བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ཀྱིས་ཁེ་ན་ཌའི་ཁྲིམས་དོན་བློན་ཆེན་དང་ཁྲིམས་དོན་སྤྱི་ཁྱབ་གསར་པ་བོད་དོན་རྒྱབ་སྐྱོར་བ་ཨ་རི་ཧྥི་ཝི་རཱ་(Arif Virani)ནི་མཆོག་ལ་འཚམས་འདྲི་ཞུས་འདུག
ཁ་སང་ཕྱི་ཚེས་ ༢༨ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་འཚམས་འཕྲིན་ནང་། ངས་ཁྱེད་ཉིད་ཁེ་ན་ཌའི་ཁྲིམས་དོན་བློན་ཆེན་དང་ཁྲིམས་དོན་སྤྱི་ཁྱབ་ཏུ་བསྐོ་གཞག་བྱུང་བར་ལྷག་བསམ་རྣམ་དག་གིས་བཀྲ་ཤིས་་བདེ་ལེགས་ཞུ་རྒྱུ་ཡིན། འདི་ནི་ཁྱེད་ཀྱིས་ཁ་ཞེ་གཉིས་མེད་ཀྱིས་འབད་བརྩོན་གནང་བའི་འབྲས་བུར་ངོས་འཛིན་ཐོབ་པའི་ཆེ་བསྟོད་ཞིག་རེད། ཁྱེད་ལ་ཁྲིམས་དོན་རིག་པའི་རྣམ་དཔྱོད་རྒྱ་ཆེ་ཞིང་། ཉམས་མྱོང་ཕུན་སུམ་ཚོགས་པ་ཡོད་པས། ཁྱེད་ཀྱིས་མ་འོངས་བར་ཁེ་ན་ཌའི་ནང་དུ་དྲང་བདེན་དང་། རང་དབང་། དམངས་གཙོའི་བྱ་གཞག་རླབས་ཆེན་ཞིག་བསྒྲུབ་ཐུབ་པའི་ཡིད་ཆེས་བརྟན་པོ་ཡོད། ཅེས་གསུངས་འདུག
ཡང་སྲིད་སྐྱོང་མཆོག་གིས། ངས་གོ་སྐབས་འདི་བརྒྱུད་ནས་ཁྱེད་ཀྱིས་བོད་དང་བོད་མི་མང་གི་དོན་དུ་འགྱུར་བ་མེད་པའི་རྒྱབ་སྐྱོར་གནང་བར་སྙིང་ཁོངས་ནས་ཐུགས་རྗེ་ཆེ་ཞུ་རྒྱུ་ཡིན། ཁྱེད་ཀྱིས་བོད་དོན་ཞུ་གཏུགས་དང་རྒྱབ་སྐྱོར་བརྟན་པོ་གནང་བས་བོད་དོན་འཐབ་རྩོད་སྲ་བརྟན་དུ་གཏོང་བར་ཕན་ནུས་ཆེན་པོ་བྱུང་ཡོད་ལ། ཁྱེད་ཉིད་ལྟ་བུའི་མཐུན་གྲོགས་ཤིག་ཡོད་པ་ནི་ང་ཚོའི་བསོད་ནམས་ཉག་གཅིག་རེད། ཁྱེད་ཀྱིས་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོའི་ལས་གནས་དེ་མི་འཇོན་ནུས་ཅན་ཞིག་ལ་གནང་ནས་ལས་དོན་མུ་མཐུད་དུ་རྒྱུན་འཁྱོངས་བྱེད་པར་ཡིད་ཆེས་ཀྱིས་ཁེངས་ཡོད། ཅེས་གསུངས་འདུག
དེ་བཞིན་སྤྱི་འཐུས་ཚོགས་གཙོ་མཆོག་གི་འཚམས་འཕྲིན་ནང་། ཁྱེད་ཀྱིས་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོའི་ལས་འགན་འཁུར་ནས་བོད་དོན་འཐབ་རྩོད་རྒྱུན་འཁྱོངས་གནང་བར་བཀའ་དྲིན་ཆེ་ཞུ་རྒྱུ་ཡིན། ཐེངས་འདིའི་འོས་འདེམས་ཀྱིས་ཁྱེད་ཉིད་མགོ་ཁྲིད་བཟང་པོ་ཞིག་ཡིན་པ་མཚོན་པ་མ་ཟད། ཁྱེད་ནི་ཁེ་ན་ཌའི་མི་མང་གི་སེམས་ནང་དུ་དྲང་བདེན་དང་བློ་སྤོབས་ཀྱི་ཚད་གཞི་མཐོ་བོ་ཡིན་འདུག ཁྱེད་ཀྱིས་ཁྲིམས་དོན་བློན་ཆེན་དང་ཁྲིམས་དོན་སྤྱི་ཁྱབ་ཀྱི་གོ་གནས་འཁུར་བའི་ལས་ཡུན་རིང་། ཁེ་ན་ཌའི་མི་མང་གི་མ་འོངས་བའི་ལས་དོན་ཐམས་ཅད་ལམ་ལྷོངས་ཡོང་བའི་བཀྲ་ཤིས་སྨོན་འདུན་ཞུ་རྒྱུ་ཡིན། ཁྱེད་ཀྱིས་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་བྱས་པ་ཐུགས་རྗེ་ཆེ་ཞུ་ཡིན་པ་མ་ཟད། བོད་དོན་བདེན་མཐའ་མ་གསལ་བར་མུ་མཐུད་དུ་རྒྱབ་སྐྱོར་གནང་སྐྱོང་ཡོང་བའི་རེ་འདུན་ཞུ་རྒྱུ་ཡིན་ཞེས་གསུངས་འདུག
ཨ་རི་ཧྤི་ཝི་རཱ་ནཱི་མཆོག་ནི་ཤར་ཨ་ཧྥེ་རི་ཁའི་ཨུ་གྷན་ཌཱ་སྤྱི་མཐུན་རྒྱལ་ཁབ་(Repubilc of Uganda)ཀྱི་ཁམ་པཱ་ལཱ་(kampala)ཞེས་པའི་གྲོང་ཁྱེར་དེ་ནས་ཡིན་ཞིང་། ཕྱི་ལོ་ ༡༩༧༢ ལོར་ཁོང་གི་ནང་མི་མཉམ་དུ་ཁེ་ན་ཌའི་ནང་སྐྱབས་བཅོལ་དུ་འབྱོར་ཏེ། ཌོ་རོན་ཌོ་གྲོང་ཁྱེར་ནང་དུ་འཚར་ལོངས་བྱུང་བ་ཞིག་ཡིན་འདུག ཕྱི་ལོ་ ༡༩༩༤ ལོར་མེ་ཁི་གྷིལ་མཐོ་སློབ་(McGill University) ནས་ཆབ་སྲིད་ཚན་རིག་དང་ལོ་རྒྱུས་ཀྱི་གཙུག་ལག་རབ་འབྱམས་པའི་སློབ་གཉེར་བྱས་ཅིང་། རྗེས་སུ་ཌོ་རོན་ཌོ་མཐོ་སློབ་ནས་ཁྲིམས་ལུགས་རིག་པའི་ཐོག་ནས་བསླབ་པ་མཐར་སོན། ཕྱི་ལོ་ ༢༠༠༣ ནས་བཟུང་ཌོ་རོན་ཌོ་ས་གནས་ཁྲིམས་དོན་བློན་ཆེན་གྱི་ལས་ཁུངས་སུ་ཁྲིམས་དཔོན་ཀྱི་ལས་ཀ་བྱས། ཕྱི་ལོ་ ༢༠༡༥ ནས་བཟུང་ཡུལ་མི་གནས་སྤོའི་བློན་ཆེན་དང་། རིག་གཞུང་བློན་ཆེན། ཁྲིམས་དོན་བློན་ཆེན་སོགས་ཀྱི་ཕྱག་ལས་གནང་ཡོད་འདུག ཁོང་ནི་ཁེ་ན་ཌའི་ཆབ་སྲིད་གནད་ཡོད་མི་སྣའི་ཁྲོད་ནས་བོད་དོན་གླེང་སློང་ཤུགས་ཆེན་གནང་མཁན་ཞིག་ཡིན་པ་མ་ཟད། ལོ་མང་རིང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གནང་ཡོད་འདུག
གསར་འགོད་པ། བྱམས་པ་ཚེ་རིང་།
