༧སྐྱབས་རྗེ་ཀིརྟི་སྐུ་ཕྲེང་དང་པོ་ནས་བཅུ་གཅིག་བར་གྱི་འཁྲུངས་གཞིས་མི་འདྲ་བའི་ངག་རྒྱུན་ལོ་རྒྱུས་གསལ་བའི་ཕྱག་དེབ་སྟོད་སྨད་གཉིས་ཅན་ཞིག་དབུ་འབྱེད་གནང་སོང་།
དེ་རིང་ཕྱི་ཟླ་ ༨ ཚེས་ ༧ ཉིན་གྱི་སྔ་དྲོའི་ཆུ་ཚོད་༩།༣༠ ཐོག་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ། ༸སྐྱབས་རྗེ་ཀིརྟི་སྐུ་ཕྲེང་བཅུ་གཅིག་གི་འཁྲུངས་གཞིས་གཟའ་རུ་རོང་འབྲོག་ཐུན་མོང་གི་བརྟན་བཞུགས་གོ་སྒྲིག་ཚོགས་ཆུང་ནས་འགྲེམས་སྤེལ་ཞུས་པའི་སྐུ་ཕྲེང་བཅུ་གཅིག་གི་འཁྲུངས་གཞིས་ཀྱི་ངག་རྒྱུན་ལོ་རྒྱུས་གཡས་འཁྱིལ་དུང་གི་སྒྲ་དབྱངས་ཞེས་པའི་སྟོད་སྨད་གཉིས་ཅན་གྱི་ཕྱག་དེབ་དབུ་འབྱེད་ཀྱི་མཛད་སྒོ་ཞིག་འཚོགས་སོང་། མཛད་སྒོའི་ཐོག་ཏུ་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་བཀའ་ཟུར་ཐུབ་བསྟན་ལུང་རིགས་ལགས་དང་། བཀའ་ཟུར་འཕགས་པ་ཚེ་རིང་ལགས། བཀའ་ཟུར་རིན་ཆེན་མཁའ་འགྲོ་ལགས། བོད་ཀྱི་དཔེ་མཛོད་ཁང་གི་དབུ་འཛིན་དགེ་བཤེས་ལྷག་རྡོར་ལགས་བཅས་ཀྱི་དབུས། བོད་མི་མང་སྤྱི་འཐུས་དང་ལྷན་ཁང་ཁག་ཅིག་གི་དྲུང་ཆེ་རྣམ་པ། དེ་བཞིན་རྩོམ་པ་པོ་དང་། ཉམས་ཞིབ་པ། དྷ་ས་ཁུལ་གྱི་དོན་གཉེར་ཅན་གྱི་སེར་སྐྱ་མི་མང་ཁག་ཅིག་བཅས་འཛོམས་འདུག
འདི་གའི་གསར་འགོད་པས་ཀིརྟིའི་བྱེས་པ་གྲྭ་ཚང་གི་རིག་གནས་སློབ་དཔོན་ཆེན་མོ་རེ་མདོ་སེང་གེ་ལགས་སུ་ཕྱག་དེབ་སྐོར་ལ་བཅར་འདྲི་ཞུས་པར་ཁོང་གིས། གནའ་སྔ་མོ་སྟོན་པའི་སྐབས་ཀྱི་དགྲ་བཅོམ་པ་ཉེ་བར་འཁོར་ནས་ད་ལྟའི་བར་དུ་འཁྲུངས་རབས་ ༥༥ བགྲངས་སྲོལ་གྱི་ལོ་རྒྱུས་ཤིག་ཡོད་པ་རེད། ང་ཚོའི་ལོ་རྒྱུས་དེ་དག་ངག་རྒྱུན་དུ་བཤད་པ་མིན་པར་འཁྲུངས་རབས་སུ་གསལ་བོ་རེད། ཐང་གའི་ཐོག་ནས་སྐུ་ཕྲེང་རིམ་བྱོན་བཞེངས་སྲོལ་ཡང་གནའ་སྔ་མོ་ནས་ཡོད་བསྡད་པ་ཞིག་རེད། ཐེངས་འདིའི་སྐུ་ཕྲེང་བཅུ་གཅིག་གི་འཁྲུངས་གཞིས་ཀྱི་ངག་རྒྱུན་ལོ་རྒྱུས་ནང་དུ། བླ་མ་སོ་སོའི་ལོ་རྒྱུས་གཅིག་པོ་མ་ཡིན་པར་བླ་མ་སོ་སོ་འཁྲུངས་སའི་སྤྱི་ཚོགས་ཀྱི་ཆབ་སྲིད་ལོ་རྒྱུས་དང་། ཆོས་ལུགས་ཀྱི་ལོ་རྒྱུས། སྤྱི་ཚོགས་ཀྱི་གནས་སྟངས། སྐབས་དེའི་མི་སོ་སོའི་འཚོ་བའི་གནས་སྟངས་དང་། དཔལ་འབྱོར་གྱི་གནས་སྟངས། སྤྱི་ཚོགས་ཡོངས་ཀྱི་སྒྲོམ་གཞི་ནས་བཟུང་ཞིབ་འཇུག་གཏིང་ཟབ་པོའི་ཐོག་ནས་བྲིས་ཡོད་པ་ཞིག་རེད། འདིའི་ནང་དུ་བླ་མའི་རྣམ་ཐར་ཕལ་བ་དང་། སྤྱི་ཚོགས་ཀྱི་རྒྱབ་ལྗོངས་ཀྱི་གནས་སྟངས་གཙོ་བོའི་ཚུལ་དུ་བྲིས་ཡོང་དུས། བོད་ཁམས་སྤྱི་ཡོངས་ཀྱི་ལོ་རྒྱུས་དང་། ལྷག་པར་དུ་མདོ་སྨད་ལྷོ་བྱང་རྒྱུད་ཀྱི་ལོ་ངོ་ ༦༠༠ ལྷག་རིང་གི་ལོ་རྒྱུས་དཔྱད་གཞིའི་རྒྱུ་ཆ་ཧ་ཅང་གནད་འགག་ཆེན་པོ་ཞིག་ཆགས་ཡོད་པ་རེད། དེ་ཡང་ང་ཚོའི་བསམ་ཚུལ་རྐྱང་པ་མ་ཡིན་པར་ལོ་རྒྱུས་ཕྱག་དེབ་འདི་བཀླག་པ་ཡིན་ན་གསལ་བོ་རེད། སྤྱིར་ང་ཚོར་ལོ་རྒྱུས་ཀྱི་ཕྱག་དེབ་མང་པོ་ཡོད་པའི་ནང་དུ། ལྷ་སྒྲུང་གི་ཟོལ་དང་ཆོས་ལུགས་ཁས་མི་ལེན་མཁན་གྱིས་བལྟས་པ་ཡིན་ན་ལམ་སང་ཁས་ལེན་མ་ཐུབ་དེ་འདྲ་ཡོང་གི་འདུག ཕྱག་དཔེ་འདི་ལྟ་བུར་མཚོན་པ་ཡིན་ན། ཞིབ་འཇུག་གི་རང་བཞིན་སྟེང་ནས་བྲིས་ཡོད་དུས། སྐུ་ཕྲེང་སོ་སོའི་འཁྲུངས་ཡུལ་གང་ཡིན་པ་དེའི་ཡུལ་ཁམས་ཡོངས་ཀྱི་ལོ་རྒྱུས། སྐུ་ཕྲེང་སོ་སོ་འཁྲུངས་སའི་ཁྱིམ་ཚང་དང་། གྲོང་པ་གང་ཡིན་པ་དེ་དང་དེ་འབྲེལ་གྱི་གནས་ཚུལ་ཧ་ཅང་ཞིབ་ཚགས་ཀྱིས་བྲིས་ཡོད་འདུག དེ་དག་ཀྱང་ཡིག་ཐོག་ཏུ་ཡོད་པ་དང་། རྣམ་ཐར་རྐྱང་པ་ཙམ་ལ་གཞི་བཅོལ་བ་མ་ཡིན་པར་ཡིག་ཐོག་ཏུ་མ་འཁོད་པའི་ས་གནས་དེ་གའི་མི་རྒན་པ་རྣམས་སུ་ངག་རྒྱུན་གྱི་ལོ་རྒྱུས་ཁུངས་ལྡན་རྩད་གཅོད་བྱས་པར་ཟུར་རྒྱན་གྱི་ཚུལ་དུ་བྱས་ཡོད་པས། དེབ་འདི་མ་འདྲ་བ་ཞིག་འདུག ལོ་རྒྱུས་ཞིབ་འཇུག་བྱེད་མཁན་ཞིག་ལ་མཚོན་པ་ཡིན་ནའང་ལོ་རྒྱུས་ཀྱི་རྒྱུ་ཆ་ཕུན་སུམ་ཚོགས་པ་ཞིག་ཆགས་འདུག་བསམ་གྱི་འདུག ཅེས་བརྗོད་བྱུང་།
ཕྱག་དེབ་པར་སྐྲུན་དང་འབྲེལ་བའི་སྐོར་ལ་ཁོང་གིས། སྤྱིར་དེབ་གཅིག་པར་སྐྲུན་བྱེད་པར་དེབ་འབྲི་མྱོང་མཁན་ཞིག་ཡིན་ན་དཀའ་ངལ་ག་ཚོད་ཡོད་པ་ཧ་གོ་ཡི་རེད། ཤོག་བུ་རེ་འབྲི་བར་ཡི་གེ་རེ་རེ་བྱས་ནས་ཀླད་པ་འགུལ་སྐྱོད་བྱས་པ་ཙམ་མིན་པར། དེའི་རྒྱབ་ལྗོངས་སུ་སྤྱི་ཚོགས་ལ་ཞིབ་འཇུག་བྱེད་པའི་བསམ་བློ་མང་པོ་གཏོང་དགོས། དེབ་འདི་པར་སྐྲུན་གྱི་བརྒྱུད་རིམ་དུའང་དཀའ་ལས་ཞེ་དྲགས་བརྒྱབ་ཡོད་པ་རེད། དེབ་འདི་ཡང་བོད་ནས་མི་ཁ་ཤས་ཀྱིས་འགན་འཁུར་ནས་ལོ་མང་པོའི་རིང་ཞིབ་འཇུག་གིས་རྩོམ་སྒྲིག་གནང་བར་དཀའ་ལས་བརྒྱབ་པ་ཞིག་རེད། ཡིན་ནའང་བོད་ནང་དུ་པར་སྐྲུན་བྱེད་པར་དཀའ་ངལ་འཕྲད་ཡོད་རྐྱེན། ཀིརྟི་སྐུ་ཕྲེང་བཅུ་གཅིག་པ་མཆོག་དགུང་ལོ་ ༨༢ ཕེབས་པའི་སྐུའི་འཁྲུངས་སྐར་དང་བསྟུན། རིན་པོ་ཆེ་མཆོག་གི་འཁྲུངས་ཡུལ་མདོ་སྨད་མཛོད་དགེ་གཟའ་རོང་འབྲོག་མི་མང་གིས་རྒྱབ་སྐྱོར་ལ་བརྟེན་ནས་པར་སྐྲུན་བྱེད་ཐུབ་པ་བྱུང་བ་རེད། བོད་ཀྱི་བླ་མ་དང་སྐྱེས་ཆེན་རྣམས་ཀྱི་འཁྲུངས་གཞིས་ཀྱི་ལོ་རྒྱུས་སོགས་འདི་ལྟ་བུ་ཞིག་འབྲི་བའི་ཕྱག་ལས་གནང་ཐུབ་ཚེ། བོད་ཁམས་སྤྱི་ཡོངས་ཀྱི་ལོ་རྒྱུས་ཀྱང་ཡིག་ཐོག་ཏུ་གསལ་བོ་ཆགས་ཐུབ་པ་ཞིག་རེད། དེ་ནི་ལོ་རྒྱུས་ཕྱག་དཔེ་འདིའི་ཁྱད་ཆོས་གཙོ་བོར་མཐོང་གི་འདུག་ཅེས་བརྗོད་བྱུང་།
མཛད་སྒོའི་ཐོག་བོད་ཀྱི་དཔེ་མཛོད་ཁང་གི་དབུ་འཛིན་དགེ་བཤེས་ལྷག་རྡོར་ལགས་ཀྱིས། ངག་རྒྱུན་ལོ་རྒྱུས་སྐོར་ནས་བཤད་ཡོང་དུས། བོད་པ་གཅིག་པོ་མིན་པར་འཛམ་གླིང་ས་ཕྱོགས་གང་སར་ཡི་གེ་མ་བྱུང་སྔོན་ལ་ངག་རྒྱུན་ལོ་རྒྱུས་རྐྱང་རེད། སངས་རྒྱས་བཅོམ་ལྡན་གྱི་རྣམ་ཐར་དང་། ཡི་ཤུ་མ་ཤི་ཀ་སོགས་ཀྱི་སྔོན་མའི་སྐྱེས་བུ་དམ་པ་རྣམས་ཀྱི་ལོ་རྒྱུས་དངོས་གནས་ཡིན་མིན་ཐད་རྩོད་པ་ཞེ་དྲགས་ཡོད་པ་རེད། དེའི་སྐབས་སུ་ཡི་གེ་མེད་པས་ཁུངས་སྐྱེལ་བྱེད་པར་རྙོག་དྲ་ཆེན་པོ་རེད། ཕྱི་ལོ་ ༡༩༤༠ ཙམ་ནས་བཟུང་ནུབ་ཕྱོགས་པའི་ནང་དུ་ངག་རྒྱུན་རྣམས་སྒྲ་འཇུག་བྱས་ཏེ་ཡིག་ཐོག་ཏུ་བཀོད་པ་རེད། དེ་དག་ལ་བསམ་བློ་བཏང་དུས་ང་ཚོ་སྐྱབས་བཅོལ་བ་ཡིན་ཡང་། ༧སྐུ་མདུན་གྱི་ཐུགས་རྗེ་བཀའ་དྲིན་ལ་བོད་ཀྱི་དཔེ་མཛོད་ཁང་བཙུགས་ནས་ལོ་ ༣༠ ལྷག་འགྲོ་བཞིན་འདུག ང་ཚོ་ཞེ་དྲགས་རྗེས་ལུས་ཐེབས་མི་འདུག ངའི་ཉམས་མྱོང་ཐོག་བཤད་ན་ངག་རྒྱུན་ལོ་རྒྱུས་ནང་དུ་མི་རབས་དེ་གའི་མྱོང་ཚོར་དང་། མཐོང་ཐོས་སོགས་ཕྱོགས་ཚང་མར་སྐད་ཆ་འདྲི་དགོས་ཀྱི་ཡོད་པ་རེད། ང་ཚོའི་ངག་རྒྱུན་ལོ་རྒྱུས་དེབ་ ༥༠ ཙམ་པར་སྐྲུན་བྱས་ཡོད་ཅིང་། དེ་དག་ཚང་མ་ལོ་རྒྱུས་ཤ་སྟག་ཆགས་ཀྱི་རེད་དམ་ཞེ་ན་དེ་དྲི་བ་རེད། ལོ་རྒྱུས་ཁུངས་ལྡན་ཆགས་དགོས་ན་ལོ་ཚིགས་དང་། ཚེས་གྲངས་སོགས་ཏག་ཏག་དགོས་པ་རེད་ཅེས་བརྗོད་སོང་།
དེ་བཞིན་བཀའ་ཟུར་ཐུབ་བསྟན་ལུང་རིགས་ལགས་ཀྱིས། ཀིརྟི་རིན་པོ་ཆེ་སྐུ་ཕྲེང་དང་པོ་ནི་རྗེ་ཙོང་ཁ་བ་རིན་པོ་ཆེའི་དངོས་སློབ་ཅིག་ཆགས་ཀྱི་འདུག་ཅིང་། སྐུ་ཕྲེང་དང་པོ་ནས་བཅུ་གཅིག་པོ་ཚང་མ་མདོ་སྨད་ཀྱི་ཡུལ་མ་འདྲ་བ་རེ་ནས་འཁྲུངས་བར་བཀའ་བཀོད་རྒྱུ་མཚན་ཆེན་པོ་ཡོད་པ་རེད་བསམ་གྱི་འདུག སྤྱིར་སྐྱེས་བུ་དམ་པ་རྣམས་ཀྱིས་བསམ་བཞིན་དུ་སྲིད་པ་བཟུང་བ་དང་། སྐུ་ཕྲེང་རྗེས་མ་རྣམས་ཀྱིས་སྐུ་ཕྲེང་གོང་མའི་མཛད་པའི་འཕྲོ་བསྐྱངས་བར་ཕེབས་ཀྱི་ཡོད་པའང་ཤེས་ཀྱི་འདུག མདོ་སྨད་ཁུལ་ལ་མཚོན་པ་ཡིན་ན་ཕལ་ཆེར་ཆོས་བརྒྱུད་གཞན་པ་རྣམས་སྔོན་ལ་དར་ཡོད་འདུག རྗེ་རིན་པོ་ཆེས་རི་བོ་དགེ་ལུགས་པའི་སྲོལ་བཏད་རྗེས་ཁོང་གི་དངོས་སློབ་རྣམས་ཀྱིས་དར་སྤེལ་མཛད། མདོ་སྨད་རྒྱལ་རོང་ཁུལ་དུ་ཀིརྟི་སྐུ་ཕྲེང་དང་པོ་དང་ངག་དབང་གྲགས་པ་གཉིས་ཀྱི་འཕྲིན་ལས་ལ་བརྟེན་ནས་རི་བོ་དགེ་ལུགས་པའི་བསྟན་པ་སྤེལ་ཡོད་ཅིང་། དེ་ནས་རིམ་བཞིན་མདོ་སྨད་ཁུལ་དུ་ཡོངས་ཁྱབ་ཏུ་དར་སྤེལ་བྱུང་བ་ཞིག་ཡིན་འདུག་ཅེས་བརྗོད་སོང་།
མཇུག་ཏུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ༧སྐྱབས་མགོན་ཀིརྟི་སྐུ་ཕྲེང་བཅུ་གཅིག་གི་འཁྲུངས་གཞིས་ཀྱི་ངག་རྒྱུན་ལོ་རྒྱུས་དེབ་ཕྲེང་གཉིས་ནང་དུ། དང་པོ་འཁྲུངས་གཞིས་དང་མཉམ་དུ་དེའི་ས་ཆའི་ཆགས་སྟངས་དང་། མིང་འདོགས་སྟངས། ལོ་རྒྱུས་ཀྱི་གནས་བབ་མང་པོ་ཞིག་བཀོད་འདུག དེ་བཞིན་རིན་པོ་ཆེའི་ཡབ་ཡུམ་གྱི་གདུང་རྒྱུད་ཆ་ཚང་རིམ་པ་བཞིན་བཀོད། དེ་ནས་རིན་པོ་ཆེའི་མཛད་རྣམ་སྙིང་བསྡུས་སུ་བཀོད་ཡོད་པ་དང་། རིན་པོ་ཆེའི་གདུང་རྒྱུད་ཀྱི་སྐུ་ཚ་སོགས་ཞིབ་ཚགས་ཀྱིས་བྲིས་འདུག ང་རང་ལ་ཕན་ཐོགས་པོ་ཞེ་དྲགས་བྱུང་། བྱུང་རབས་ལ་ལྟ་མཁན་ཞིག་དང་ཞིབ་འཇུག་པ་ཞིག་ཡིན་ཚེ་ཞིབ་ཚགས་ཀྱིས་བལྟ་དགོས་སའང་མང་པོ་འདུག རྩོམ་སྒྲིག་པ་ཚོ་ཡིན་ནའང་ད་དུང་ཞིབ་འཇུག་བྱེད་དགོས་པ་མང་པོ་ཞིག་འདུག ཕྱག་དེབ་འདི་གཉིས་རྩོམ་འབྲི་བྱེད་པར་དུས་ཚོད་མང་པོ་དགོས་པར་བསམ་གྱི་འདུག འདིའི་ནང་དུ་བཀོད་པའི་གདུང་རྒྱུད་ཚང་མ་བརྩད་གཅོད་བྱེད་དུ་འགྲོ་དགོས་དུས་ལས་སླ་བོ་ཡོད་པ་མ་རེད། ༧སྐྱབས་རྗེ་ཀིརྟི་རིན་པོ་ཆེ་སྐུ་ཕྲེང་བཅུ་གཅིག་གི་བྱུང་རབས་དང་འབྲེལ་བའི་གནས་ཚུལ་ཆ་ཚང་བཤད་ཡོང་དུས། སྐུ་ཕྲེང་རེ་ལ་འཁྲུངས་ཡུལ་དང་། འཁྲུངས་གཞིས། གདུང་རྒྱུད་མི་འདྲ་བ་ཡོད་པས། དེའི་ནང་དུ་སློབ་སྦྱོང་བྱ་རྒྱུ་ཡོད་པ་མང་པོ་མཐོང་སོང་། ལྷག་པར་དུ་བྱུང་རབས་ཀྱི་ཐོག་ནས་དེ་གནད་འགག་ཆེན་པོ་ཞིག་ཏུ་མཐོང་སོང་། སྤྱིར་བཏང་བླ་མའི་མཛད་པ་རྣམ་ཐར་མང་པོ་ཞིག་ཡོང་གི་ཡོད་པ་རེད་དེ། བྱུང་རབས་དང་འབྲེལ་ནས་གདུང་རྒྱུད་སོགས་བཤད་ཡོང་སྐབས། ད་ལྟའི་དུས་སུ་གནད་འགག་ཆེན་པོ་ཞིག་ཏུ་མཐོང་གི་འདུག མདོ་དབུས་ཁམས་གསུམ་གྱི་སྐྱེས་ཆེན་ཚོའི་རྣམ་ཐར་དེབ་འདི་བཞིན་ཏུ་རྩོམ་ཐུབ་པ་ཡིན་ན། བོད་ཀྱི་ཆོས་འབྱུང་དང་རྒྱལ་རབས་ཐམས་ཅད་ཀྱི་སྙིང་པོ་བསྡུས་ནས་ལོ་རྒྱུས་ཀྱི་གནས་སྟངས་མང་པོ་ཤེས་ཐུབ་པ་འདུག ཕར་བལྟས་པ་ཙམ་གྱིས་དེབ་འདི་གཉིས་པོ་ལས་སླ་མདོག་ཏུ་མཐོང་ཡང་། འདིའི་ནང་དུ་ལོ་མང་པོའི་རིང་དཀའ་ངལ་བརྒྱབ་པའི་གནད་འགག་མཐོང་ཡོང་གི་འདུག ཅེས་གསུངས་སོང་།
གསར་འགོད་པ། བྱམས་པ་ཚེ་རིང་།
