བོད་ཀྱི་ཟློས་གར་ཚོགས་པ་དབུ་བརྙེས་ནས་མི་ལོ་ ༦༤ འཁོར་བ་དང་བསྟུན་འདི་ལོའི་དབྱར་སྐྱིད་ཀྱི་གླུ་གཞས་སྒྱུ་རྩལ་འགྲན་བསྡུར་དེ་རྔོན་པ་རུ་ཁག་ལ་ཐོབ་སོང་།
དེ་རིང་ཉིན་རྒྱབ་ཆུ་ཚོད་ ༢ སྟེང་བོད་ཀྱི་ཟློར་གར་ཚོགས་ཁང་དུ། བོད་ཀྱི་ཟློས་གར་ཚོགས་པ་དབུ་བརྙེས་ཏེ་ལོ་ངོ་ ༦༤ འཁོར་བའི་དུས་དྲན་སྲུང་གཙི་དང་བསྟུན། ཟློས་གར་ཚོགས་པའི་རྔོན་པ་རུ་ཁག་དང་རྒྱ་ལུ་རུ་ཁག་དབར་དབྱར་སྐྱིད་ཀྱི་རྐང་བྲོ་གླུ་གཞས་དང་གཏམ་བརྗོད་ཀྱི་འགྲན་བསྡུར་ཁྲོད་ཁྱོན་བསྡོམས་ཀྱི་སྐར་གྲངས་ ༣༧༥ ལས་རུ་ཁག་གཅིག་ལ་སྐར་གྲངས་ ༣༠༡ དང་གཞན་དེར་སྐར་གྲངས་ ༢༨༧།༥༠ བཅས་ཆགས་ཏེ། ཕྱོགས་བསྡོམས་ཀྱི་རྒྱལ་ཁ་དེ་རྔོན་པ་རུ་ཁག་ལ་ཐོབ་སོང་།
དེ་རིང་གི་མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་དམིགས་བསལ་སྐུ་མགྲོན་དུ་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ (Shri Ajit Kumar) Nehria) མཆོག་དང་། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་བསྟན་འཛིན་ལུང་རྟོག་མཆོག་དང་བོད་མི་མང་སྤྱི་འཐུས་ཁག་ཅིག་དང་གཞུང་འབྲེལ་མིན་པའི་ཚོགས་པ་ཁག་གི་གནད་ཡོད་མི་སྣ་ཁག དེ་བཞིན། བོད་ཀྱི་ཟློས་གར་ཚོགས་པའི་ཚོགས་མི་ཟུར་བ་དང་འབྲེལ་ཡོད་རྣམ་པ་དང་གསར་འགོད་པ་བཅས་ཚང་འཛོམས་ཐོག ཟློས་གར་རིག་གཞུང་སྒྱུ་རྩལ་ཐོག་ཉམས་མྱོང་དང་ཆེད་མཁས་ཡིན་པའི་གཟུ་དཔང་བ་དགུའི་རྟོག་ཞིབ་འོག་མཛད་རིམ་དབུ་ཚུགས་སོང་།
སྐབས་དེར་བོད་ཀྱི་ཟློས་གར་ཚོགས་པའི་ཚོགས་གཙོ་དོན་གྲུབ་ཚེ་རིང་ལགས་ཀྱིས། བོད་ཀྱི་ཟློས་གར་ཚོགས་པ་དབུ་བརྙེས་ནས་མི་ལོ་ཧྲིལ་པོ་ ༦༤ འཁོར་བའི་བརྒྱུད་རིམ་ངོ་སྤྲོད་གནང་ཞིང་། ད་སྔ་བར་བོད་ཀྱི་ཟློས་ཚོགས་པས་འཛམ་གླིང་རྒྱལ་ཁབ་ ༣༧ ཙམ་གྱི་ནང་བོད་ཀྱི་ངོ་བོ་མཚོན་པའི་རིག་གཞུང་སྒྱུ་རྩལ་འཁྲབ་སྟོན་གཟིགས་འབུལ་ཞུས་པ་བརྒྱུད། དུས་ནས་དུས་སུ་བོད་ནང་གི་བོད་མིའི་གནས་སྟངས་རྒྱལ་སྤྱིའི་སྟེང་དྲན་སྐུལ་བྱས་ཡོད་པ་དང་། བཙན་བྱོལ་དུ་རྒྱ་གར་གཞུང་མང་གཉིས་ལ་བཀའ་དྲིན་རྗེས་དྲན་ཞུ་ཡི་ཡོད་སྐོར་སོགས་བརྗོད་སོང་།
སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བོད་ཀྱི་ཟློས་གར་ཚོགས་པ་དབུ་བརྙེས་ནས་ལོ་ངོ་ ༦༤ འཁོར་གྱི་ཡོད་པ་དང་སྟབས་བསྟུན། བོད་ཀྱི་ཟློས་གར་ཚོགས་པའི་དབུ་བརྙེས་པ་ནས་ད་བར་མཛད་འགན་བཞེས་མཁན་གྱི་ཟློས་གར་འགན་འཛིན་གཙོ་བྱས་པའི་དགེ་སློབ་ཡོངས་ལ་བཀའ་དྲིན་རྗེས་དྲན་ཞུ་རྒྱུ་གལ་ཆེན་ཡིན་སྐོར་དང་འབྲེལ། མ་འོངས་པར་བོད་ཀྱི་རིག་གཞུང་ལས་ཟློས་གར་སྒྱུ་རྩལ་སྲུང་སྐྱོབ་བྱེད་པའི་འགན་དེ་ཟློས་གར་ཚོགས་པར་ཡོད་པ་དང་། བོད་ཀྱི་ཟློས་གར་ཚོགས་པའི་ཚོགས་མི་ཟུར་བ་ཚོས་ག་དུས་ཡིན་ཡང་མ་འོངས་པར་ཟློས་གར་ཚོགས་པ་རྒྱུན་གནས་ཡོང་ཐབས་སུ་འགན་མཉམ་བཞེས་བྱས་པ་ཡིན་ན་ཐུགས་ཕན་གསོས་པ་དང་བོད་མིའི་སྒྲིག་འཛུགས་ངོས་ནས་ཟློས་གར་ཚོགས་པའི་ལས་དོན་ཅི་ཡོད་ཐོག་དུས་དང་རྣམ་པ་ཀུན་ཏུ་གང་ཡོང་ཅི་ཡོང་གནང་གི་ཡོད་སྐོར་དང་། ང་ཚོ་ལུས་པོའི་ཆ་ནས་རྒྱང་ཐག་རིང་དུ་འགྲོ་ཡི་ཡོད་ཀྱང་། སེམས་ནང་ནས་རང་ཉིད་བོད་པ་ཡིན་བསམ་པའི་ཀུན་སློང་གིས་བསླངས་ཏེ། ད་ལོ་གཅིག་པུར་ཆ་བཞག་ན་ཕྱི་རྒྱལ་ཡུལ་གྲུ་ཁག་ནས་བོད་མི་གཞོན་སྐྱེས་མང་པོ་ཞིག་དྷ་སར་ཕེབས་ནས་རང་རང་གི་སྐད་ཡིག་རིག་གཞུང་དང་བཅས་པར་དོ་སྣང་བྱས་པ་དང་། བོད་མིའི་སྒྲིག་འཛུགས་ངོས་ནས་བོད་ཀྱི་རྒྱལ་སྤྱིའི་གཞོན་སྐྱེས་ཚོགས་འདུ་ཚོགས་ཏེ། དོན་གྱི་སྙིང་བོར་ད་ལྟའི་བཀའ་ཤག་གིས་རེ་བ་བཟང་ས་ནས་རྒྱོབས། གྲ་སྒྲིག་སྡུག་ས་ནས་བྱོས་ཟེར་བ་ལྟར། ད་ལྟ་ང་ཚོའི་མི་རབས་ཀྱིས་འགན་འཁུར་གྱིན་ཡོད་པ་དང་དེའི་སྔོན་ལ་མི་རབས་རྒན་པ་མང་ཞིག་གིས་འགན་འཁུར་བཞེས་ནས། བོད་མི་རིགས་ད་ལྟ་གནས་ཐུབ་ཡོད་པ་དང་། དེའི་སྒང་དུ་༧གོང་ས་མཆོག་གི་ཐུགས་རྗེ་བྱིན་རླབས་དང་བོད་ནང་དུ་བཞུགས་པའི་བོད་མི་ཚོའི་ལྷག་བསམ་ཟོལ་མེད་དང་སྙིང་སྟོབས་ཞུམ་པ་མེད་པའི་རྗེས་འབྲས་ལ་བརྟེན་ནས་ད་ལྟ་ང་ཚོ་གནས་ཐུབ་པ་དང་། གྲ་སྒྲིག་སྡུག་ས་ནས་བྱོས་ཟེར་བ་བཞིན། ང་ཚོའི་ལས་འགན་གྱི་ནང་ནས་ལས་འགན་ཆེ་ཤོས་ཤིག་ནི་མ་འོངས་པའི་མི་རབས་གཞོན་པ་ཚོས་བོད་སྤྱི་པའི་རྩ་དོན་གྱི་འགན་འཁུར་ཐུབ་པའི་གྲ་སྒྲིག་བྱ་རྒྱུ་དེ་ཡིན་སྐོར་སོགས་གསུངས་སོང་།
དེ་རིང་དབྱར་སྐྱིད་ཀྱི་གཞས་སྣ་སྒྱུ་རྩལ་འཁྲབ་སྟོན་གྱི་གཟུ་དཔང་དུ། རྩོམ་པ་པོ་ལྡུམ་ར་བསོད་ནམས་ལགས། ས་ར་བོད་ཀྱི་གཙུག་ལག་རབ་འབྱམས་པའི་རྩོམ་རིག་དགེ་རྒན་ཆེན་མོ་རྡོ་རྗེ་ཚེ་རིང་ལགས། བོད་ཀྱི་ཟློས་གར་ཟུར་པ་ལས་བྱེད་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས། ཁ་རག་སྒྱུ་རྩལ་ཁང་གི་སྒྱུ་རྩལ་བ་ཁ་རག་སྤེན་པ་ལགས། དཔལ་རྫོང་སར་བཤད་གྲྭའི་མཐོ་སློབ་ཀྱི་རྩོམ་རིག་གཙུག་ལག་སློབ་དཔོན་ཆེན་མོ་སྤྲེལ་ནག་པ་བློ་གྲོས་དཔལ་བཟང་ལགས། སྐུ་བཅར་རྣམ་རྒྱལ་གྲྭ་ཚང་གི་ཤེས་ཡོན་ལྷན་ཚོགས་ཀྱི་འགན་འཛིན་དང་རྣམ་རྒྱལ་གྲྭ་ཚང་གི་སློབ་སྤྱི་ཐུབ་བསྟན་ཡར་འཕེལ་ལགས། བོད་ཀྱི་ཟློས་གར་ཚོགས་པའི་ཟློས་དགེ་ཟུར་པ་བསྟན་འཛིན་ཆོས་ཉིད་ལགས། ས་ར་མཐོ་སློབ་ཀྱི་ལོ་རྒྱུས་སློབ་དཔོན་ཆེན་མོ་གཙང་ཕྲུག་སྟོབས་ལགས། བཙན་བྱོལ་གྱི་(JJI)རོལ་ཚོགས་ཀྱི་བུ་རྒན་པ་འཇམ་དབྱངས་ལགས་བཅས་རེད་འདུག
གསར་འགོད་པ། སྐལ་བཟང་སྦྱིན་པ།
