༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་ཞི་བདེ་སེམས་ཀྱི་ཐོག་ནས་དགོས་པ་ཡིན་དུས། བོད་ཀྱི་ཆོས་དང་རིག་གཞུང་གིས་འཛམ་གླིང་ཞི་བདེ་ཡོང་བར་ཞབས་འདེགས་ངེས་ཅན་བསྒྲུབ་ཐུབ་ཀྱི་འདུག་ཅེས་བཀའ་སློབ་བསྩལ་སོང་།
ཁ་སང་ལ་དྭགས་ཞི་བའི་ཚལ་ཕོ་བྲང་གི་ཐང་ཆེན་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་དབུས་གཙང་ཆོལ་ཁའི་འགན་འཛིན་ལྷན་ཚོགས་ཐེངས་བཅུ་དྲུག་པའི་ཚོགས་བཅར་བ་རྣམས་ལ་མཇལ་ཁ་དང་བཀའ་སློབ་བསྩལ་སྐབས། དེ་རིང་འདིར་དབུས་གཙང་དམ་པ་ཆོས་ཀྱི་ཆོལ་ཁའི་འགན་འཛིན་ལྷན་ཚོགས་རེད། ང་ཚོས་སྟོད་མངའ་རིས་སྐོར་གསུམ་དང་། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ཟེར་གྱི་ཡོད། བོད་ཆོལ་ཁ་གསུམ་ནི་སྔོན་མ་ཆོས་རྒྱལ་རྣམས་ཀྱི་སྐབས་དང་། ཆོས་རྒྱལ་སྲོང་བཙན་གྱི་སྐབས་སུ་སོ་སོའི་སྐད་ཡིག་ཟུར་དུ་དགོས་པ་དགོངས་པ་བཞེས་ནས། དི་བ་ནག་རི་ཟེར་བ་ཡི་གེ་ཞིག་ཡོད་པ་དེར་དཔེ་བལྟས་ནས་དབྱངས་དང་གསལ་བཤད་ཀྱི་ཡི་གེ་ཡོད་པ་དེ་འདྲ་ཞིག་མཛད་པ་རེད། ཆོས་རྒྱལ་སྲོང་བཙན་སྒམ་པོས་རྒྱ་བཟའ་དང་འཁྲུངས་ས་བསྐྱོན་པ་རེད། ཆོས་རྒྱལ་སྲོང་བཙན་སྒམ་པོ་རྒྱ་མིའི་ཁ་ལག་ལ་མཉེས་པོ་ཡོད་པ་རེད་བསམ་གྱི་འདུག སོ་སོའི་མི་རིགས་ཀྱི་ལྟ་བ་དེ་མཁྲེགས་པོ་ཞེ་བོ་བཟུང་འདུག རྒྱ་བཟའ་ཡིས་བོད་པ་ཚོས་རྒྱ་ཡིག་སྦྱངས་བར་རེ་བ་ཡོད་ཀྱང་། སྲོང་བཙན་སྒམ་པོས་ཟུར་དུ་བོད་ཡིག་དགོས་པའི་དགོངས་པ་རྒྱ་ཆེན་པོ་དང་ཕུགས་རྒྱང་རིང་པོ་ཞིག་གཏན་གཏན་རེད་འདུག བོད་པ་རང་ཉིད་ཀྱི་དབྱངས་དང་གསལ་བཤད་ཡོད་པའི་ཡི་གེ་ཞིག་སྲོལ་གཏོད་གནང་བ་རེད། དེའི་རྨང་གཞིའི་སྟེང་དུ་ཆོས་རྒྱལ་ཁྲི་སྲོང་ལྡེའུ་བཙན་སྐབས་སུ་མཁན་ཆེན་ཞི་བ་འཚོ་གདན་འདྲེན་ཞུས་པ་དང་། རྒྱ་གར་མཁས་པའི་གཞུང་མང་པོ་བོད་ཡིག་ཏུ་བསྒྱུར་བ་རེད། ང་ཚོ་བཀའ་འགྱུར་པོ་ཏི་ཉིས་བརྒྱ་ཙམ་དང་། བསྟན་འགྱུར་པོ་ཏི་མང་པོ་བཅས་ཁྱོན་པོ་ཏི་སུམ་བརྒྱ་ལྷག་བོད་ཡིག་ནང་དུ་ཡོད། མཁན་ཆེན་ཞི་བ་འཚོས་དཔལ་ནལེནྡྲའི་ཆོས་བརྒྱུད་དྲི་མ་མེད་པ་ཞིག་བོད་དུ་རྩིས་སྤྲོད་གནང་ཡོད་པ་རེད། རྒྱ་གར་མཁས་པའི་གཞུང་དེ་དག་ང་ཚོ་བོད་པའི་བདག་པོ་བརྒྱབ་པ་རེད། དེ་རིང་ཁ་སང་གི་དུས་ཚོད་འདིར་ནང་པའི་ཆོས་ཀྱི་ལྟ་སྒོམ་སྤྱོད་གསུམ་དང་། སེམས་ཁམས་རིག་པ། ལྟ་གྲུབ་ཀྱི་སྐོར་ལ་བོད་ཡིག་དེ་ཡག་ཤོས་ཆགས་བསྡད་ཡོད། བྱས་ཙང་སྔོན་གྱི་ཆོས་རྒྱལ་རྣམས་དང་། ས་དགེ་བཀའ་རྙིང་བཅས་རིས་སུ་མ་ཆད་པའི་སྐྱེས་བུ་དམ་པ་དེ་དག་གིས་བོད་ཀྱི་སངས་རྒྱས་ཀྱི་ཆོས་ལ་སྤུས་དག་པོའི་བདག་པོ་བསྐྱོན། དེ་ཡང་སྨོན་ལམ་བརྒྱབ་བསྡད་པ་གཅིག་པོ་མ་ཡིན་པར་སློབ་སྦྱོང་བྱས་ཡོད། དཔེར་ན་ངོས་རང་ལ་ཆ་བཞག་ན། ཆུང་དུས་ནས་བློ་རིག་དང་རྟགས་རིགས་ཀྱི་སྡོམ་ཞིག་ཡོད་པ་དེ་བློ་ལ་བཟུང་། དེ་ནས་བསྡུས་གྲྭ་དང་། ཕར་ཕྱིན། དབུ་མ་བཅས་ལ་བལྟས་པ་རེད། ངོས་རང་ཆུང་ཆུང་ཡིན་དུས་སྐུ་འབུམ་དུ་ཡོད་པའི་སྐབས་སུ། སྐུ་འབུམ་གྱི་འདུ་ཁང་གི་འཁྲིས་སུ་གྲྭ་བ་ཆུང་ཆུང་ཚོས་ཕྱག་འཚལ་ཏེ་ཨ་ར་པ་ཙ་བགྲང་བ་གསལ་བོ་དྲན་གྱི་འདུག ངོས་དེ་དུས་ལྟད་མོའི་ཟོལ་འདྲ་བོ་མ་གཏོགས་ཕྱག་འཚལ་ནས་ཨ་ར་པ་ཙ་བསགས་ཡོད་པ་མ་རེད། ངོས་རང་དེ་དུས་ཆུང་ཆུང་རེད། ཡིན་ནའང་། དེ་དུས་གནས་ཚུལ་ངོས་རང་གིས་གསལ་བོ་ཞེ་བོ་དྲན་གྱི་འདུག མདོ་སྨད་ལ་ཆ་བཞག་པ་ཡིན་ནའང་། ད་ལྟ་རང་བཤད་མ་ཐག་པ་ནང་བཞིན། ཞིབ་འཇུག་སློབ་གཉེར་བྱེད་པར་ཞེ་བོ་གཏིང་ཟབ་པོ་དང་རྒྱ་ཆེན་པོ་ཡོད་པ་རེད། མཁས་པའི་སྐྱེས་བུ་དམ་པ་མང་པོ་བྱུང་བ་རེད། མདོ་སྟོད་ལ་ཆ་བཞག་ནའང་། དེ་དེ་བཞིན་མཁས་གྲུབ་གཉིས་ལྡན་གྱི་སྐྱེས་བུ་དམ་པ་མང་པོ་བྱུང་བ་རེད། དབུས་གཙང་དམ་པ་ཆོས་ཀྱི་ཆོལ་ཁ་ལའང་མཁས་གྲུབ་གཉིས་ལྡན་གྱི་སྐྱེས་བུ་དམ་པ་མང་པོ་བྱུང་བ་རེད། ཅེས་གསུངས་འདུག
ཡང་༧མགོན་པོ་གང་ཉིད་མཆོག་ནས། དེ་རིང་ཁ་སང་ཆབ་སྲིད་ཀྱི་ཐོག་ནས་བོད་ཀྱི་རང་དབང་བརླག་པ་རེད་དེ། དངོས་གནས་དྲང་གནས་བོད་ནང་གི་རྒྱ་ཆེའི་མི་མང་གི་ལྷག་བསམ་གྱིས་སོ་སོའི་སྐད་ཡིག་བདག་པོ་རྒྱག་བཞིན་ཡོད་པ་ཧ་ལས་པ་ཞིག་རེད། རྒྱ་མི་གུང་ཁྲན་གྱིས་བོད་ནང་དུ་ཞེ་བོ་དོ་དམ་པོ་བྱས་ཀྱང་། བོད་པ་ཚོས་ཆོས་དང་རིག་གཞུང་ཉམས་ཆག་རྩ་བ་ནས་མ་བཏང་པར་སེམས་ཤུགས་ཆེན་པོས་ཟིན་བསྡད་ཡོད་པ་རེད། དེ་རིང་ཁ་སང་རྒྱ་ནག་ནང་དུ་བོད་ཀྱི་ནང་ཆོས་དོ་སྣང་བྱེད་མཁན་ཇེ་མང་ནས་ཇེ་མང་དུ་འགྲོ་བཞིན་འདུག ལོ་ཁ་ཤས་ཀྱི་སྔོན་ལ་ངོས་རང་བོད་ནས་ཡོང་བའི་ལན་ཀྲུའུ་སློབ་ཆེན་གྱི་སློབ་མ་ཞིག་ལ་ཐུག་སོང་། ཁོང་ཚོས་ཆབ་སྲིད་ཀྱི་ཐོག་ནས་བོད་ལ་རྒྱ་མིས་དབང་བསྒྱུར་བ་རེད་དེ། ཆོས་ཀྱི་ཐོག་ནས་ང་ཚོས་རྒྱ་ནག་དབང་བསྒྱུར་ཐུབ་པར་དྲན་གྱི་འདུག་ཟེར་གྱི་འདུག དེ་བདེན་པའི་བཟོ་འདྲ་བོ་ཞིག་འདུག དེང་སང་རྒྱ་ནག་ནང་དུ་ནང་པ་ལ་དོ་སྣང་བྱེད་མཁན་མང་ནས་མང་དུ་འགྲོ་བཞིན་འདུག ངོས་རང་ལ་ཆ་བཞག་པ་ཡིན་ནའང་། དེ་སྔ་ནས་ཏཱ་ལའི་ལོག་སྤྱོད་པར་བཤད་བསྡད་ཀྱི་ཡོད། དེ་རིང་ཁ་སང་སྐད་ཆ་དེ་འཇམ་བསྡད་ཡོད་པ་རེད། བོད་དུ་ཡོད་བསྡད་པའི་སངས་རྒྱས་ཀྱི་བསྟན་པ་དེ་ཚན་རིག་དང་མཐུན་པ་རེད་ལ། ཐོག་མར་ཐོས་བྱུང་གི་ཤེས་རབ་བསྐྱེད། དེ་ནས་བསམ་བྱུང་གི་ཤེས་རབ་བསྐྱེད། སྒོམ་བྱུང་གི་ཤེས་རབ་བསྐྱེད་ཀྱི་ཡོད་པས། བོད་ཀྱི་ཆོས་དང་རིག་གཞུང་དེ་གཞན་དང་མ་འདྲ་བ་ཞིག་ཆགས་ཡོད་པས། དེ་རིང་ཁ་སང་རྒྱ་ནག་ནང་དུའང་དོ་སྣང་ཡོང་གི་ཡོད་པ་རེད་ལ། འཛམ་བུ་གླིང་དུའང་དོ་སྣང་བྱེད་མཁན་མང་པོ་འདུག
རྗེ་རིན་པོ་ཆེས་གསུངས་བ་ནང་བཞིན། བསྟན་པ་རིན་ཆེན་མཆོག་གིས་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེ་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡི།། ཕན་བདེའི་གཏེར་དེ་གསལ་བར་བྱེད་པར་ཤོག།། སྔོན་མ་ནུབ་ཕྱོགས་རྒྱལ་ཁབ་དང་། ཨ་ཧྥེ་རི་ཁའི་ནང་དུ་ནང་ཆོས་ཀྱི་མིང་ཙམ་ལས་ཤེས་མཁན་མེད་ཀྱང་། དེང་སང་དེ་དག་དུ་ནང་ཆོས་ལ་དོ་སྣང་བྱེད་མཁན་མང་པོ་ཡོང་བསྡད་ཀྱི་འདུག ལྷག་པར་དུ་སེམས་ཁམས་རིག་པའི་སྐོར་ནང་པའི་གཞུང་དུ་གཏིང་ཟབ་པོ་དང་རྒྱ་ཆེན་པོ་ཡོད་པའི་ཐོག་ལ་དོ་སྣང་གསར་བ་ཡོང་བསྡད་ཀྱི་འདུག ཆོས་ལ་དད་པ་ཡོད་ཀྱང་མེད་རུང་། ནང་པ་ཡིན་ཡང་མིན་རུང་། བསམ་བློ་འགྲོ་སྟངས་དང་ལྟ་གྲུབ་ཀྱི་ཐོག་ནས་རིག་པས་དཔྱད་པ་བྱེད་པ་དེ། ནུབ་ཕྱོགས་རྒྱལ་ཁབ་ཀྱི་ཚན་རིག་པ་དང་ཤེས་ཡོན་ཅན་རྣམས་ཀྱིས་དོ་སྣང་གསར་པ་བྱེད་བསྡད་ཀྱི་ཡོད། བོད་ཀྱི་ཆོས་དང་རིག་གཞུང་གཏིང་ཟབ་མོ་ཡོད་པ་དེས་འགྲོ་བ་མི་སྤྱི་ལ་ཕན་ཐོགས་ཡོང་བསྡད་པ་ཞིག་ཆགས་འདུག ཅེས་གསུངས་འདུག
ཡང་༧མགོན་པོ་གང་ཉིད་མཆོག་ནས། བོད་ཀྱི་ནང་ཆོས་ཀྱི་ཁུངས་དཔལ་ནལེནྡྲའི་མཁས་པའི་དབང་བོ་རྣམས་ལ་གཏུགས་ནས་ཡོང་གི་ཡོད་པ་རེད། མགོན་པོ་ཀླུ་སྒྲུབ་དང་། འཕགས་པ་ཐོགས་མེད། ཕྱོགས་ཀྱི་གླང་པོ། ཆོས་ཀྱི་གྲགས་པ་ལ་སོགས་པའི་གཞུང་ལ་བརྟེན་ནས་བོད་ཀྱི་ནང་ཆོས་སློབ་སྦྱོང་བྱེད་ཀྱི་འདུག དབུ་མའི་གཞུང་དང་ཚད་མའི་གཞུང་འབྲེལ་ནས་ཡོང་དུས་ཞེ་བོ་སྤུས་དག་པོ་རེད། དེ་ཡང་རྒྱུ་མཚན་ལ་བརྟེན་ནས་བསམ་བློ་བཏང་ནས་འགྲོ་བ་ཞིག་རེད་མ་གཏོགས། དད་པ་རྐྱང་རྐྱང་གི་ཐོག་འགྲོ་ཡི་མེད་དུས། ང་ཚོས་ཚན་རིག་པ་དང་མཉམ་དུ་གོ་བསྡུར་བྱེད་ཀྱི་ཡོད། སེམས་ཁམས་རིག་པའི་གནས་ཚུལ་མང་པོ་ཞིག་ཚན་རིག་པས་དོ་སྣང་བྱེད་ཀྱི་ཡོད་ལ། ང་ཚོས་ཕར་སློབ་བཞིན་ཡོད་འདུག ཡང་སེམས་ཁམས་རིག་པའི་གནས་ཚུལ་མང་པོ་ཞིག་ང་ཚོས་ཚན་རིག་པའི་འགྲམ་ནས་སློབ་སྦྱོང་བྱེད་རྒྱུ་ཡོད་བསྡད་པ་རེད། དེང་སང་བོད་ཀྱི་རིག་གཞུང་ཐོག་ནས་འཛམ་གླིང་དུ་སེམས་ཁམས་རིག་པའི་ཤེས་ཚད་གོང་མཐོར་སྤེལ་ཐུབ་པ་ཞིག་རེད། དེ་ང་ཚོ་བོད་པའི་ལས་འགན་རེད།
འདི་འདྲའི་རིག་གཞུང་ཞིག་ཡོད་པ་ང་ཚོ་ཚང་མ་དངོས་གནས་སྤོབས་པ་སྐྱེ་དགོས་པ་རེད། ང་ཚོ་བོད་ཟེར་དུས་འདི་འདྲའི་རིག་གཞུང་གཏིང་ཟབ་ཅིག་ཡོད་པར་དོ་སྣང་བྱེད་དགོས། དེ་རིང་ཁ་སང་ནུབ་ཕྱོགས་པའི་རྒྱལ་ཁབ་དང་ཚན་རིག་པའི་ནང་དུ་སེམས་ཁམས་རིག་པའི་སྐོར་དོ་སྣང་བྱེད་བཞིན་ཡོད་པར་ཤེས་པ་དགོས་པ་མ་ཟད། ང་ཚོ་བོད་པར་འདི་འདྲའི་རིག་གཞུང་གཏིང་ཟབ་ཅིག་ཡོད་པ་ཤེས་པ་བྱས་ཏེ་བདག་པོ་རྒྱག་རྒྱུ་གལ་ཆེན་པོ་རེད། ང་ཚོ་ཚང་མས་འཛམ་གླིང་ཞི་བདེ་ཟེར་བསྡད་ཡོད་པ་རེད། བློ་ཡི་ནང་དུ་བྱམས་བརྩེ་ཡོད་ན་ཞི་བདེ་ཡོང་གི་རེད། སེམས་ལ་ང་རྒྱལ་དང་ཁོང་ཁྲོའི་ཐོག་ནས་བསྡད་པ་ཡིན་ན་ཞི་བདེ་ཡོང་རྒྱུ་ཁག་པོ་ཞེ་དྲགས་རེད། དངོས་གནས་དྲང་གནས་ཀྱི་ཞི་བདེ་དེ་སེམས་ཀྱི་ཐོག་ནས་ཞི་བདེ་དགོས་པ་ཡིན་དུས། བོད་ཀྱི་ཆོས་དང་རིག་གཞུང་གིས་འཛམ་གླིང་ཞི་བདེ་ཡོང་བར་ཞབས་འདེགས་ངེས་ཅན་བསྒྲུབ་ཐུབ་པ་འདུག ངོས་རང་ལ་ཆ་བཞག་ན། རྒྱལ་དབང་གི་མིང་ཞིག་ཐོགས་པ་དེ་འདྲ་རེད་ལ། འཛམ་བུ་གླིང་གི་ཤར་ལྷོ་ནུབ་བྱང་གི་ལུང་པ་མང་པོར་སླེབས་ཚར་རེད། བོད་ཀྱི་ཆོས་དང་རིག་གཞུང་དེ་དངོས་གནས་དྲང་གནས་སྤོབས་པ་སྐྱེས་བ་ཞིག་རེད། ངོས་ཀྱིས་ངོ་ཤེས་པ་མང་པོར་འགྲེལ་བཤད་དེ་ལྟར་རྒྱག་གི་ཡོད་པས་དགའ་བོ་ཞེ་དྲགས་བྱེད་ཀྱི་འདུག གང་ལྟར་ང་ཚོས་འཛམ་གླིང་ཞི་བདེ་ཟེར་ནས་བཤད་བསྡད་ཡོད་པ་རེད། ཞི་བདེ་དངོས་དེ་སེམས་ཀྱི་ཞི་བདེ་དགོས་པ་རེད། ནུབ་ཕྱོགས་རྒྱལ་ཁབ་དང་ལུང་པ་གཞན་དུ་ང་རྒྱལ་དང་ཕྲག་དོག་ཐོག་ཏུ་འགྲོ་བསྡད་ཀྱི་འདུག ང་ཚོས་བྱམས་བརྩེ་ཟེར་བའི་ཐོག་ནས་བོད་ཀྱི་རིག་གཞུང་ཟིན་གྱི་ཡོད་པ་རེད། ངོས་རང་ལོ་བརྒྱད་ཅུ་གྱ་བརྒྱད་ལ་སླེབས་ཡོད་པ་རེད། ངོས་ཀྱི་གཟུགས་པོ་བརྟག་དཔྱད་བྱས་དུས། གཟུགས་པོ་ཡག་པོ་ཞེ་དྲགས་འདུག་ལ། རྨི་ལམ་བརྟག་ནས་མཚན་མ་ཡོང་བ་བརྩིས་པ་ཡིན་ན། ངོས་རང་ལོ་བརྒྱ་དང་བཅུ་གྲངས་ལྷག་ཡོང་ཐུབ་པ་གསལ་བོ་ཞེ་དྲགས་འདུག ང་ཚོས་ད་ལྟ་བར་དུ་སེམས་ཤུགས་བསྐྱེད་ནས་ཧུར་ཐག་བྱས་པ་རེད། ད་དུང་ཡང་ང་ཚོས་འབྱུང་འགྱུར་གྱི་ལོ་བཅོ་ལྔ་དང་ཉི་ཤུའི་རིང་དུ་སེམས་ཤུགས་བསྐྱེད་ནས་ཧུར་ཐག་བྱོས་ཞེས་བཀའ་སློབ་བསྩལ་འདུག
གསར་འགོད་པ། བྱམས་པ་ཚེ་རིང་།
