ཝེ་ནི་སི་རྒྱལ་སྤྱིའི་གློག་བརྙན་དུས་སྟོན་སྟེང་བོད་ཀྱི་གློག་བརྙན་འཁྲབ་ཁྲིད་པ་འདས་པོ་པདྨ་ཚེ་བརྟན་ལགས་སུ་རྗེས་དྲན་དང་གུས་བཀུར་ཞུ་སླད་གློག་བརྙན་གསའ་དུས་སྟོན་དུ་གཟིགས་འབུལ་ཞུ་རྒྱུ་ཡིན་སྐོར་བསྒྲགས་འདུག
ཟླ་འདིའི་ཕྱི་ཚེས་ ༢༥ ཉིན་ཨེ་ཊ་ལི་རྒྱལ་ཁབ་ཀྱི་ལི་ཌོ་(Lido)གླིང་ཕྲན་དུ། རྒྱལ་སྤྱིའི་གློག་བརྙན་བཟོ་སྐྲུན་མཐུན་ཚོགས་(International Federation of Film Producers Association)ཀྱི་གོ་སྒྲིག་འོག སྐབས་ ༨༠ པའི་ཝེ་ནི་སི་རྒྱལ་སྤྱིའི་གློག་བརྙན་དུས་སྟོན་( 80th Venice International Film Festival )གྱི་འོས་འདེམས་ཚོགས་ཆུང་གི་འགན་འཛིན་རོ་བྷར་ཌོ་ཁི་ཁུ་ཌོ་(Roberto Cicutto)ལགས་དང་། འཁྲབ་ཁྲིད་པ་ཨལ་བྷེར་ཌོ་བྷར་བྷེ་རཱ་(Alberto Barbera)་ལགས་ཀྱིས་གློག་བརྙན་དུས་ཆེན་གྱི་འོས་མིང་ཁོངས་སུ་ཚུད་པའི་གློག་བརྙན་གྱི་མིང་ཐོ་གསལ་བསྒྲགས་བྱས་ཡོད་ཅིང་། ཐེངས་འདིའི་གློག་བརྙན་དུས་སྟོན་གྱི་འོས་མིང་དུ་བོད་ནང་གི་གློག་བརྙན་འཁྲབ་ཁྲིད་གྲགས་ཅན་འདས་པོ་པདྨ་ཚེ་བརྟན་ལགས་ཀྱི་གཏམ་རྒྱུད་གློག་བརྙན་༼གསའ༽་ཡང་ཚུད་ཡོད་པ་དང་། དེ་ནི་འདས་པོ་པདྨ་ཚེ་བརྟན་ལགས་ཀྱིས་གློག་བརྙན་ལས་རིགས་ཆེད་དུ་བཞག་པའི་བྱས་རྗེས་ལ་རྗེས་དྲན་དང་གུས་བཀུར་ཞུ་སླད་ཡིན་སྐོར་བརྗོད་འདུག
ཁོང་གི་གློག་བརྙན་གྱི་སྐོར་ལ་འཁྲབ་ཁྲིད་པ་ཨལ་བྷེར་ཌོ་བྷར་བྷེ་རཱ་ལགས་ཀྱིས། པདྨ་ཚེ་བརྟན་ལགས་ནི་བོད་ཀྱི་རླབས་ཆེ་བའི་རྩོམ་པ་པོ་དང་། གློག་བརྙན་འཁྲབ་ཁྲིད་པ། འཁྲབ་གཞུང་རྩོམ་མཁན་བཅས་ཡིན། ཁོང་ཉིད་སྐུ་གཤེགས་བའི་རྗེས་སུ་གློག་བརྙན་འདི་ལེགས་འགྲུབ་བྱུང་བ་ཞིག་ཡིན། ཁོང་གི་གློག་བརྙན་ཐེངས་གསུམ་ལ་ཝེ་ནི་སི་གློག་བརྙན་དུས་སྟོན་དུ་འགྲན་བསྡུར་མཉམ་ཞུགས་བྱས་མྱོང་ཡོད་པ་མ་ཟད། རྒྱལ་སྤྱིའི་སྟེང་དུ་ཁོང་ལ་གློག་བརྙན་གཟེངས་རྟགས་ཀྱང་ཐོབ་ཡོད་པ་རེད། ད་ལོའི་ཕྱི་ཟླ་ ༥ ཚེས་ ༨ ཉིན་ཁོང་ཉིད་ང་ཚོ་དང་ཁ་བྲལ་བ་ཡིན་པས། ཁོང་གིས་ང་ཚོའི་ཆེད་དུ་གནང་བའི་ཕྱག་ལས་ལ་དྲན་གསོ་དང་གུས་བཀུར་ཞུ་དགོས་ངེས་རེད། ཅེས་གསུངས་སོང་།
པད་མ་ཚེ་བརྟན་ལགས་ཀྱི་གློག་བརྙན་༼གསའ༽ ནི་ཕྱི་ལོ་ ༢༠༢༡ ལོའི་ཟླ་ ༡༠ ནས་བཟུང་ཕབ་སྐྲུན་བྱེད་མགོ་ཚུགས་པ་ཞིག་ཡིན་འདུག་ཅིང་། གློག་བརྙན་འདིའི་ནང་དུ་མི་དང་སྲོག་ཆགས་གཉིས་ཇི་ལྟར་མཉམ་དུ་འཚོ་སྡོད་བྱེད་པའི་སྐོར་གྱི་གཏམ་རྒྱུད་ཅིག་བཤད་ཡོད་པ་དང་། གློག་བརྙན་གྱི་ཕབ་སྐྲུན་བྱ་ཡུལ་ནི་མགོ་ལོག་རྨ་སྟོད་ཀྱི་སྟོང་རི་མཚོ་རྒན་གྱི་ཉེ་འདབས་ཀྱི་རི་དྭགས་གསའ་རྒྱུན་དུ་འཚོ་སྡོད་བྱ་སའི་ཡུལ་དངོས་སུ་ཕབ་སྐྲུན་བྱས་པ་ཞིག་ཡིན་འདུག གློག་བརྙན་འདིའི་ནང་དུ་བོད་ཀྱི་གློག་བརྙན་འཁྲབ་སྟོན་པ་སྦྱིན་པ་ལགས་དང་ཚེ་བརྟན་བཀྲ་ཤིས། ཞོང་ཙི་ཆིས་བཅས་ཀྱིས་གཙོ་འཁྲབ་གནང་ཡོད་པ་དང་། གཞན་བོད་ཀྱི་གློག་བརྙན་འཁྲབ་སྟོན་པ་བློ་བཟང་ཆོས་འཕེལ་དང་། དབང་ཕྱུག་མཚོ། དགེ་འདུན་ཕུན་ཚོགས། ཀུན་བདེ། འཇིགས་བྷ། དཀའ་ཐུབ་ཚེ་རིང་། བདེ་ཆེན་གཡང་འཛོམས། འཇུ་ཁྱུང་ཆེན། ཏང་ཧའོ་ཡོས་སོགས་ཀྱིས་འཁྲབ་སྟོན་ནང་དུ་མཉམ་ཞུགས་གནང་ཡོད་འདུག
ཐེངས་འདིའི་གློག་བརྙན་༼གསའ༽ནི་བོད་ཀྱི་གློག་བརྙན་འཁྲབ་ཁྲིད་པད་མ་ཚེ་བརྟན་ལགས་ཀྱིས་འཁྲབ་གཞུང་དང་འཁྲབ་ཁྲིད་བྱས་པའི་གཏམ་རྒྱུད་གློག་བརྙན་བརྒྱད་པ་དེ་ཡིན་ཅིང་། བོད་སྐད་གློག་བརྙན་༼ཐར་ལོ།༽དང་༼ལག་དམར།༽༼དབུགས་ལྒང་།༽བཅས་ཝེ་ནི་སི་རྒྱལ་སྤྱིའི་གློག་བརྙན་དུས་སྟོན་གྱི་འོས་མིང་དུ་ཚུད་པའི་ཁྲོད་ཀྱི་ཐེངས་བཞི་པ་དེ་ཆགས་ཡོད་འདུག ཕྱི་ཟླ་ ༨ ཚེས་ ༨ ནས་ཟླ་གཅིག་རིང་ཨེ་ཌ་ལིའི་རྒྱལ་ཁབ་ཀྱི་ལི་ཌོ་གླིང་ཕྲན་དུ་སྐབས་ ༨༠ པའི་ཝེ་ནི་སི་རྒྱལ་སྤྱིའི་གློག་བརྙན་དུས་སྟོན་འཚོགས་གཏན་འཁེལ་ཡོད་པ་དང་བོད་ཀྱི་གློག་བརྙན་གསའ་འགྲན་རིམ་ནང་མི་ཞུགས་པར་པདྨ་ཚེ་བརྟན་ལགས་སུ་རྗེས་དྲན་མཚོན་སླད་གཟིགས་འབུལ་ཞུ་རྒྱུ་ཡིན་པ་རེད།
བོད་ཀྱི་གློག་བརྙན་འཁྲབ་ཁྲིད་པ་པདྨ་ཚེ་བརྟན་ལགས་ནི་ཕྱི་ལོ་ ༡༩༦༩ ལོར་བོད་མདོ་སྨད་ཁྲི་ཀའི་ཡུལ་དུ་སྐྱེས་ཤིང་། གློག་བརྙན་འཁྲབ་ཁྲིད་པ་དང་། རྩོམ་པ་པོ། ལོ་ཙཱ་བ་བཅས་ཡིན་ལ། ཕྱི་ལོ་ ༢༠༠༢ ལོར་པེ་ཅིན་གློག་བརྙན་སློབ་གླིང་དུ་གློག་བརྙན་སྐོར་ལ་ཆེད་སྦྱོང་གནང་རྗེས། འཁྲབ་གཞུང་རྩོམ་པ་པོ་དང་འཁྲབ་ཁྲིད་པ་བཅས་ཀྱི་ལས་ཀ་གཅིག་ལྕོགས་སུ་གནང་། ཁོང་གིས་ད་བར་ལྷིང་འཇགས་ཀྱི་མ་ཎི་རྡོ་འབུམ་དང་འཚོལ། ཁྱི་རྒན་དང་གཡང་མདའ། ཐར་ལོ་སོགས་གློག་བརྙན་རིགས་ ༡༤ ལྷག་འཁྲབ་ཁྲིད་གནང་སྟེ་བོད་ཕྱི་ནང་གཉིས་ནས་དགའ་བསུ་ཆེན་པོ་ཐོབ་ཡོད་པ་མ་ཟད། རྒྱལ་སྤྱིའི་གློག་བརྙན་དུས་སྟོན་ཆེ་ཁག་ནས་གཟེངས་རྟགས་ཁག་ཅིག་ཀྱང་ཐོབ་སྟེ། བོད་པ་རང་གིས་བཟོ་སྐྲུན་བྱས་པའི་གློག་བརྙན་གྱིས་རྒྱལ་སྤྱིའི་སྐད་གྲགས་ཅན་གྱི་གློག་བརྙན་ཚོང་རའི་ནང་གོམ་པ་དང་པོ་སྤོས་ཡོད་པ་རེད། དེ་བཞིན་ཁོང་གི་གློག་བརྙན་ཐར་ལོ་དང་ཁྱི་རྒན། ལག་དམར། དབུགས་ལྒང་བཅས་ལ་ཨ་རིའི་བྷིར་ཀི་ལིན་(Brooklyn) ། ཐའེ་ཝན་དང་རྒྱ་ནག་གི་གློག་བརྙན་དུས་སྟོན་སོགས་ཀྱི་ཐོག་གཟེངས་རྟགས་བྱ་དགའ་ཐོབ་སྟེ། རྒྱལ་སྤྱིའི་སྟེང་པདྨ་ཚེ་བརྟན་ལགས་ནི་བོད་ཀྱི་གློག་བརྙན་འཁྲབ་ཁྲིད་པའི་ཚབ་མཚོན་མི་སྣ་ལྟ་བུར་གྱུར་ཡོད་ལ། ཁོང་གི་གློག་བརྙན་གྲགས་ཅན་ཐར་ལོ་ལོ་རྒྱལ་ཕྱི་ནང་གི་གཟེངས་རྟགས་མི་འདྲ་བ་ ༡༢ ཐོབ་ཡོད་འདུག འདི་ལོའི་ཕྱི་ཟླ་ ༥ ཚེས་ ༨ ཉིན་དགུང་ལོ་ ༥༤ ཐོག་བོད་ཀྱི་རྒྱལ་ས་ལྷ་སར་སྐུ་གཤེགས་ཡོད་འདུག
གསར་འགོད་པ། བྱམས་པ་ཚེ་རིང་།
