ལ་དྭགས་བོད་ཁྱིམ་ནང་ཆིབས་བསྒྱུར་བསྐྱངས་ཏེ་བོད་ཀྱི་གཞོན་སྐྱེས་ཚོས་བོད་ཡིག་སྦྱང་བརྩོན་བྱ་རྒྱུ་གལ་ཆེན་ཡིན་སྐོར་གྱི་བཀའ་སློབ་བསྩལ། 

དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་བོད་མི་རྣམས་ལ་དམིགས་བསལ་གྱི་བཀའ་སློབ་གནང་སྐབས་བོད་མི་ཚོས་བོད་ཀྱི་ཆོས་རིག་སྲུང་སྐྱོབ་གནང་དགོས་པའི་ཁར་བོད་རིགས་གཞོན་སྐྱེས་ཚོས་བོད་ཀྱི་སྐད་ཡིག་ལ་སྦྱང་བརྩོན་བྱ་རྒྱུ་དེ་ཧ་ཅང་གལ་ཆེན་ཡིན་པ་སོགས་ཀྱི་བཀའ་སློབ་བསྩལ་གནང་སོང་།

༧གོང་ས་རྒྱལ་བ་རིན་པོ་ཆེ་མཆོག་ནས། ཡུལ་བ་(ལ་དྭགས་ཀྱི་བོད་མི) ཚོས་དགའ་སྤྲོ་ཆེན་པོའི་ཐོག་ནས་སྤོབས་པ་དང་བཅས་ཏེ་གཞས་དང་ཞབས་བྲོ་གནང་བ་རེད། གཙོ་ཆེ་ཤོས་ཁྱེད་རང་ཚོ་ཚང་མའི་ལྷག་བསམ་དང་། དད་པ་གཡོ་བ་མེད་པའི་ཐོག་ནས་དགའ་བསུ་གནང་གི་ཡོད་རེད། ཐུགས་རྗེ་ཆེ་ཞུ་ཡི་ཡིན། ང་རང་ཚོ་བོད་ཁ་བ་གངས་ཅན་འཕགས་པ་སྤྱན་རས་གཟིགས་ཀྱི་གདུལ་ཞིང་དེ། སྔོན་ཆོས་རྒྱལ་སྲོང་བཙན་སྒམ་པོ་ནས་བཟུང་སོ་སོའི་སྐད་དང་ཡི་གེའི་གཞི་རྩ་ཚུགས་པ་རེད། དེའི་རྗེས་ཆོས་རྒྱལ་ཁྲི་སྲོང་ལྡེའུ་བཙན་གྱི་ཁ་ཐུག་ཏུ་རྒྱ་གར་ནས་མཁན་ཆེན་ཞི་བ་འཚོ་གདན་ཞུ་གནང་། མཁན་ཆེན་ཞི་བ་འཚོ་དེ་དུས་ལེནྜའི་མཁས་པའི་གཙུག་རྒྱན་གྱི་གྲས་ཆགས་བསྡད་ཡོད་རེད། བྱས་ཙང་མཁན་ཆེན་ཞི་བ་འཚོས་བོད་ལ་སྐད་ཡིག་ཟུར་དུ་འདུག ལེགས་སྦྱར་སྐད་བསླབ་རྒྱུ་དང་། དེ་བཞིན་པཱ་ལི་བསླབ་དགོས་མི་འདུག བོད་སྐད་ཀྱི་ཐོག་ལ་སྟོན་པའི་གསུང་དང་རྒྱ་གར་མཁས་པའི་གཞུང་དེ་ཚོ་ཚུར་བསྒྱུར་རྒྱུ་གལ་ཆེན་པོ་རེད་འདུག་ཅེས་གསུངས་པ་བཞིན། རིམ་པས་ལེགས་སྦྱར་དང་པཱ་ལི་ཡི་གཞུང་དུ་ཡོད་པའི་བཀའ་དང་བསྟན་བཅོས་རྣམས་བོད་ཡིག་ལ་བསྒྱུར་ནས། བཀའ་འགྱུར་པོ་ཏི་བརྒྱ་ཙམ་དང་བསྟན་འགྱུར་པོ་ཏི་ཉིས་བརྒྱ་ཞིག་ཡོད་རེད། དེ་དག་དངོས་གནས་བྱས་ན་ང་ཚོའི་སློབ་དེབ་ཆགས་ཡོད་རེད། གྲྭ་ས་ཚོས་རང་རང་གི་ཡིག་ཆ་དེ་དག་གཙོ་བོར་བལྟས་ནས་ཁུངས་བཅོལ་ས་དེ། བཀའ་འགྱུར་བསྟན་འགྱུར་ལ་གཏུགས་ནས་སློབ་སྦྱོང་བྱས་པའི་ཁ་ཐུག་ལ་བཀའ་འགྱུར་བསྟན་འགྱུར་ལ་སློབ་སྦྱོང་བྱས་ནས་དེའི་སྙིང་པོ་དེ་གང་ལ་གང་འཚམ་སློབ་སྦྱོང་བྱས་ནས་ཤེས་ཀྱི་ཡོད་རེད། བོད་གངས་ཅན་གྱི་ལྗོངས་ལ་བཀའ་འགྱུར་བསྟན་འགྱུར་ཟེར་ནས་པོ་ཏི་ཧ་ལམ་སུམ་བརྒྱ་སྐོར་ཞིག་ཡོད་པ་དེ་དག་ང་ཚོའི་སློབ་དེབ་རེད། བོད་གངས་ཅན་གྱི་ལྗོངས་ཀྱི་སྔ་འགྱུར་རྙིང་མ། གསར་པའི་ནང་ལ་བཀའ་བརྒྱུད། ས་སྐྱ། ཇོ་ནང་དང་། དགེ་ལུགས་པ་བྱས་ནས་བསྟན་བཅོས་མང་པོ་བརྩམས་ཏེ། ང་ཚོ་བོད་ལ་འཛམ་བུ་གླིང་འདིའི་སྒང་ལ་སངས་རྒྱས་ཀྱི་བསྟན་པར་ལུང་དང་རིག་པས་བསྒྲུབས་ནས་བཤད་རྒྱུ་ཡོད་པ་དེ། ཕལ་ཆེར་སྤུས་དག་ཤོས་དང་ཟབ་ཤོས་ཆགས་འདུག  ངོས་རང་གིས་ནང་པའི་ཡུལ་གྲུ་མང་པོ་ནས་ཕེབས་པའི་ནང་པ་དེ་འདྲ་མཇལ་གྱི་ཡོད་རེད། བཀའ་མོལ་ཡོང་གི་རེད། བལྟ་ཡོང་དུས་ང་རང་ཚོ་བོད་ལ་ཡོད་པའི་ནང་པའི་ཆོས་ཀྱི་ཐོས་བྱུང་གི་ཤེས་རབ། བསམ་བྱུང་གི་ཤེས་རབ། དེ་དག་དངོས་གནས་དྲང་གནས་སྤུས་དག་པོ་རེད་འདུག ད་ཐོས་བསམ་སྔོན་དུ་སོང་བའི་ཐོག་ནས་སྒྲུབ་པ་ལ་ཞུགས་ནས། སྒོམ་ཉམས་ལེན་གནང་མཁན་མང་པོ་ཡོང་གི་འདུག ཐོས་བསམ་སྒོམ་པ་ཡ་མ་བྲལ་བའི་ཐོག་ནས། སངས་རྒྱས་ཀྱི་ལུང་རྟོགས་ཀྱི་བསྟན་པ་གཉིས་པུ་འདི་ཤེས་སྒྲུབ་གཉིས་ཀྱི་ཐོག་ནས། འཛིན་སྐྱོང་སྤེལ་གསུམ་གནང་མཁན་ཞིག་ཆགས་ཏེ། ལྷག་པར་རིམ་པས་བོད་ལ་ཚད་མའི་གཞུང་དེ་དག་བསྒྱུར་ནས་བཤད་གྲྭ་གཙོ་ཆེ་བ་དེ་དག་གིས་ཚད་མའི་གཞུང་བསླབས་པ་དང་ཆབས་ཅིག་ཕྱྭ་པ་ཆོས་སེང་གིས་སྲོལ་གཏོད་པའི་རྟགས་གསལ་གཏང་རྒྱུ་དེ་ཚུགས་པ་རེད། དེས་ལུང་ཙམ་ལ་སྐྱབས་སུ་མཆིས་པ་མ་ཡིན་པར། རིག་པས་དཔྱད་དགོས་པའང་བཅོམ་ལྡན་འདས་རང་གིས་གསུངས་འདུག ཅེས་གསུངས་སོང་།

ཡང་༧གོང་ས་རྒྱལ་བ་རིན་པོ་ཆེ་མཆོག་ནས། ང་ཚོ་ཚང་མའི་འཛམ་གླིང་ཞི་བདེ་ཟེར་ནས་བཤད་བསྡད་ཀྱི་ཡོད་རེད། དངོས་གནས་གལ་ཆེན་པོ་རེད། དམག་ཆེན་དང་པོ་བརྒྱབ་ནས་མི་ག་ཚོད་བསད་སོང་། དམག་ཆེན་གཉིས་པ་བརྒྱབ་ནས་མི་ག་ཚོད་བསད་སོང་། གཏོར་བཤིག་ག་ཚོད་བཏང་སོང་། དེ་དག་ལ་བསམ་བློ་གཏོང་དུས་དངོས་གནས་དྲང་གནས་སེམས་ཀྱི་ཞི་བདེ་མ་བྱུང་ན། གཞུང་ཚོས་གྲོས་ཆོད་བཞག་པའི་ཟོལ་དང་། གསུང་བཤད་བྱས་པའི་ཟོལ་ཞིག་གིས་འཛམ་གླིང་ཞི་བདེ་ཡོང་ཐུབ་རྒྱུ་ཞིག་མི་འདུག ཞི་བདེ་སེམས་ནས་བཟོས་དགོས་ཀྱི་འདུག  ང་ཚོ་བོད་ལ་ཡོད་པའི་སེམས་ཁམས་རིག་པ་དེས་སེམས་ལ་ཞི་བདེ་བསྐྲུན་རྒྱུ་དེ་ཞེ་དྲགས་གལ་ཆེན་པོ་རེད་འདུག སངས་རྒྱས་ཀྱི་བསྟན་པ་དེ་དངོས་གནས་དྲང་གནས་རྒྱ་ཆེན་པོ། གཏིང་ཟབ་པོ། རིག་པས་དཔྱད་པ་བྱ་རྒྱུ་ཡོད་པ། ཚན་རིག་དང་མཉམ་དུ་འགྲོ་ཐུབ་རྒྱུ་ཞིག་ཆགས་བསྡད་ཡོད་པ་ཡིན་དུས། ང་ཚོ་ཚང་མའི་དོ་སྣང་བྱོས། སློབ་སྦྱོང་བྱ་རྒྱུ་དེ་གལ་ཆེན་པོ་ཞེ་དྲགས་རེད། ཆོས་ཟེར་དུས་ཚོགས་འཚོགས་ན་འདོན་པ་གདོན་རྒྱུ་དང་། སྨོན་ལམ་བརྒྱག་བསྡད་ཡ་ཞིག་མ་རེད། ཆོས་ཟེར་དུས་སེམས་ལ་འགྱུར་བ་བཏང་ནས། སེམས་ལ་ཁོང་ཁྲོ་དང་ང་རྒྱལ་སྐྱེས་ཡོང་དུས། དེའི་གཉེན་པོ་བསྟེན་ནས་ལྷོད་ལྷོད་ཆག་རྒྱུ་ཞིག གཙོ་བོ་རང་གཞན་རོགས་གསུམ་དང་མཐར་ཐུག་ན་སེམས་ཅན་ཐམས་ཅད་ལ་ཇི་སྲིད་འཚོ་བའི་བར་དུ་སྙིང་ཁོངས་རུས་པའི་གཏིང་ནས། བརྩེ་བ་དང་། ཕན་ཐོགས་པའི་བློ་ཞིག་གི་ཐོག་ནས་དངོས་ཤུགས་བརྒྱུད་གསུམ་ནས་ཕན་ཐོགས་བྱ་རྒྱུ། ལྷག་པར་སེམས་ཁམས་རིག་པའི་ཐོག་ནས་སེམས་ཀྱི་ཞི་བདེ་བསྐྲུན་ཐབས་ཐད་བགྲོ་གླེང་བྱ་རྒྱུ་དཔེ་གལ་ཆེན་པོ་རེད་འདུག་པས། བོད་པ་གཞོན་སྐྱེས་ཚོས་དེའི་ཐོག་ (སེམས་ཁམས་རིག་པ) དོ་སྣང་ཡག་པོ་ཞིག་གནང་ཤོག ངོས་རང་ལ་ཆ་བཞག་ན་རྒྱ་ནག་གུང་ཁྲན་གྱིས་བོད་ལ་མནར་གཅོད་བྱས་པ་དེར་བསམ་བློ་འཁོར་དུས། དེ་ལ་སྙིང་རྗེ་སྐྱེས་ཡ་ཞིག་མ་གཏོགས་ཁོང་ཁྲོ་ལང་ཡ་ཡོང་གི་མི་འདུག བྱས་ཙང་ང་རང་ཚོས་སེམས་ཁམས་རིག་པའི་ཐོག་སེམས་ཞི་བདེ་ལྷོད་ལྷོད་ཡོང་ཡ་ཞིག་གི་ཐོག་ནས། འཛམ་གླིང་ཞི་བདེ་བསྐྲུན་རྒྱུ་དེ། ཆོས་དང་སྐྱེས་བ་ཕྱི་མའི་སྐད་ཆ་མ་རེད། ཚེ་འདི་ལ་སེམས་ལྷོད་ལྷོད་བསྡད་རྒྱུའི་ཆ་རྐྱེན་ང་ཚོར་འདུག་ལ། དེ་འདྲའི་གོ་སྐབས་ཡོད་པའི་ཟོལ་འདྲ་བོ་ཞིག་འདུག་པས། ཚང་མའི་སེམས་ལ་བཅངས་ཤོག ཅེས་གསུངས་སོང་།

ཡང་༧མགོན་པོ་གང་ཉིད་ཀྱིས། བོད་པའི་སྐད་ཡིག་དེ་གལ་ཆེན་པོ་ཞེ་དྲགས་རེད་འདུག དེ་རིང་ཁ་སང་ནང་པའི་ལྟ་གྲུབ་ཀྱི་ཐོག་ལ་འགྲེལ་བཤད་རྒྱག་པའི་སྐད་ཡག་ཤོས་དེ་བོད་སྐད་རེད་འདུག བྱས་ཙང་ཁྱེད་རང་ཚོ་སློབ་ཕྲུག་ཚང་མས་དོ་སྣང་བྱོས། བཀའ་འགྱུར་བསྟན་འགྱུར་ནང་ཡོད་པའི་སྐད་ཡིག་གིས་མ་འདང་བར། ཚན་རིག་གི་སྐོར་ལ་མིང་ཚིག་གསར་པ་ཡོང་གི་ཡོད་རེད། དེ་ཚོའི་གྲས་སྣོན་པ་རྒྱག་གིན་རྒྱག་གིན་བྱས་ན་ཕན་ཐོགས་ཡོང་གི་རེད། ང་རང་ཚོ་བོད་པ་རིག་གཞུང་གི་ཐོག་ནས་བསམ་བློ་རྒྱ་ཆེན་པོ་དང་གཏིང་ཟབ་པོ་ཡོད་བསྡད་པ་ཞིག་རེད་འདུག དེར་ཚང་མས་དོ་སྣང་བྱོས། དེའི་རྩ་བ་དེ་བོད་ཡིག་ཆགས་བསྡད་ཡོད་རེད། བོད་ཡིག་ལ་དོ་སྣང་ཡག་པོ་བྱོས། བོད་ཡིག་ནང་མ་འདང་བ་དེ་ཡར་རྒྱས་མུ་མཐུད་གཏང་རྒྱུར་ཁྱེད་རང་ཚོ་གཞོན་སྐྱེས་ཚོའི་སེམས་ལ་ངེས་པ་བྱོས།  ཞེས་བླང་དོར་བཀའ་སློབ་བསྩལ་སོང་།

གསར་འགོད་པ་དཔལ་ལྡན་དང་དོན་འགྲུབ་བཀྲ་ཤིས་གཉིས་ཀྱིས་སླེ་ནས་སྤེལ།