན་གསལ་ལགས་ཀྱིས་བདེ་རྩའི་དཔལ་འབྱོར་འདུ་འགོད་ཆེད་དུ་ཁོང་གིས་བྲིས་པའི་རི་མོ་རིན་ཚད་འགྲན་བསྡུར་ཚོང་འགྲེམས་བྱས་འདུག་ལ། ད་དུང་། བདེ་རྩའི་དཔལ་འབྱོར་འདུ་འགོད་ལ་དམིགས་ནས་ (ཀུན་གསལ་གྱི་བྱམས་བརྩེ་དགོང་ཚོགས།) ཞེས་པའི་གཞས་སྣ་གོ་སྒྲིག་ཀྱང་བྱས་འདུག མངོན་དགའ་སློབ་གྲྭ་སོགས་ལ་ཕན་པའི་ལས་གཞི་གཅིག་ཡིན་སྐོར་བརྗོད། ཀུན་གསལ་ལགས་ཀྱིས། ངས་དེའི་སྔོན་ལ་བོད་པའི་སྤྱི་ཚོགས་ནང་ལ་མངོན་དགའ་སློབ་གྲྭ་ལྟ་བུ་དམིགས་བསལ་སློབ་གྲྭ་དེ་འདྲ་ཡོད་པ་ཤེས་ཀྱི་མེད་ལ། ངའི་བསམ་པར་དེ་དུས་བོད་པ་མང་པོས་དེ་འདྲ་ཡོད་པ་ཤེས་ཀྱི་ཡོད་མ་རེད་བསམ་གྱི་འདུག བོད་པས་བོད་པར་རོགས་པ་བྱེད་རྒྱུའི་བསམ་བློ་དང་ལས་འགུལ་རྩོམ་རྒྱུར་ཀུན་སློང་བྱ་རྒྱུར་དམིགས་ནས་ལས་གཞི་བརྩམས་པ་ཡིན། ཞེས་བཤད།

ཀུན་གསལ་ལགས་ཀྱི་མིག་ལམ་དུ་འཆར་བ་དང་། སེམས་ནང་ལ་དྲན་པའི་རླབས་ཆེན་གྱི་མི་སྣ་གཅིག་ནི་མོ་རང་གི་ཨ་མ་ལགས་རེད་འདུག དེ་ནི་དེང་སྐབས་ནུབ་ཕྱོགས་སུ་ཡོད་པའི་བོད་ཕྲུག་ཚོས་དྲན་ན་བསམ་པའི་ངའི་རེ་སྨོན་གཅིག་ཡིན། རྒྱུ་མཚན་ནི། ནུབ་ཕྱོགས་སུ་གཞོན་སྐྱེས་དང་སློབ་ཕྲུག་ལ་རྩ་ཆེ་ཤོས་སུ་ཡིན་པས་ལབ་ན། ཕ་མ་ལབ་པའི་ཚབ་ལ་ཁྱི་དང་ཞི་མི་སོགས་ལབ་མཁན་ཧ་ཅང་མང་པོ་དང་། སློབ་གྲྭ་ཁག་གི་ནང་ལ་ཡང་སློབ་ཕྲུག་གི་སེམས་མྱོང་རྒྱབ་སྐྱོར་ emotion support བྱེད་མཁན་ཁྱི་དང་ཞི་མི་སོགས་དགོས་པ་སྨན་པས་ལམ་སྟོན་བྱས་པ་དང་། སློབ་ཕྲུག་གིས་སློབ་གྲྭར་འཁྲིད་ཡོང་བའི་ཁྱི་དང་ཞི་མི་སོགས་ཉར་འཇོག་བྱེད་སའི་མཐུན་རྐྱེན་བསྐྲུན་གྱི་ཡོད་ཚོད་འདུག ཉེ་དུས་ཕྲན་གྱིས་དྲྭ་ཐོག་གནས་ཚུལ་ཆོབ་ཚ་པོ་གཅིག་ཐོས་པ་ནི། ནུབ་ཕྱོགས་ཀྱི་སློབ་གྲྭ་གཅིག་ལ་སློབ་ཕྲུག་གཅིག་གིས་ཁོ་རང་གིས་དགའ་པོ་བྱེད་སའི་སེམས་ཅན་རྟ་གཅིག་སློབ་གྲྭར་འཁྲིད་ནས་སླེབས་པར་སློབ་གྲྭས་རྟ་འཇོག་ས་བཟོ་རྒྱུར་དཀའ་ངལ་འཕྲད་པའི་གནས་ཚུལ་དེ་རེད།

དེ་ནས་ཀུན་གསལ་ལགས་ཀྱིས་མི་ཚེའི་ནང་གི་སྙིང་དོན་གཅིག་དང་། དངོས་ཡོད་གནས་ཚུལ་གཅིག་བཤད་པ་དེར་དོ་སྣང་བྱུང་། དེ་ནི་ཀུན་གསལ་ལགས་ཀྱིས། མི་ཚེའི་ནང་ལ་གདོང་པ་གསར་པ་སླེབས་པ་དང་། གདོང་པ་རྙིང་པ་བརླག་པའི་གནས་སྟངས་ཡོང་གི་རེད། ཅེས་པ་དེ་རེད། ཨིན་སྐད་ཐོག་ལ་གོང་གི་བརྗོད་པ་དེ་ལབ་པ་ཐད་བསྒྱུར་བྱས་པར་གོ་མི་བདེ་བ་ཡོད་ནའང་། ཡིན་རྒྱུ་ནི་མི་ཚེའི་ནང་ལ་ངོ་ཤེས་གསར་པ་ཐུག་པ་དང་མཉམ་དུ་ངོ་ཤེས་རྙིང་པ་མང་པོ་ཞིག་འདས་གྲོངས་སུ་གྱུར་པ་སོགས་ཀྱི་དངོས་ཡོད་གནས་སྟངས་ལ་ཁས་ལེན་བྱ་དགོས་པ་དེ་རེད། འཛོམས་པའི་མཐའ་མ་བྲལ་རྒྱུ་དེ་ཞེས་པ་དེ་རེད་དྲན། གང་ལྟར་དེ་རིགས་འབྲི་མཚམས་འདིར་འཇོག་གི་ཡིན། གུང་གསེང་ཕྱི་ལ་རང་བྱུང་ཁམས་ཀྱི་མཛེས་སྡུག་ལོངས་སྤྱོད་ཆེད་རི་སྟེང་ལ་འཛེགས་པ་དང་། ཆུ་འགྲམ་ལ་འགྲོ་དགོས་ཡོད། རྗེས་སུ་མཇལ་ཡོང་། ཐུགས་རྗེ་ཆེ། ནོར་ཡོད་ན་དགོངས་སེལ་ཞུ་གི་ཡོད་ལ། ཀློག་མཁན་རྣམས་ལ་བོད་ཡིག་ཀློག་རྒྱུའི་གོ་བསྐལ་ཙམ་ཐོབ་ཡོད་པར་སྨོན། །