བོད་ཀྱི་མང་གཙོའི་བཅའ་ཁྲིམས་བསྐྱར་བཅོས་སམ་ཁྲིམས་སྒྲིག་བསྐྱར་བཅོས་ཐོག་མི་མང་ལ་བསམ་ཚུལ་ཡོད་ཚེ་ཡིག་ཐོག་ནས་འབུལ་དགོས་པའི་གསལ་བསྒྲགས་བྱས་འདུག
དེ་རིང་ཉིན་རྒྱབ་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱིས་ཡོངས་ཁྱབ་གསལ་བསྒྲགས་ཤིག་སྤེལ་ཏེ། གྲོས་ཚོགས་ཚོགས་དུས་ལྔ་བའི་སྟེང་མང་མོས་བྱུང་བའི་གཞུང་འབྲེལ་གྲོས་ཆོད་ཨང་ ༢༠༢༣།༡༧།༥།༥ དགོངས་དོན་ལྟར། ད་ལྟ་ཚོགས་གཙོ་སྦྲེལ་པོས་བསྐོ་གཞག་གནང་བའི་ཁྲིམས་སྒྲིག་བསྐྱར་བཅོས་འཆར་ཟིན་ཚོགས་ཆུང་གི་ལས་དོན་དངོས་སུ་མགོ་འཛུགས་ཞུས་ཡོད་སྟབས། གསལ་བསྒྲགས་ནང་། ཚོགས་པ་དང་མི་སྒེར་སུ་ཐད་ནས་ཁྲིམས་སྒྲིག་བསྐྱར་བཅོས་དང་འབྲེལ་བའི་དགོངས་ཚུལ་མཆིས་ཚེ་ཡིག་ཐོག་ནས་ཕྱི་ལོ་ ༢༠༢༣ ཟླ་ ༩་ཚེས་ ༢ མང་གཙོའི་དུས་ཆེན་བར་ཚོགས་དྲུང་ལས་ཁུངས་བརྒྱུད་གཤམ་གསལ་གློག་འཕྲིན་ཁ་བྱང་ཐོག་འདི་ག་ཚོགས་ཆུང་དུ་འབུལ་དགོས་པའི་ཡོངས་ཁྱབ་གསལ་བསྒྲགས་སུ། ཞེས་གསལ་འདུག
བཅའ་ཁྲིམས་བསྐྱར་བཅོས་འཆར་ཟིན་ཚོགས་ཆུང་གི་ཚོགས་མི་དག་ནི། བོད་མི་མང་སྤྱི་འཐུས་ཟླ་བ་ཕུན་སྐྱིད་ལགས་དང་། སྤྱི་འཐུས་གསེར་རྟ་ཚུལ་ཁྲིམས་ལགས། སྤྱི་འཐུས་ཀརྨ་དགེ་ལེགས་ལགས། སྤྱི་འཐུས་དགེ་བཤེས་ལྷ་རམས་པ་གོ་བོ་ཕན་བདེ་ལགས། ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་ལགས་བཅས་ཡིན་པ་དང་། བཅའ་ཁྲིམས་བསྐྱར་བཅོས་སམ་ཡང་ན་ཁྲིམས་སྒྲིག་བསྐྱར་བཅོས་དེ་ནི་བོད་ཀྱི་བཅའ་ཁྲིམས་ནང་གསལ་ཁ་མེད་པ་དང་ཁ་སྣོན། འགྱུར་བ་གཏོང་དགོས་རིགས་ཀྱི་ཐད་ཞིབ་འཇུག་བྱས་ཏེ་བསྐྱར་བཅོས་བྱ་རྒྱུ་ཡིན་པ་རེད།
གསར་འགོད་པ། སྐལ་བཟང་སྦྱིན་པ།
