བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ནས་བཙན་བྱོལ་བོད་མིའི་གཞིས་ཆགས་ཁག་གཅིག་ཀྱང་མ་ལྷག་པར་ཚང་མའི་ནང་གཟིགས་སྐོར་གནང་རྒྱུ་ཡིན་པའི་ཁས་ལེན་གནང་བ་ལྟར་གནངས་ཉིན་ནས་གཟིགས་སྐོར་ཡོངས་སུ་འགྲུབ་ཀྱི་འདུག
ཁ་སང་ཕྱི་ཚེས་ ༤ ཉིན་ནས་བཟུང་ཉིན་གྲངས་ ༤ རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བཞུགས་སྒར་དྷ་རམ་ས་ལ་ཉེ་ཁུལ་དུ་གཟིགས་སྐོར་གནང་བཞིན་ཡོད་པ་ལྟར། དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གངས་སྐྱིད་དཔེ་སྟོན་སློབ་གྲྭ་དང་། དྷ་ཤོད་བོད་ཁྱིམ་སློབ་གྲྭ། དེ་བཞིན་ཤེས་རབ་དགའ་ཚལ་གླིང་དང་མེས་དབོན་གཙུག་ལག་དཔེ་སྟོན་སློབ་གྲྭ། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་། སྒྲོལ་མ་གླིང་དང་། འཆི་མེད་དགའ་ཚལ་གླིང་། ཇོ་ནང་དགོན་པ། སྙིང་སྟོབས་གླིང་སོགས་སུ་རིམ་གྱིས་གཟིགས་སྐོར་གནང་གི་འདུག
དེ་རིང་སྔ་དྲོར་དྷ་ཤོད་བོད་ཁྱིམ་སློབ་གྲྭར་སྲིད་སྐྱོང་སྤེན་པ་ཚེ་རིང་མཆོག་གིས། ཁྱེད་རང་ཚོ་མང་ཆེ་བ་བྱང་ཤར་ཁུལ་ནས་རེད་འདུག ཁྱེད་ཚོ་སློབ་སྦྱོང་བྱ་ཆེད་དུ་ཐག་རིང་པོ་ནས་ཡོང་བ་རེད། དེར་བརྟེན། ཁྱེད་ཚོས་སློབ་སྦྱོང་ལ་ཧུར་ཐག་བྱ་དགོས་པ་དང་སྤྱོད་པའང་ཡག་པོ་དགོས་ཀྱི་ཡོད་རེད། སློབ་སྦྱོང་དང་སྤྱོད་པ་གཉིས་ཀ་ཡག་པོ་ཡོད་ན་མི་ལ་ཕན་ཐོགས་མང་བ་ཡོང་གི་རེད། ད་ལྟ་བོད་ཕྲུག་ཁྱིམ་སྡེའི་སྲིད་ཇུས་ལ་འགྱུར་བ་ཕྱིན་མེད་ན། དྷ་ཤོད་སློབ་གྲྭ་དེ་མ་འོངས་པར་ཕྱི་རྒྱལ་ལ་ཡོད་མཁན་གྱི་ཕྲུ་གུ་རྣམས་ཀྱིས་རྒྱ་གར་དུ་སློབ་སྦྱོང་བྱ་སའི་སློབ་གྲྭ་ཞིག་བཟོ་རྒྱུ་ཡིན་པའི་འཆར་གཞི་ཡོད་པ་དང་། རྒན་ལགས་རྣམས་ཀྱིས་ད་བར་དུ་བོད་ཁྱིམ་སློབ་གྲྭར་ཕྱག་ལས་གནང་བར་ཐུགས་རྗེ་ཆེ་ཞུ་རྒྱུ་ཡིན་ཞེས་སོགས་གསུངས་སོང་།
མེེས་དབོན་གཙུག་ལག་དཔེ་སྟོན་སློབ་གྲྭ་ཆེ་བའི་ཚོགས་ཁང་དུ་སྲིད་སྐྱོང་མཆོག་གིས། ངས་སྲིད་སྐྱོང་གི་འགན་འཁུར་ནས་ད་བར་ཤེས་རབ་དགའ་ཚལ་སློབ་གླིང་ལ་ཐེངས་གཉིས་བསླེབས་ཡོད། འོན་ཀྱང་སློབ་གྲྭ་ཁྱོན་ཡོངས་ལ་ལྟ་རྟོག་བྱེད་ཐུབ་ཡོད་པ་མ་རེད། དེ་སྔ་ཡོང་བའི་སྐབས་སློབ་གྲྭ་དང་ལས་ཤག་སོགས་ཀྱི་གནས་སྟངས་སྐྱོ་བོ་མཐོང་སོང་། ད་ལན་ཉལ་ཁང་ལ་རྩི་བཏང་འདུག དེ་རིང་བློ་ཏོག་ཙམ་བདེ་པོ་བྱུང་ཞེས་སློབ་གྲྭ་དང་ལས་ཤག་སོགས་ལ་བདག་པོ་ལེགས་པོ་བརྒྱག་དགོས་སྐོར་སོགས་གསུངས་སོང།
དེ་ནས་དཔེ་སྟོན་སློབ་གྲྭའི་སློབ་མ་ཁག་ཅིག་གིས་སྲིད་སྐྱོང་མཆོག་ལ་ཕྱག་ལས་གནང་བའི་སྐབས་དཀའ་ངལ་ཆེ་ཤོས་ག་རེ་འཕྲད་ཡོད་སྐོར་བཀའ་འདྲི་ཞུས་པར། སྲིད་སྐྱོང་མཆོག་གིས། ང་ཚོ་ལ་ལས་འགན་གཙོ་བོ་གཉིས་རེད། རྒྱ་ནག་གིས་བོད་ལ་བཙན་འཛུལ་བྱས་ཏེ་བོད་ས་ཤོར་ཡོད་པར་བརྟེན། ང་ཚོས་དུས་ཚོད་མང་བ་དེ་བོད་ལ་གང་འདྲ་ལོག་དགོས་ཀྱི་ཡོད་པའི་སྐོར་ལ་བསམ་བློ་གཏང་དགོས་ཀྱི་ཡོད་རེད། འོན་ཀྱང་ད་ལྟའི་ཆར་ང་ཚོས་དུས་ཚོད་མང་ཆེ་བ་བཙན་བྱོལ་བོད་མིའི་དཀའ་ངལ་སེལ་ཐབས་ལ་གཏོང་གི་ཡོད་རེད། དེར་བརྟེན་དོན་དངོས་སུ་ཆབ་སྲིད་སྒང་ལ་དུས་ཚོད་མང་བ་གཏང་དགོས་ཀྱང་། མི་མང་གི་བདེ་སྡུག་ལ་གཟིགས་ཞིབ་བྱ་རྒྱུར་དུས་ཚོད་མང་བ་གཏོང་གི་ཡོད་པའི་དཀའ་ངལ་འཕྲད་པ་དང་། འཛིན་སྐྱོང་དང་སྒྲིག་འཛུགས་ནང་འགྱུར་བ་གཏོང་གི་ཡིན་ལབ་ཚེ། རྒྱུ་མཚན་ཡོད་མེད་ལ་མི་ལྟ་བར་ལམ་སེང་དོགས་པ་དང་རྣམ་རྟོག་བྱས་ཡོང་གི་ཡོད་པའི་དཀའ་ངལ་ཕྲན་བུ་འཕྲད་ཀྱི་ཡོད་པ་རེད། ཅེས་གསུངས་སོང་།
སློབ་མ་ཁག་ཅིག་གིས་མགོ་ཁྲིད་ཀྱི་ཁྱད་ཆོས་ག་རེ་དགོས་སྐོར་དྲིས་པར་ཁོང་གིས། མགོ་ཁྲིད་ཟེར་མཁན་དེ་དྲང་པོ་དགོས་རེད་བསམ་གྱི་འདུག དྲང་པོ་མེད་ན་རྙོག་དྲ་མང་པོ་ཆགས་ཀྱི་རེད། ལྷག་པར་དུ་སྤྱི་པའི་ལས་ཀ་བྱེད་པའི་སྐབས་དྲང་པོ་དང་ལས་ཀ་གཙང་མ་བྱ་རྒྱུ་གལ་ཆེན་པོ་རེད། སློབ་དཔོན་ཟམ་གདོང་རིན་པོ་ཆེ་མཆོག་གིས། སྤྱི་པའི་ལས་ཀ་བྱེད་པའི་སྐབས་ལས་ཀ་འཇོན་དང་མ་འཇོན་ཡོང་གི་རེད། མི་འཇོན་པོ་ཞེ་དྲགས་ཡོད་ཀྱང་གནས་སྟངས་དང་ཆ་རྐྱེན་མ་ཚང་བ་ཡིན་ན། དོན་དག་འགྲུབ་རྒྱུ་ཡོད་མ་རེད། ལས་ཀ་འཇོན་དང་མི་འཇོན་དང་། ལས་དོན་འགྲུབ་དང་མི་འགྲུབ་ཟེར་བ་སྣ་ཚོགས་ཡོང་གི་རེད། གལ་ཆེ་བ་དེ་སྤྱི་པའི་འགན་འཁྱེར་ནས་དངུལ་དང་རྩིས་སོགས་གཙང་མ་དགོས་ཀྱི་ཡོད་སྐོར་དང་། མགོ་ཁྲིད་ལ་རིམ་པ་མང་པོ་ཡོད་པར་བརྟེན་སོ་སོའི་མགོ་ཁྲིད་ཀྱི་རིམ་པ་ལ་དཔག་པའི་ལས་འགན་འགྲུབ་དགོས་གལ་ཆེ་སྐོར་དང་། སྤྱི་པའི་ལས་ཀ་བྱེད་སྐབས་ལྷག་བསམ་རྣམ་དག་དགོས་པ་དང་། རྒྱ་ཆེ་ས་ནས་བསམ་བློ་བཏང་སྟེ་སྤྱི་པ་ལ་ཕན་པའི་བསམ་བློ་ཡོད་ཚེ་མགོ་ཁྲིད་ཚད་ལྡན་ཞིག་ཡིན་སྐོར་སོགས་བཀའ་སློབ་ལམ་སྟོན་གནང་སོང་ལ། དེ་རིང་ཉིན་རྒྱབ་ཏུ་སྲིད་སྐྱོང་སྤེན་པ་ཚེ་རིང་མཆོག་གིས་སྒྲོལ་མ་གླིང་དང་། འཆི་མེད་དགའ་ཚལ་གླིང་། ཇོ་ནང་དགོན་པ། སྙིང་སྟོབས་གླིང་། ནོར་གླིང་རིག་གཞུང་གཅེས་སྐྱོང་ཁང་བཅས་གཟིགས་ཞིབ་གནང་སྟེ་སེར་སྐྱ་མང་ཚོགས་ལ་བཀའ་སློབ་གནང་འདུག
ཁ་སང་ཕྱི་ཚེས་ ༤ ཉིན་སྲིད་སྐྱོང་མཆོག་གིས་དྷ་སྟེང་བོད་ཁྱིམ་སློབ་གྲྭ་དང་། བོད་ཀྱི་ཟློས་གར་ཚོགས་པ། བྱམས་པ་གླིང་རྒས་གསོ་ཁང་། བཙུན་དགོན་དགེ་ལྡན་ཆོས་གླིང་བཅས་སུ་འཚམས་གཟིགས་གནང་ཡོད་པ་དང་། དྷ་སྟེང་བོད་ཁྱིམ་སློབ་གྲྭའི་ཚོགས་ཁང་དུ་སྲིད་སྐྱོང་མཆོག་གིས། ང་ཚོས་ཁྱེད་ཚོའི་འགྲམ་ནས་སློབ་སྦྱོང་ལེན་རྒྱུ་ཡོད་ལ། ང་ཚོས་ཕྲན་བུ་ཤེས་པ་དེ་ཁྱེད་ཚོར་སློབ་དགོས་ཀྱི་ཡོད་རེད། མ་འོངས་པར་བོད་དོན་འཐབ་རྩོད་ཀྱི་འགན་དེ་ཁྱེད་ཚོས་འཁུར་དགོས་པ་རེད། དེར་བརྟེན། ད་ལྟ་སློབ་གྲྭར་ཡོད་པའི་སྐབས། དོ་སྣང་ཕྲན་བུ་བྱས་ཏེ་བོད་ཀྱི་སྤྱི་ཡོངས་གནས་ཚུལ་ལ་རྒྱུས་ལོན་ཡག་པོ་བྱེད་ཚེ། རང་བཞིན་གྱིས་སེམས་ལ་སྤོབས་པ་ཡོང་གི་རེད། ཅེས་དང་། ས་ཁམས་ཆབ་སྲིད་ཐོག་བོད་ཀྱི་གལ་གནད་དང་། བོད་ཀྱི་ཆོས་དང་རིག་གཞུང་གི་གལ་གནད། བོད་ཀྱི་ཁོར་ཡུག་གི་གལ་གནད་སྐོར། དེ་བཞིན་རྒྱ་ནག་གཞུང་གིས་ལོ་རྒྱུས་ལ་འཁྱོག་བཤད་ཇི་ཙམ་བྱས་ཀྱང་། དོན་དངོས་སུ་ལོ་རྒྱུས་ཐོག་ནས་བོད་དེ་རང་བཙན་ཡོད་པའི་རྒྱལ་ཁབ་ཅིག་ཡིན་པ་གསལ་པོ་ཡིན་སྐོར་ངོ་སྤྲོད་དང་། བོད་ཀྱི་ལོ་རྒྱུས་ཀྱི་འཕེལ་རིམ་དང་། བོད་དང་རྒྱ་ནག་བར་གྱི་འབྲེལ་བ། བོད་དང་སོག་པོ་བར་གྱི་འབྲེལ་བ། བོད་དང་རྒྱ་གར་བར་གྱི་འབྲེལ་བ་སོགས་གསུངས་སོང་།
ཡང་སྲིད་སྐྱོང་གིས། ད་ལྟའི་བོད་ནང་གི་ཛ་དྲག་གི་གནས་སྟངས་དང་། བོད་ནང་གི་ཆོས་དང་རིག་གཞུང་། སྐད་ཡིག་སོགས་ལ་དམ་དྲག་ཤུགས་ཆེན་བྱེད་ཀྱི་ཡོད་པའི་སྐོར་དང་། བོད་ནང་གི་ཤེས་ཡོན་ཅན་དང་། ཁོར་ཡུག་སྲུང་སྐྱོབ་པ། ནང་ཆོས་ཀྱི་སློབ་དཔོན་སོགས་བཙན་གནོན་བྱེད་བཞིན་ཡོད་སྐོར་སོགས་རྒྱ་ནག་གཞུང་གིས་བོད་ཀྱི་ངོ་བོ་མེད་པ་བཟོ་རྒྱུའི་སྲིད་ཇུས་ལག་བསྟར་བྱེད་བཞིན་པའི་སྐོར་སོགས་འགྲེལ་བརྗོད་གནང་བ་དང་། བཀའ་ཤག་སྐབས་བཅུ་དྲུག་པའི་ངོས་ནས་དམ་བཅས་པ་བཞིན་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་ཡོངས་རྫོགས་སུ་གཟིགས་སྐོར་དུ་ཕེབས་ཏེ་མི་མང་གི་དཀའ་ངལ་དང་དགོས་འདུན་གང་ཡིན་རྒྱུས་ལོན་བྱས་ཏེ། ད་ལྟ་ལས་གཞི་ལག་བསྟར་གནང་མགོ་བཙུགས་ཟིན་སྐོར་དང་། བོད་ཕྲུག་རྣམས་ནས་བོད་ཀྱི་གནས་ཚུལ་ཤེས་པའི་ཐོག་བོད་མིའི་མགྲིན་ཚབ་པ་གནང་དགོས་སྐོར་ལམ་སྟོན་གནང་སོང་།
སང་ཉིན་ཕྱི་ཚེས་ ༦ ཉིན་སྲིད་སྐྱོང་སྤེན་པ་ཚེ་རིང་མཆོག་གྷོ་པལ་པུར་བོད་ཁྱིམ་སློབ་གྲྭ་དང་རྒྱུད་སྟོད་དགོན་པ། སཱ་ར་མཐོ་སློབ། ཅན་མུན་ཌ་ས་གནས་བོད་རིགས་ཚོང་པ་བཅས་ལ་མཇལ་འཕྲད་དང་གཟིགས་ཞིབ་གནང་རྒྱུ་ཡིན་འདུག ཕྱི་ཚེས་ ༧ ཉིན་དབུས་སྨན་རྩིས་ཁང་དང་ཞ་ལུ་དགོན་པ། ཤུག་གསེབ་དགོན་པ། འཇམ་དབྱངས་ཆོས་གླིང་། ཀརྨ་སྒྲུབ་བརྒྱུད་དར་རྒྱས་གླིང་དུ་འཚམས་གཟིགས་གནང་རྒྱུ་ཡིན་པ་མ་ཟད། དྷ་ས་ས་གནས་མང་ཚོགས་ལ་མཇལ་འཕྲད་ཀྱིས་ལམ་སྟོན་བཀའ་སློབ་གནང་རྒྱུ་ཡིན་འདུག་ལ། ད་ལན་གྱི་གཟིགས་སྐོར་འགྲུབ་ན་རྒྱ་གར་རྒྱལ་ཡོངས་ནང་གི་བོད་མིའི་གཞིས་ཆགས་ཁག་ཚང་མའི་ནང་གཟིགས་ཞིབ་དང་པོ་དེ་ཡོངས་སུ་གྲུབ་པ་ཡིིན་འདུག
གསར་འགོད་པ། བསྟན་འཛིན་ཕུར་བུ།
