༧གོང་ས་མཆོག་གིས་ཆོས་ལུགས་གྲུབ་མཐའ་ཁག་གི་ལྟ་གྲུབ་ཀྱི་གལ་གནད་ཤེས་དགོས་པ་གལ་ཆེན་པོ་ཡིན་པ་དང་བོད་པས་ཚད་མ་རིག་པའི་འགྲོ་སྟངས་ཀྱི་ཐོག་རྟགས་གསལ་གྱིས་གནས་ཚུལ་ཞིབ་ཕྲ་བཤད་ཀྱི་ཡོད་པས་ཕན་ཐོགས་པོ་བྱུང་ཞེས་བཀའ་སློབ་བསྩལ།
ཟླ་འདིའི་ཕྱི་ཚེས་ ༢ ཉིན་ལ་དྭགས་གླེ་ཞི་བའི་ཕོ་བྲང་དུ། ༧གོང་ས་རྒྱལ་བ་རིན་པོ་ཆེ་མཆོག་ནས་ཐའེ་ཝན་གྱི་དད་ལྡན་པ་ཁག་ཅིག་ལ་མཇལ་ཁ་དང་བཀའ་སློབ་བསྩལ་སྐབས། ༧གོང་ས་རྒྱལ་བ་རིན་པོ་ཆེ་མཆོག་ནས། ཆོས་གྲོགས་ཚོ་ཐུག་པར་ཞེ་དྲགས་དགའ་བོ་བྱུང་། ལོ་རྒྱུས་ཀྱི་ཐོག་ནས་རྒྱ་ནག་ནང་པའི་ལུང་པ་རེད། སྔ་མོ་ངོས་རང་རྒྱ་ནག་ལ་ཕྱིན་སྐབས་ས་ཁུལ་མང་པོར་ནང་པའི་ལྷ་ཁང་འདུག ངོས་ཀྱིས་ཆོས་ལུགས་ཚང་མར་གུས་ཞབས་བྱེད་ཀྱི་ཡོད། ཆོས་ལུགས་ཚང་མར་ལྟ་གྲུབ་ཀྱི་ཐོག་ནས་མི་འདྲ་བ་རེ་ཡོད་པ་རེད་དེ། ཆོས་ལུགས་ཚང་མའི་བསླབ་བྱ་སེམས་བཟང་པོ་བྱ་དགོས་པ་དང་། གཞན་ལ་ཕན་ཐོགས་བྱ་དགོས་ཟེར་བ་དེ་ཆོས་ལུགས་ཚང་མར་གཅིག་པ་རེད། ལྟ་གྲུབ་སྟེང་དུ་མི་འདྲ་བ་དེ་ནང་པ་རང་ལ་ཆ་བཞག་པ་ཡིན་ནའང་། བྱེ་བྲག་སྨྲ་བ། མདོ་སྡེ་བ། སེམས་ཙམ་པ། དབུ་མ་བ་བཅས་ཡོད་པ་རེད་ལ། དབུ་མ་བ་ལ་ཆ་བཞག་པ་ཡིན་ནའང་། ཐལ་འགྱུར་པ་དང་རང་རྒྱུད་པ་ཟེར་ནས། གཞན་པ་ལའང་ལྟ་གྲུབ་ཀྱི་ཐོག་ནས་དབྱེ་བ་མང་པོ་འདུག ལྟ་གྲུབ་ཀྱི་ཐོག་ན་མི་འདྲ་བ་ཡོད་པ་དེ་དག་ལ་ཡག་པོ་སློབ་སྦྱོང་བྱས་པ་ཡིན་ན། དེ་དག་གི་གནད་འགག་དེ་དང་འདི་རེད་ཅེས་བཤད་ཐུབ་པ་ཞིག་རེད། གཞན་སངས་རྒྱས་ལ་སྐྱབས་སུ་མཆིའོ། ཆོས་ལ་སྐྱབས་སུ་མཆིའོ། དགེ་འདུན་ལ་སྐྱབས་སུ་མཆིའོ། ཞེས་སྐྱོར་བསྡད་པ་གཅིག་པོས་བློ་གྲོས་རྒྱ་ཆེན་པོ་ཆགས་ཀྱི་ཡོད་པ་མ་རེད། གྲུབ་མཐའ་ཆ་ཚང་ལ་བལྟ་དགོས་པ་རེད། བཅོམ་ལྡན་འདས་ཀྱིས་གསུངས་ཡོད་པའི་བཀའ་དེ་གཞན་དང་མ་འདྲ་བ་ཞིག་ཡོད་པ་བཤད་ཡོང་དུས་དད་པ་བརྟན་པོ་ཞིག་ཡོང་གི་འདུག ཅེས་གསུངས་འདུག
ཡང་མགོན་པོ་གང་ཉིད་མཆོག་ནས། ང་ཚོ་བོད་ལ་གཙོ་བོ་ཚད་མ་རིག་པའི་འགྲོ་སྟངས་ཀྱི་ཐོག་ནས་རྟགས་གསལ་གཏོང་པ་ཞིག་ཡོད་པ་དེ་ཡག་པོ་ཞེ་དྲགས་རེད། ཐག་ཆོད་པའི་ཐོག་ནས་དེ་ཡིན་ན་ཁྱབ་པར་ཐལ་ཟེར་ནས་རྟགས་གསལ་བཏང་ཡོང་དུས། གནས་ཚུལ་ཞིབ་ཅིང་ཕྲ་བོའི་ཐོག་ནས་བཤད་ཀྱི་ཡོད་པ་ཞེ་བོ་ཕན་ཐོགས་པོ་འདུག ནང་པའི་ལུང་པ་ཚང་མ་ཞེ་དྲགས་ཡག་པོ་རེད། རྟགས་གསལ་བཏང་ནས་འགྲོ་བ་དེ་བོད་ལ་ནལེནྡྲའི་འགྲོ་སྟངས་ཀྱི་ཐོག་ནས་འགྲོ་བཞིན་ཡོད་པ་ཞིག་རེད། སློབ་དཔོན་ཕྱྭ་བ་ཆོས་ཀྱི་སེང་གེས་སྲོལ་གཏོད་པ་ནས་བཟུང་། བོད་ཀྱི་གདན་ས་ཆེན་པོ་གསུམ་གཙོ་བོར་གྱུར་བའི་དགོན་སྡེ་ཁག་ཏུ་རྟགས་གསལ་གཏོང་བཞིན་ཡོད། ཕྱྭ་བ་ཆོས་ཀྱི་སེང་གེའི་རྟགས་གསལ་ལ་དོ་སྣང་ཞེ་དྲགས་ཡོད་པ་ཞིག་རེད་འདུག ཅེས་གསུངས།
དེ་བཞིན་༧མགོན་པོ་གང་ཉིད་མཆོག་ནས། ལོ་རྒྱུས་སུ་ཆོས་རྒྱལ་ཁྲི་སྲོང་ལྡེའུ་བཙན་དཀྱིལ་དུ་བཞུགས་ཤིང་། ཕྱོགས་གཅིག་ཏུ་ཀ་མ་ལ་ཤཱི་ལ་བཞུགས་པ་དང་། ཕྱོགས་གཞན་ཞིག་ཏུ་རྒྱ་ཡི་མཁན་པོ་རྣམས་བཞུགས་ནས་བགྲོ་གླེང་བྱེད་སྐབས། ཀ་མ་ལ་ཤཱི་ལ་ཕྱོགས་ཀྱི་རིག་པའི་དཔྱད་གླེང་བྱེད་སྐབས་རྟགས་གསལ་ཟོལ་བྱས་ནས་བཏང་ཡོང་གི་ཡོད་པ་རེད། རྒྱ་རིགས་ཀྱི་དགེ་སློང་རྣམས་ཀྱིས་སྒོམ་བརྒྱབ་ནས་བཞུགས་པ་མ་གཏོགས། རྟགས་གསལ་སྐོར་སློབ་སྦྱོང་ཞེ་དྲགས་ཡོད་པ་མ་རེད། ཆོས་རྒྱལ་ཁྲི་སྲོང་ལྡེའུ་བཙན་གྱིས་ཀ་མ་ལ་ཤཱི་ལར་ཞིབ་ཚགས་པོའི་སྒོ་ནས་དཔྱད་པ་གཏོང་རྒྱུ་ཡོད་པ་ཡག་པོ་ཞེ་དྲགས་འདུག་ཅེས་གསུངས་ཡོད་པ་རེད། རྒྱ་ཡི་མཁན་པོ་ཚོས་སྒོམ་རྒྱག་རྒྱུ་མ་གཏོགས། རིག་པའི་དཔྱད་པ་གཏོང་རྒྱུ་དེ་ཙམ་མེད་པ་ཡིན་དུས། རྒྱ་ཡི་མཁན་པོ་ཚོ་རྒྱ་ནག་ཏུ་ལོག་ན་འགྲིག་གི་འདུག་གསུངས་པ་རེད། ང་ཚོས་ཁྱབ་དང་མ་ཁྱབ་ཅེས་རིག་པས་དཔྱད་པ་གཏང་ནས་འགྲོ་བ་དེ་ཞེ་བོ་ཕན་ཐོགས་པོ་རེད། དཔེར་ན་ངོས་རང་ལ་ཆ་བཞག་པ་ཡིན་ན། ཆུང་ཆུང་སྐབས་རྟགས་གསལ་གྱི་འགྲོ་སྟངས་བསླབས་ཡོད་པ་རེད། དེང་སང་ཚན་རིག་པ་རྣམས་དང་ཐུག་ནས་སྐད་ཆ་བཤད་དུས། ཆུང་ཆུང་སྐབས་བསྡུས་གྲྭ་བསླབས་ཡོད་པ་དེས་ཕན་ཐོགས་པོ་ཞེ་དྲགས་འདུག་ཅེས་བཀའ་སློབ་བསྩལ།
གསར་འགོད་པ། བྱམས་པ་ཚེ་རིང་།
