རྒྱ་གར་གྱི་རྒྱལ་ས་ལྡི་ལི་རུ་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་དྲུག་པའི་ཐོག་བོད་ཡུ་སོག་གསུམ་གྱིས་མཉམ་འབྲེལ་གྱི་བསྒྲགས་གཏམ་གྲོས་ཆོད་དོན་ཚན་ ༡༣ ཅན་ཞིག་གཏན་འབེབས་བྱས་འདུག
ཟླ་འདིའི་ཕྱི་ཚེས་ ༡༦ ནས་ ༡༩ བར་ཉིན་གྲངས་བཞིའི་རིང་། རྒྱ་གར་གྱི་རྒྱལ་ས་ལྡི་ལི་གསར་པའི་རྒྱལ་སྤྱིའི་ཚོགས་འདུ་བསྟི་གནས་ཁང་དུ། རྒྱལ་སྤྱིའི་བོད་རང་བཙན་ཚོགས་ཆེན་ཐེངས་དྲུག་པ་བསྐོང་འཚོག་བཞིན་ཡོད་པ་དང་། ཚོགས་ཆེན་ཐོག་ད་ལྟ་རྒྱ་ནག་གི་བཙན་ཤེད་དབང་སྒྱུར་འོག་ཚུད་པའི་བོད་དང་། ཡུ་གུར། ལྷོ་སོག་གསུམ་གྱི་འཐུས་མི་ལྷན་འཛོམས་ཐོག མི་རིགས་སོ་སོའི་གནས་བབ་དང་འཐབ་རྩོད་ཀྱི་ཁ་ཕྱོགས། མ་འོངས་པར་བཙན་འཛུལ་འོག་གི་མི་རིགས་གསུམ་གྱིས་དགྲ་བོ་རྒྱ་དམར་ལ་གདོང་ལེན་དང་རང་བཙན་གྱི་རྒྱལ་ཁབ་སླར་གསོ་བྱ་རྒྱུར་གོམ་སྟབས་མདུན་སྤོ་བྱེད་ཐབས་ཅི་ཡོད་སྐོར་ལ་གྲོས་བསྡུར་དང་ལས་འཆར་བསྒྲིགས་ཏེ་མཉམ་འབྲེལ་གྱི་བསྒྲགས་གཏམ་ཞིག་སྤེལ་འདུག
ཁ་སང་ཕྱི་ཚེས་ ༡༧ ཉིན་བོད་ཡུ་སོག་གསུམ་གྱི་མཉམ་འབྲེལ་གྱི་གྲོས་ཆོད་དོན་ཚན་ ༡༣ གཏན་འབེབས་བྱས་པའི་དོན་ཚན་དང་པོ། རྒྱ་གཞུང་གི་བཙན་གནོན་འོག་ཡོད་པའི་མི་རིགས་རྣམས་ནས་མནའ་འབྲེལ་མཐུན་ཚོགས་ཤིག་གསར་འཛུགས་བྱེད་ཐུབ་པར་འབད་བརྩོན་བྱ་རྒྱུ་དང་། གཉིས་པ། བོད་ཡུ་སོག་གསུམ་མཉམ་འབྲེལ་ཐོག་དུས་ལྟར་རྒྱལ་སྤྱིའི་རང་བཞིན་གྱི་རང་བཙན་ཚོགས་ཆེན་ཞིག་འཚོགས་ཐུབ་པར་འབད་བརྩོན་ཞུ་རྒྱུ། གསུམ། ཐུན་མོང་གི་དྲ་རྒྱ་བེད་སྤྱོད་གཏོང་སའི་སྡིངས་ཆ་བསྐྲུན་ཐབས་བྱ་རྒྱུ། བཞི། ཚང་མས་མཉམ་རུབ་ཐོག་ལས་འགུལ་སྤེལ་བ་དང་རྒྱབ་སྐྱོར་བྱ་རྒྱུ། ལྔ། རྒྱལ་སྤྱིའི་སྤྱི་ཚོགས་ཐོག་ཞུ་གཏུགས་ལས་འགུལ་སྤེལ་སྐབས། རྒྱ་ནག་གི་བཙན་གནོན་འོག་ཡོད་པའི་མི་རིགས་ཕན་ཚུན་གྱི་གནས་སྟངས་གླེང་སློང་བྱ་རྒྱུ། དྲུག བོད་ཡུ་སོག་གསུམ་གྱི་གཞོན་སྐྱེས་ནང་ཁུལ་འབྲེལ་ལམ་གོང་མཐོར་གཏོང་ཐབས་བྱ་རྒྱུ། བདུན། ལོ་རྒྱུས་ཐོག་རང་བཙན་ཅན་གྱི་རྒྱལ་ཁབ་ཡིན་པ་ངོས་འཛིན་གྱི་ཡོངས་ཁྱབ་བསྒྲགས་གཏམ་སྤེལ་རྒྱུ། བརྒྱད། རྒྱ་གཞུང་གི་ཆབ་སྲིད་ཀྱི་དུས་ཆེན་ཁག་ཏུ་མཉམ་འབྲེལ་ཐོག་ངོ་རྒོལ་གྱི་ལས་འགུལ་སྤེལ་རྒྱུ། དགུ། རྒྱ་མིས་བཟོས་པའི་དངོས་ཡོད་ལོ་རྒྱུས་དང་མི་མཐུན་པའི་ས་ཁྲ་དང་། ས་མིང་། ཆུ་མིང་། རུས་མིང་སོགས་ལ་ངོས་ལེན་མི་བྱེད་པར། སོ་སོའི་རང་བཞིན་གང་ཡིན་པ་དེ་རང་འཇགས་བེད་སྤྱོད་གཏོང་རྒྱུ་དང་། ས་ཆའི་བདག་དབང་སྐོར་གྱི་དྲིལ་བསྒྲགས་ལོག་པ་ལ་ངོས་ལེན་མི་བྱ་རྒྱུ། བཅུ། སོ་སོའི་མི་རིགས་ཀྱི་མ་འོངས་མདུན་ལམ་ལ་རང་བཙན་ཁོ་ན་ལས་གཞན་རྒྱ་ནག་གི་བསླུ་བྲིད་འོག་མི་ཚུད་པ་བྱ་རྒྱུ་ནི་བདག་དབང་རྩོད་ལེན་བྱེད་པའི་མ་རྩ་ཡིན་པ་ངེས་ཤེས་དགོས་པའི་དྲན་སྐུལ་བྱ་རྒྱུ། བཅུ་གཅིག རྒྱལ་སྤྱིའི་ཐོག་བོད་ཡུ་སོག་གསུམ་གྱི་གནད་དོན་ཞུ་གཏུག་དང་གླེང་སློང་བྱེད་སྐབས། རྒྱ་ནག་གི་བཙན་གནོན་འོག་ཡོད་པའི་རྒྱལ་ཁབ་གསུམ་ལ་རང་བཙན་མེད་པའི་དཀའ་ངལ་ཡོད་པ་གསལ་སྟོན་བྱ་དགོས་རྒྱུ། བཅུ་གཉིས། སྟོབས་ཆེན་རྒྱལ་ཁབ་ཉི་ཤུའི་ཚོགས་ཆེན་ (G20) རྒྱ་གར་དུ་འཚོག་འཆར་ཡོད་པ་ལྟར། སྐབས་དེར་བོད་ཡུ་སོག་གསུམ་ནས་མཉམ་འབྲེལ་གྱིས་ངོ་རྒོལ་གྱི་ལས་འགུལ་སྤེལ་བར་ཤུགས་སྣོན་རྒྱག་རྒྱུ། བཅུ་གསུམ། ཚོགས་ཆེན་འདི་བརྒྱུད་ནས་བོད་མིའི་སྒྲིག་འཛུགས་ལ་བོད་རྒྱའི་དཀའ་རྙོག་སེལ་སླད་རྒྱ་ནག་གཞུང་ལ་བཟང་ཕྱོགས་ཀྱི་རེ་བ་རྒྱག་ས་མེད་པ་དང་། བོད་ཀྱི་བདེན་མཐའ་གསལ་ཆེད་རང་བཙན་གྱི་ལམ་བུར་སྐྱོད་དགོས་པའི་འབོད་སྐུལ་ཞུ་རྒྱུ་བཅས་ཡིན་འདུག
ཡང་བསྒྲགས་གཏམ་དེའི་ནང་། དེ་རིང་རྒྱ་གར་གྱི་རྒྱལ་ས་ལྡི་ལི་རུ་རྒྱ་གར་རང་བཙན་ཐོབ་ནས་ལོ་ངོ་ ༧༧ འཁོར་བའི་དུས་ཆེན་དང་སྟབས་བསྟུན་ནས། བོད་དང་ཡུ་གུར། ལྷོ་སོག་གསུམ་གྱི་འཐུས་མི་ཁག་ཅིག་ལྷན་འཛོམས་ཐོག ང་ཚོ་ཐུན་མོང་གི་དགྲ་བོ་བཙན་འཛུལ་བ་རྒྱ་དམར་གཞུང་གི་དབང་སྒྱུར་ལས་རང་དབང་རང་བཙན་གྱི་རྒྱལ་ཁབ་སླར་གསོའི་ཆེད། བོད་ཡུ་སོག་གསུམ་ནས་གནའ་མཐུན་གྱི་རྒྱལ་ཁབ་ཏུ་གཟི་བརྗིད་དང་སྤོབས་པའི་དར་ཆ་ས་ཆེན་འདིར་བསྒྲེང་རྒྱུའི་ཆོད་སེམས་བརྟན་པོ་བཅངས་ཡོད་སྐོར་བརྗོད་འདུག་ལ། དེ་རིང་གི་ཚོགས་ཐོག་ཏུ་བོད་ཡུ་སོག་གསུམ་གྱི་རང་བཙན་འཐབ་རྩོད་པ་རྣམས་འཛོམས་ཏེ། རྒྱ་ནག་གཞུང་གིས་བོད་ཡུ་སོག་གསུམ་ལ་བཙན་འཛུལ་དབང་སྒྱུར་བྱས་པ་དེར་མཐའ་གཅིག་ཏུ་ངོ་རྒོལ་དང་། མི་མང་དམར་གསོད། དེ་བཞིན་ཆོས་རིག་གོམས་སྲོལ་རྩ་བརླག་གཏོང་ཐབས་དང་། མི་རིགས་རྩ་མེད་ཀྱི་བཙན་རྒྱལ་རིང་ལུགས་པའི་སྲིད་ཇུས་ལག་བསྟར་བྱས་དང་བྱེད་མུས་ཡིན་པར་རྒོལ་གཏམ་དྲག་པོ་གཏོང་གི་ཡོད་སྐོར་དང་། བོད་ཡུ་སོག་གསུམ་གྱི་འཐུས་མི་ལྷན་འཛོམས་ཐོག འཛམ་གླིང་འདིར་དྲང་བདེན་དང་རང་དབང་། འདྲ་མཉམ་གཙིགས་སུ་འཛིན་པའི་སྲིད་གཞུང་དང་རྒྱལ་སྤྱིའི་ཚོགས་སྡེ་ཁག མི་མང་ཡོངས་ཀྱིས་རྒྱ་དམར་གཞུང་འདི་དུས་རབས་ཉེར་གཅིག་པའི་བཙན་འཛུལ་རིང་ལུགས་པར་ངོས་འཛིན་བྱ་དགོས་པའི་སྐུལ་འདེད་དང་། བོད་ཡུ་སོག་གསུམ་བཙན་ཤེད་ཀྱིས་དབང་སྒྱུར་བྱས་པ་དེ་ནི་མིའི་རིགས་ཀྱི་ལོ་རྒྱུས་ཀྱི་ནག་ཉེས་ཤིག་དང་། ང་ཚོར་རང་དབང་རང་བཙན་གྱི་རྒྱལ་ཁབ་སླར་གསོའི་དགོས་འདུན་ལ་བརྩི་བཀུར་དང་ངོས་འཛིན་ཡོང་བའི་རེ་སྐུལ་ཞུ་བཞིན་ཡོད་སྐོར་བརྗོད་འདུག
གསར་འགོད་པ། བསྟན་འཛིན་ཕུར་བུ།
