གཏན་འབེབ་བརྒྱད་དང་འགལ་བར་བསྙད་དེ་བོད་རིགས་མགོ་འཁྲིད་ཅིག་ལ་ཞིབ་བཤེར།

འདས་པའི་ཟླ་གཅིག་ཙམ་ནང་བོད་རིགས་མགོ་ཁྲིད་གཉིས་གཙོ་བོར་གྱུར་བའི་བོད་ཁུལ་གྱི་མཐོ་རིམ་མགོ་འཁྲིད་ལྔ་ཡས་མས་ལ་ཁྲིམས་འགལ་ཉེས་མིང་འོག་གནས་དབྱུང་བཏང་སྟེ་ཁྲིམས་བཤེར་བྱེད་ཀྱི་ཡོད་ལུགས་ཕྱིར་བསྒྲགས་བྱས་སོང་།

ཉེ་ཆར་མཚོ་སྔོན་ཞིང་ཆེན་མཚོ་ཤར་གྲོང་ཁྱེར་སྒྲིག་ཁྲིམས་བཤེར་ཁང་ཟེར་བས་གནས་ཚུལ་སྤེལ་བ་ལྟར་ན། མཚོ་སྔོན་ཞིང་ཆེན་མཚོ་ཤར་གྲོང་ཁྱེར་གྲོང་གསེབ་དར་སྤེལ་ཚན་པའི་མགོ་ཁྲིད་ཚེ་རིང་ཐར་ཞེས་པའི་བོད་མི་ཞིག་གིས། ཕུགས་བསམ་དང་དད་སེམས་ཉམས་པ་དང་། ཐོག་མའི་བསམ་འདུན་ལ་རྒྱབ་འགལ་བྱས་པ།  སྒྲིག་ཁྲིམས་དང་བཅའ་ཁྲིམས་ཀྱི་འདུ་ཤེས་སྤུ་ཙམ་ཡང་མེད་པ་པར་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ཟེར་བ་དང་འགལ་ཡོད་ལུགས་དང་། ཡུན་རིང་དུ་ལག་རྟགས་དང་སྐྱེས་དངུལ་བླངས་པ། སྤྱི་པའི་རྒྱུ་ནོར་ལྐོག་ཉར་བྱས་ལུགས་སོགས་བརྗོད་དེ། དམག་ཤོག་ཚོགས་པའི་ཁོངས་ནས་ཕྱིར་ཕུད་དང་། སྲིད་གཞུང་གི་གོ་གནས་ནས་གནས་དབྱུང་བཏང་སྟེ་ཞིབ་དཔྱོད་ཁང་ལ་རྩིས་སྤྲད་ཡོད་འདུག་ལ། སྒེར་གྱི་རྒྱུ་དངོས་གཞུང་གིས་འཕྲོག་ཡོད་འདུག

ཚེ་རིང་ཐར་གྱིས་དེ་སྔོན་མཚོ་སྔོན་འབའ་རྫོང་གི་ཁྲིམས་བཤེར་ལྟ་རྟོག་ཁང་གི་རྒྱུན་ལས་དང་། ཕིན་ཨིན་རྫོང་གི་འཆར་ལྡན་བུ་སྐྱེས་ཁང་གི་འགན་འཛིན། ཡ་རྫི་རྫོང་གི་རྫོང་དཔོན་གཞོན་པ། མཚོ་ཤར་གྲོང་ཁྱེར་འཐབ་ཕྱོགས་གཅིག་གྱུར་ཁང་གི་འགན་འཛིན་གཞོན་པ་དང་། མི་རིགས་ཆོས་ལུགས་ལས་དོན་གྱི་མགོ་ཁྲིད་གཞོན་པ་བཅས་བྱས་ཡོད་འདུག

ཡང་ཀན་སུའུ་ཞིང་ཆེན་ཆིན་ཡང་གྲོང་ཁྱེར་མི་མང་ཁྲིམས་ཁང་ཟེར་བས་གསལ་བསྒྲགས་བྱས་པ་ལྟར་ན། ཀན་སུའུ་ཞིང་ཆེན་མིན་རྫོང་གི་དམར་ཤོག་དྲུང་ཡིག་ཟུར་བ་ཀོ་ཧྲི་ཅེ་（郭世杰）ཟེར་བ་ཞིག་གིས་རྒྱ་སྐོར་ཁྲི་ ༩༠༠༠ ལྷག་ལྐོག་ཟ་བྱས་པའི་ནག་ཉེས་འོག་ཚེ་བཙོན་གྱི་ཁྲིམས་ཐག་བཅད་དེ། སྒེར་གྱི་རྒྱུ་དངོས་ཡོད་ཚད་གཞུང་གིས་འཕྲོག་ནས་མུ་མཐུད་ཁྲིམས་འདེད་བྱ་རྒྱུ་ཡིན་སྐོར་བསྒྲགས་འདུག

བོད་རང་སྐྱོང་ལྗོངས་ཆུ་བེད་ལས་ཁུངས་ཀྱི་མགོ་འཁྲིད་ཟླ་བ་བཀྲ་ཤིས་ཞེས་པ་ཞིག་གིས་སྒྲིག་འགལ་ཁྲིམས་འགལ་ཚབས་ཆེན་བྱས་པའི་དོགས་གཞི་ཡོད་ལུགས་བརྗོད་དེ་ཞིབ་བཤེར་བྱེད་བཞིན་ཡོད་འདུག དེ་བཞིན་བོད་རང་སྐྱོང་ལྗོངས་དམར་ཤོག་སྐོར་ཞིབ་ཚོགས་ཆུང་གི་ཐིང་རིམ་པ་གཞོན་པའི་སྐོར་ཞིབ་ཆེད་བསྐོས་པ་ཟུར་པ་ལུའོ་ཧུང་ཞེས་པ་ཞིག་གིས་ཀྱང་སྒྲིག་འགལ་ཁྲིམས་འགལ་ཚབས་ཆེན་བྱས་ཡོད་ལུགས་བརྗོད་དེ། དམར་ཤོག་ཚོགས་པའི་ཁོངས་ནས་ཕྱིར་ཕུད་དང་ལས་གནས་ནས་གནས་དབྱུང་བཏང་སྟེ་ཁྲིམས་བཤེར་བྱེད་བཞིན་ཡོད་ལུགས་བསྒྲགས་འདུག

གསར་འགོད་པ། བྱམས་པ་ཚེ་རིང་།