རྒྱ་ནག་གཅིག་གི་སྲིད་ཇུས་དྲག་སྤྱོད་ཅེས་པའི་མཁས་པའི་བགྲོ་གླེང་ལྷན་ཚོགས་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གཅིག་གི་སྲིད་ཇུས་ནི་བོད་དང་འབྲེལ་བ་ཅིའང་མེད་ཅེས་ནན་བརྗོད་གནང་འདུག
ཟླ་འདིའི་ཕྱི་ཚེས་ ༡ ནས་ཉིན་གཉིས་རིང་རྒྱ་གར་གྱི་རྒྱལ་ས་ལྡི་ལིའི་རྒྱལ་སྤྱིའི་ལྟེ་གནས་ཁང་དུ། འཚེ་བ་མེད་པའི་ཐབས་ལམ་ཐེབས་རྩ་ཁང་གི་(Foundation For Non-Violent Alternatives) གོ་སྒྲིག་འོག རྒྱ་ནག་གཅིག་གི་སྲིད་ཇུས་དྲག་སྤྱོད་ཅེས་པའི་མཁས་པའི་བགྲོ་གླེང་ལྷན་ཚོགས་ཤིག་འཚོགས་ཡོད་ཅིང་། ཐེངས་འདིའི་མཛད་སྒོའི་ཚོགས་ཐོག་ཏུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། རྒྱ་གར་གཞུང་ཚབ་ཆེན་མོ་ཟུར་པ་ལཱ་ཁཱན་ལཱལ་མེ་ཧ་རོ་ཌི་རཱ་(Lakhan Mehrotra) མཆོག་གི་གཙོས་རྒྱལ་ཁབ་ཕྱི་ནང་གི་མཁས་དབང་དང་། ཉམས་ཞིབ་པ། གཙུག་ལག་སློབ་གླིང་ཁག་གི་སློབ་དཔོན། གཞུང་ཚབ་ཟུར་པ་བཅས་མཉམ་ཞུགས་གནང་ཡོད་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་གསུང་བཤད་གནང་སྐབས། རྒྱ་ནག་གཅིག་གི་སྲིད་ཇུས་དེ་ནི་བོད་དང་འབྲེལ་བ་ཅི་ཡང་མེད་པ་ནན་བརྗོད་གནང་བ་དང་མཉམ་དུ། ༧གོང་ས་རྒྱལ་བ་རིན་པོ་ཆེ་མཆོག་གི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་གི་ཕྱག་དེབ་ལས་གསུང་དུམ་ཞིག་ལུང་འདྲེན་གནང་སྟེ། རྒྱ་ནག་གཅིག་གི་སྲིད་ཇུས་དེ་རྒྱ་ནག་དང་ཐའེ་ཝན་གྱི་འབྲེལ་བར་དམིགས་ནས་བཟོས་བ་དང་། ཕྱི་ལོ་ ༡༩༧༠ ཙམ་ནས་ཨ་རིས་རྒྱ་ནག་དང་ཐའེ་ཝན་བར་འབྲེལ་བ་བྱེད་ཕྱོགས་ཀྱི་སྲིད་ཇུས་ཤིག་ལས་གྲུབ་པ་ཡིན་ལ། ཕྱིས་སུ་རྒྱ་ནག་གི་མགོ་ཁྲིད་རིམ་པས་རྒྱལ་ཁབ་གཞན་དང་འབྲེལ་བ་བྱེད་སྐབས། རྒྱ་ནག་གཅིག་གི་སྲིད་ཇུས་ལ་ངོས་འཛིན་བྱ་དགོས་པའི་བཙན་སྐུལ་བཏང་ཡོད་པ་མ་ཟད། ལྷག་པར་དུ་རྒྱ་ནག་གཞུང་གིས་རྒྱ་ནག་གཅིག་གི་སྲིད་ཇུས་དེ་བོད་ལ་འཇུག་ཚུལ་རྒྱལ་སྤྱིའི་སྤྱི་ཚོགས་ལ་ལོག་འགྲེལ་བྱས་ཏེ། རྒྱལ་ཁབ་གཞན་གྱིས་བོད་དང་འབྲེལ་བ་བྱེད་པར་དམ་དྲག་གི་ལག་ཆར་བེད་སྤྱོད་གཏོང་བཞིན་པ་འགྲེལ་བརྗོད་གནང་འདུག
ཡང་སྲིད་སྐྱོང་མཆོག་གིས། རྒྱ་ནག་མི་མང་སྤྱི་མཐུན་རྒྱལ་ཁབ་དང་བོད་གཉིས་བར་གྱི་འབྲེལ་བའི་འཕེལ་རིམ་དང་། ལྷག་པར་དུ་ཕྱི་ལོ་ ༡༩༥༡ ལོར་བཙན་ཤེད་འོག་བཞག་པའི་ཆིངས་ཡིག་དོན་ཚན་བཅུ་བདུན་གྱི་ནང་དོན་བོད་ཀྱི་ཕྱི་འབྲེལ་དང་བདེ་སྲུང་ཕུད་བོད་ཀྱི་ཆོས་སྲིད་ཀྱི་གནས་བབ་སྔར་ཡོད་རང་གནས་འཇོག་རྒྱུའི་ཁས་ལེན་བྱས་ཏེ། ཐོག་མར་བོད་མི་དང་བསྟུན་མཁས་བྱས་ཀྱང་རིམ་པས་རྒྱ་ནག་གིས་ཆིངས་ཡིག་གི་ནང་དོན་ལ་བརྩིས་མེད་རྡོག་རོལ་བཏང་ཡོད་སྐོར་གསུངས་འདུག དེ་བཞིན་ཁོང་གིས་རྒྱ་དཀར་ནག་དང་། ཨ་རི་དང་རྒྱ་ནག་གི་འབྲེལ་བའི་འཕེལ་རིམ་ངོ་སྤྲོད་དང་། རྒྱལ་སྤྱིའི་ཁྲིམས་ཡིག་ཁག་བོད་ལ་གཅིག་མཚུངས་ལག་བསྟར་བྱས་ཐོག་རྒྱལ་སྤྱིའི་སྤྱི་ཚོགས་ནས་བོད་དེ་ལོ་རྒྱུས་ཐོག་རང་བཙན་གྱི་རྒྱལ་ཁབ་ཅིག་ཏུ་ངོས་འཛིན་གནང་དགོས་སྐོར་སོགས་གསུངས་ཡོད་འདུག
རྒྱ་ནག་གཅིག་གི་སྲིད་ཇུས་ཀྱིས་ཐའེ་ཝན་ཕྱི་སྲིད་ཀྱི་གནོན་ཤུགས་སྐོར་ལ་ཧྥེ་ལེ་མེ་གཙུག་ལག་སློབ་གླིང་(FLAME University)་གི་ལྷོ་ཤར་ཨེ་ཤ་ཡའི་ཚན་པའི་སློབ་དཔོན་ཁྲི་ཧྥིན་ལིག་ (Roger Chi Feng Liu) ལགས་ཀྱིས། ཐའེ་ཝན་གྱི་རྩ་ཁྲིམས་སུ་རྒྱ་ནག་གཅིག་གི་སྲིད་བྱུས་ངོས་ལེན་བྱས་པ་དེ་གནད་དོན་ཆེན་པོ་ཞིག་ཏུ་གྱུར་ཡོད་ཅིང་། ཐའེ་ཝན་གཞུང་ནས་དེ་ལ་འགྱུར་བ་གཏོང་ཐུབ་ཚེ། དེས་རྒྱ་གཞུང་ལ་ཡ་ལན་ཆེན་པོ་ཞིག་སྤྲད་ཡོད་པ་རེད། རྒྱ་གར་གཞུང་གིས་ཨ་རུ་ན་ཅལ་སོགས་ཀྱི་རྩོད་རྙོག་ཡོད་པའི་ས་ཁུལ་ཁག་རྒྱ་གར་གྱི་ཁུངས་གཏོགས་ཡིན་པ་གསལ་སྟོན་བྱེད་བཞིན་ཡོད་ཀྱང་། ཐའེ་ཝན་གྱིས་དེའི་ཐད་ལ་ཡོངས་གྲགས་ཀྱི་གསལ་བཤད་ཅིའང་མེད་པ་རེད། དེ་ནི་རྒྱ་གར་གྱི་ཕྱོགས་འཛིན་དང་རྒྱ་ནག་གི་ཁ་གཏད་དུ་འགྱུར་རྒྱུ་ཡིན་པས་རྐྱེན་རེད། གནད་དོན་འདིའི་རིགས་ང་ཚོས་བསམ་ཤེས་བྱེད་དགོས་པ་ཞིག་ཡིན་མོད། གནད་དོན་དེ་དག་ཁ་གསལ་འབྱུང་རྒྱུ་ཧ་ཅང་ཁག་པོ་རེད་ཅེས་བརྗོད་འདུག
ཞི་བ་ནཱ་དཱར་གཙུག་ལག་སློབ་གླིང་(Shiv Nadar University)་གི་སློབ་དཔོན་ཇཱ་བྷིན་ཇཱ་ཀོབ་(Jabin Jacob)་ལགས་ཀྱིས། རྒྱ་གཞུང་གིས་ཚོང་ལས་དང་ཆབ་སྲིད་ཀྱི་གནད་ཡོད་མི་སྣར་འབྲེལ་ལམ་རྒྱུན་སྐྱོང་བྱ་ཆེད་དུ་ཤུགས་རྒྱག་བཞིན་ཡོད་ཅིང་། དམིགས་བསལ་རྒྱལ་སྤྱིའི་ཚོགས་སྡེ་ཁག་ཏུ་རྒྱ་ནག་གཅིག་གི་སྲིད་ཇུས་ཀྱི་ལས་དོན་བྱེད་ཕྱོགས་མངོན་གསལ་དུ་འདོན་པའི་འཆར་གཞི་འཐེན་བཞིན་ཡོད། ཕྱི་རྒྱལ་དུ་ཡོད་པའི་རྒྱ་ནག་གཞུང་ཚབ་པ་གཙོས་པའི་རྒྱ་རིགས་རྣམས་ཀྱིས་རྒྱ་ནག་གཅིག་གི་སྲིད་ཇུས་དྲིལ་བསྒྲགས་བྱེད་པར་འབད་བརྩོན་བྱེད་མུས་ཡིན། བྷང་ལ་དྷི་ཤི་ནང་དུ་མཚོན་པ་ཡིན་ན། རྒྱ་ནག་གཞུང་གི་མི་སྣ་ཁག་གིས་རྒྱ་ནག་གཅིག་གི་སྲིད་ཇུས་ལག་བསྟར་བྱས་ཏེ་རྒྱ་བསྐྱེད་ཡོད་པ་རེད་ཅེས་བརྗོད་འདུག
སྐབས་དེར་རྒྱ་གར་གཞུང་ཚབ་ཆེན་མོ་ཟུར་པ་ལཱ་ཁཱན་ལཱལ་མེ་ཧ་རོ་ཌི་རཱ་མཆོག་གིས། ད་ལྟའི་ཆར་རྒྱ་ནག་ནི་སྟོབས་ཆེན་རྒྱལ་ཁབ་ཅིག་ཏུ་གྱུར་ཡོད་པས། འཛམ་བུ་གླིང་གི་ཞི་བདེ་དང་བདེ་འཇགས་ཀྱི་ཐད་ཉེན་ཁར་གྱུར་ཡོད་པ་མ་ཟད། ལྷག་པར་དུ་རྒྱ་ནག་གཞུང་གིས་བོད་བཙན་བཟུང་བྱས་རྗེས་རྒྱ་གར་གྱི་རྒྱལ་མཚམས་བདེ་འཇགས་ལའང་ཉེན་ཚབས་ཆེན་པོ་བཟོས་དང་བཟོ་བཞིན་ཡོད་སྐོར་འགྲེལ་བརྗོད་གནང་འདུག
གསར་འགོད་པ། བྱམས་པ་ཚེ་རིང་།
