བོད་ཕྲུག་ཕ་མ་ཁ་བྲལ་གཏོང་མཁན་རྒྱའི་དཔོན་རིགས་ཁག་ཅིག་ལ་ཉེས་ཆད་གཏང་རྒྱུ་ཡིན་འདུག

ཨ་རིས་བོད་ཀྱི་བྱིས་པ་ས་ཡ་གཅིག་ལྷག་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་བསྒྱུར་སྲིད་ཇུས་ལག་བསྟར་བྱེད་མཁན་རྒྱ་རིགས་དཔོན་པོ་ཚོར་ཉེས་ཆད་གཅོད་ཀྱི་ཡོད་འདུག

ཁ་སང་ཨ་རིའི་ཕྱི་སྲིད་ལྷན་ཁང་གི་དྲ་ཐོག་ཏུ་སྤེལ་བའི་གནས་ཚུལ་ལྟར་ན། ཨ་རིའི་ཕྱི་སྲིད་ལྷན་ཁང་གིས། རྒྱ་ནག་གཞུང་གིས་བོད་ཀྱི་བྱིས་པ་ས་ཡ་གཅིག་ལྷག་རྒྱའི་བཅའ་སྡོད་སློབ་གྲྭར་བཙན་གྱིས་བཅུག་སྟེ། བོད་པའི་བྱིས་པ་རྣམས་བོད་ཀྱི་སྐད་ཡིག་དང་རིག་གཞུང་། ཆོས་ལུགས་སྲོལ་རྒྱུན་སོགས་ལས་ཁ་བྲལ་དུ་གཏོང་ཐབས་ཀྱི་སྲིད་ཇུས་ལག་བསྟར་བྱེད་བཞིན་ཡོད་སྟབས། ཨ་རིས་དེ་འབྲེལ་བཅའ་སྡོད་སློབ་གྲྭའི་སྲིད་ཇུས་ལག་བསྟར་བྱེད་མཁན་གྱི་རྒྱའི་དཔོན་རིགས་ལ་ཉེས་ཆད་གཅོད་རྒྱུ་ཡིན་སྐོར་བསྒྲགས་འདུག

ཨ་རིའི་ཕྱི་སྲིད་བློན་ཆེན་ཨན་ཐོ་ནེ་བྷི་ལིག་ལགས་ཀྱིས།  རྒྱ་ནག་གི་དཔོན་རིགས་ཚོས། བོད་ཀྱི་བྱིས་པ་ཚོ་རྒྱའི་བཅའ་སྡོད་སློབ་གྲྭར་བཅུག་སྟེ་བོད་མིར་རྒྱ་བསྒྱུར་གྱི་སྲིད་ཇུས་སྤེལ་མཚམས་འཇོག་དགོས་པའི་ནན་སྐུལ་བྱེད་ཀྱི་ཡོད། རྒྱ་ནག་གི་ས་ཁུལ་གཞན་གྱི་ནང་དུའང་རྒྱ་བསྒྱུར་གྱི་སྲིད་ཇུས་སྤེལ་མཚམས་འཇོག་དགོས། ང་ཚོས་མུ་མཐུད་མཐུན་ཕྱོགས་དང་མཉམ་འབྲེལ་རྒྱལ་ཁབ་ཁག་དང་ལྷན་དུ་གནད་དོན་འདི་དག་ཁ་གསལ་བཟོས་ཏེ་འགན་འཁྲིའི་འདུ་ཤེས་གོང་འཕེལ་གཏོང་རྒྱུ་ཡིན། ཞེས་བརྗོད་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། རྒྱལ་སྤྱིའི་བོད་དོན་ལས་འགུལ་ཁང་དང་བོད་དོན་ལས་འགུལ་བསྟི་གནས་ཁང་སོགས་ཀྱིས་ཨ་རིའི་སྲིད་ཇུས་ལངས་ཕྱོགས་དེར་དགའ་བསུ་དང་སྦྲགས། རྒྱ་ནག་གཞུང་གིས་བོད་ཀྱི་བྱིས་པ་རྣམས་རང་ཉིད་ཀྱི་ཁྱིམ་དང་ཁ་བྲལ་དུ་བཅུག་པའི་གནད་དོན་དེ་ཕྱི་གསལ་ནང་གསལ་ངེས་པར་དུ་བཟོ་དགོས་སྐོར་སོགས་བརྗོད་འདུག

ཨ་རིས་རྒྱ་ནག་ལ་འགྲོ་བ་མིའི་ཐོབ་ཐང་རྡོག་རོལ་བཏང་བའི་གནད་དོན་དང་འབྲེལ་ནས། གཞུང་འབྲེལ་སྲིད་ཇུས་གང་མང་ཞིག་སྤེལ་དང་སྤེལ་མུས་ཡིན་ཞིང་། ཕྱི་ལོ་ ༢༠༢༡ ལོར་ཨ་རིས་རྒྱ་ནག་གཞུང་གིས་ཤར་ཊུ་ཀི་སི་ཐན་ནམ་ཡུ་གུར་མི་རིགས་རྩ་གཏོར་གྱི་སྲིད་ཇུས་ལག་བསྟར་བྱེད་བཞིན་པའི་སྐྱོན་བརྗོད་བྱས་ཡོད་པ་དང་།  ཐེངས་འདིར་བོད་ཀྱི་བྱིས་པའི་གནད་དོན་དང་འབྲེལ། ཨ་རིས་རྒྱ་ནག་གི་ལས་བྱེད་སུ་དང་སུར་ཉེས་ཆད་གཅོད་རྒྱུ་ཡིན་མིན་ཁྲིམས་ལུགས་ཀྱི་བཀག་རྒྱའི་གནས་སྟངས་འོག་ཁ་གསལ་བཟོས་མེད་ཀྱང་། རྒྱ་ནག་གི་ལས་བྱེད་པའི་ཐོངས་མཆན་བཀག་འགོག་བྱ་རྒྱུའི་མཚོན་པའི་ཉེས་ཆད་གཏང་རྒྱུ་ཡིན་པ་རེད།

འདས་ལོའི་ཕྱི་ཟླ་ ༡༢ ནང་རྒྱ་ནག་དམར་ཤོག་ཚོགས་པའི་དཔོན་རིགས་ཏེ། བོད་རང་སྐྱོིང་ལྗོངས་ཟེར་བའི་དམར་ཤོག་དྲུང་ཆེ་ཟུར་བ་ཝུ་ཡེན་ཅེ་(Wu Yingjie) དང་ཉེན་རྟོག་སྤྱི་ཁྱབ་ཟུར་པ་ཀྲང་ཧོང་པའོ་(Zhang Hongbo) ཟེར་བ་གཉིས་ཀྱིས། བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་བའི་ནག་ཉེས་འོག ཁོ་གཉིས་ཀྱི་ཨ་རིར་ཡོད་པའི་རྒྱུ་དངོས་ཡོངས་རྫོགས་བཀག་སྡོམ་བྱས་ཏེ་ཉེས་ཆད་བཏང་ཡོད་པ་རེད།

རྒྱ་ནག་གཞུང་གིས་ད་སྔ་བར་བོད་པའི་བྱིས་པ་ལོ་ན་ ༤ ནས་ ༦ བར་གྱི་བྱིས་པ་འབུམ་གཅིག་ལྷག་དང་ལོ་ན་ ༦ ནས་ ༡༨ བར་གྱི་བྱིས་པ་འབུམ་ ༩ ཙམ་བཙན་གྱིས་ཕ་མ་ཁ་བྲལ་དུ་བཏང་སྟེ། རྒྱ་ནག་གིས་བསྐྲུན་པའི་སྔོན་འགྲོ་དང་འབྲིང་རིམ་བཅའ་སྡོད་སློབ་གྲྭར་བཅུག་སྟེ། རྒྱ་སྐད་རྒྱ་ཡིག་ཁོ་ནས་སློབ་འཁྲིད་བྱེད་བཞིན་ཡོད་པ་མ་ཟད།  ཉིན་རེའི་བྱིས་པའི་བྱེད་སྒོ་ཡོངས་ལ་རྒྱའི་ཤུགས་རྐྱེན་ཐེབས་སུ་བཅུག་གི་ཡོད་པའི་ཁར། ཐ་ན་ཟས་རིགས་ཡིན་ཕྱིར་རྒྱ་ཟས་སྤྲད་དེ། བྱིས་པ་རྣམས་བོད་པའི་སྲོལ་རྒྱུན་གྱི་ཟ་མ་རྩམ་མར་སོགས་ལ་དགའ་བོ་མེད་མཁན་ཞིག་ཏུ་བསྒྱུར་ཐབས་བྱེད་ཀྱིན་ཡོད་འདུག