རྒྱ་ནག་གིས་བཅད་བགོས་བྱས་པའི་ཀན་སུའུ་ཞིང་ཆེན་གྱི་ནུབ་བྱང་ཁུལ་གྱི་ཧྲན་དན་རྫོང་ཁོངས་སུ་ཡོད་པའི་སངས་རྒྱས་ཀྱི་སྐུ་བརྙན་གྲགས་ཅན་མཐོ་ཚད་ལ་རྨི་ཊིར་ ༣༩ ཡོད་པ་དེར་མེ་སྐྱོན་ཆེན་པོ་བྱུང་ཡོད་འདུག
དེ་རིང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། རེས་གཟའ་ཟླ་བའི་ཉིན་ཀན་སུའུ་ཞིང་ཆེན་ཧྲན་དན་རྫོང་གི་སངས་རྒྱས་ཀྱི་སྐུ་བརྙན་གྲགས་ཅན་དེར་གློ་བུར་དུ་མེ་སྐྱོན་བྱུང་ཡོད་པ་དང་། ད་ལྟའི་ཆར་མེ་སྐྱོན་ཇི་ལྟར་བྱུང་བ་སོགས་ཀྱི་ཐད་རྩད་གཅོད་གཏོང་བཞིན་པའི་སྒང་ཡིན་འདུག
སྐུ་བརྙན་ཨར་འདམ་དང་རྡོ་ཡིས་བཞེངས་ཡོད་པས་མེ་ཡིས་གཏོར་སྐྱོན་ཚབས་ཆེན་ཐེབས་མེད་ཀྱང་། ཉེ་འཁོར་གྱི་ལྷ་ཁང་ཁག་ཅིག་ལ་ཚིག་སྐྱོན་ཆེན་པོ་བྱུང་ཡོད་འདུག ཡིན་ནའང་། ས་གནས་སྲིད་གཞུང་གིས་སྐུ་བརྙན་ལ་མེ་སྐྱོན་བྱུང་ཡོད་ཀྱང་། མི་ལ་ཤི་རྨས་བྱུང་མེད་སྐོར་དང་། དགོན་པའི་ཕྱི་དངོས་ལ་ཚིག་སྐྱོན་བྱུང་ཡོད་ཀྱང་ནང་རྟེན་ཁག་ལ་སྐྱོན་བྱུང་མེད་སྐོར་བསྒྲགས་འདུག
ཧྲན་དན་རྫོང་གི་གསར་ལམ་དུ་གནས་ཚུལ་ཐོན་པ་ལྟར་ན། ཕྱི་ལོ་ ༤༢༥ ཡས་མས་ལ་སངས་རྒྱས་ཀྱི་སྐུ་བརྙན་ཆེན་པོ་དེ་བཞེངས་ཡོད་པ་དང་། ཕྱིས་སུ་རྒྱ་ནག་གི་རིག་གནས་གསར་བརྗེའི་སྐབས་སུ་གཏོར་སྐྱོན་བཟོས་པ། དེ་ནས་ཕྱི་ལོ་ ༡༩༩༨ ལོར་སྐུ་བརྙན་བསྐྱར་གསོ་བྱས་ཡོད་པ་དང་། ཡང་ཕྱི་ལོ་ ༢༠༢༡ ལོར་སླར་ཡང་བསྐྱར་གསོ་བྱས་ཡོད་འདུག་ལ། ཧྲན་དན་རྫོང་གི་སངས་རྒྱས་སྐུ་བརྙན་དེ་ཡུལ་སྐོར་སྤྲོ་འཆམ་གྱི་ལྟེ་གནས་ཤིག་ཀྱང་ཡིན་འདུག
གསར་འགོད་པ།་བསྟན་འཛིན་ཕུར་བུ།
