ཨོ་གླིང་གནས་མཁར་གསར་བོད་ཡིག་སློབ་གྲྭའི་སློབ་མ་བུ་མོ་བསྟན་འཛིན་ཡེ་ཤེས་ལགས་དང་བུ་ཆོལ་གསུམ་རྣམ་རྒྱལ་ལགས་གཉིས་ལ་ནེའུ་སོ་ཐི་ཝལ་མངའ་སྡེའི་བློན་ཆེན་བྱ་དགའ་ཐོབ་ཡོད་འདུག
ཨོ་གླིང་ནེའུ་སོ་ཐི་ཝལ་མངའ་སྡེའི་བློན་ཆེན་བྱ་དགའ་སློབ་པའི་གནས་མཁར་གསར་བོད་ཡིག་སློབ་གྲྭའི་སློབ་མ་གཉིས། ༢༠༢༣།༠༩།༠༤ པར་འབྲེལ་ཡོད་ནས་མཁོ་སྤྲོད་གནང་།
ཟླ་འདིའི་ཕྱི་ཚེས་ ༤ ཉིན་གྱི་སྔ་དྲོར་ཨོ་སི་ཁྲི་ལེ་ཡ་ནེའུ་སོ་ཐི་ཝལ་མངའ་སྡེའི་གྲོང་ཁྱེར་སིཊ་ནེ་རུ་མངའ་སྡེའི་བློན་ཆེན་གྱི་བྱ་དགའི་མཛད་སྒོ་བསྡུས་ཤིང་། བྱ་དགའ་དེ་ནི་ཨོ་སི་ཁྲི་ལེ་ཡའི་ཤེས་རིག་ལྷན་ཁང་གི་ཁྱབ་ཁོངས་རིག་གཞུང་སྣ་མང་གི་སློབ་མ་རྣམས་ལ་བློན་ཆེན་བྱ་དགའ་སྤྲོད་སྲོལ་ཡོད་པ་ལྟར། ༢༠༢༣ ལོར་འདི་ག་གནས་མཁར་གསར་བོད་ཡིག་སློབ་གྲྭའི་སློབ་མ་ཕ་ཚུལ་ཁྲིམས་ཉི་མ་དང་མ་བསྟན་འཛིན་གཉིས་ཀྱི་བུ་མོ་བསྟན་འཛིན་ཡེ་ཤེས་དང་། ཕ་ཚེ་རིང་སྟོབས་ལྡན་དང་མ་བསོད་ནམས་དབང་མོ་གཉིས་ཀྱི་བུ་ཆོལ་གསུམ་རྣམ་རྒྱལ་གཉིས་ལ་མཛད་སྒོའི་སྐུ་མགྲོན་གཙོ་བོ་དབུས་ཤེས་རིག་བློན་ཆེན་གཞོན་པ་སྐུ་ལྕམ་(Keynote Adress)མཆོག་ནས་བྱ་དགའི་ཕྱག་འཁྱེར་གནང་། མངའ་སྡེའི་བྱ་དགའ་དེ་ནི་བོད་ཡིག་སློབ་གྲྭའི་ལོ་འཁོར་ཡིག་ཚད་ཀྱི་གྲུབ་འབྲས་རྩེ་གཏོགས་རྣམས་ལ་གནང་གི་ཡོད་འདུག
དེ་བཞིན་མཛད་སྒོའི་ཐོག་ས་གནས་གྲོང་ཁྱེར་གྱི་ཤེས་རིག་འགན་འཛིན་སྐུ་ལྕམ་མ་ཁཱ་ར་༼Kara Mathewson༽ ལགས་བརྒྱུད་ནས་བོད་ཡིག་སློབ་གྲྭའི་སློབ་མ་རྣམས་བོད་གཞས་འཁྲབ་སྟོན་ཆེད་གཞུང་འབྲེལ་མགྲོན་འབོད་གནང་བ་ལྟར། བོད་ཡིག་སློབ་གྲྭའི་ངོས་ནས་ཀྱང་གལ་ཆེན་དུ་མཐོང་ནས་གྲ་སྒྲིག་གང་ལེགས་བྱས་ཏེ་གོ་སྐབས་དམ་འཛིན་བྱས་ཏེ་འཁྲབ་སྟོན་གཟིགས་འབུལ་ཞུས་ཡོད་པ་རེད།
ཨོ་གླིང་ནེའུ་སོ་ཐི་ཝལ་མངའ་སྡེའི་བློན་ཆེན་གྱི་བྱ་དགའ་གནང་བའི་མཛད་སྒོར་གནས་མཁར་གསར་བོད་ཡིག་སློབ་གྲྭའི་སློབ་མ་ཚོས་གཞས་སྣ་འཁྲབ་སྟོན་ཞུས་པ། ༢༠༢༣།༠༩།༠༤ པར་འབྲེལ་ཡོད་ནས་མཁོ་སྤྲོད་གནང་།
སྤྱིར་མཛད་སྒོ་འདི་ལ་གཞུང་འབྲེལ་གྱི་མི་སྣ་གལ་ཆེན་དང་ལྷག་དོན་མི་རིགས་སྣ་མང་འདུ་བ་མ་ཟད། དོ་སྣང་ཤུགས་ཆེན་བྱེད་ས་ཞིག་ཏུ་གྱུར་ཡོད། ལོ་སྔོན་མར་ཡུག་ཁི་རེན་ལ་དཀའ་སྡུག་མྱོང་གི་ཡོད་པའི་སྐབས་དང་བསྟུན་ནས་ཡུག་ཁི་རེན་གྱི་སྐྱབས་བཅོལ་སློབ་ཕྲུག་རྣམས་ལ་གཞས་སྣ་འཁྲབ་སྟོན་འདི་གོ་སྒྲིག་གནང་ཡོད། ད་ལོར་གནས་མཁར་གསར་བོད་ཡིག་སློབ་གྲྭའི་སློབ་ཕྲུག་རྣམས་ལ་གོ་སྐབས་འདི་ཕུལ་བ་ཡིན་འདུག་པས། རྒྱལ་ཁབ་དང་མི་རིགས་སོ་སོའི་ཡུལ་སྲོལ་གཞས་སྣ་སོགས་ཁྱབ་བསྒྲགས་ཀྱི་གདེང་ཆ་གལ་ཆེན་ཞིག་ཏུ་གྱུར་ཡོད། ས་གནས་བོད་རིགས་སློབ་མ་རྣམས་ཀྱིས་བོད་རང་གི་སྲོལ་རྒྱུན་གྱི་སྒྲ་སྙན་དང་གཞས། ཞབས་བྲོ་སོགས་འཁྲབ་ནས་ལན་གྲངས་དུ་མར་འདི་འདྲའི་གལ་ཆེའི་སྡིངས་ཆ་བཟུང་མྱོང་ཡོད་པས། ད་ལན་ཡང་ཆེད་དུ་གཞུང་འབྲེལ་མགྲོན་འབོད་གནང་བ་ལྟར་བོད་རིགས་སློབ་ཕྲུག་ཚོས་སོ་སོའི་རྒྱལ་ཁབ་དང་མི་རིགས་ཀྱི་ངོ་བོ་མཚོན་པར་བྱས་ཡོད་པ་རེད།
ཨོ་གླིང་གནས་མཁར་གསར་བོད་ཡིག་སློབ་གྲྭའི་དགེ་རྒན་ལྷ་ཆབ་སྦྱིན་པ་ལགས་ནས་གནས་ཚུལ་མཁོ་སྤྲོད་གནང་།
