༧གོང་ས་རྒྱལ་བ་རིན་པོ་ཆེ་མཆོག་གིས་ཨ་རིའི་མངའ་སྡེ་ཧཱ་ཝེ་མི་མང་ལ་ཐུགས་གསོའི་གསུང་འཕྲིན་བསྩལ།
ཉེ་ལམ་ཨ་རིའི་ཧཱ་ཝའེ་མངའ་སྡེའི་ (Maui) མཚོ་གླིང་དུ་མེ་སྐྱོན་ཚབས་ཆེན་ཤོར་བའི་རྐྱེན་གྱིས་མི་མང་པོའི་ཚེ་སྲོག་ཤོར་བ་དང་། རྒྱུ་དངོས་སོགས་ལ་་གཏོར་སྐྱོན་ཐེབས་པར་བརྟེན། མངའ་སྡེ་དེའི་མི་མང་སྤྱི་དང་དམིགས་བསལ་གནོད་འཚེ་ཐེབས་པའི་ཤུལ་ལུས་ནང་མི་རྣམས་ལ། དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས་ཨ་རིའི་ཧཱ་ཝེ་མངའ་སྡེའི་སྲིད་སྐྱོང་རྗོ་ཤི་གྷི་རིན་ (Josh Green) ལགས་ཀྱི་མཚན་ཐོག་ཏུ་ཐུགས་གསོའི་གསུང་འཕྲིན་བསྩལ་འདུག
༧གོང་ས་རྒྱལ་བ་རིན་པོ་ཆེ་མཆོག་གིས་ཐུགས་གསོའི་གསུང་འཕྲིན་ནང་། ངོས་རང་ཨ་རིའི་ཧཱ་ཝེ་མངའ་སྡེ་དང་ (Maui) མཚོ་གླིང་དུ་ཐེངས་ཁ་ཤས་རིང་བསྐྱོད་པའི་བསྐལ་བ་བཟང་པོ་བྱུང་། ཧཱ་ཝེ་མི་མང་གིས་ངོས་ནས་འགྲོ་བ་མིའི་བཟང་སྤྱོད་གོང་སྤེལ་དང་། ཆོས་ལུགས་མཐུན་སྒྲིལ་གོང་སྤེལ་གཏོང་བར་དགའ་མོས་བྱེད་བཞིན་པར་རྗེས་སུ་ཡི་རངས་ཡོད། ད་དུང་ཧཱ་ཝེ་མི་མང་དང་འབྲེལ་ལམ་བྱེད་སྐབས། མི་མང་གིས་རང་གི་རྒྱུན་སྲོལ་གོམས་གཤིས་དང་ཤུལ་བཞག་རིག་གནས་ལ་དད་གུས་གཏིང་ཟབ་བྱེད་བཞིན་པར་སེམས་འགུལ་ཐེབས་བྱུང་། དེར་བརྟེན། ད་རབ་མེ་སྐྱོན་ཚབས་ཆེན་ཤོར་ཏེ་ལོ་རྒྱུས་ལྡན་པའི་རྒྱལ་ས་གཏོར་སྐྱོན་ཕྱིན་པ་ཤེས་རྟོགས་བྱུང་བར་དམིགས་བསལ་གྱིས་བློ་ཕམ་ཆེན་པོ་བྱུང་། ངོས་ནས་ཁྱེད་དང་ཧཱ་ཝེ་མི་མང་རྐྱེན་ངན་དེ་ལས་གཡོལ་ཐུབ་པའི་སྨོན་ལམ་འདེབས་ཀྱི་ཡིན།
གཏོར་སྐྱོན་ཕྱིན་པའི་ཁང་པ་དག་བཟོ་བཅོས་བྱེད་མི་ཐུབ་པ་ཞིག་ཡིན་སྲིད་དུས། ཧཱ་ཝེ་མངའ་སྡེ་དང་སྤྱི་མཐུན་སྲིད་གཞུང་། དེ་བཞིན་ཚོགས་སྡེ་ཁག་གཞན་གྱིས་རྐྱེན་ངན་འདིའི་ཁྲོད་ནས་གནོད་འཚེ་ཕོག་མཁན་གྱི་མི་རྣམས་ལ་རོགས་རམ་དང་རྒྱབ་སྐྱོར་བྱ་དགོས་ངེས་རེད། ཅེས་གསུངས་སོང་།
གསར་འགོད་པ། བསྟན་འཛིན་ཕུར་བུ།
