ཨ་རིའི་ལོ་རྒྱུས་ནང་ལོ་ངོ་བརྒྱ་ལྷག་རིང་བྱུང་མྱོང་མེད་པའི་མེ་སྐྱོན་བྱུང་སྟེ་མི་རྒྱུ་གཉིས་ལ་གྱོང་གུད་ཚབས་ཆེན་ཐེབས་ཡོད་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། བདུན་ཕྲག་སྔོན་མའི་ནང་ཨ་རིའི་མངའ་སྡེ་ཧཱ་ཝེའི་མཱོ་འུ་(maui) གླིང་ཕྲན་གྱི་ནགས་ཚལ་ལ་མེ་སྐྱོན་ཚབས་ཆེན་ཤོར་བའི་དོན་རྐྱེན་དང་འབྲེལ། དེ་རིང་མཱོ་འུ་གླིང་ཕྲན་གྱི་ཛ་དྲག་མྱུར་སྐྱོབ་དོ་དམ་ཚན་ཁག་གི་སྤྱི་ཁྱབ་འགན་འཛིན་ཧཱར་མན་ཨན་ཌ་ཡ་ (Herman Andaya) ལགས་རང་ཉིད་ཀྱི་ལུས་ཁམས་བདེ་མིན་གྱི་རྒྱུ་མཚན་འོག་ལས་གནས་ནས་དགོངས་པ་ཞུས་ཡོད་པ་རེད།
མཱོ་འུ་གླིང་ཕྲན་མི་མང་གིས། གལ་སྲིད་ཛ་དྲག་མྱུར་སྐྱོབ་དོ་དམ་ཚན་ཁག་གིས་མྱུར་སྐྱོབ་ཀྱི་ལས་དོན་དམ་ཚགས་གནང་ཡོད་ཚེ། མི་སེར་མང་པོ་སྲོག་ཉེན་ལས་སྐྱོབ་ཐུབ་ཡོད་སྐོར་བརྗོད་ཡོད་པ་དང་། ཉེ་ལམ་མེ་སྐྱོན་དོན་རྐྱེན་དེའི་ཁྲོད་མི་མང་ ༡༡༡ རྐྱེན་འདས་དང་མི་གྲངས་ ༡༠༠༠ ལྷག་བོར་བརླག་ཏུ་ཕྱིན་ཏེ་ད་ལྟའང་རྙེད་སོན་བྱུང་མེད་པ་རེད།
མཱོ་འུ་གླིང་ཕྲན་ཛ་དྲག་མྱུར་སྐྱོབ་དོ་དམ་ཚན་ཁག་གི་སྤྱི་ཁྱབ་འགན་འཛིན་གྱིས་གོ་གནས་ནས་དགོངས་པ་ཞུ་དོན་ནི། ཉེ་སྔོན་མེ་སྐྱོན་དོན་རྐྱེན་བྱུང་སྐབས། ས་གནས་ཛ་དྲག་ལས་ཁུངས་ཀྱིས་ཉེན་བརྡ་མ་བཏང་བའི་གནད་དོན་ཐད་མང་ཚོགས་ཀྱིས་སྐྱོན་བརྗོད་ཤུགས་ཆེན་བྱེད་བཞིན་ཡོད་པ་ལ་བརྟེན་ནས་བྱུང་ཞིང་། མཱོ་འུ་གླིང་ཕྲན་ཁྱོན་ཡོངས་སུ་ཉེན་བརྡའི་གློག་དུང་ ༨༠ ཡོད་ཅིང་ནམ་རྒྱུན་ཟླ་རེའི་ཟླ་མགོར་ཚོད་ལྟ་བྱས་ཏེ། ཉེན་ཁ་བྱུང་སྐབས་ཉེན་བརྡ་གཏོང་བར་གྲ་སྒྲིག་བྱེད་མུས་ཡིན་ཡང་། མེ་སྐྱོན་བྱུང་བའི་ཉིན་དེར་ཉེན་བརྡའི་དུང་སྒྲ་བསྒྲགས་མེད་པ་དང་། སྤྱི་ཁྱབ་འགན་འཛིན་ཧཱར་མན་ཨན་ཌ་ཡ་ཡིས། ཉིན་དེར་མེ་སྐྱོན་ཤོར་བའི་ཁར་རླུང་འཚུབ་ཧ་ཅང་ཆེ་བས། གལ་ཏེ་དུང་བརྡ་གྲགས་བཅུག་པ་ཡིན་ན་མི་མང་པོ་ཞིག་རི་སྒང་དུ་བྲོས་སྲིད་པས། མི་མང་གི་སྲོག་ལ་ཉེན་ཁ་དེ་ལས་ཆེ་བ་འབྱུང་སྲིད་སྟབས། ཉིན་དེར་ཉེན་བརྡ་བཏང་མེད་པའི་གསལ་བཤད་བྱས་ཡོད་པ་རེད།
ཡང་མཱོ་འུ་རྫོང་གླིང་ཕྲན་གྱི་(Lahaina) གྲོང་ཚོ་ནས་ཡིན་པའི་ཨ་རིའི་གྲོས་ཚོགས་འཐུས་མི་སྐུ་ཞབས་གྷ་སི་མག་ཀལ་ཝེ་ (ngus McKelvey) ལགས་དང་ཧཱ་ཝེའི་གྲོས་ཚོགས་འཐུས་མི་སྐུ་ཞབས་ (Mazie Hirono) ལགས་གཉིས་ནས། ཛ་དྲག་མྱུར་སྐྱོབ་རུ་ཁག་གི་འགན་འཛིན་ཧཱར་མན་ཨན་ཌ་ཡ་ལ་སྐྱོན་བརྗོད་བྱས་ཏེ། མང་ཚོགས་ཀྱིས་ཉེན་བརྡའི་དུང་སྒྲ་ཐོས་པ་ཙམ་གྱི་འགྲིག་གི་ཡོད་པ་དང་། མི་མང་ལ་མེ་སྐྱོན་ལས་གཡོལ་ཐབས་ཀྱི་རྣམ་རིག་ཡོད་པ་བཤད་མི་དགོས་པས། ཧཱར་མན་ཨན་ཌ་ཡ་ཡིས་མི་མང་ལ་མཐོང་ཆུང་བྱས་ཡོད་སྐོར་སོགས་བརྗོད་ཡོད་པ་རེད།
ད་ལན་ཧཱ་ཝེ་ནང་མེ་སྐྱོན་དོན་རྐྱེན་བྱུང་བ་དེ་ནི་ཨ་རིའི་ལོ་ངོ་བརྒྱ་ལྷག་གི་ལོ་རྒྱུས་ནང་བྱུང་མྱོང་མེད་པའི་མེ་སྐྱོན་ཚབས་ཆེ་ཤོས་ཤིག་ལ་ངོས་འཛིན་བྱེད་བཞིན་འདུག་ལ། ཟླ་འདིའི་ཕྱི་ཚེས་ ༨ ཉིན་ནས་ཉེ་བའི་བདུན་གཅིག་ཙམ་རིང་མེ་སྐྱོན་བྱུང་ཡོད་པ་དང་། མེ་སྐྱོན་ཁྲོད་ཁང་པ་ ༢༠༠༠ ལྷག་མེས་འཚིག་ཡོད་པ་སོགས་མི་རྒྱུ་གཉིས་ལ་གྱོང་གུད་ཚབས་ཆེན་ཐེབས་ཡོད་པ་རེད།
